Flying Gulls Never Land [ဘာသာပြန်]

5.1

လုဖုန်း ဝရန်တာကို တစ်ချက်ချောင်းကြည့်မိသည် ။ ရှန့်မင်အော်ကား ဖုန်းပြောနေဆဲပင် ။ ထို့ကြောင့် အပျင်းပြေလိုပြေငြား စားပွဲပေါ်တွင်တင်ထားသော စာအုပ်အချို့ကို လှန်လှောကြည့်ဖို့ ဆုံးဖြတ်လိုက်သည် ။

စာအုပ်များကို ဖွင့်ကြည့်ဖို့ရန် လက်လှမ်းရုံရှိသေးသည် ။ စားပွဲပေါ်ရှိ အဖုံးထူစာအုပ်တစ်အုပ်ကို မတော်တဆနှင့် ဝင်တိုက်မိတော့သည် ။ ထိုစာအုပ်မှာဖိုင်များသဖွယ် စာရွက်များကိုကဏ္ဍအလိုက် သေချာစီကာ အပေါ်မှစာအုပ်အဖုံးအမာနှင့် ပြန်ချုပ်ထားသော စာအုပ်မျိုးဖြစ်သည် ။ အခုတော့ လုဖုန်းလက်ချက်ကြောင့် အထဲမှ စာရွက်များမှ ကြမ်းပြင်ပေါ် တစစီပြန့်ကျဲလျက် ။

လုဖုန်း ထိုစာရွက်များကိုအလျင်အမြန်လိုက်ကောက်ရတော့သည် ။ သူလုပ်ခဲ့သည်ကို ရှန့်မင်အော်သိသွားကာ ဒေါသထပ်ထွက်လေမလားဟုတွေးမိသောအခါ ခဏတာပင် တုံ့ဆိုင်းသွားရ၏ ။

ရှန့်မင်အော်လိုလူမျိုးသည် ဒေါသထွက်လျှင် သူ့ကို အပြစ်တင်ဆုံးမမည့်သူမျိုးမဟုတ် ။ ထိုအစား နောက်တစ်ခါ အခန်းထဲသို့ ဝင်ခွင့်ပေးလိမ့်တော့မည်မဟုတ် ။

စာရွက်များအပြင် ပြန့်ကျဲသွားသောဓာတ်ပုံအချို့ကိုပါ လိုက်ကောက်ရင်း စာအုပ်ထဲသို့ပြန်ညှပ်ရန် လုဖုန်းပြင်ကာရှိသေး ။
မတော်တဆ ထိုဓာတ်ပုံများအပေါ် စွဲကျန်မိသောအကြည့်များသည် မေ့နိုင်ဖွယ်ရာမရှိ။ တကယ်ဆို ထိုအချိန်တုန်းက ဓာတ်ပုံများကိုမကြည့်ဘဲ စာအုပ်ထဲသာညှပ်လိုက်သင့်သည် ။ အခုချိန်ထိ ကြည့်မိသည်ကို နောင်တရမိသည်ဆိုလည်း မမှား ။

* Warning *
လုဖုန်း အမြင်အာရုံမြင်ကွင်းတစ်ခုလုံး သွေးတို့ဖြင့်ဖုံးလွှမ်းသွားသကဲ့သို့ ။ သွေးစွန်းကာ ရစရာမရှိလောက်အောင် ဒဏ်ရာကွက်တို့ထနေသော လူ့အရေပြား ။ ဖြူဖျော့သော ခြေလက်အင်္ဂါတို့နှင့် အပြင်းအထန် ဒဏ်ရာရနေသောခြေလက်အင်္ဂါအစိတ်အပိုင်းတို့သည် ယှဥ်ကြည့်လိုက်ပါက လုံးဝအထင်းသား ကွဲထွက်နေလျက် ။

အလောင်းကောင်တို့၏ မျက်နှာထက်တွင် မဲ့ရွဲ့နေသော အမူအရာများ ။ မချိမဆံ့သောဝေဒနာကြောင့် ပုံပန်းပျက်လျက် ။ နို့နှစ်ရောင်ဖြူဝင်းသော အဆီလွှာတို့သည် သွေးစွန်းပုံပျက်နေသော ကိုယ်တွင်းအင်္ဂါတို့နှင့်အတူ အပြင်ဘက်သို့ယိုစိမ့်ထွက်လျက် ။