بيوم منهن كعدت الصبح غسلت وبدلت حضرت نفسي للدوام برابع اعدادي سويت ريوك لبابا وماما سلمت عليهم كالت ماما اليوم نروح نستلم الراتب يمه مياده خاف نتأخر من ترجعين حضري غدا هالموجود ... كلتله حاضر ماما سلمت عليهم وطلعت
خلص الدوام ورجعت للبيت بعدهم مراجعين غيرت ملابسي
طبيت للمطبخ سويت شوربه عدس وتمن فتحت الثلاجه بيها حبتين خيار وباقي طماطه ثرمتهم سويت كاس زلاطه زغيره كعدت انتظر جيتهم
ملل قاتل وحدي كاعده كمت جبت كتبي وكعدت اكمل باقي دروسي
نزلو اطفال وهاب من فوك كعدو يمي شويه لعبت وياهم
سمعت صوت استبرق عاطت بيهم خطيه من خوفهم صعدو يركضون ويتعثرون اباوع عليهم قهروني .. هو هذا طبعها تستنكف من عدنا
اباوع لساعه صارت بثنتين واهلي ماكو ما عدي تلفون اتصل بيهم
رحت على جارتنا ام احمد
خاله ممكن موبايلج بس اتصل بماما هواي تأخرو وضل بالي عليهم راحو يستلمون الراتب والى هسه ما اجو !؟
هي هم خافت مثلي انتطتني الموبايل واتصلت مغلق مره ومرتين يطلعلي مغلق انتطتها التلفون
- هاا يمه بشري حصلتيهم
- خاله مغلق
كالت ... خاف خلص شحن اكعدي يمنا هسه يجون لتخافين
ما كدرت اكعد ترخصت منها ورجعت لبيتنا
ساعة تلاثه بالظبط ودخل وهاب لونه مخطوف عاط بيه البسي وامشي ويايه
كمت مفزوعه وخايفه ... وين انروح وهاب شبيك فهمني ليش هيج حالتك
عاط بيه ...امشي بسرعه ولضلين تسألين يله
بسرعه طبيت للغرفه مثل المخبله لبست وطلعت ويا وما ادري وين ما خذني .. هو بس وكت المصايب يتذكرني
وصلنا للمستشفى ... كلبي وجعني حيل وخفت كمت ابجي
عفيه انت ليش ساكت دكولي شكو ماما وبابا بيهم شي فدوه احجي
جرني من ايدي ونزلني يسحل بيه ويكولي ما كو وكت امشي بسرعه لا ابتلي بيج انت لخ
طبينا للطورائ وياريتني ما طبيت ولا شفتهم بهذا المنظر
وكعت من طولي واغمى عليه
الناس التمت ويصحون بيه فزيت على ايد تمسح بوجهي باوعت مريه ما اعرفه تكعد بيه دكولي كومي يمه الله يصبرج ويقويج
كلنا على هذا الطريق تعددت الاسباب والموت واحد هذا يومهم بعد
كمت اريد استوعب فقدان اهلي .. هسه اني يتيمه لاام ولا اب ؟!
بارت 6
Start from the beginning
