Amiss Prayer (Zawgyi&Unicode) [Completed]

Part-55 (ပျော်ရွှင်ခြင်း)

For Unicode
ပျော်ရွှင်ခြင်း

ချစ်သူနှစ်ဦး ဝင်ရောက်ယှဉ်ပြိုင်လေသည့် ကစားပွဲတစ်ခု..။ နေသူရိန်က အနိုင်ရမည်လော..။ လမင်းကိုကိုက အနိုင်ရမည်လော..။ သေချာစွာမသိရသည့် အဖြေတစ်ခုအား လောင်းကြေးထပ်၍ကစားထားသည်။ ဖြစ်လာမည့်ကိစ္စအရပ်ရပ်တို့အား နှစ်ဦးသားလုံး မျှော်လင့်နေသည်။ ရင်ခုန်ခြင်းနှင့်မဟုတ်...။ ပူလောင်မှုကိုယ်စီနှင့်။

လမင်းကိုကိုဘက်မှကြည့်လျှင် တေဇဖွင့်ပြောလာ၍ငြင်းမည်ဆိုပါက သူငယ်ချင်းဆက်ဆံရေးပျက်ဆီးနိုင်သည်။ နေသူရိန်ဘက်မှ ကြည့်ပါက သူ့ထက်ပင်ရုပ်ရည်၊ ပညာအရည်အချင်း အစစအရာရာသာလွန်နေသည့် တေဇ၏လက်ထဲသို့ လမင်းကိုကိုရောက်ရှိသွားမည်အား စိုးရိမ်နေရသည်။

မပြိုင်အပ်သောကစားဝိုင်းအား နှုတ်ဖျားမှစကားလေးတစ်ခွန်းဖြင့်သာ စတင်ခဲ့သည်။ နှုတ်ဖျားမှစတင်ခဲ့သော ကစားဝိုင်းသည် နှုတ်ဖျားတွင်သာအဆုံးသတ်မည်ဟု မည်သူမျှအာမမခံနိုင်..။

ယနေ့တွင် လမင်းကိုကိုအား နေသူရိန်သည် ကျောင်းလာကြိုသည်။ ကျောင်းမပြန်ခင်တွင် တေဇသည် လမင်းကိုကိုအား စကားပြောရန်ရှိကြောင်းဆို၍ စောင့်စေခဲ့သည်။ ‌သဘောရိုးဖြင့်စောင့်နေသူက ‌လမင်းကိုကို..။ အရောင်ဆိုးမေတ္တာတို့ကို ဝန်ခံလိုသူက တေဇဖြစ်သည်။

“ တေဇ.. မင်းငါ့ကိုပြောစရာရှိတယ်ဆို.. ဘာပြောမလို့လဲ “

“ ငါပြောမယ့်စကားက ယောက်ျားလေးဖြစ်တဲ့မင်းအတွက် နည်းနည်းတော့ ထူးဆန်းနေလိမ့်မယ် “

တေဇ၏စကားအား ရုတ်တရက်နားမလည်း..။ သေချာစဉ်းစားပြီးသောအခါ သူပြောပြမည့်စကား၏အစွန်းအစအား အနည်းငယ်ရိပ်မိနေသည်။

တကယ်ပဲ Sunပြောသလိုဖြစ်လာတော့မှာလား...

“ ငါလည်း ယောက်ျားလေးတစ်ယောက်ပါပဲ.. ဒါပေမဲ့.. ယောက်ျားလေးဖြစ်တဲ့မင်းကို သဘောကျနေတယ်.. ငါ့စိတ်တွေထူးဆန်းနေတယ်မဟုတ်လား “

“ ဒီလိုစကားတွေက နောက်ကောင်းတဲ့စကားတွေမဟုတ်မှန်း မင်း ကောင်းကောင်းကြီးနားလည်မှာပါ “