#امى_حياتى
#امى_حياتى_15
#جزء_من_حلقة_سابقة
أحمد(بخوف): انا خايف ليكون حصله حاجه
شيرين : يا جماعه متقلقوش خير بإذن الله بس أنزل يامينا انت وأحمد دوروا عليه مينفعش تقعدوا ساكتين كده
رنا(بعياط): انا بحاول ارن عليه من ساعتها مبيردش وفي الآخر كنسل
مينا :يلا ياحمد ننزل ندور عليه (لقوا الباب بيفتح ورجاء(جريت علية واول ماشفت محمد وقفت قدامو بدموع وضربتو بالقلم
#بداية_الحلقة_الجديدة
واخدته في حضنها وعيطت كتير بعد دقايق زقيته بعيد عنها ومسحت دموعها وبزعيق): انت كنت فين ومبتردش على تليفونك ليه
مينا(بزعيق): انا اللي غلطان اصلا اني وافقت انك تنزل عشان تقلقنا عليك وكمان متردش على تليفونك لا وكمان في الآخر تكنسل على اختك وهي بتحاول ترن عليك عشان توصلك
شيرين(بهدوء): براحه يامينا واهدي ياماما تعالي ادخل اقعد وارتاح يامحمد وقول كنت فين
رجاء(بزعيق): هو لسه هيقعد ويرتاح وبعدين يحكي هو كان فين لا يقول الأول
محمد(بزعل): طب ادونى فرصه أتكلم قاعدين تسألوني ومش سايبنلي فرصه أنطق
مينا(بزعيق): بجح كمان تبقى غلطان وتبجح ماتنطق كنت فين
أحمد :(بزعيق)هيتكلم ازاى وانت بتتكلم سيبه بقا يامينا يتكلم قول يامحمد يلا
محمد(حط الأكياس اللي في ايده على الأرض): كنت بجيب الحاجات دي(وكمل بدموع) دا لبس ولعب لبنت مينا اللي جايه عشان لما تيجي بخير تبقوا تقولولها ان عمها جبلها ألعاب ولبس وكان نفسه يشوفها والهدايا دي ليكوا كلكوا عشان تفضلوا فاكريني ومتنسونيش ابدا ومكنتش برد على التليفون عشان مكنتش عارف ارد والحاجات في ايدي ولما خلصت حسيت اني مخنوق وعايز اتمشى لوحدي ولما كنسلت على رنا عشان كنت قربت من البيت فكنسلت عشان تفهموا اني وصلت بس شكلي زعلتكوا أو قلقتكوا زياده أنا آسف ليكوا كلكوا(وسابهم ودخل اوضته وسط استغراب وزعل الكل)
احمد: كنتو ادولو فرصة يتكلم ومكنتيش تضربية ياماما (رجاء سابتهم ودخلت لمحمد والكل دخل وراها)
رجاء:(بدموع) محمد
محمد:(قام قعد مسح دموعو) نعم ياماما (دخلت رجاء وقعدت قدامو على السرير وشافت اثر القلم لسة معلم على خدو)
رجاء: انا اسف
محمد:(بسرعة) متكملهاش ياماما مش صح انك تعتذرى لابنك انتى لو قلعتى الى فى رجلك وضربتينى بية (ومسك ايدها الى ضربتو بيها وباسها) الايد دى من خوفها عليا ضربتنى وانا غلطان انا الى بعتذر ليكو
مينا: طب مكنتش بترد علينا لية
محمد:(بصلو بدموع) والله يامينا حاولت اوطى احط الاكياس فى الارض بس معرفتش من ظهرى خفت اتك على نفسى واحطهم فى الارض معرفش اعدلو وحسيت انى هتحرج فى وسط الناس علشان كدة مردتش عليكو
احمد: طب لم كنسلت على رنا كنت رد علينا وطمنا عليك
محمد:(بزعل اكتر) انا كنت على السلم بس كنت طالع براحة علشان مكنتش قادر اطلع ومحبتش اضيع رصدها
رجاء: خلاص ياحبيبى بس احنا من قلقنا عليك وبعدين اية الحاجات الى انت جايبها دى
محمد: دى ذكرى منى ليكو علشان تفتكرونى
احمد:(بزعيق وعصبية)محمد كفاية بقا حرام عليك انت بتموتنى بكلامك دة
رنا: (بعصبية)مش انت لوحدك ياحمد بيموتنا كلنا بقيت اخاف اغمض عينى حرام عليك بقا (وجريت وسابتهم وهيا بتعيط راحت وراها شرين)
مينا: خليك ديما كدة كاسرنفسنا عالطول بكلامك (وسابهم وخرج)
رجاء:الله يهديك يابنى معندتش تقول كدة (وخرجت من الاوضة احمد بصلو ونام على السرير) محمد نام على السرير وسرح
محمد:(فى بالو) مانتو لازم تبقو عارفين انو هيجى يوم عليا وهمشى من الدنيا دى لازم تبقو عارفين بس هتوحشونى قوى يارب صبرهم اليوم دة
فى الصباح رجاء دخلت اوضة محمد واحمد
رجاء: محمد,, احمد يلا ياولاد قومو (قربت من محمد وحطت ايدها على وشو محمد فتح عينو)
محمد: ماما انا كويس ياماما متقلقيش
رجاء:كل اخواتك زعلو منك امبارح من كلامك بلاش تقولو تانى ياحبيبى علشان خاطرى وعلشان خاطرهم
محمد: حاضر ياماما انا اسف ليكو كلكو
رجاء: طب يلا ياحبيبى قوم اقعد معانا على الفطار
محمد:(بابتسامة)حاضر
رجاء:يلا ياحمد قوم (دخل محمد الحمام وخرج واحمد لسة ماقمش)
محمد: احمد لسة مصحاش
رجاء: غلبت اصحى فية
محمد:(بتفكير: امممممم انا هصحيهولك دخل محمد الحمد وحط فى ايبدو مية وطلع رشها على احمد وجرى
احمد:(قام بخضة) ها اية فى اية
رجاء: والله جدع ياواد يامحمد يلا يادكتور قوم
احمد: ماشى يامحمد الجات اكتر من الريحات وهعملها فيك ومش مهم تكون نايم هتلاقى مية فى وشك كدة
محمد:(بضحكة) اعلى مافى خيلك اركبو ( طلع قعد على الكنبة وساب احمد فى الاوضه)طلعو(فطرو ومحمد واخد حذرو من احمد)
رجاء: احمد متهزرش مع اخوك بالمية انت سامعنى
احمد:لا مش سامع وزى ماعمل فيا هعمل فية (وسابهم ونزل وكل الى فى الى وراه شغل نزل مر اليوم سريعا واحمد رجع من برة هلكان ونام )
(عند محمد اللي كان قاعد في الاوضه وأحمد نايم في سريره )
محمد(بص حواليه ملقاش حاجه يعملها):ايه الملل ده اما أقوم اصحى أحمد يقعد معايا ندردش شويه ولا نعمل أي حاجة(وقرب من احمد) أحمد .. احممممد أحمد(بصوت نايم): سبيني بقا يا ماما انا لسه نايم
محمد : ماما مين يااحمد انا محمد قوم يلا
أحمد :طب سبني والنبي يامحمد عايز انام بقا
محمد : بس انا زهقت من القعدة لوحدي قوم اقعد معايا
أحمد : روح يا محمد اقعد مع ماما أو مينا أو البت رنا
محمد : ماما فى المطبخ ومينا في اوضته ورنا تقريبا نايمه
أحمد : طب وانا مالي بقا يامحمد سبني انااااام
محمد(قام وقف بغيظ واتكلم بصوت واطي): ماشي يااحمد والله لهقومك غصب عنك(دخل الحمام وطلع بعد دقيقه ماسك حاجه فيها مايه وكبها فوق دماغ احمد) أحمد(بشهقه): هااا في ايه في ايه
محمد(بضحكه): لما اقولك قوم تقوم على طول متتلكعش
أحمد : انت غبي ياله
محمد : اه غبى بس فوق كده وقوم واقعد معايا
أحمد(بص جمبه ومسك مخده): انت اللي بدأت بقا(والاتنين نزلوا ضرب في بعض بالمخدات وبالايد والرجل وقلبوا الاوضه وصوتهم على جدا)
مينا(دخل فجأة بزعيق): ايه اللي انتوا عاملينه ده وايه الهيصه دي وانت يامحمد مش كنت تعبان والأستاذ التاني ده انت بتضرب اخوك افرض أي خبطه جت لحد فيكوا غلط
احمد: اية يامينا فى اية
مينا: انا بردو الى فى اية ولا انتو الى فى اية وانت انت مش كنت متهبب على دماغك ونايم تعبان اية الى صحاك
(محمد بص لأحمد وغمزله والاتنين جروا وشدوا مينا والتلاته نزلوا ضرب في بعض وصوتهم على اكتر واكتر)
رجاء(دخلت واتصدمت من منظر الاوضه وقفت وبصت عليهم وعلى الاوضه وهما لما شافوها وقفوا بسرعه وعدلوا هدومهم وبيكتموا الضحكه بالعافيه): ايه اللي انتوا عاملينه ده حرام عليكوا بجد
أحمد : ياماما
رجاء(مقاطعه لكلامه بزعيق): يا ماما ايه يا أخي حرام عليكوا منظر الاوضه ده عاجبكوا البت الغلبانه اختكوا الصغيره يا بهوات اللي بتتهد كل يوم في ترتيبها وانتوا التلاته قاعدين بتضربوا بعض في بعض بغباء وهزار اطفال مش كبار ومش عاملين حساب اخوكوا التعبان ليحصله حاجه
أحمد :(بص لمحمد بقرف وبص لمامتو) والله محمد اصلا اللي بدأ
محمد(بصوت واطي لاحمد): انت واطي
أحمد(بضحكه بسيطه وبصوت واطي): لازم انقذ نفسي
محمد(بصوت واطي): ماشي انا هعرفك
رجاء : وانت يامينا بدل ماتسكتهم يا كبير تلعب معاهم كده وانا الى بقول عليك عاقل طلعت اجن منهم بس هقول ايه انا هخرج برا أصلي هتشل بسبب عمايلكوا(وخرجت والتلاته بصوا لبعض وضحكوا)(أحمد ومحمد طلعوا برا الاوضه وقعدوا على الكنبه محمد مسك الريموت وبيقلب التليفزيون)
أحمد : في ايه يامحمد ما تركز على قناه بقا خيلتني من كتر ما بتقلب
محمد : براحتي لو مش عاجبك قوم
أحمد : لا مش هقوم يامحمد وهات قناه عدله بقا أو هات الريموت
محمد(ببرود): قولت مش جايب قنوات ولا جايب الريموت
أحمد(بضيق): متضايقنيش بقا يامحمد وتنرفزني
محمد(بعصبيه): اتنرفز يا أحمد و وريني هتعمل ايه
أحمد(بنرفزه): متعصبنيش يامحمد
محمد(بعصبيه): متعليش صوتك عليا ولا تكلمني بالطريقه دي انت فاهم
أحمد : انت غبي يا
رجاء(قاطعت خناقهم بزعيق):لا قوموا اضربوا بعض احسن انا عيزاكوا تضربوا بعض اصل كدة مينفعش
أحمد : يا ماما هو ال
رجاء(مقاطعة لكلامه): مش عايزه اسمع حاجه وعقابا ليكوا بقا محدش هيوضب ويعدل اوضتكوا غيركوا ويلا ادخلوا عشان تعدلوها(أحمد ومحمد بصوا لعبض) انتوا لسه هتبصوا لبعض يلا ادخلوا(ونادت بصوت عالي) يا مينا مينا(مينا جه جري لمامته) أدخل انت كمان مع اخواتك اعدلوا الاوضه
مينا(بصدمه): ايه؟! ليه بقا
رجاء(بجديد): من غير ليه عقاب ليكو يلا أدخل مش انتوا اللي قلبتوها اعدلوها بقا(مينا دخل لمحمد وأحمد اللي مش عارفين يعملوا أي حاجة بس بيحاولوا) أحمد(بص لمحمد): انت السبب في اللي بنعمله ده بسبب عندك وبرودك
محمد : متقولش كده يااحمد
مينا(بزعيق): ماخلاص بقا انت وهو واتكسفوا على دمكوا ويلا علشان نخلص (وبدئوا في التنظيف)
محمد(بتفكير): البت رنا السوسه هي اللي بتعدلها في دقيقه احنا نجيبها خمس دقايق من ورا ماما تنضف وتمشي
أحمد : تنضف وتمشي ؟!! أنت مش عارف اختك دي ساعتها هتستغلنا وتاخد فلوس وفي الاخرتقول لماما أنها اللي عدلت الاوضه
محمد : طب وانت بترد عليا ليه مش احنا مبنكلمش بعض
أحمد : انت مالك بقا انا مخاصم اخويا لكن بكلم توأمي
محمد : ااااه بحسب يعني
مينا:(بنفاذ صبر)تتكو نيلة فى برودكم انتم الاتنين(ووضبو الاوضة ونامو على السرير من التعب)
عند عباس رجع من الشركة وطلع على الاوضة لقى هايدى قاعدة على السرير وحاسة بدوخة فظيعة
عباس: مالك ياهايدى
هايدى: مافيش ياحبيبى حاجة عادى يعنى
عباس: طيب ماشى بس مالك بردو
هايدى: حاسة بدوخة بس
عباس: دوخة ااااه اكيد مكلتيش
هايدى: منا مستنيك
عباس:(بعد هنا وبصلها بزعيق)ميت مرة اقولك متستننيش على الاكل وكلى انتى ولم اجى ياستى ابقى كلى معايا تانى
هايدى:(بعياط) هو انت كل ماتشوف وشى هتزعقللى
عباس: يعنى انا بزعق من غير سبب
هايدى: (بعياط) بس مش كل شوية
عباس: خدى بالك من صحتك ومتبقيش عملة زى المكوك طول النهار وكلى وانا مزعقش ويلا بقا تعالى اغسلى وشك علشان ننزل زمانهم حطو الاكل
هايدى: مش عايزة انزل
عباس:(بنفاذ صبر) يلاياهايدى (قامت غسلت وشها ونزلو مع بعض وهو ماسك ايدها وخايف عليها لتقع) بالليل فى بيت رجاء صحيو بعد مارقو الاوضة لقو محمد سخن جدا ومامت هقاعده بتعمله كمادات ورنا قاعده جمبه وأحمد ومينا قاعدين وشيرين في اوضتها عشان متتعداش من السخونيه
رجاء : قومي يارنا من جمبه عشان متتعديش يا حبيبتي
رنا(بزعل): لا يا ماما انا عايزه أبقى جمبه
رجاء : قومي اقعدي على سرير أحمد وبرده هتبقي معاه
رنا(بتأكيد): لا ياماما هفضل هنا
رجاء : انتي حره ولو حصلك حاجه بقا ولا سخنتي ابقي شوفي مين هيعبرك
رنا : ماشي ياماما
رجاء : ماتقوم يا مينا تشوفله حاجه بدل هو سخن نار كده
مينا : ماهو لسه اخد علاجه من شويه يا ماما
رجاء(بدموع): انت شايفه عامل ازاي ياابني دي السخونيه مخلياه مهدود خالص ومش حاسس بحاجه وبعدجين اصلا غلط علية انا خايفة على مخو
مينا(بص لاحمد): طب انت هتعرف تديلو الحقنه وهو نايم ومش حاسس بالدنيا كده
أحمد : اه عادي دة بيبقى احسن (وقام وجهز الابر) قومي كده يا رنا ( نيمو محمد على جمبو واحمد لف وراء محمد ومينا مسك ايدو
احمد:مينا امسك ايدو قوى (احمد ضربلو الابر بس محسش بيها وضربو التانية وبردو محسش بيهم ولا طلع صوت ولا اى حاجة مع انو كانت دموعو بتنزل منهم احمد ومينا بصو لبعض باستغراب ومينا قرب ايدو من نفسو وخاف ليكون حصلو حاجة وكانت بين احمد ومينا اشارت محدش فاهمة)
رنا:(باستغراب بزعيق بصوت عالى ومحمد جسمو اتنففض لم سمع الزعيق) فى اية هو محسش بالحقن لية
مينا:(بعصبية بصوت واطى) وطى صوتك ياغبية اخوكى اتخض من صوتك
احمد: بس بقا متزعقوش جمبو
رجاء(بدموع): انا قولتيلكوا الصبح متتعبهوش في اللعب والجري وصممتو تهزروا وتلعبوا وفي الاخردة مبيعكش الا على دماغى
احمد: ياماما محمد لازم يعيش حياة طبيعة كان مبيعديش ثوانى من غير هزار ولم يفوق متزعيقيش معاه علشان هزر وكدة كدة اصلا السخونية بتجيلو كل ليلة بعد شوية السخونية نزلت خالص
مينا: يلا ياماما قومى خدى رنا وراحو ارتاحو
رجاء: يلا يارنا هو كدة كدة نايم مش حاسس بجد وطلعو الكل يرتاحو دخل مينا لشرين لقاها بتعيط
مينا: مالك ياشرين فى اية :(قرب منها وخدها فى حضنو وهداها خااااالص)
مينا: ها بقا قوليلى مالك
شرين: معاد الولادة لاقرب اقل من شهر
مينا: ودى حاجة تزعلك انتى مش مستنية البيبى ولا اية
شرين: ازاى يعنى مستنياه بس خايفة خايفة من الولادة والبيبى الى جاى
مينا: ياستى بس خايفة من اية متخفيش هتعدى ان شاء الله وهتبقى ساعة سهلة عليكى وعلى الى زيك يارب
شرين: هو انا لم اولد هبقى هنا مش كدة
مينا:لا هتروحى عند مامتك انتى شايفة الوضع هنا كل ساعة فى حال شفت الصبح بيلعب وبيضحك ويهزر ودلوقتى نايم والحقن الى بتخلية يعيط مش حاسس بيهم
شرين:(بعياط) انا عايزة ابقى هنا مش هبقى مطمنة وانا هناك
مينا: علشان خاطرى اول شهربس وبعدين ارجع تكونى شديتى حيلك شوية
شرين: بس يامينا
مينا: نامى ياشرين مش وقتو الكلام دة لسة شوية علية يلا ياحبيبتىتصبحى على خير وفضل حمبها لحدج اراحت فى النوم ونام هو كمان
(الصبح محمد بيفتح عينه شاف قدامه احمد ومينا وأحمد واقف بيجهز ابره)
محمد(اتعدل بتعب وخوف): في ايه انتوا واقفين ليه كده
مينا : يلا يا محمد عشان تاخد علاجك قبل ما أنزل اروح الشركة
محمد :(بزهق) بس انا مش عايز حقن
مينا : لا انت تستحمل بقا اليومين دول عشان انت مشوفتش انت كنت عامل ازاي وانت تعبان امبارح
أحمد : يلا يامحمد عشان ميبظوش
محمد(بخوف): طب ليه اتنين
احمد : ماانت عارف ان ده علاجك يامحمد
محمد : حرام والله انا اصلا مش قادر اتحرك عشان الشكشكه دي كلها
أحمد : خلاص متقومش وساعده يا مينا ينام على بطنه وانا اديهالو (مينا ساعد محمد انو ينام على بطنو وكل مايقرب منو احمد محمد يقولو استنى )
احمد:لا بقا كدة الحقن هتبوظ ( جاب الابرتين جمبو وقعد على السرير ومسك ايد محمد لوها على ظهرو براحة ومينا مسك ايدو التانية وضرب الحقنه الاولى ومحمد دفس دماغو فى المخدة ولسة هيضرب التانية
محمد:(بدموع) اية يا احمد استنى ياخى
احمد:معلشى يامحمد استحمل الحقنة هتبوظ (وضربو الحقنة التانية ومدالوش فرصة وساب ايدو وساعدوة ناو على ظهرو ودموعو كانت على خدو)
مينا: معلشى يامحمد انا عارف انك تعبت بس هنعمل اية(وباس دماغو ومسح دموعو وفضلو معاه لحد ما راح فى النوم وسابوة وخرجو)
عند رنا رجاء دخلت تصحيها رجاء(بتصحي رنا بس لقيتها سخنه جدا بخضه) رنا حبيبتي مالك بس(وخرجت برا بسرعه) مينا يامينا
مينا :(خرج مينا من اوضة محمد وكاناحمد نزل الصيدلية) في ايه ياماما
رجاء(بخوف): اختك سخنه نار معرفش من ايه
مينا(دخل بسرعه لرنا وحط ايده على دماغها لقاها سخنه جدا): متقلقيش ياماما واهدي انا هكلم الدكتور يجي يشوفها(ميناكلم الدكتور وبعد ربعالساعة الدكتور كان وصل وكشف عليها وكانت رجاء بتعملها كمدات
الدكتور: هيا السخونية دى جتلها من اية ( الدكتور جارهم وعارف بحالة محمد)
رجاء:محمد سخن جدا بالليل وفضلت جمبو ومرضيتش تبعد عنو(ومسكت ايد الدكتور) عايزة اعملها تحليل عايزة اطمن عليها ميكشن عندها الزفت دة
الدكتور: انا شايف قدامى انها عندها نازلة شعبية لو انت قلبك مش مطمن وعايزة تطمنى اكتر اعملها التحليل
مينا: قولها يادكتور عمالة تعيط من ساعتها
لدكتور: هيا رنا قربت من محمد
رجاء: هيا الى كانت قاعدة جمبو منا خايفة من كدة
الدكتور: ياحاجة السخونية بتعدى وانتى بيتقولى انو سخن قوى بس انتو متسكتوش على السخونية دى لانها غلط علية
مينا: ماحنا ادينالو العلاج اللحمد لله والسخونية نزلت بس الحقن الى بياخدها بتنيم
الدكتور: رنا مافيهاش حاجة يامى متقلقيش عليها هيا بس النازلة شديدة عليها انا هكتبلها على ادوية لازم تمشى عليهالا وابعديها شوية عن محمد وبلااش تقرب منو وهو سخن بعد اذنكو (طلع ميناوصل الدكتور ورجع لرجاء)
مينا: اطمنى ياماما
رجاء: هعملها التحليل بردو
مينا: ماما ابوس ايدك مترعبيش رنا
رجاء: خدها زى مابتاخد محمد من يعرف
مينا:(بنفاذ صبر) انا نازل الشغل سلام
عند محمد وهو قاعد في اوضته لوحده وكان قلقان على رنا لأنه مشفهاش من يومين ولما قال لمامته حذرته انه يدخلها عشان ميتعداش من السخونيه بتاعتها
محمد (بعد دقايق قام وقف): لا بقا انا هروح لرنا من غير ما ماما تحس(وخرج ومشى براحه جدا عشان رجاء متحسش بيه ودخل الاوضه من غير ما يخبط)
رنا(لما شافت محمد قامت قعدت): محمد ايه اللي جابك هنا اطلع برا عشان متتعبش تاني
محمد(قعد جمبها): مش هطلع انا عايز اتكلم معاكي شويه
رنا : طب خلاص خليك أتكلم معايا بس قوم وخليك بعيد
محمد : سيبك مني دلوقتي المهم انتي عامله ايه
رنا(بخوف على اخوها): انا كويسه بس انت اللي لو فضلت قاعد هنا مش هتبقى كويس
محمد : رنا بس بقا انا جاي اقعد معاكي عشان أخرج من الاوضه ومن جو التعب اللي فيها
رنا : خلاص انت حر بقا خليك قاعد
محمد : اومال البت هايدي فين بقالي كام يوم مشوفتهاش
رنا : هي كانت بتكلمني الصبح عشان تطمن عليك وبتسلم عليك
محمد : اومال مجتش ليه
رنا : انت عارف بقا الشغل بتاعتها وتعب الحمل فمهدوده خالص
محمد : ربنا معاها ويكملها على خير
رجاء(جايه تجيب شوربة خضار لرنا واتفاجئت بوجود محمد في الاوضه بزعيق): انت ايه اللي جابك هنا مش انا قولتيلك متجيش عشان متتعداش انت ليه مصمم تتعب نفسك وتتعبنا معاك ياابني
محمد(بزعل): في ايه ياماما انا اتخنقت من الاوضه ومن القعدة لوحدي
رجاء : ياابني اتخنقت تطلع تقعد معايا في الصالة مش تيجي هنا واختك تعبانه دااحنا ما بنصدق انك تفوق شويه قوم يلا ياحبيبي وانا هقعد مع اختك على ما تاكل واديها الدوا واجيلك نقعد مع بعض وندردش طول اليوم
محمد(قام وقف وباس دماغ رنا): ماشي انا رايح اوضتي وانتي خلي بالك من نفسك يارنوش مرت الايام سريعا وعدى على جلسة محمد اكترمن اسبوع
بعد جلسة محمد باكتر من اسبوع مينا قاعد مع رجاء وتليفونو رنا ولقى الدكتور فتح علية
مينا: ازى حضرتك يادكتور............الحمد لله كويسين ومحمد كويس..............سخن ولم بياخد الدواء بتعدى....... بكرة............ان شاء الله........... ممكن يعند معايا وميرضاش يجى...........ربنا يسهل ان شاء الله مع السلامة(قفل مع الدكتور وبص لمامتو بحيرة)
رجاء: مالك يابنى فى اية
مينا: الدكتور عايز محمد بكرة
رجاء: طب اية الى قالقك
مينا: ابنك من يومين بيقولى غيرلى المستشفى دى وقالى مش رايح تانى انا طنشتو بس خايف يعند
رجاء: متخفش وبعدين هو لعب عيال قوم بس ادخلو وكلمو وخرجو من خنقة الاوضة دى وان شاء الله ربنا يسهل (قام مينا ودخل لمحمد)
مينا: محمد تعالا برة عايز اتكلم معاك (طلع مينا ومحمد طلع وراه)
محمد: نعم يامينا فى اية
مينا: اعمل حسابك بكرة هتروح تعمل التحاليل
محمد:(بسرعة) لا المستشفى دى تانى لا
مينا: يعنى اية لا مافيش حاجة اسمها لا هو لعب عيال ولا اية
محمد: وانا قولتلك شوفلى غيرها
مينا: مينفعش ياحبيبى الدكتور بتاعك متابع الحالة من الاول هنغيرو ازاى
محمد:هينفع الدكتور الجديد هيشوف الورق ويعرف الحالة اية مش كميا يعنى
مينا:(بصلو بجدية) طيب ماشى يامحمد انا مش هغير الدكتور وانت هتيجى معايا بكرة تعمل التحاليل
محمد:(بصلو بصدمة)يعنى اية
مينا: يعنى الى سمعتو وانت منطرشتش وسمعنتى كويس
محمد: طيب ماشى انا سمعتك ومنطرشتش بس مش رايح فى حتة
مينا:مافيش حاجة اسمها مش رايح اقل حاجة حقنة بنج وتفوق تلاقى نفسك هناك وفى طرق كتيرانا عايزك تيجى معايا بمزاجك مش غصب عنك
محمد:(بصلو بتحدى) اعمل الى تعملو انا مش رايح هناك تانى
مينا:(بصلو بعصبية) يبقى انت الى بتطرنى اعملك زى الاطفال واخدك غصب عنك واحطك قدام الامر الواقع وهناك اديك بتشوف بتعمل الحاجة غصب عنك والاخر بتزعل وكدة كدة هتعمل التحاليل اعملها بمزاجك احسن
محمد:(قام وقف بعصبية وزعيق ودموع) قولتلك مش رايح فى حتة انت مبتفهمش (بتاكيد) مش راااااااااااايح فى حتة(وسابو ودخل الاوضة ورزع وراه الباب) مينا:(بزعيق) يبقى متزعلش منى لم تصحى الصبح تلاقى نفسك فى المستشفى
محمد فضل صاحى طول الليل وخايف لتهديد مينا يتنفذ بس جات علية ساعة ونام ومينا دخل علية لقاه نايم ومش مستغطى غطاة وعدلو وباس دماغو وطلع نام فى الصباح
مينا دخل لمحمد واحمد كان بيتحايل علية علشان يقوم
مينا: انت بردو بتعند يامحمد
محمد: مش هروح فى حتة يامينا
مينا: طيب يامحمد ماشى برحتك انت حربقا (فتح الباب) اتفضل يادكتور
محمد:(قام قعد) اية دة
مينا: 2 سم بنج وهتروح فى دنيا تانية وهنخدك فى الاسعاف غصب عنك وهتروح هناك هتتكتف وتعمل التحليل غصب عنك ومش هبقى معاك
محمد:(قام وقف على السرير بخوف ودموع) محدش يقرب منى قوليلهم ياماما يطلعو برة انا مش عايز حقن وموش عايز بنج مش عايز حاجة علشان خاطرى يامينا (مينا قرب منو وقلع الكوتشى وطلع على السرير خد محمد فى حضنو وقعدو ومينا قعد جمبو)
مينا:يبقى قوم معايا وبلاش علاج وبلاش حقن وبلاش بنج وبلاش حاجة خالص وقوم معايا بمزاجك يلا يامحمد انت مش شايف مامتك عملة ازاى يلا ياحبيبى علشان خاطرى
محمد:(بصلو بدموع) يلا يمينا (مينا حضنو وقامو مع وخرجو ومينا شارو للدكتور انو خلاص بعد ما نزلو ورنا ورجاء بيقفلو باب الشقة )
رجاء: معلشى يابنى تعبناك معانا
وليد:(الى كان عامل دكتور) لا عادى ياخالتى ولا يهمك بعد اذنك هنزل اكمل شغلى (ونزل)
رنا: هو دة مش دكتور
رجاء: لا دة وليد شغال فى الشارع الى ورنا قى صيدلية ومينا راح جابو
رنا: محمد لو عرف هيزعل
وصلو المستشفى رجاء ومحمد واحمد ورنا ومينا محمد حاطط راسو فى الارض وحاسس انو الكل عارف انو ركب الحقنة الشرجية والكل بيبص علية
دخل للدكتور وعينو مليانو دموع الدكتور اول ماشافو كدة قام وقف جمبو
الدكتور:(مسح لمحمد دموعو) اقدر اعرف الدموع دى لية (محمد مردش علية) يامحمد انا عارف انك محرج بس فى ناس كتير بيركبو الحقنة دة يابنى علاج ومش هنا امرض كتير قوى علاجها بالحقنة دى وفى ناس بعد كل جلسة بيركبوها وبعدين هتعمل اية لو عرفت انك ممكن يبقى فى علاجك لبوس
محمد:(بص للدكتور بصدمة) طب متكتبليش البتاع دة لانى لو بموت مش هخدو
الدكتور:(بضحكة) طيب ياسيدى حاضر انا مش هكتبهولك بس يلا قوم معايا كدة نعمل التحاليل علشان نعرف العلاج بيوصل لاية (قام محمد وهو خايف يقول للدكتور انو مش قادر لاى حقن النهاردة وخرج برة اوضة الكشف مع مينا
رجاء: دكتور انا عايزة اطلب من حضرتك طلب
الدكتور: اتفضلى يامى
رجاء: انا بنتى الصغيرة سخنت من كام يوم كدة وبصراحة عايز اطمن عليها انو ميكنش اتعدت من اخوه
الدكتور: حاضر يامى بس لوكميا الدم مش معدى يعنى محمد لو متزوج ميعديش مراتو مابالك دى اختو وعادى حضرتك عايزة تطمنى عليها انا ممكن اسحب منها دم
رجاء: مش عايزها تحس اسحب منى ومن اخواتها مينا واحمد وانت كدة كدة بتسحب من محمد
(دخلو المعمل كلهم واية سحبت دم من مينا واحمد ورجاء وجات لرنا وكانت خايفة بس سحبت منها دم)
اية:(حطت لمحمد االاستك على ايدو) طبق ايدك يامحمد (وفضلت تدور على عروق ومافيش خالص (لقت عرق غرزت الابرة)
محمد: ااه(وايدو اتحركت)
اية: متتحركش يامحمد العرق هرب
محمد: (بتوجع) اعمل اية بس الابره دى بتوجع قوى
اية:(دورت فى كف ايدو ولقت عرق مينا مسك ايدو وغرزت الابرة وسحبت دم بس بعد عذاب ورجاء ورنا عيطو من منظر الشكشكة الى اتشكشكها)
خرجو من المعمل وقعدو ومحمدقاعد جمب رجاء ورجاء بتطبطب علية محمد بص للدكتور
محمد: انا مش جاهز للتحليل النهاردة
الدكتور:(لف لمحمد بصدمة) نعم هو كل مرة مش جاهز للتحليل
محمد:(بدموع) انا بقالى يومين ياخد حقن اتنين الصبح واتنين بالليل والله تعبت
الدكتور: معلشى مانت لازم تتعب علشان تخف وبعدين حقن السخونية مبتوجعش يامحمد
محمد: والله بتوجع ادينى راحة يومين والله وهاجى لحضرتك تانى
الدكتور:(بتنهيدة) مافيش راحة يامحمد
مينا: قدم قدام محمد ومسك ايدو) هو احنا مش قولنا هنستحمل يامحمد علشان ربنا يشفينا بسرعة
محمد: بس مش قادر النهاردة
الدكتور:(بص لمحمد) لا هتقدر يلا قوم
محمد:(بص لمامتوبدموع)قوليلو يسبنى ارتاح يومين
رجاء:(بدموع) قوم مع الدكتور يابنى واخلص النهاردة وارتاح بعد كدة
احمد: يلا يامحمد انا هدخل معاك المرادى وخلى مينا هنا
محمد: مش جاهز ياحمد
الدكتور: يبقى انت عايز تعمل كل حاجة غصب عنك ونادا للممرضين ودخلو محمكد الاوضة غصب عنو ونيموه على السرير ودخل احمد ومينا معاه)
ياترى محمد هيعذبهم زى اخر تحليل ياترى نتيجى التحلية هيكتشوف مرض تانى فى حد منهم دينا فين معتدتش بتظهر لية كل دة هتعرفوة الحلقة الى جاية
#hadeer
#rody
YOU ARE READING
امى حياتى
Adventureمعاناه بسبب الاهمال الاهمال القاتل معاناه مريض السرطان احداث مشوقه داخل الحلقات
