စေရာ(Complete)

အပိုင္း(၉) ထပ္တူနာက်င္ခံစားရျခင္း

Unicode

အပိုင်း(၉)

ထပ်တူနာကျင်ခံစားရခြင်း။

ကြမ်းပြင်ပေါ် လဲကျသွားသော လွန်းငယ်ကြောင့် ခွန်းသုရှင် ထိတ်လန့်သွားရသည်။ စိတ်၏ ဆောင်မှုကြောင့် လွန်းငယ်အနား မည်သို့ရောက်ရှိသွားမှန်းပင် မသိလိုက်။ လွန်းငယ်၏ ပေါ့ပါးသော ကိုယ်အား ပွေ့ချီလိုက်သည်။

သူ့လုပ်ရပ် အရမ်းလွန်သွားပုံရသည်။ သို့သော် သူ ခံစားခဲ့ရတာနှင့်ယှဉ်လျှင် စာပင်မဖွဲ့လောက်။ ဆုံးရှုံးရသော နာကျင်မှုအား လွန်းငယ် မခံစားရသေးပါ။ စကားနှင့်ပင် ထိုမျှလောက်နာနေရင် သူကဲ့သို့ ရင်နင့်စရာအဖြစ်မျိုးကြုံခဲ့ရလျှင်။

နုနုနယ်နယ် မျက်နှာအား မြင်မိတိုင်း သူ မုန်းမိသည်။ သူတို့ဘယ်လိုများ ဘာမှမဖြစ်သလို နေနိုင်ရသလဲဟု စဉ်းစားမိတိုင်း နှလုံးသားထဲမှ စူးအောင့်ရသည်။ လွန်းငယ်အား ခံစားရအောင် လုပ်ပြီးတိုင်း ထပ်တူနာကျင်ခံစားရသည့် ကိုယ့်ကိုကိုယ်အားလည်း ပို၍ မုန်းတီးမိသည်။ တစ်ခုခုဖြစ်မည်စိုးကာ အမြဲစိုးရိမ်မိသည့်စိတ်သည် သူ့အား အမြဲပြန်နှိပ်စက်နေသည်။

ချစ်သူဖြစ်စ ပျော်ရွှင်ဖွယ်အချိန်များ ပြန်တွေးမိလေတိုင်း ကြည်နူးမိသော စိတ်အားလည်း မယုံကြည်နိုင်။ သူ့ဘက်မှ စတင်ချဉ်းကပ်ခဲ့ခြင်းဖြစ်သော်လည်း ချစ်စဖွယ်မျက်နှာလေး၏ ဆွဲဆောင်မှုကိုခံရကာ စိတ်ရင်းနှင့်ကောင်းမိခဲ့သည့် အခိုက်အတန့်များစွာရှိသည်။ ထိုမျက်နှာလှလှလေးက လူတစ်ယောက်ကို သေစေနိုင်တယ်ဟူသော အတွေးဝင်မိသည့်အခါ အမုန်းကြီးမုန်းမိသည်။

ယခုလည်း လွန်းငယ် မေ့လဲသည်ထိ ဖြစ်သွားသောအခါ သူ မနေနိုင်ပေ။ ရင်ထဲပူလောင်ကာ စိုးရိမ်မှုတို့ ကြီးစိုးသွားရသည်။

ပေါ့ပါးသော လွန်းငယ် ကိုယ်အား ပွေ့ချီကာ ဝိုင်းအုံနေကြသောလူများကြားမှ တိုးထွက်လိုက်သည်။ ဆေးရုံခန်းတံခါးရှေ့ရပ်နေသော မဝါအား ပြောလိုက်၏။

"မဝါ တံခါးဖွင့်ပေး"

"ကိုသု အထဲမှာ ဒေါက်တာမိုးက လူနာကြည့်နေတာ ခုလို ဝင်လိုက်ရင် မကောင်းဘူး...ခဏစောင့်ပါဦး"