السفاح العاشق

بارت 105

ﺟﻮﻻﻥ : " ﺩﻭﺯﺍﺕ ﺍﻟﺨﻂ " ﺁﻟﻮﻭ
ﺭﺋﺒﺎﻝ : ﺍﻣﺘﻰ ﻏﺎﺩﻱ ﺗﺨﺮﺟﻲ ؟
ﺟﻮﻻﻥ : ﻣﻊ 6 ﻫﻜﺎﻙ ... ﻫﻨﺪ ﻗﺮﺑﺎﺕ ﺗﺪﻋﻴﻨﻲ ﺣﻴﻨﺖ ﻛﻨﺠﻲ ﻣﻌﻄﻠﺔ ﻭ ﻧﺨﺮﺝ ﺑﻜﺮﻱ ... ﻭ ﺍﻟﻴﻮﻡ ﻓﺎﻟﻐﺪﺍ ﺗﻌﻄﻠﺖ ﻧﺺ ﺳﺎﻋﺔ
ﺭﺋﺒﺎﻝ : ﺗﻐﺪﻳﺘﻲ ﻓﺎﻟﺨﺎﺭﺝ ... ﻣﻌﺎﻣﻦ ؟
ﺟﻮﻻﻥ : ﻣﻊ ﻟﺒﻨﺎﺕ ... ﺍﺗﺎﻓﻘﺖ ﻣﻌﺎﻫﻢ ﺑﺎﺵ ﻧﺨﺮﺟﻮ ﻧﺘﻘﺪﺍﻭ ﻏﺪﺍ
ﺭﺋﺒﺎﻝ : ﺧﺎﺻﺎﻙ ﺷﻲ ﺣﺎﺟﺔ ؟
ﺟﻮﻻﻥ : " ﺑﺤﺮﺝ " ﺁﻩ ... ﺷﺤﺎﻝ ﻣﻦ ﺣﺎﺟﺔ ﺧﺼﺎﻧﻲ
ﺭﺋﺒﺎﻝ : ﻭ ﻋﻼﺵ ﻣﺎﻗﻠﺘﻴﻬﺎﺵ ﻟﻴﺎ ... ﻧﺪﻳﻚ ﺃﻧﺎ ﺗﺎﺧﺪﻱ ﺍﻟﻲ ﺑﻐﻴﺘﻲ
ﺟﻮﻻﻥ : ﺁﺍ ... ﻟﺒﻨﺎﺕ ﺣﺘﻰ ﻫﻤﺎ ﺑﻐﺎﻭ ﻳﺘﻘﺪﺍﻭ ﺩﺍﻛﺸﻲ ﻋﻼﺵ
ﺭﺋﺒﺎﻝ : ﻣﺰﺍﻝ ﻣﺎ ﻗﻠﺘﻲ ﻟﻴﺎ ﺷﻨﻮ ﺑﺎﻏﻴﺔ ﻓﺎﻟﺼﺪﺍﻕ ﺩﻳﺎﻟﻚ ؟
ﺟﻮﻻﻥ : ﻣﺎﺑﻐﻴﺖ ﻭﺍﻟﻮ " ﺳﻜﺘﺎﺕ ﻟﻠﺤﻈﺎﺕ " ﺭﺋﺒﺎﻝ
ﺭﺋﺒﺎﻝ : ﺍﻣﻢ
ﺟﻮﻻﻥ : ﻋﻨﺪﻱ ﻃﻠﺐ ﻭﺍﺣﺪ ... ﻛﻨﺖ ﺑﻐﻴﺖ ﻧﻘﻮﻟﻮ ﻟﻴﻚ ﻓﺎﺵ ﺟﻴﺖ ﻟﻌﻨﺪﻙ ﻟﻠﻤﻜﺘﺐ
ﺭﺋﺒﺎﻝ : ﺷﻨﻮ ﻫﻮ ﻫﺎﺩ ﺍﻟﻄﻠﺐ ؟
ﺟﻮﻻﻥ : ﻣﻤﻜﻦ ﺗﻘﺎﺑﻞ ﺟﺪﻭﺩﻙ ﻭ ﺗﻌﺮﻓﻬﻢ ﻋﻠﻴﻚ ... ﺑﻐﻴﺘﻬﻢ ﻳﻜﻮﻧﻮ ﺣﺎﺿﺮﻳﻦ ﻧﻬﺎﺭ ﺍﻟﻌﻘﺪ ... ﻫﻤﺎ ﻋﺎﺋﻠﺘﻚ ﻭ ﺣﺎﻥ ﺍﻟﻮﻗﺖ ﻳﻌﺮﻓﻮ ﻛﻠﺸﻲ
ﺑﻘﺎﺕ ﺟﻮﻻﻥ ﺳﺎﻛﺘﺔ ﻭ ﻫﻲ ﻛﺘﺴﻤﻊ ﺻﻮﺕ ﺃﻧﻔﺎﺳﻮ ﻛﻴﻌﻠﻰ ... ﺯﺍﺭﺩﺕ ﺗﻮﺛﺮﺍﺕ ﻓﺎﺵ ﻣﺎﻗﺎﻝ ﻭﺍﻟﻮ ﻭ ﻓﺠﺄﺓ ﺗﻘﻄﻊ ﺍﻟﺨﻂ ... ﻗﺎﺑﻼﺕ ﺍﻟﻔﻮﻥ ﻣﻊ ﻭﺟﻬﺎ ﻭ ﺳﺪﺍﺕ ﻋﻨﻴﻬﺎ ... ﻧﺪﻣﺎﺕ ﺍﻟﻲ ﺟﺒﺪﺍﺕ ﻣﻌﺎﻩ ﻫﺎﺩ ﺍﻟﻤﻮﺿﻮﻉ ﺍﻟﺤﺴﺎﺱ ﻓﺎﻟﺘﻴﻠﻴﻔﻮﻥ ...
ﺃﻛﻴﺪ ﺯﻋﻒ ﻣﻦ ﻛﻼﻣﻬﺎ ... ﻟﻜﻦ ﻣﻦ ﻧﻬﺎﺭ ﺗﺤﺪﺩ ﺍﻟﻌﻘﺪ ﻭ ﻫﻲ ﻛﺘﻔﻜﺮ ﻓﻬﺎﺩﺷﻲ ... ﺑﻐﺎﺗﻬﻢ ﻳﻜﻮﻧﻮ ﻣﻌﻬﺎ ﻭ ﻳﺸﺎﺭﻛﻮﻫﺎ ﻓﺮﺣﺘﻬﺎ ... ﻟﻜﻦ ﺍﻷﻫﻢ ﻫﻮ ﻳﺘﻌﺮﻓﻮ ﻋﻠﻰ ﺣﻔﻴﺪﻫﻢ ﺍﻟﻲ ﺗﺤﺮﻣﻮ ﻣﻨﻮ ﺳﻨﻮﺍﺕ ﻫﺎﺩﻱ ... ﻫﻲ ﺧﻄﻮﺓ ﺻﻌﻴﺒﺔ ﻟﻠﻄﺮﻓﻴﻦ ﻟﻜﻦ ﺿﺮﻭﺭﻱ ﻣﻨﻬﺎ ...
ﻓﻲ ﭬﻴﻼ ﺿﺨﻤﺔ ﻭﺳﻂ ﻣﺴﺎﺣﺔ ﺷﺎﺳﻌﺔ ﺧﻀﺮﺍﺀ ... ﺿﺎﻳﺮﻳﻦ ﺑﻴﻬﺎ ﻣﻼﻋﺐ ﺍﻟﮕﻮﻟﻒ ﻭ ﺑﺤﻴﺮﺍﺕ ﺻﻐﺎﺭ ... ﻣﻠﻜﻴﺔ ﺧﺎﺻﺔ ﺗﻤﺘﺪ ﻷﻣﻴﺎﺍﺍﻝ ﻭ ﻣﺎﻛﻴﻮﺻﻞ ﻟﻴﻬﺎ ﺣﺪ ... ﺑﻴﻦ ﺍﻟﺒﻮﺍﺑﺔ ﺍﻷﻭﻟﻰ ﻭ ﺍﻟﺮﺋﻴﺴﻴﺔ ﻣﺴﺎﺣﺔ ﻛﺒﻴﺮﺓ ﻛﻴﻨﺘﺎﻗﻠﻮ ﺍﻟﺤﺮﺍﺱ ﻣﺎﺑﻴﻦ ﺍﻟﺒﻮﺍﺑﺘﻴﻦ ﺑﻌﺮﺑﺎﺕ ﺍﻟﮕﻮﻟﻒ ﺍﻟﺼﻐﻴﺮﺓ ... ﻭ ﻛﻞ ﺑﻮﺍﺑﺔ ﻭﺍﻗﻒ ﻋﻨﺪﻫﺎ ﺣﺎﺭﺳﻴﻦ ﺿﺨﻤﻲ ﺍﻟﺒﻨﻴﺔ ...
ﺃﻣﺎﻡ ﺍﻟﺒﻮﺍﺑﺔ ﺩﻳﺎﻝ ﺍﻟڨﻴﻼ ﻧﺎﻓﻮﺭﺓ ﺩﺍﺋﺮﻳﺔ ﺿﺨﻤﺔ ... ﻣﺼﻤﻤﺔ ﺑﺸﻜﻞ ﻳﺒﻬﺮ ﺍﻷﻋﻴﻦ ... ﻭ ﻛﻴﻒ ﺍﻟﺸﻜﻞ ﺍﻟﺨﺎﺭﺟﻲ ﻛﻴﻌﻄﻲ ﻓﻜﺮﺓ ﻋﻠﻰ ﺛﺮﺍﺀ ﺻﺎﺣﺐ ﺍﻟﻤﻠﻜﻴﺔ ... ﺍﻟﺪﺍﺧﻞ ﻛﺎﻥ ﺃﻛﺜﺮ ﻣﻦ ﺫﻟﻚ ... ﺃﺛﺎﺙ ﻓﺎﺧﺮ ﻭ ﻛﻼﺳﻴﻜﻲ ... ﻟﻮﺣﺎﺕ ﺣﺎﺋﻄﻴﺔ ﺑﺎﻫﻀﺔ ﺍﻟﺜﻤﻦ ... ﻭ ﺃﺷﻴﺎﺀ ﺃﺧﺮﻯ ﻻ ﺗﻌﺪ ﻭ ﻻ ﺗﺤﺼﻰ ...
ﻳﻤﻜﻦ ﻳﺸﻮﻓﻮ ﺍﻟﻤﺮﺀ ﺳﻮﺍﺀ ﺗﺒﺎﻫﻲ ﺃﻭ ﺗﺒﺬﻳﺮ ... ﻟﻜﻦ ﻫﺬﺍ ﻫﻮ ﻣﺤﻴﻂ ﺭﺟﻞ ﺍﻷﻋﻤﺎﻝ ﺳﻠﻄﺎﻥ ﺍﻟﻌﺒﺪﻱ ... ﺻﻴﺘﻮ ﺑﻴﻦ ﺭﺟﺎﻝ ﺍﻷﻋﻤﺎﻝ ﻭﺍﺻﻞ ... ﻟﻜﻦ ﺍﻟﻘﻠﻴﻞ ﺍﻟﻲ ﻛﻴﻌﺮﻑ ﻋﻠﻴﻪ ﺃﻧﻪ ﺷﺨﺼﻴﺔ ﺫﺍﺕ ﻧﻔﻮﺫ ﺃﻗﻮﻯ ﻓﺎﻟﻌﺎﻟﻢ ﺍﻟﺴﻔﻠﻲ ... ﺃﻱ ﻋﺎﻟﻢ ﺍﻟﺠﺮﻳﻤﺔ ﻭ ﺍﻟﻔﺴﺎﺩ ﻭ ﺍﻟﻤﺨﺪﺭﺍﺕ ... ﺍﻟﺸﻲﺀ ﺍﻟﻲ ﺧﻼﻩ ﺷﺨﺺ ﻣﺨﻴﻒ ﺣﺘﻰ ﻭﺍﺣﺪ ﻣﺎﺑﺎﻏﻲ ﻋﺪﺍﻭﺗﻮ ...
ﻭﺳﻂ ﻫﺪﻭﺀ ﺍﻟﭭﻴﻼ ﺗﺴﻤﻊ ﺻﻮﺕ ﺻﺮﺍﺥ ﻋﺎﻟﻲ ﻓﺎﻟﻄﺎﺑﻖ ﺍﻟﺜﺎﻧﻲ ... ﻭ ﺑﻌﺪ ﻟﺤﻈﺎﺕ ﻃﻠﻊ ﺷﺨﺺ ﻻﺑﺲ ﺑﺪﻟﺔ ﺳﻮﺩﺍﺀ ﻛﻴﺠﺮﻱ ﻣﻊ ﺍﻟﺪﺭﻭﺝ ... ﻭﺻﻞ ﻟﻠﻐﺮﻓﺔ ﺍﻟﺮﺋﻴﺴﻴﺔ ﻭ ﺩﻕ ﻋﺎﺩ ﺣﻞ ﻟﺒﺎﺏ ... ﺑﺎﻥ ﻟﻴﻪ ﺳﻠﻄﺎﻥ ﻻﺑﺲ ﺑﻮﻛﺴﻮﺭ ﺃﺳﻮﺩ ﻭ ﻳﺪﻳﻪ ﻋﺎﻣﺮﻳﻦ ﺩﻡ ... ﺷﺎﻑ ﺍﻟﮕﺎﺭﺩ ﻓﺠﻬﺔ ﺍﻟﺴﺮﻳﺮ ﺍﻟﻜﺒﻴﺮ ﺑﺎﻥ ﻟﻴﻪ ﺟﺴﺪ ﺑﻨﺖ ﻋﺎﺭﻳﺔ ﻛﻠﻴﺎ ﻭ ﻣﻄﻌﻮﻧﺔ ﻓﻜﺮﺷﻬﺎ ...
ﺍﻟﺨﻨﺠﺮ ﺍﻟﺨﺎﺹ ﺑﺴﻠﻄﺎﻥ ﺑﺎﻗﻲ ﻣﺮﺷﻮﮒ ﻓﻴﻬﺎ ... ﻟﻤﺢ ﺳﻠﻄﺎﻥ ﻛﻴﻘﺮﺏ ﻟﻴﻪ ﻭ ﻫﻮ ﻳﺒﺪﺍ ﻳﻌﺮﺍﻕ ... ﻭﻗﻒ ﺳﻠﻄﺎﻥ ﻣﻘﺎﺑﻞ ﻣﻌﺎﻩ ﻭ ﻣﺴﺢ ﻳﺪﻭ ﺍﻟﻲ ﻋﺎﻣﺮﺓ ﺩﻡ ﻓﺎﻟﻘﺎﻣﻴﺠﺔ ﺩﻳﺎﻝ ﺍﻟﮕﺎﺭﺩ ﻭ ﻗﺎﻝ ﺑﻨﺒﺮﺓ ﻣﺨﻴﻔﺔ ...
ﺳﻠﻄﺎﻥ : ﺑﺎﻗﻲ ﺗﺠﻴﺐ ﻟﻴﺎ ﺷﻲ ﻭﺣﺪﺓ ﻣﺜﻘﻮﺑﺔ ... ﻧﺜﻘﺐ ﻣﻚ ﻧﺘﺎ ﺍﻟﻠﻮﻝ
ﻣﺮﻭ ﻳﻮﻣﻴﻦ ﻋﻠﻰ ﺟﻮﻻﻥ ... ﺍﻟﻔﺮﺣﺔ ﺗﻘﻠﺒﺎﺕ ﻟﻴﻬﺎ ﺑﻌﺪ ﺁﺧﺮ ﻣﻜﺎﻟﻤﺔ ﺑﻴﻨﻬﺎ ﻭ ﺑﻴﻦ ﺭﺋﺒﺎﻝ ... ﻣﺎ ﺑﺎﻗﻲ ﻗﺪﺭﺍﺕ ﺗﻮﺻﻞ ﻟﻴﻪ ﻭ ﻻ ﺗﺸﻮﻓﻮ ... ﺟﺎﻟﺴﺔ ﻓﻤﻜﺘﺒﻬﺎ ﻭ ﺩﺍﻳﺮﺓ ﻳﺪﻳﻬﺎ ﻋﻨﺪ ﺭﺍﺳﻬﺎ ... ﻓﺠﺄﺓ ﻭﻗﻔﺎﺕ ﻫﺰﺍﺕ ﺻﺎﻛﻬﺎ ﻭ ﻗﺮﺑﺎﺕ ﻟﻌﻨﺪ ﻫﻨﺪ ...
ﺟﻮﻻﻥ : ﺧﺘﻲ ﻫﻨﺪ ... ﺧﺎﺹ ﻧﺨﺮﺝ ﺩﺍﺑﺔ ﻋﻨﺪﻱ ﺷﻲ ﻏﺮﺽ ﺿﺮﻭﺭﻱ
ﻫﻨﺪ : ﻳﺎﻙ ﺷﻲ ﺑﺎﺱ ﻣﻜﺎﻳﻦ ؟
ﺟﻮﻻﻥ : ﻻ ﻫﺎﻧﻴﺔ ... ﻏﻴﺮ ﻣﺎﻗﺪﺭﺗﺶ ﻧﺼﺒﺮ ﺣﺘﻰ ﻧﺨﺮﺝ
ﻫﻨﺪ : ﺻﺎﻓﻲ ﻏﻴﺮ ﺳﻴﺮﻱ ﻗﺪﻱ ﻏﺮﺿﻚ
ﺟﻮﻻﻥ : ﺷﻜﺮﺍ ﺑﺰﺍﻑ ... ﻻ ﺳﻮﻝ ﻋﻠﻴﺎ ﺍﻟﻤﺪﻳﺮ ﻗﻮﻟﻲ ﻟﻴﻪ ﺑﺎﻫﺎ ﻋﻴﺎﻥ ﺷﻮﻳﺔ
ﺧﺮﺟﺎﺕ ﺟﻮﻻﻥ ﻛﺘﺰﺭﺏ ﻓﻤﺸﻴﺘﻬﺎ ... ﺧﺪﺍﺕ ﻃﺎﻛﺴﻲ ﻟﻠﺸﺮﻛﺔ ﻭ ﻃﻠﻌﺎﺕ ﻟﻤﻜﺘﺐ ﺭﺋﺒﺎﻝ ... ﺩﻗﺎﺕ ﻭ ﺩﺧﻼﺕ ... ﺑﻘﺎﺕ ﻛﺘﺸﻮﻑ ﻓﺎﻟﺒﻴﺮﻭ ﺍﻟﻔﺎﺭﻍ ﺷﺤﺎﻝ ﻋﺎﺩ ﺿﺎﺭﺕ ﺧﺎﺭﺟﺔ ﻭ ﺗﻮﺟﻬﺎﺕ ﻟﻤﻜﺘﺐ ﺑﻬﺎﺀ ... ﺣﻼﺕ ﻟﺒﺎﺏ ﻭ ﺩﺧﻼﺕ ...
ﺟﻮﻻﻥ : ﻓﻴﻦ ﻫﻮ ﺭﺋﺒﺎﻝ ؟
ﺑﻬﺎﺀ : " ﻫﺰ ﺭﺍﺳﻮ ﺷﺎﻑ ﻓﻴﻬﺎ " ﻣﺠﺎﺵ ﺍﻟﻴﻮﻡ
ﺟﻮﻻﻥ : ﻣﺎﻋﺮﻓﺘﻴﺶ ﻓﻴﻦ ﻣﻤﻜﻦ ﻳﻜﻮﻥ ؟
ﺑﻬﺎﺀ : ﻻ
ﺟﻮﻻﻥ : ﻻ ﺭﺟﻊ ﻣﻤﻜﻦ ﺗﻌﻠﻤﻨﻲ
ﺑﻬﺎﺀ : ﺃﻛﻴﺪ