Glowing Gems

GLOWING GEMS 20: SA PILING NI LEE

"Ano ang ginagawa niyo rito?" Tanong ko sa dalawa.

Tumingin naman sa malayo si Danny. "Pupunta sana ako ng kusina upang kumuha ng tubig nang makita kita papunta rito kaya agad kong pinuntahan si Lee upang samahan akong puntahan ka." Paliwanag ni Danny ngunit tanging tango lamang ang aking naitugon.

Tahimik ulit...

Binalot kami ng labis na katahimikan na tila walang may gustong bumasag nito kaya ako na ang nangahas na bulabugin ang katahimikang ito.

"Danny?" Pagtawag ko rito.

Bumaling naman ito ng tingin. "Bakit? Gusto mo ba ng nectar? Marami ako doon sa garapon. Kung gusto mo iyang nectar na lang ni papa lee-bog." Biro nito dahilan upang bahagya kaming matawang tatlo.

Bigla namang sumeryoso ang paligid. "Bakit hindi mo naipagtapat o nabanggit man lang ang mga bagay na ito?" Takang tanong ko dito.

Hinaplos naman ni Lee ang aking likuran habang napabuntong hininga na lamang si Danny. "Ang mga bagay na ito ay mahirap paniwalaan at tanggapin. Wala akong lakas na ibulalas ko sa iyo ang mga bagay na ito sa kadahilanang ayaw kitang maguluhan at magduda sa iyong sarili. Isa pang dahilan kung bakit itinago ko sa iyo ito ay dahil sa hindi mo ako kayang paniwalaan dahil alam mo namang maloko ako sa buhay at tiyak kong pagtatawanan mo lang ako. Ngunit ngayon ay panatag na ang aking loob dahil sa natuklasan mo na ang mga bagay na ito." Pagpapaliwanag ni Danny.

"Maloko ka nga sa buhay ngunit iyon lamang ay upang pasayahin kami. Bakit hindi mo sinubukang ipagtapat sa akin? Ng sa gayon ay malaman natin kung kaya ko ba itong paniwalaan o pagtatawanan ka na lamang. Ngunit malinaw na sa akin na ang tanging hangad niyo lamang ay ang aking kapakanan. Sa kabilang banda naman ay labis akong nagpapasalamat na binibigyan ako ng lakas upang unawain at yakapin ang mga bagay na nakapaligid sa akin, ito ay sapat na upang makaraos ako sa bawat pagkakataon." Usal ko.

Nasa ganoong paguusap kami ni Danny ay naramdaman ko na lamang ang pagakbay sa akin ni Lee at walang ano ano'y ipinasandal ako nito sa kanyang mga balikat dahilan upang makaramdam ako ng kagaanan at kapayapaan sa aking sarili.

Ipinahinga ko ang aking sarili sa balikat ni Lee. "Kung sakali mang balutin ka ng kalungkutan at pagiisa ay hayaan mong pawiin namin ito. Nandito lamang kami para sa iyo." Pagpapagaan ng loob sa akin ni Lee dahilan upang pumatak ang isang butil ng luha pagapang sa aking pisngi dahil sa kanilang ginawa para sa akin.

"Maraming salamat sa inyong dalawa, kung wala kayo dito malamang mabubuang na ang aking sarili. Salamat sa pagpapalakas niyo ng aking loob, sadyang masyado lamang napakabilis ng pangyayari." Usal ko.

Nasa ganoong posisyon kami nang bigla na lamang dumating si Heneral Icarus at agad na humalik sa noo ni Danny.

"Kanina pa kita hinahanap mahal ko. Halina't tayo ay bumalik sa ating silid at magpahinga." Pagaya ng Heneral sa kanyang kasintahan kaya agad itong tumayo at nagtungo sa aking kinaroroonan at agad akong niyakap nito.

"Mauuna na ako frend, sigurado akong magdamag na labanan ito para sa amin." Natatawang saad ni Danny dahilan upang mapahagikhik ako ng tawa.

Agad namang umalis ang magkasintahan at ito naiwan kami ni Lee sa lugar na ito.

Maginaw sa paligid...

Patuloy sa pag ihip ang nakakaginaw na hangin sa kapaligiran habang nakasilay sa kalangitan ang hugis crescent na buwan.

Narinig ko namang bumuntong hininga si Lee dahilan upang balingan ko ito ng tingin. "Ayokong nakikita kitang nasasaktan at nalulungkot dahil triple ang dulot nito sa akin, kung maaari lang ay ayaw kitang mahiwalay sa akin Gilom. Alam mo naman kung gaano ka kahalaga sa akin sa simula pa lang, huwag ka sanang magtaka kung espesyal ang turing ko sa iyo dahil ito lamang ang paraan kung paano ko maipapahayag ang aking nararamdaman para sa iyo." Pagtatapat nito dahilan upang bumilis ang tibok ng aking puso sa hindi malamang kadahilanan.