تلاعب أدوار

المقدمه

#تلاعب_ادوار ♥️♥️
#المقدمه ✍

ماذا اذا كنتي غلطه ؟! منبوذه من الكل ؟!!  كان الذنب انك بنت حلال بس جيتي قبل وقتك ؟!! بس وين ذنبك انتي ف الموضوع ؟!

قبل 16 سنه

دارين : بخوف حبيبي عارفه ان انقرت فاتحتنا بس ماتجيش
انور  : سكتها بوسه و قرب عليها اشش انا ولد عمك مش حيصير شي و فاتحتنا انقرت الشي حلال و العرس بعد شهر ماتخافيش
دارين : ببس انا خايفه خلينا انراجو
انور  : مسك شعرها و يشم فيه بس انا مانتحملش اشش خلي كل شي عليا مش تثقي فيا انتي
دارين : ابتسمت بشويه اكيد
انور : ابتسم انحبك و قرب عليها و سلمت دارين روحها بضعف منهاا

مر سبوع على يلي صار بينهم و فالسبوع هذا تكرر الشي هذا اكثر من مره و بعد سبوع اخرى اغمى ع دارين و شالوها هلها للمستشفى و من غادي علمو هلها ان حامل 

رغم ان كل شي كان بالحلال و ان انور ولد سيدها بس الغلطه عند الليبين تبقى غلطه انقلبت العيله باكملها عليهم و طرو يقدمو العرس و فعلا قدمو العرس و زوجو

اول شهر كان عسل و حب و رومنسيه و تدليع ع الاخر بس شويه بشويه بدا حب انور يقل و لمعت عيونها اتجاها تختفي شويا ب شويا بدت دارين تحس ان معش يحبها زي قبل و من هنا خش الشك لراسها ان في وحده اخرى اخشت حياته و فعلا تاكدت من الشي هذا و هيا في شهرها الثالث صارت مشكله كبيره بينهم

و"  عايرها انور انها سلمت نفسها لاه قبل العرس حتى و لو بالحلال" و نسى نفسه ان هوا من اوهمها بالحب

بدت من مشكله ل مشاكل و بدت علاقتهم تدمر او دمرت بالكامل و لما ولدت دارين طلقها انور عشان يزوج ب ثانيه يلي حبها بعد دارين

و ماكملتش دارين عدتها الا و هلها زوجوها من راجل اخرى و قعدت البنت عند عيت جدها هل باتها و تربت غادي

للكاتبه ' #wiush_hamo ♥️
___________________________

ابتسمت ب كسره خاطر ب حزن و عيون معبيه دموع و انا نشوف للانسان يلي يكون بابا بس ماعمرش حسسني بالابوه كل يلي نشوف فيه منه الضرب و العقاب و بس

وتوا قاعد يمسح ع شعر بنت مراته و يدلع فيها و هيا تترجى فيه عشان يدير عيد ميلادها ع البحر و تبوس فيها و هوا يضحك عليها 

كان خاطري نصبي قدامه و نعيط بعلو صوتي و نقوله انا بنتك الحقيقه مش هيا انا يلي من دمك مش هيا انا يلي تحضني و تلعبني مش هيااا  .. نزلت دمعتي نار ع خدي مسحتها وانا نشوف للمنظر العائلي السعيد يلي ماعمري كنت فيه حتى و لو بكلمه

اسمي بيان عمري 16 سنه او حنخش لل16 بكرا  كبرت و تربيت عند حني ام بابا صاح ماكنتش هذك الحنه الطيبه بس اقل شي كانت تحبني

ديما تعاقب فيا ع الغلط و عقابها واعر و احيانا تحرش فيا في عمامي و بابا  لاكن ماتخليش في مرات بابا تقرب مني او حتى تهزبني و احيانا تحن علياا و مصروفي و دبشي كلا منهااا كانت صارمه و واعره بس تحبني و مش منقصه عليا شي و انا نعتبر فيها امي حتى نادي فيها امي مش حني