لعنة كاميليا -Camellia's curse

الفصل الثامن 🖤

وانا فاقدة الوعي بدأت اشوف ومضات من الي بيحصل حوليا مشهد وانا بتشال وبخرج من العربية والناس ملموة وعمالة تقول لا اله الا الله ديه لسة صغيرة
مشهد وانا نايمة في عربية وصوت عمار : استحملي يا كاميليا هتبقي كويسة ان شاء الله وهنلاقي الحل وهتعيشي حياتك بس علشان خطري استحملي .
ومشهد تاني كنت شايفة انوار كتير وصوت ناس وهرج ومرج وصوت عمار : جهزوا أوضة العمليات ومش عاوز اي حد معايااااا بسرعة اتحركواااا .
ومشهد كنت نايمة وشايفة انوار الي بتبقي فوق المريض في اوضة العمليات ولقيت واحد واقف جنبي مكنش بصصلي وكان مركز في حاجة بس بصلي وشوفت عيونه الي بتقولي اطمني انا معاكي ومكنش طبعا غير عمار وغيبت عن الوعي تماما  .
فضلت مدة مش عارفة قد ايه وصحيت لقيت نفسي نايمة علي سرير بس مش في مستشفي سرير الاوضة الي في الفندق وعمار قاعد علي كرسي جنبي وساند راسه علي السرير ونايم بصيت عليا لقيتني لابسة لبس غير بتاع امبارح وسليمة مافيش حاجة فاتعدلت براحة بس وانا بحاول  غصب اتوجعت اوي في منطقة القفص الصدري فعمار لقيته اتفزع وقال بسرعة : كاميليا انتي تمام كويسة في حاجة بتوجعك اوديكي مستشفي طب ؟؟
رديت بسرعة : لا لا انا تمام الحمدلله اهدي اتوجعت بس لما حاولت اقعد .
قالي : طب استني اساعدك .
وفعلا ساعدني وقاعدت وقولتله : هو احنا مش في المستشفي ليه؟
قالي : لما عملتي الحادثة خدتك وروحنا المستشفي وطلبت مافيش حد يبقي معايا في اوة العمليات علشان ميستغربوش انك لسة عايشة بعد ده كله دخلت بيكي ويعتبر مكنش فيكي نفس قعدت اعملك شوية اسعافات واحاول ارجع عضمك وضلوعك لمكانها واوقف النزيف لكن بعد حوالي ساعة بدأت كل جروحك تلم وترجعي عادية ومؤشراتك الحيوية تبقي كويسة جدا عملتلك شوية اشعة وكنتي كويسة جدا فخدتك وخرجنا من المستشفي علشان مش عاوز اسئلة ولا اي استفسار عن حالتك وجبتك هنا.
قولتله : تمام ومجادلتوش لان مش اول مرة يحكي حاجة زي كدة وكمان لاني كنت ميتة وعاوزة انام، لقيته هيقوم ويخرج قولتله بسرعة وبرجاء : لا خليك مش عارفة ممكن يحصل ايه انا خايفة .
ابتسم وهز راسه وقعد علي الكنبة وقالي : تمام حاضر هقعد انا هنا وانتي نامي يلا .
اتطمنت فعلا ومخدتش وقت كتير ونمت .
بدأ يزعجني وانا نايمة صوت ماية جاي من الحمام وكأن حد بيستحمي او بيغسل حاجة مش عارفة ، فتحت عيني لقيت فعلا في صوت من الحمام بصيت علي الكنبة لقيت عمار نايم امال مين في الحمام ؟؟ ، النور كان ضلمة والستائر كانت مقفولة فمش عارفة احنا ليل ولا نهار مكنش في غير اباچورة جنب السرير منورة بس نورها كان هادي ، لقيت الماية اتقفلت بس بدأت اسمع صوت خطوات وكان صوتها عالي وواضح وسمعت مقبض باب الحمام بيتفتح براحة وصوت باب الحمام بيتفتح ، طبعا انا معنديش الجراءة اروح اشوف مين مش عارفة ايه العفريت الي جاي يستحمي عندي ده ، بهدوء نديت علي عمار لكن ولا هو هنا : عمااار قوم عمار في عفريت في الحمام اللهي ربنا يكرمك اصحي .
بس برده مافيش اي استجابة لا واتقلب وودي وشه الناحية التانية ، مش عارفة اعمل ايه قولت مبدهاش هقوم اشوف في ايه ، وفعلا قومت براحة وروحت ناحية الطرقة الي بتودي علي الحمام وطلعت راسي ابص لقيت باب الحمام موارب ونور الحمام مقفول والدنيا ضلمة  لسة هقول وانا مالي وهرجع لقيت باب الحمام بدأ يتفتح قدامي براحة لغاية ما تفتح كله وشوفت عينين بتنور واقفة جوا الحمام في الضلمة وسمعت ضحكة عالية لوهلة حسيتها هزت المكان كله مستنش وجريت بسرعة علي عمار وفضلت اصحي فيه : عمار قوووم عمار عماااار .
فاق مفزوع وقال : ايه في ايه عفريت ؟؟
قولتله : اه بالظبط كدة وهو في الحمام .
ضحك وافتكرني بهزر وقالي : يابنتي انتي ما صدقتي سيبيني اكمل نومي بقي ولسة هينام تاني سمعت صوت الماية اشتغل تاني واصوات همس كتير بصيتله لقيته بصصلي ومتنح وقالي : انتي سامعة الي انا سامعة !؟
قولتله : صدقتني بقي امال انا بقول ايه من الصبح .
لقيته بسرعة خدت موبيل وبص فيه وحطه في جيبه هو والمحفظة وقالي : انتي شكلك بقيتي تمام واكيد الي جوا مش حرامي مافيش حرامي بيدخل الحمام يعني فهاتي حاجاتك بسرعة ومتنسيش النوت الي فيها الترجمة ويلا هنمشي من هنا . لسة هتكلم قالي : يلاااا مش عاوز كلام بسرعة .
سمعت كلامه وروحت لشنطتي لقيت فيها كل حاجة لاني معظم الوقت نايمة مفتحتش حاجة وهدومي كانت عادية اخرج بيها عادي قولتله انا جاهزة يلا وكل ده والصوت لسة شغال وبيزيد ، خرجنا من الاوضة وقفلنا الباب ، لقينا انوار الطرقة بدأت ترتعش والاصوات بقت من كل حتة حوالينا عمار مسك ايدي بسرعة وفضل يجري بيا بصيت ورايا واحنا بنجري لقيت ان الارض بدأت تتشقق ويظهر من تحتها نار واصوات صرخات سمعاها وايادي مولعة بتطلع منها ، وصلنا الاسانسير وفضل يطلبه وانا عمالة ابص ورايا وشايفة الشقوق والأيادي بدأت تزيد وتقرب وخلاص كانت  هتصولنا لقيت عمار شدني جوا الاسانسير وطلب اللوبي بسرعة والباب اتقفل..
حمدت ربنا وخدت نفسي بس كنت قلقانة يحصل حاجة في الاسانسير بس محصلش ووصلنا اللوبي ، اول ما الباب اتفتح لقيت الكائن الاسود في وشي روحت مصرخة وقربت من عمار بسرعة وقولتله :  اهرب اهرب هيقتلك بسرعة . لقيت صوت حد غريب بيقول : في حاجة يا انسة ؟؟ هو ايه الي هيقتلك هو انا اعرفك ولا اعرفه اساسا ؟؟
بصيت علي الرجل لقيته بني ادم عادي وانا الي كنت بتخيل بعدت عن عمار وابتسمت ابتسامة سمجة : اووه اسفة شوفتك حد تاني سوري .
وجريت من جنبهم خرجت برا الفندق .
وقفت استني عمار طلع بعد شوية صغيرين وقالي : معلشي اتأخرت كنت بعمل تشيك اوت يلا اركبي العربية .
استغربت وبصيت للعربية لقيتها عربية كيا حمرا قولتله : بتاعة مين العربية ديه ؟
رد قالي : بتاعتي مالك في ايه ؟
قولتله : عربيتك مكنش ده لونها ده غير انها وقعت في البحر
ابتسم وهو بيركب فركبت انا كمان وكمل كلامه : ديه عربيتي التانية خليت قريب ليا يجيبهالي .
وبدأ يتحرك ، مكنتش عارفة رايحين علي فين فسألته فرد عليا وقالي : بصي انا لسة مش عارف بس نروح نفطر الاول وبعدين نخطط هنعمل ايه .
وفعلا روحنا مطعم بس غير بتاع امبارح وطلب اكل وكنت جعانة جدا الصراحة فكلت وبعد ماخلصنا طلب عصير بس انا مشربتش تقريبا جالي فوبيا من العصير لقيته لاحظ فساب العصير بتاعه وبدأ يتكلم : اولا اشربي العصير عادي مش هيجري حاجة متخافيش ثانيا بقي نكلم في المهم دلوقتي احنا عرفنا القصة وعرفنا انك بدخولك للساحة وانك انتي العذراء وبلمسك للنقوش والكلام الي في الكهف حررتي اللعنة تاني مظبوط كدة ؟
هزيت براسه بمعني اه فكمل : وان علشان كريم كان معاكي في الوقت ده مات واتقتل زي ما قولتي صح ؟
هزيت راسي تاني وقولت : تمام
كمل : وعرفنا ان الي الي انتي حررتيه ده هو الساحر بس طبعا بقي عبارة عن مسخ ومن قوة التعاويذ لازم يتغذي علي حاجة علشان يقدر ينبعث تاني ويبقي اقوي من الاول وهنا يجي دورك ودور لعنتك ان انتي كل ما تموتي وكل ما بتتألمي وبتتوجعي ده بيقويه زيادة وهيفضل كدة لغاية ما الحلقة بتاعة النار تكمل ، حلو بس الي مش فاهمه حلقة نار ايه؟
قولتله بسرعة : مش لما روحنا تاني للكهف انا وانت كان في حلقة نار حوالين التابوت وكان في كمان خط بارز في الارض بعدها بشوية فهي ديه تقريبا مفروض حلقة النار بتكبر بتكبر لغاية ما توصل للخط البارز ده  ومن هنا هتبدأ مراسم انبعاث الساحر ، حتي لو لاحظت لما اتحرقت من النار او الحمم الي كانت في حلقة النار لقيناها بتكبر شوية علشان ايه ؟ علشان انا اتألمت ساعتها .
رد وكمل : فعلا هو انا ملاحظتش ده بس فعلا كلامك منطقي وصح فاحنا مفروض نعرف ازاي هنكسر اللعنة ونحبس الشر تاني قبل ما الحلقة تكمل علشان لو كملت هيبقي مش ناقص غير موتك الحقيقي وبدمك هينتهي كل حاجة والبوابة الي عاوز يفتحها هتتفتح والعالم هيتدمر ، بس ثواني بعيدا عن الموضوع انتي فعلا عندك شفافية وبتشوفي حاجات وكدة ؟؟
قولتله : مش عارفة الصراحة بس وانا صغيرة فعلا كنت بشوف خيالات واكلم مع ناس بس بعد كدة اكتشف ان الي كلمتهم دول مش موجدين اساسا وساعات كتير كنت بكلم ناس ميتة مكنتش ببقي عارفة لاني بعرف انهم ماتوا بعد ما اكون اكلمت معاهم يعني مثلا في مرة كنت عند جدتي نايمة عادي بليل لقيت حد بيهزني جامد فصحيت لقيت جدتي واقفة قدامي كان شكلها يرعب شعرها كان منكوش وعرقانة وعمالة تنهج و بالعافية قالتلي جملة واحدة " خليهم يدخلوا عليا الاوضة " قولتلها " مين يا تيتا مش فاهمة " بصيتلي تاني بصة مرعبة وخرجت ، روحت انا جريت لماما وبابا كان لسة عايش وصحيتهم وقولتلهم "تيتا جاتلي وبتقولي خليهم يدخلوا عليا الاوضة قوموا شوفوا عاوزة ايه انا خايفة منها كان شكلها مرعب اوي " قاموا فعلا ودخلوا ولما دخلت وراهم لقيت ماما بتعيط وبابا كذلك وشدوا الغطاء علي وشها وانا كنت صغيرة مش فاهمة بس كنت متأكدة ولغاية دلوقتي ان تيتا كانت واقفة عند الشباك وبتبص علينا وقولتلهم بسذاجة طفلة" تيتا واقفة هناك اهي امال مين الي انتوا غطيتوها ديه ؟ " مركزوش معايا وماما خرجتني بسرعة من الأوضة وبعدها لما جيه الدكتور ووو قالوا ان تيتا لما دخلوا عليها كانت ميتة قبلها بأربع ساعات يعني كانت ميتة قبل ما تجيلي اساسا طبعا انا مكنتش واعية لحاجة وهما برده مركزوش وقالوا اني كنت بحلم
بس وحاجات كتير بس كنت بتنساها لان ملهاش تفسير .
عمار كان مركز اوي معايا وبعد ما خلصت راح قال: علشان كدة ، حظك بقي انك تروحي المكان وبالتالي روح الساحر قدرت توصلك ليه ، بس المشكلة برده مهو كريم الي دخلك الوادي او الممر انتي ملكيش دعوة .
قولتله : بس انا كنت ممكن ارفض زي اصحابي بس كانت في حاجة فعلا مخوفاني وبتشدني اني اوفق واعاند كريم وادخل معاه بس ما علينا ده مش موضوعنا ، دلوقتي عاوزين نعرف هندور ازاي ولا هنروح فين اقرا كدة الجملة الي مش مفهومة ديه الي هي كانت الحل ..
فتح عمار النوت وقال
"  ستبحث عن الاحفاد تجد المراد "
قعدنا ساكتين فترة نفكر احفاد مين ؟ احفاد الساحر ؟ لا مهو مقالش ان الساحر متجوز حتي  , طب احفاد الكاهن ؟ ممكن لانه قال انه متجوز وعاش في مصر
اكلمت انا وقطعت الصمت : عمار بص ممكن يكون قصده احفاد الكاهن احفاده هو شخصيا لان مذكرش في الحكاية جواز غير جوازه هو .
رد عمار وهو بيفكر : ممكن فعلا بس هنوصلهم ازاي هو محددش اي مكان ليه ولا عاش فين ؟
قولتله : ممكن احمد لما ترجم نسي يقول المعلومة ديه وريلي النوت .
خدت منه النوت وفضلت اقرا الكلام والترجمة بس ملقتش حاجة قولت لعمار:  هات طب الصور الي معاك كدة
ادالي الموبايل وفتحت الصور وفضلت اقارن ان كل الكلام الي في الصور في النوت وفعلا لقيت رمز واحد موجود في الصورة مش موجود في النوت تقريبا احمد مخدش باله منه او معرفش يترجمه لانه لغة غير العبري تقريبا فرعوني عملت زوم للصورة وفضلت ابحث عنها في النت مكنتش عارفة اوصل لحاجة وكل ده وعمار مستني يشوف انا بعمل ايه ؟ دخلت علي المدن الفرعوني ورموزها يمكن الاقي حاجة ولقيته كان رمز
أون
مدينة الشمس بالمصرية القديمة أو بالإغريقية هليوبوليس كما اسماها اليونانيون وتقع في ضاحية مصر الجديدة بشمال شرق القاهرة.
قولت بسرعة : ييييس لقيتها احنا كدة هنرجع القاهرة المدينة الي عاش فيها الكاهن هو وعيلته هليوبوليس مصر الجديدة .
لقيت عمار ضحك وقال: يابنت الايه عرفتيها ازاي ؟
بصتله بغرور وضحكت وقولتله : ده انا كاميليا مش اي حد انا .
قالي: طب يلا يا استاذة كاميليا علشان نلحق نوصل القاهرة علي الاقل علي الفجر. 
قولتله بحماس : يلا انا جاهزة .
وافتكرت حاجة فقولتله بسرعة : الاول عاوزة اجيب موبيل جديد اهلي تلاقيهم زمانهم بلغوا البوليس اساسا .
قالي : تمام ماشي بس متقلقيش اهلك انا من ساعة ما مشيوا اخر مرة من المستشفي وانا خليتهم يروحوا ويرجعوا القاهرة واقنعتهم انك لما تبقي تمام هرجعك ليهم بنفسي ممكن يكونوا قلقوا بس مش هيعملوا حاجة يعني.
هزيت راسي ومشينا فعلا حاسب علي الاكل وروحنا فعلا نشتري الموبايل ومرداش ادفع حاجة وملي العربية بنزين واشترينا شوية حاجات علشان السفر وكلمت اهلي قولتلهم اني راجعة وطمنتهم واتحركنا للقاهرة .
ساكتين ومحدش فينا اتكلم والدنيا ليل والجو هادي اكلمت انا : عمار ايه رأيك اموت نفسي انا النهاردة بدل ما اموت بسببه ؟
قالي : كاميليا انتي اتجننتي صح ؟
قولتله : لا لاني عارفة ان انا كدة كدة هموت وهو بينفنن في تعذيبي علشان هو يقوي أكتر يبقي ليه مموتش نفسي انا وكدة كدة هو مش هيسمح اني اموت علشان هو عاوزني في الاخر .
قالي : كاميليا بطلي جنان افرض كان لازم هوالي يموتك ولو موتي من نفسك او من حاجة تانية تموتي فعلا ؟
رديت : يبقي حلو جدا هرتاح وفي نفس الوقت هنقذ البشرية كلها لان طقوسهم مش هتكمل ومش هيصحي .
قالي بسرعة : بطلي هبل يا كاميليا اصبري لما نشوف هتموتي ازاي النهاردة ولسة بدري كدة كدة مش ممكن متموتيش .
قولتله :  بس انا مش هستني ولا هسيب رقبتي في أيديه خليك فاكر.
وفضلنا ساكتين وساندت راسي علي الازاز ونمت بعد شوية فوقت لقتنا لسة في الطريق وبصيت في الساعة بتاعة الموبيل لقتها 11 .
اكلمت وقولت : عمار انت بجد شخص جميل جدا وطيب ومحترم وانا حبيتك وبجد انا محظوظة جدا ان اتعرفت عليك وانك بتساعدني ابقي خلي بالك من نفسك .
بصلي بأستغراب وقالي : اشمعنا بتقولي كدة دلوقتي ؟
قولتله : لاني احتمال تكون اخر موتة فانا مش عارفة فلو موت مش هعرف اقولك الكلام ده في اي وقت تاني .
كنت عارفة من اول ما ركبت مع عمار العربية ان في  مسدس حطه تحت الدواسة شوفته وهو بيتأكد ان هو موجود اول ما ركبنا العربية ، خدته لما نزل في مرة وسابني في العربية ، وبدون أي مقدمات طلعت المسدس ووجهته لقلبي وضغطت علي الزناد وانا سامعة صوت عمار بيصرخ اني مضغطش وصوت الرصاصة بتخترق عضم صدري !!!!