ناير (مكتملة)

قرعة

قصتى بدأت من 17 سنه لما قامت النار فى بيتنا  فجأه وكلت البيت كله باللى فيه , كلت أبويا وأمى وأخواتى الأتنين ومسابتش حد عايش فى البيت غيرى

ساعتها كنت لسه رضيع مكملتش سنه ولقونى تحت أنقاض البيت المحروق وأنا  بصرخ , كانت معجزه أتحاكى بيها  نجع" الشرفاء" كله , وعلشان أبويا الحاج "طلب" أمام الجامع وكان  أكتر  حد محبوب فى النجع كله
كل  الناس اللى فى النجع  كانت عايزه تتبنانى و يربونى فى بيتهم وسط عيالهم، وكانت هتقوم خناقه كبيره بين الناس وصلت أنهم رفعوا السكاكين والسنج على بعض.

لحد ما الحاج  "فكرى  العياطى " واحد من كبار أشراف النجع  وكلمته مسموعه قالهم على فكره ممكن توقف النزاع بين أهالى النجع وتحل المشكله !!

طلب منهم  يعملوا قرعه بالورق , ويكتبوا أسامى كل الناس اللى فى النجع , ويجيبوا أصغر عيل فى النجع وهوه اللى يختار , واللى يطلع أسمه فى القرعه يبقى حلال عليه ياخدنى وسط عياله  !!!!

وبالفعل عملوا القرعه , بس حصلت مشكله تانيه , كل ما أسم حد يطلع فى القرعه الناس تعترض عليه ويطلعوا فيه القطط الفطسانه ويقوله كل عيوبه  , فيعملوا القرعه من تانى , فيطلع أسم تانى يطلعوا فيه القطط الفطسانه ويعترضوا ....وهكذا

فطلع الحاج فكرى العياطى أبو الافكار بفكره جديده  , وهى انى أقعد سنه فى كل بيت  فى النجع  لحد ماسنى يبلغ ال18 سنه وأقدر أستقل بنفسى وأعيش فى بيت لوحدى، وبكده يبقى كل أهالى النجع ربونى وسط عيالهم.
وافقوا على الفكره مبدأيا بس ظهرت مشكله تانيه !!!

وهى مين اول واحد هياخدنى عنده اول سنه؟!!
فأقترح عليهم الحاج فكرى يعملوا قرعه !! وكل آخر سنه يتجمعوا فى المسجد بعد صلاة الجمعه ويعملوا قرعه على مين ياخدنى السنه اللى بعدها وهكذا ...

وبالفعل بقيت كل سنه فى بيت شكل, مره فى بيت ناس غنيه أوى فى النجع، ومرات تانيه كتيره فى بيت ناس مش لاقين حتى كسرة العيش، على حسب ماتحدد القرعه فى آخر السنه.

فيه اللى كان بيعاملنى كويس ,ويعاملنى كويس دى يعنى يأكلنى ويشربنى ويدينى مكان أنام فيه ,ودول كانوا قليلين أوى فى سنين حياتى وفيه اللى بيعاملنى بالسخره ويشغلنى عنده ببلاش من غير حتى مايأكلنى أكله عدله ودول ما أكترهم فى سنين حياتى !!!

عشت فى بيت" على "النجار وأتعلمت النجاره غصب عنى  و شغلنى معاه بالسخره مش هو بس  ...
"عظمه" الحداد  علمنى الحداده وشغلنى  عنده هو كمان بالسخره و"مدبولى" المكوجى و"صابر" اللى بيسلك المجارى فى الكفر و"سطوحى " البنا  وغيرهم وغيرهم طوال ال17 سنه , ده فيه ناس كانت بتتمنى القرعه ترسى عليهم , بس مش علشان يكسبوا ثواب ... لأ.... علشان يكسبوا  عبد يشغلوه بالسخره ببلاش لمدة سنه !!!

أتعلمت كل حاجه وكل صنعه ممكن تتخيلها، وأتقنتها علشان أنا دماغى نضيفه وبفهم بسرعه , وعرفت من قعدتى فى بيوتهم كل أسرارهم وأسرار عيالهم ومراتتهم ,أتأكدت أن نجع "الشرفاء " كله ناس واطيه !!!