"Хоёр дахь эмэгтэй дүр"

16. Ши Жин Нуан (Төгсгөл)

🔅🔆🔅

Орой болоход Хэри нойрноосоо сэргэн хажуу тийшээ хартал Канжүн түүн рүү инээмсэглэн ширтэж байв.

"Яаж ийм зүйл тохиолдсон юм бэ?"

Хэри дөлгөөхөн нүдээр харсаар аяархан асуухад Канжүн бүх зүйлийг сайтар тайлбарлаж өглөө.

Хэриг нөгөө ертөнцөд нас барахад тэр үнэт эдлэлийнх нь нэг хэсгийг аваад бөгж болгожээ. Канжүн түүнд байгаа бөгжөө үзүүлэв. Тэр үүнийг хоёуланг нь холбосон зүйл гэж боддог. Гэхдээ тэр өөрийн жинхэнэ ертөнцөө тэгж их дурссангүй, учир нь санадаггүй гэнэ.

Түүний санаж байгаа зүйл бол анхны биелүүлэх ёстой даалгавар нь өөрийнхөө овог аймгийг хамгаалах явдал байжээ. Түүнтэй уулзсанаа мэдээгүй байв. Эхний удаа тэр түүнийг анхааралтай ажиглахад хайртай эмэгтэйтэй нь адилхан хүн байсан болохоор ихэд цочирдсон аж. Гэсэн ч тэр үед даалгавраас улбаалан эмэгтэйн хувцаслалт, зэр зэвсэг гэх мэт зүйлийг илүүтэйгээр гайхаж сонирхож байв.

Анхныхаа даалгаварт дэлхийн дүрэм журмыг зайлшгүй дагаж мөрдөх ёстой байлаа. Харин тэрхүү даалгаврын дараа тэр хоосон орон зайд байрлах хамгийн хүчирхэг системүүдийн нэгийг эзэмшиж чадсан юм.

Бүхий л хугацаанд залуу хайртай бүсгүйтэй нь төстэй эмэгтэй ажиглаж байсан бөгөөд түүнийг хэдийн мэддэг юм шиг хачирхалтай мэдрэмжид автаж байв. Гэхдээ хэзээ, хаана харж байснаа санаж чадаагүй. Мөн тэр одоо ч хачирхалтай төрөл бүрийн ертөнцөд тархсан өөрийнхөө бодгаль, сэтгэлийн чухал хэсгүүдийг цуглуулж байгаа билээ.

Түүний удирдаж буй систем нь Хэригийн системээс харьцуулшгүй их хүчирхэг, чадалтай. Тиймээс хөтөч нь хэзээ, хаана даалгавар биелүүлэхээ өөрөө сонгож болдог даваа талтай юм. Хэригээс ялгаатай нь тэр боол биш, харин дарга гэсэн үг.

Энэ бол түүний 30 дахь даалгавар юм. Тэрбээр энэ ертөнцөд титэмт хунтайж болж төрсөн бөгөөд биелүүлэх ёстой чухал даалгавар нь эх орноо болон хамгийн сайн найзаа хамгаалах ажээ. Ердөө энэ бүхэн тэр залуугийн санамжид байгаа зүйл билээ.

Агуйд тохиолдсон тэрхүү сэтгэл хөдөлгөсөн өдрөөс хойш Хэри, Канжүн хоёр томоохон хурим найр хийжээ. Эцэг эх болоод улсдаа санаа зовниж байсан хүмүүсийн санаа сэтгэл амарч, тайвширсан байлаа.

Мөн тэд гурван хүүтэй болсон юм. Ууган хүүгээ сайн анд нөхөр, хайрт дүүгийнхээ нэрээр Тэхван хэмээн нэрийдэв. Олон жилийн турш Хэри механик дуу хоолойг ганц ч удаа сонсоогүй.

Улс орон тогтвортой, амар тайван аж төрсөн бөгөөд Хэри, Канжүн хоёр аз жаргалтай хамтдаа өтөлжээ. Бас үлдсэн амьдралаа хоёул тайван өнгөрөөхийн тулд ууган хүүгээ хаан сэнтийд заларсны дараа дэлхийгээр аялахаар шийдсэн юм.

Нэгнээ олсон эрхэм газраа хадгалж үлдэхийн үүднээс өнөөх агуйдаа суурьшсан байлаа. Канжүн агуйг тохь тухтай гэр шиг болгохыг ихэд хичээсэн.

Нэгэн өдөр тэд хоёул агуйн амсар дээр халуун нарны илчийг мэдрэн сууж байлаа. Канжүн хайр татам хөөрхөн эхнэрээ анхааралтай ажиглана. Түүний хувьд эхнэр нь үрчлээтэй байх эсэхийг үл харгалзан нүдэнд нь маш үзэсгэлэн төгс харагдаж байв. Канжүн эхнэрийнхээ жижигхэн гарыг атган зөөлөн илбэнэ.

"Хэрвээ би эхлээд явчихвал чи намайг дахиж хайх уу?" Хэри түүний гарыг зөрүүлэн зөөлөн атгаж намуун дуугаар асуув.

"Чи хаашаа ч явсан хамаагүй би чамайг үргэлж хайх болно оо." Канжүн үрчлээ суусан ч царайлаг төрхөндөө дулаахан мишээл тодруулахад Хэри ч мөн инээмсэглэлээ.

Энэ бол Хэригийн хүссэн амьдрал. Одоо тэр харамсах зүйлгүйгээр нүдээ аажуухан аниад гэрэлтсэн инээмсэглэл тодруулсан чигтээ тайван гэгч нь бөх нойрслоо. Канжүн Хэригийн гар хажууд нь унаж буйг мэдрэв.

Канжүн цийлгэнэх нулимстай ч инээмсэглэж байлаа.

"Намайг хүлээж байгаарай. Би чамайг заавал олох болно оо." тэр ийн хэлээд сүүлийн амьсгалаа хураасан юм.

Тэдний хайрт хүүхдүүд эцэг эхээ үзэсгэлэнтэй газар оршуулсан ба хайрын түүх нь тоо томшгүй олон үеэс үед бичиг найраг хэлбэрээр дурсагдан үлджээ.

Хөндий зэврүүн харанхуй хоосон орон зайд Хэри нүдээ нээв. Гараа харахад эргээд залуу болсон байлаа.

Харин энэ үед механик дуу хоолой ярьж эхлэв.

"Эргээд тавтай морил, хөтчөө. Энэ даалгавар цуцлагдсан. Манай дээд удирдлага хүчтэй вирус нэвтэрч орсонд тун сэтгэл хангалуун бус байгаа. Хөтчийн хувьд, та бидний тогтоосон дүрмийг санаатайгаар үл тоомсорлосны төлөө шийтгэгдэх болно. Мөн таныг буцаж ирүүлэхгүй, бүх даалгаврыг цуцалж болох байсан гэдгийг санаарай! Ямар ч байсан та анхнаасаа бидний нөхцлийг хүлээн зөвшөөрсөн болохоор бидний тавьсан дүрэм журмыг заавал дагаж мөрдөх ёстой! Шийтгэлийн хувьд танд өөрийн ертөнцөд үлдэх ердөө нэг сарыг олгож байна. Гэсэн хэдий ч энэ нь бага төвшний шийтгэл юм шүү! Мөн бид таны бүх дурсамжийг арилгахын тулд чадах бүхнээ хийсэн. Гэхдээ одоо ч ямар нэг зүйлийг санаж байж болно. Энэ хооронд манай инженер халдагч вирусийг устгах гэж хичээх бөгөөд бас таны даалгавраас олж авсан бүх дурсамжийг цэвэрлэн арилгахын тулд хичээх болно." хэмээн Механик дуу хоолой тайлбарлалаа.

Хэри түүний зөв гэдгийг мэдэх тул бүхий л хугацаанд дуугүй байв.

•Нарана•