ထာဝရသူငယ်ချင်း (B.F.F) (Z+U){Completed}

13: Silence

(Unicode)

အိပ်မပျော်သည့် ညများကား နေ့စဉ်ရက်ဆက်ဖြစ်လာ၍ အိပ်ဆေး သောက်ကာ အိပ်နေရသည်မှာ သုံးလေးရက်မျှပင် ရှိခဲ့ပြီ။ သူကလေးကို မမြင်မတွေ့ရသည်မှာ သုံးပတ်ပင် ပြည့်လေပြီ မဟုတ်လား။ အိပ်ဆေးမှသောက်၍ ကျွန်တော်မအိပ်လျှင် သွေးသစ်ကို မမြင်ရခင် စိတ်ကျန်းမာရေးဆေးရုံ ရောက်သွားနိုင်သည်လေ။

ကျွန်တော့်အကြောင်းကို သိ၍ထင် မေမေရော၊ဖေဖေရော၊ ညီမလေးရော၊ တစ်ယောက်မျှ လာမနှိုးကြချေ။ ယခင်က ကျောင်းပိတ်ရက်ပင်ဖြစ်လင့်ကစား ဖေဖေကလာနှိုးတတ်သည်လေ။ ယခုတော့ တစ်ယောက်မျှ လာမနှိုးသည့်အပြင် တစ်အိမ်လုံး တိတ်ဆိတ်နေလေသည်။ ကျွန်တော့်အပူက တစ်အိမ်လုံးကိုများ ကူးစက်သွားပြီလား..။

နာရီကြည့်မိတော့ ဆယ်နာရီ ပင်ထိုးနေပြီ။ 'ငါ..ဒီအချိနိထိ..အိပ်နေမိတာလား.....' ဟူ၍ အိပ်ယာမှထကာ ရေချိုးအဝတ်အစားလဲပြီး မီးဖိုခန်းသို့ တန်းဆင်းလာမိတော့သည်။ မနက်စာက အဆင်သင့်။ စားချင်စိတ်မရှိ၍ ကော်ဖီခါးခါးတစ်ခွက်ကို တစ်ငုံမော့သောက်လိုက်မိသည်။

ရုတ်တရက် ဧည့်ခန်းမှ စကားပြောသံကြားလိုက်ရ၍ သောက်လက်စ ကော်ဖီ ခွက်ကိုကိုင်ကာ ထွက်လာမိသည်။

"ခလွမ်း.............."
တစ်ချိန်လုံး တောင့်တသတိရနေသော လူတစ်ယောက်ကို ရုတ်တရက် မြင်လိုက်ရ၍ လက်ထဲမှ ကော်ဖီခွက်ကို သတိလက်လွတ်ဖြစ်ကာ လွှတ်ချလိုက်မိသည်အထိ။

ဧည့်ခန်းတွင် ကြယ်စင်နှင့်အတူ စကားပြောနေသူက သွေးသစ်..။ ကျွန်တော်ထွက်လာသည်ကို မြင်တော့ သူကလေးက အပြုံးတစ်ပွင့်ဖြင့် ကြိုဆိုသည်။ မျက်လုံးအပြူးသားဖြင့် ကော်ဖီခွက်ကို လွှတ်ချလိုက်မိသော ကျွန်တော့်ကို သွေးသစ်က

"ပူကုန်တော့မှာပဲ...ဘယ်လိုဖြစ်တာလဲ...ကို..ရယ်..ရရဲ့လား....." ဟူ၍ သူကလေးလည်း ရုတ်တရက် သတိလက်လွတ်ဖြစ်ကာ ခေါ်လိုက်မိသည်က 'ကို'။

ပြီးမှ နှစ်ယောက်လုံး သတိမူမိသည်က ကြယ်စင် ရှိနေသည်ကိုပင် ။ သူမလည်း ရုတ်တရက် ကြားလိုက်ရ၍ အံသြ သွားဟန်တူသည်။ သုံးယောက် လုံး တစ်ယောက်မျက်နှာ တစ်ယောက်ကြည့်ကာ စကားလုံးများတိတ်ဆိတ်နေခိုက် ထိုတိတ်ဆိတ်မှုကို စပြီး ဖြိုခွင်းလိုက်သူက ကြယ်စင်။