ما بعرف اديه نمت...وما بعرف وين انا...استيقظت على صوت طرقات خفيفة ع الزجاج..رفعت راسي بسرعة ... لحد م شفت شخص واقف عم يطرق عالزجاج..ت اصحى...نزلت الشباك شوي...لسة عيوني مغمضات...شايفة اسود بأسود...
لحد م صارت الرؤية عندي اوضح...عدلت شعري المبعثر...وشديت عضامي..
ورجعت تطلعت بالشخص الواقف قدام الزجاج
ليش هون؟
* انا وين؟
# سارة انتي بشارع مسكر...ونايمة بالسيارة...ليش؟
* تعبانة...
# طب انزلي انزلي...انتي عند بيتنا...تعالي كملي نومك عنا..
* زوج امك هلأ بكون بالبيت
# لاء اتطمني...مسافر صرله شهرين..وناوي يرجع بأول السنة الجديدة..
* امك بالبيت؟
# يس...يلا تعي انزلي
* يلا يلا..
قلبي صار يرجف...لمجرد التفكير فيها...وكأني رجعت لايام زمان...
صراحة ما كنت بعرف عنوان بيتها الجديد...وكنت بمشي بهالسيارة بدون اهتداء...عدلت شعري وزبطته...رشيت من العطر اللي كان موجود بالسيارة... ونزلت من السيارة...حضنت عز بقوة وصار يضحك
اشتقتلك
# وانا يا عزوز...كتير يا حبيب قلبي..
* بعدك بتحبيها
# لمين
*لماما
# وليه بالله؟
ضحك لانك انعجقتي
ضحكت معه وقلتله شبه سامي ...
* من اي ناحية؟
# بكل النواحي
* الشي الوحيد اللي مو فاهمه...انتي تطلعي عمتي!
# وشو فيها؟؟
* مهو يعني...بعرفش...يلا تعي...
حطيت ايدي ع كتفه وقلتله اه يلا.
واول م وصلنا عالبيت فتح باب الترس...متحول الترس لحديقة مصغرة... مليانة ورد..مليانة احواض نعنع وريحان..ريحة الياسمين معبقة المكان...وبكل مكان في ورد...ومن الحديقة لباب المطبخ...
انت جيت ماما؟
سمعنا صوتها من جوا المطبخ
*اه حبيبتي...وفي معي ضيوف
# يتفضلوا...البيت بيتهم كانت عم تحكي هاي الجملة وهي عم تمشي من مطرح م كانت لعنا...
وفجأة وقفت وسكتت...انصدمت...ابتسمت ابتسامة مكسورة وانا سرحانة بعيونها...
حكتلي سارة...
* بعد زمان عنك زين
# كيف...كيف حالك؟
* بخير
قاطعنا عز ماما...سارة كانت نايمة بالشارع المسكر ...
* ما كنت بعرف اني عند ....بيتكم علقت وانا عيوني لسة معلقة بعيون زين..
البيت بيتك...يا سارة...
# تسلمي...
من متى صار في بينا رسميات بهاد الشكل؟ وانتي اللي كنتي تدبحيني اذا ناديتك بإسمك؟
واحتراما لوفاة مروة...شلت عيوني عن عيون زين..
تعالي نقعد...بالصالة...احسن من الوقفة بالمطبخ...عز...اعمل فنجانين قهوة...وخلي تبعت سارة سادة .
بعدك حافظة؟؟ وعارفة كيف قهوتي؟ صحيح انه شي عادي وطبيعي...لكنه كبير...بالنسبة الي...غيرك كان سألني كيف قهوتك...بحكم البعد...والفراق..
سمعت انك كنتي بالمشفى...
* عملية.... اغتيال
حطت ايدها ع قلبها بخوف وقالت عرفت...بابا حكالي...الله يلعنهم...بعرف انه ...عملتي عملية...استئصال كلية...ورجل اصطناعية...المهم انك منيحة هلأ
سكتت للحظة..اقولها ولا ما اقولها؟ احكيلها اني منهارة ع موت مروة ؟؟
بهاي اللحظة دخلت بنتها صحيح...ما بتعرفي سلوى صح؟
* ما صحتلي الفرصة اني اتعرف عالقمر
# بنوتي الحلوة ...ماما روحي سلمي ع سارة
قربت لعندي ..شبه امها بالضبط...باست خدي برقة ولطافة... ضحكتلي....ضحكتها شبه ضحكة زين بالضبط...
شغلت زين سيجارة وقالتلي ترا مسموح التدخين
* مبين وابتسمنا
#طمنيني عنك يا سارة.. كيف الجميع؟ كيف البزنس.؟ كيفك انتي ومروة!
* الجميع بخير...بتتذكري..اخر شي قيصر وجود تزوجوا....وهيها حامل ..
# جد؟؟ والله منيح...بجيكي هلأ وريث للبزنس...
* بالضبط...
# والبقية؟ سامي قاسم...رزان وابتسام...ماري سيدرا...يعني الكل
* سامي لسة زي مهو...قاسم بده يتزوج بأخر الشهر...رزان وابتسام بعدهم هم هم...عم يفكروا يتبنوا صبي...ماري منيحة....
# بقية اخوانك..خالد ورد عنان ليلى!
* كلهم مناح...خالد بده يخطب بس مو هلأ...ورد بدها تقدم ع جامعة...عنان وليلى هيهم بخير..
قدملي عز القهوة وبلشت اشربها ع مهل
#صحيح والبنوتات...كاتي وجوان؟
* بياخدوا العقل... لازم شي نهار....يتعرفوا ع سلوى...رح ينسبطوا كتير سوا
# اه اه...جيبيهم شي نهار وتعوا...
* ان شا الله
#وانتي ومروة كيفكم؟
يا ريتك ما سألتي هاد السؤال...الشيء الوحيد اللي كنت بستناك تسأليه عشان ما اجاوبك.
اخدت وقت وانا ساكتة ...لحد م قالت شكله..الوضع متأزم بينكم؟
هزيت راسي بالنفي..
لكن؟
طفيت السيجارة وشربت من كاسة المي بسرعة...تعلقت عيوني بعيونها...لحد م تغرغرت عيوني.... قامت قعدت جمبي وحكت سارة ايش في؟
مسحت دموعي اللي هربت وقلتلها ما في شي..
وابتسمت ابتسامة مكسورة...بلى فيك شي...من اول م شفتك وانتي وجهك اصفر...وهزيلة جدا... كتير ضعفانة انتي . .في شي صاير يعني؟
* زين...مروة...ماتت...ماتت اول م طلعت من المشفى...قتلوها
سكتت زين وهي عم تطلع فيني... مسكت ايدي ومسحتلي دموعي زي زمان
شدي حيلك سارة.....بعرفك قوية.
# بس انا.تعبت...تعبت من اني اضل قوية...كل شي..عم بصير اسوأ من قبل.. من وقت موت فرساني ..وموت رشاد....وهلأ مروة...
* انا اسفة..اسفة اني مش قادرة اعملك شي...اسفة اني عم بشوفك هيك ومش قادرة اتصرف..
مسحت دموعي لاء زين...انا اللي اسفة...جيت خربت عليك هدوءك...ما كنت بعرف اني انا عند بيتك...شكرا عالقهوة.. لازم امشي.. وارجعي...لامورك ويومك...
سلمت عليها وودعت عز وطلعت...الهروب...يمكن هروب من حالي..من بؤسي وحزني...كانت زين عم تراقب خطواتي الراحلة بعجز...الشخص الوحيد اللي كنت مستبعدة اني اشوفه...اخر شخص كنت متوقعة اني اقابله بخضم همومي...
ركبت السيارة وسقت فيها بعيدا عن بيت زين...رن تلفوني عشرات المرات... الساعة الان الثالثة عصرا...
رديت بدون م انتبه عإسم المتصل الو.
* سارة
# رزان...اه معك
* كيف حالك سارة؟
# بخير بخير..وانتوا؟
* نحن بخير...لا تقلقي...خالتو ام فياض ما قصرت..
# بعرف...مروة كانت متلها.
* وينك انتي؟ الواضح انك بالسيارة؟
# اه..
*طب أمورك منيحة؟
# ما بعرف..ما اظن...لاء...بلى...بلى...لاء مش منيحة...بعرفش..رزان بعرفش...
* طولي بالك...كل شي بينحل...وينك انتي طيب؟
# ما بعرف...
* متى ناوية تجي لهون؟
# مو هلأ....بس اانتقم لموت مروة...
وانقطع الخط ..شكلي دخلت ع شارع الشبكة فيه ضعيفة...
رجع تلفوني رن ..اه رزان..
# سارة
* هاد الصوت مش صوت رزان..شريف...شو بدك
# بدي اشوفك...تجي لحالك...بدون رجالك.. بدون فرسانك..
* عشان تغتالني...
# لاء...بدنا نحكي..نتفق..
* نتفق ع شو! بتعرف مين انا؟
# سارة سارة...قلتلك انتي ولا حدا.
* لا بلى
# مين يعني انتي؟ شخص لا بقدم ولا بأخر
حكيتله ببرود اعصاب انا اللي رح امزع رقبتك انت واللي معك واحد واحد...بدم بارد...اللي رح تدفنك وانت عايش...واللي رح تخليك تبوس ايدها...مشان تخلصك وتقتلك
وسكر الخط بوجهي جبان.
ركنت السيارة ع جنب..وقعدت افكر مع حالي شوي...لحد م حسيت ببرود بالسيارة
كنعان..
* سارة..
# أظهر..
* ثواني
وظهر جمبي كنعان بهيئته البشرية
عم بتفكري تروحي للموت!
* عم بفكر انتقم
# لاء سارة...الانتقام مش حل
* كنعان...وفرلي نصائحك شوي...ما بدي فلسفة
# طيب طيب.....عالاقل خدي معك فرسانك
* ما بدي اخد معي حدا...مو مستعدة أخسر حدا كمان..
# والحل؟
* ما بعرف...عم بفكر اني ما اعمل اشي....بس بنفس الوقت...سمعتي ك زعيم اقوى واكبر منظمة...تتراجع عن قرار الانتقام...والتخلص من اللي عم يلعبوا معها العاب وسخة...لاول مرة بحياتي بحس حالي محتارة لهاي الدرجة...حاسة حالي عاجزة...وفاة مروة ..دبحتني...بس بنفس الوقت لما شفت زين... في شي جواتي رجع دق...
# شفتيها؟
* اه...نمت بالسيارة بشارع مسكر...وصحيت على وجه عز... وأكتشفت اني عند بيتهم... قعدت عندها شوي...حسيت حالي غبية لما حكيتلها...حسيت اني خربت عليها صفاء يومها..وهدوءها...ورجعتها للهم اللي كانت عايشته معي.
# ترا...زين اتطلقت..
* نعم؟
# ما قالتلك؟
* لاء...حكالي عز انه مسافر صرله شهرين
هز براسه اول م طلقها سافر...الغبي كاتب البيت بإسمها...وما اله مطرح هون..ف راح سافر عند ابوه بالامارات...
# كويس..
* شو الكويس بالموضوع...سارة هاي فرصة جديدة الكم
سكتته لاء...هي اللي عملت فيني هيك...هي اللي اختارته عني... وبعدين...احتراما لوفاة مروة ..ما بدي ولا اشي..
# براحتك...بس لو انا محلك...بغتنم هاي الفرصة
........
اغتنم الفرصة؟ مع زين؟
صحيح اني ايام زمان كنت بخبص... كنت بعمل اشياء ما في حدا عاقل بيعملها...كنت شخص غلط وماشي غلط..وما زلت...خنتها كتير...بس بمعرفتها...ومو مبرر ابدا هاد الشي بعرف...بس كنت بكل ليلة ارجعلها هي...واختارها هي في كل مرة...رغم علاقاتي المتعددة..بس كانت هي اختياري الوحيد دائما..
لكن هي اختارت شخص غيري...اختارت انها تعيش حياة عادية مع واحد عادي مهندس...اختارت هاد الشي بإرادتها وما فكرت للحظة بردة فعلي .
وفوق هيك كنعان بدوياني افكر واغتنم الفرصة؟
طب ومواساتي لوفاة مروة! ليه ما حدا عم يواسيني...حتى كنعان ..ما حدا فيهم واساني..
وبنص العجقة..والهموم...ما عملت عزا لمروة...ما عملت شي...ولا حتى رثيت حالي بحالي...
وتمنيت لوهلة...انه يكون كل شي حلم...واصحى الاقي حالي بنت ال١٤ سنة...اللي لسة ما عرفت حسين الكويتي...ولا كانت بتعرف ايا شي..
واصحى الاقي حالي بعدني هديك البنت...الي كانت تخاف من بكرا...وتضل تفكر بالمجهول...
اللي عايشة بس ...ترضي حالها...وتفكر بكل شي وبكل التفاصيل...واللي ما كان يهمها اي شي...غير حالها بس....لا فلوس...لا عز...لا جاهة..ولا القاب ومسميات اطلقوها البشر عشان العنصرية بين بعضهم...وعشان احنا بمجتمع طبقي...اللي معه مصاري بيسوى...واللي ما معه وجوده وعدمه واحد..
رغم انه عيلة الوريث ما كانت عائلة فقيرة..ولا ميسورة الحال ولا حتى متوسطة....كانت عائلة غنية بحكم معارف الجد عارف...وبحكم اعمال عمي ماهر وعمي رأفت...وكامل...وبحكم معارف جدي الطيب...
وبحكم تاريخ العائلة المشرف...
بس عمره ما كان بهمني هاد الشي...لا جاه ولا نسب ...
ليش صار كل شي؟...ليش...بالذات معي من بين كل احفاد الوريث....ليه طلع نصيبي بهاد الشكل...ليه ما كنت زي ماري سيدرا وأخوها ...ليش ما طلع نصيبي بالحب زي تالا واخوانها ...او حتى...ولا شي..!
كانت هي الاسئلة اللي شاغلة بالي ...اكلت عقلي وعملتلي قلق لسنوات طويلة...عملتلي ارق وتوتر...وزهق من حالي...
وكان نفسي اعرف....شو الحكمة من اني اكون بهاد الشكل...وانا الي بآمن بوجود الحكم بكل شي..
