اسكريبتات تقي الله على

يوسف ٢🌹❤️

هو المفروض يكون عدي انهارده علي جوازنا تقريبا ه شهور و بصراحة هما احلي كام شهر عدوا عليا في حياتي مش علشان عدوا كلهم حب و فرح و قلوب لأ طبعاً كان في كام مشكله قابلتنا و احنا في الاول كده اه والله بس كنا بنعديها يعني.. كانوا معظمهم لاننا لسه مش متعودين علي بعض و علي طباع بعض و علي عادات كل واحد في البيت يعني يوسف مثلا متعود بعد ما نصلي الفجر يفضل صاحي لحد تاني يوم و ماينمش و يبقي عايزني اقعد معاه و ماسيبهوش لوحده و انام فاقعد معاه و افضل انا عماله انام علي نفسي و هو كل شوية يتكلم معايا في اي موضوع و لا حتي يسمعلي الورد بتاعي علشان مانمش منه و مش فاهمه ليه العذاب ده يعني ما ينام عادي ما ينام زي بقية مخاليق ربنا ما بتنام بعد ما يصلوا الفجر لااا ده يصلي و يقرا ورده و يفضل مقعدني جنبه و مش فاهمه و انا مالي انا.. انا عايزه انام يا بشر هيبقي ورايا حاجات تاني يوم بالهبل تنضيف و غسيل و غدا و انزل لماما اللي هي حماتي يعني بس هي ماما حاليا.. هعمل ايه بعدين لما ابدأ اشتغل انا لسه مخلصة الكلية من شهرين و بفكر ادور علي شغل لكن المهم دلوقتي انها كلها مشاكل و حاجات من هذا القبيل.. يعني كلها اختلافات بس في عادات كل واحد فينا في البيت و بصراحه احنا اتشلينا لحد ما شوفنا نظام نمشي بيه او بصراحه لسه بنشوفه مع بعض و بنطوره.. هي الساعة دلوقتي تلاته كدا المفروض يوسف فاضله ساعة و يجي و انا الحمد لله كست بيت شاطرة طبعاً مخلصه اللي ورايا و عامله الغدا و مستنياه و لسه طالعه من عند ماما من شويه فقولت بدل القعده دي اما اروح اقري شوية و لا حاجة و بصراحة انا بقالي كتير منزلتش اجيب كتب و للاسف الاسيف المؤسف انا هتسحب و ادخل اجيب كتاب من مكتبة يوسف و مش عارفه انا هتسحب ليه و انا لوحدي بس هي تعتبر عمليه انتحاريه بصراحه اني اخد كتاب من مكتبته دي.. يوسف مابيحبش حد يمسك كتبه بيخاف عليهم جدا و بيخاف اني حتي اكرمش ورقة و انا بقلبها و مع اني بحاول اقنعه اني هحافظ عليهم و اني بحافظ علي الكتب جدا و مكتبتي تشهد لكن مفيش فايده فكالحراميه و علي طراطيف صوابعي روحت ناحية مكتبته و انا بتلفت حواليا.. ثانيه واحده ايه الهبل ده امشي عادي يا تقي مفيش يوسف هنا ايوا ايوا احم احم المهم اخترت روايه رومانسيه من عنده و قعدت علشان اقراها و اول ما فتحتها و بدأت اقرا لاحظت حاجة خلت قلبي يسيح كدا و الله و ينبض بسرعه كان محدد كده علي جمل حلوة اوي في الرواية و عامل فوقيهم سهم صغير كدا و كاتب (الي تقي) كان بيهديهم ليا.. ااه الجمل حلوين بشكل خلتني اقفل الكتاب تاني و احطه مكانه و اقعد استناه و انا مفيش حاجة في دماغي غير صورته و علي لساني كلمة احمدك و اشكر فضلك يارب عليه و الله و فضلت قاعده مش زهقانه لحد ما الباب خبط جريت بسرعه قبل ما يطلع مفاتيحه و يفتح هو انا مش فاهمه اوي ايه لازمة التخبيطة دي طالما هيفتح بالمفتاح لكن ده مش مهم دلوقتي المهم اني عايزه اشوفه و اول ما فتحت كان باصص لتحت لجيبه بيطلع مفاتيحه فرفع راسه و ابتسملي.. ابتسمتله و حضنته علطول كان ماسك شنطة الشغل بتاعته في ايد فحضني بايد واحده و حاوطني بيها شوية و بعدت عنه = حمد الله علي سلامتك
- الله يسلمك بس ايه الحضن الحلو ده
= و هو اول مره استقبلك بحضن يعني
- لا بس كنت بدخل الاول و احط حاجتي اللي معايا كده و تحضنيني براحتك بعدها
ابتسمت = لا اصلك وحشتيني زياده انهارده
- يا سلام ده انا اوحشك علي طول بعد كده
= و هتعرف تفضل قاعد بعيد عني كتير كده علشان اوحشك
ابتسم - لا معاكي حق.. انت بتوحشيني اصلا من ساعة ما بنزل اول سلمتين الصبح و انا رايح الشغل
ابتسمت= يبقي خلاص يلا ندخل علشان تاكل
- يلا يا قمر انا جعان اوي اصلا.. انت عملتي اكل ايه صحيح؟
= امم انت بتحب ايه؟
- لا يكونش عملتي البيتزا القمر بتاعتك دي
ضحكت = برافو عليك
- اوباا ده حظك بقي اني جايب بيبسي معايا
= يبقي كده الاكله كملت يلا علشان ناكل
- يلا
و دخلنا غير هدومه و انا حطيت الاكل و قعدنا ناكل بس كان شكله سرحان و في حاجة كده طول القعده حتي و هو بيتكلم معايا شغلاه كان شكله متضايق من حاجة و مش فاهمه من ايه المهم قومت شيلت الاكل و روحت الصاله كان قاعد علي الكرسي بتاعه قدام الشباك و سرحان في السما روحت عنده و شديت الكرسي بتاعي انا كمان قدامه و قعدت و حركت وشه ناحيتي انا بصلي و ابتسم = سرحان في ايه؟
اتنهد - مفيش
= طيب ايه شَغلك شكل في حاجة مضايقاك من ساعة ما دخلت
- صدقيني مفيش
= امم طيب هاتفق معاك اتفاق ماشي؟
- ماشي
= مش لازم تكلمني لو في حاجة شغلاك كده كتقي مراتك و حبيبتك و ام ولادك بإذن الله قريبا كلمني علي اني صاحبك مثلا لحد ما ابقي سرك و امانك و الكلام ده يعني
ضحك جامد - فاكره؟
ابتسمت = فاكره
- امم بس هو بعيداً عن انك بقيتي اماني و سري و حبيبتي و اكتر لكن طيب المفروض اعمل ايه دلوقتي؟
= مفيش يا سيدي انت تقعد كده و اخترلك اسم انشاله نوفل حتي و كلمني علي اني هو و براحتك يعني
- امم اختار اسم؟
= لا لا و لا اقولك ينفع اختار انا؟
ابتسم - اختاري
= يعقوب.. سميني يعقوب
رفع حاجبه و هو مبتسم - اشمعني يعقوب؟
= علشان يعقوب محبش حد اد يوسف و انا بردو بحب يوسف بتاعي زيه
ابتسم اكتر - تقي انا..
قاطعته = اوعي يا باشمهندس تكون هتقلبها رومانسيه و انت شاطر فيها كدا انا قلبي ضعيف
ضحك - سلامة قلبك والله مع اني كنت هقول كلمتين دلوقتي يستاهلوكي
= اسمها تستاهليهم
- تؤ تؤ هما اللي هيبقي حاجة حلوة بالنسبالهم انك تتوصفي بيهم فهما اللي يستاهلوكي
= يا خبر ابيض عليا يعني حتي و انا بقول متقولش بتقول
ضحك - الله ما هو الواحد كده بينسي نفسه قدامك و بيبقي لازم يقول احلي كلام
= ايوا ايوا خدني يلا في الكلام و ماتقوليش ايه مضايقك لا يا بيه معاك يعقوب هو هيتصرف.. احم احم عامل ايه يا چو؟
ضحك - چو؟ لا تمام الحمد لله كويس
= اومال مالك يا بني سرحان كده و مش مركز
- خايف اقول بصراحه
= لا يا عم ماتخفش.. خايف ليه يعني؟
-مفيش بس اصل عارف تقي مراتي بتخاف بسرعه و من اي حاجة و مش عايز اقلقها بصراحه
= يعني انت فكرك انك كده يعني قلقان لوحدك و مش قالقها معاك.. ماهي ملاحظة و خايفة اكتر لانها عايشه في افكارها
- تفتكر كده؟
= ايوه يا عم اتكلم بس و احنا نبقي نشوف هنقولها الموضوع ازاي بالراحة
اتنهد - ماشي ماشي هقول
سكت شوية = هاا ما تقول يا چو
بصلي في عنيا و كان قلقان - احمد
قلبي وقف و حسيت اني اتهزيت من جوا و دعيت مايكونش اللي في دماغي = ا.. احمد مين؟
- احمد يا تقي احمد اللي ضربته قبل كده
غمضت عيني و انا بحاول اهدي و عايزه يوسف ما يقلقش و يتكلم = يعقوب يا يوسف يعقوب.. ها ماله احمد
- جالي الشغل انهارده
بلعت ريقي بالعافية = و بعدين
- م.. مفيش
= اتكلم يا يوسف انت بترمي قنبله و سايبها تنفجر في وشي
- لا مفيش قنابل و لا حاجة بس جيه انهارده و كان محروق اوي من الضربة اللي ضربتهاله يومها
= و بعدين ؟
- و لا قبلين
= يووسف
- يوووه يوسف يوسف.. نعم
= يا يوسف ماتقول علطول
- يا تقي انا قلقان من رد فعلك انتي
= يعني و هو انت كدا مش قالقني؟ قول علطول
خد نفس طويل و بصلي - جيه يهددني يا تقي جيه قالي اني اللي رحمني منه من ساعتها انه كان مسافر تاني يوم لكنه رجع و هيردلي الضربة بتاعتي
ساعتها حسيت حرفيا اني مش حاسه بجسمي.. جسمي كله نمل فجأة و حسيت اني بردانه و خايفه.. خايفه علي يوسف جداً.. يارب ما تأذنيش فيه يارب.. قومت بالعافيه و حاولت اقعد علي رجله لكن كانت اقرب اني وقعت علي رجله مسك ايدي و هو باصصلي بقلق - مالك؟ مالك يا تقي؟ انت كويسة؟
= ك.. كويسة يا يوسف بس.. بس ما تخفش يا يوسف هو مش هيأذيك و هتفضل كويس علطول بإذن الله علشاني انا
حط ايده علي وشي و بصلي في عنيا - يا تقي انت فكراني خايف عليا.. باس ايدي.. يا تقي انا خايف يأذيني فيكي انت انا خايف بس يفكر يعملك حاجة ساعتها انا مش هستحمل هتجنن و ممكن يحصلي حاجة
حضنته -بعد الشر عليك يا يوسف انا هفضل كويسة ان شاء الله.. ان شاء الله ربنا هيحمينا منه و من شره و مفيش حد فينا هيحصله حاجة
حضني هو كمان = ان شاء الله يا تقي.. ان شاء الله
شوية و بصلي = طب ايه رأيك ندخل ننام انا تعبان شوية
اتخضيت - ليه؟ ليه يا يوسف؟ تعبان ليه؟ مالك؟
مسك ايديا الاتنين و بصلي = اهدي اهدي مفيش حاجة شوفتي اهو ده اللي انا كنت خايف منه اهو هتفضلي خايفه و قلقانه كده حتي من اقل حاجة
- ي.. يا يوسف يعني مش من حقي اقلق عليك
= لا طبعا يا روحي من حقك لكن مايبقاش قلبك خفيف كدا انا بقولك تعبان شوية تعبان من الشغل بس مش من حاجة تانية
- طيب خلاص ماشي تعالي ندخل ننام شوية
ابتسم = يلا
قمت من علي رجله و دخلت في السرير بس كنت برتجف من فكرة انه ممكن يعمل حاجة ليوسف دي .. انه ممكن يأذيه او حاجة تحصله.. فضلت نايمه بفكر و خايفه لحد ما لقيته فجأة شدني ليه جامد حضني و بصلي حطيت ايدي علي وشه و ابتسمتله و دخلت جوا حضنه بس حقيقي مرعوبه و برتعش لقيته ضغط عليا جوا حضنه و اتنهد = يا تقي ماتخفيش كدا بترتعشي كدا ليه بالله عليكي اهدي خوفك ده مضايقني انا
بصتله - ي.. يا يوسف خايفة يحصلك حاجة
= و انا بقولك ماتخافيش انت مش شايفه اني اقدر احميكي و احميني منه و لا ايه؟
- لا لا والله ما اقصد كدا انا عارفه انك تقدر و اكتر والله
= اومال ايه بقي؟ بتترعشي و خايفه و انت في حضني؟ ينفع؟
- يا يوسف خايفه عليك.. خليك جنبي بس
= ما انا جنبك اهو و مش هروح في حته
بصتله - ط.. طب ما تاخد اجازه من الشغل يا يوسف و خليك قاعد جنبي علطول
بصلي - هو في ايه يا تقي؟ هستخبي منه يعني و لا ايه؟ متخلنيش اروح اضربه تاني لانه مخوفك و قلقك كده
دخلت في حضنه = لا.. لا بالله يا يوسف ما تروحش لحد انا كويسه اهو
- كويسة؟ هو فين اللي كويسة ده؟هو مخوفك اوي كدا ليه؟
= يا يوسف انت متعرفوش يا يوسف.. انا لمجرد رفضت اني اتكلم معاه و اتصاحب عليه زي ما هو عايز كان هيعتدي عليا ده كان هيخطفني خلي سلمي تاخدني مكان معين و انا مش فاهمه و خلاها تمشي و استفرد بيا انا و لما حاولت اصرخ ضربني
بصلي جامد و هو متعصب - ضربك؟!
= مش بمعني فضل يضربني يعني بس ضربني بالقلم و لولا ان في واحده سمعتني و انا بصرخ و لمت الناس الله اعلم كان هيعمل ايه
متكلمش.. سكت بس كان شكله متعصب جدا و بيجز علي سنانه و عنيه بتطق شرار = ي.. يوسف
زعق- نعم!
كشيت في نفسي بصراحه و خوفت من صوته.. غمض عنيه بسرعه و طلع نفس طويل و ضمني جامد ليه - اسف.. اسف والله ماقصدش اني ازعق.. بس اتعصبت من فكرة انه ضربك دي و كان عايز يلمسك.. لا ثواني متعصبتش انا حاسس اني هولع دلوقتي و جوايا نار ممكن تحرق بلاد انا عايز اروح اهريه ضرب لحد ما يموت في ايديا
= اسفة اني قولت كلام يعصبك
- يا تقي انا مش متعصب من كلامك.. انت بتفكري ازاي؟ هو ازاي قدر يضربك الحيوان ده.. يا نهار اسود يضربك؟! ده انا هقتله
= يا يوسف خلاص بالله كفايا و اهدي انا مش ناقصه اصلاً
حضني - خلاص خلاص اهدي مقصدش ماتخافيش انا بس مش مصدق انه مد ايده عليكي المتخلف الزباله ده
سكتنا شوية = يوسف..
مردش عليا = يوسف.. يا يوسف
- ها.. نعم نعم في ايه؟
= فكرت في ايه؟
- مفيش؟
= يوسف!
اتنهد- كنت بتخيل نفسي و هو بين ايديا و عمال اضرب فيه و قطعت ايديه اللي ضربك بيها دي و عمال ازعقله لحد ما مات
= ايه الدموية دي يا عم.. ياما ايه الرعب ده
- هو يستاهلها.. طيب يا رب اشوفه تاني علشان اعرف اعمل كدا
= ا.. انا غلطانه اني حكتلك والله
بصلي جامد - لا.. لا طبعا مش غلطانه و اوعي تخبي عني حاجة في يوم لمجرد اني هتضايق منها دي فهماني
= حاضر يا يوسف حاضر بس بالله اهدي
خد نفس طويل - هديت.. بس بقولك ايه
= ايه؟
- البيتزا كانت حلوه اوي انهارده
= يعني اللي قبل كده كانوا وحشين؟
- لأ بس كان فيها حاجة زيادة يعني
=امم اه ما انا زودتلك الجبنة و الفراخ علشان بتحبهم
ابتسم - تسلم ايدك والله.. تعبتي نفسك
ابتسمت = كله يهون علشانك يا يوسف انا معملتش حاجة يعني
- لا والله عامله..عامله في حياتي كتير
= ي.. يوسف
- نعم
= هو.. هو مش انت كنت تعبان ما تنام يا يوسف انا عارفه البداية دي كويس اخرها ايه
ضحك - اخرها ايه؟
= كل خير يا بني كل خير.. نام بس علشان انا كنت عايشة في بيتنا مامتي اخرها لما تقولي حاجة حلوة كانت تقولي كتر خيرك يا بنتي و لا يجبر بخاطرك ربنا لكن القلبه دي مره واحدة كبيرة عليا
ضحك - يا سلام قلبة ايه ده احنا بقالنا حوالي خمس شهور مع بعض اهو و قبليهم مش عارف كام شهر خطوبة
= ماشي بس انت خدتني كده زي ما بيقولوا من الدار للنار مفيش تمهيد هوبا لقيت نافورة كلام حلو و غزل في وشي
ضحك اكتر - نافورة؟
= ماقصدش يعني انت فاهم.. يعني مره واحده كده كلام حب و رومانسية و انا مش متعوده
- همم يعني ابطل؟
بصتله = بذمتك هتعرف ؟
ضحك - بصراحه لأ مش هعرف.. ما هو انت اللي بتخليني اهيم علي نفسي بيكي كدا
= يا سلااام تهيم مره واحده ايه يا عم مش للدرجادي
- صح معاكي حق.. هو اكتر فعلاً
بصتله جامد و خدت المخده من ورايا و حطيتها علي راسي بسرعه فضل يضحك و اخدني في حضنه و نام و بقيت كل يوم اكلمه اكتر من خمس مرات و ادعي ربنا انه ميحصلوش حاجة و في يوم كلمته و كان خلاص مروح من الشغل و رايح يركب العربية
= ايوا يا يوسف ركبت و لا لسه
- لا يا حبيبتي بعدي الشارع اهو و رايح اركب
و فجأة سمعت صوت عالي اوي و صوت عربيه قلبي وقف و فضلت اناديله لكن مكنش بيرد دموعي كانت نازله علي خدي و خايفه و عماله انديله بهستيريا لحد ما لقيت حد تاني بيرد عليا
= يا يوسف.. يوسف!!
+ يا فندم صاحب التليفون عمل حادثة و الناس دلوقتي بتنقله علي مستشفي (....)
ساعتها رجلي ماشلتنيش وقعت علي الارض و فضلت ابكي.. حاولت اقوم بسرعه علي قد ما اقدر و غيرت هدومي و نزلت جري علي العنوان اللي الراجل قالهولي روحت المستشفي و سألت عليه قالولي علي اوضته و روحتلها لقيت الدكتور طالع من عنده اصلاً = يا دكتور.. يا دكتور
+ ايوا يا فندم
= حضرتك هو يوسف حصله ايه
+ يوسف مين حضرتك
= ا.. اللي لسه حضرتك طالع من عنده
+ و حضرتك تبقي مين؟
= انا مراته
+ اه تمام هو استاذ يوسف كويس مفيش حاجات كتير هو يادوب ايده اتكسرت و ضلعين و في شوية كدمات
كنت هبدأ اعيط = كل ده و مفيش حاجات كتير؟
+ يا مدام اهدي يعني مفيش نزيف داخلي و لا دخل في غيبوبه مثلاً
= لا لا الحمد لله بعد الشر عليه.. طيب هو انا ممكن ادخله دلوقتي؟
+ تقدري طبعا بس هو نايم دلوقتي و فيها ساعة لحد ما يصحي
= خلاص هقعد معاه جوا
+ تمام يا فندم بعد اذنك
دخلت الاوضة و يارتني ما دخلت شكله و هو متجبس و نايم في السرير كدا وجعلي قلبي اوي فضلت ابكي و استغفر و احمد ربنا ان مفيش حاجة اكبر حصلتله لحد ما بدأ يفوق جريت عليه بسرعه و مسكت ايده = يوسف.. يوسف انت سامعني؟
مردش لكن رفع ايده لوشي و مسح دموعي.. مسكت ايده و بوستها و بكيت اكتر = انا اسفة يا يوسف.. انا اسفة كل ده بسببي انا اسفة والله
شد ايدي اني اقرب نمت علي كتفه السليم علشان محملش علي ضلوعه و مش عارفه أوقف بكي مش قادره.. انا اصلا كنت قادرة اخد نفسي بالعافية و هو فضل يطبطب عليا بايده السليمة و يهديني كان يدوب قادر يتكلم -ششش يا تقي خلاص بقي بالله عليكي دموعك دي وجعاني اكتر من اللي انا فيه
=خلاص خلاص هسكت الف سلامة عليك والله انا قابلت الدكتور برا و طمني عليك
- و قالك ايه؟
= قالي الحمد لله مفيش و لا نزيف داخلي و لا حاجة كبيرة من وجهة نظره حصلت
- امم من وجهة نظره.. طيب و من وجهة نظرك انتي؟
عيطت = دراعك يا يوسف.. دراعك مكسور و في ضلعين مكسورين
- طيب بتعيطي ليه دلوقتي هي دراعي انا و لا انت؟
= دراعي هي دراعك يا يوسف و اي حاجة تحصلك كأنها حصلتلي انا و اكتر هو مش انا انت و لا ايه ؟
رفع حاجبه بتعب - شوفوا مين بيقول كلام حلو دلوقتى ؟
ضحكت حاجة بسيطة = يا يوسف انت قادر تهزر دلوقتي.. حطيت ايدي علي صدره مكان ما ملفوف علي الضلعين و بصتله بقلق.. بيوجعوك ؟
اتنهد و ابتسم- و انت لمساهم كدا لأ مش بيوجعوني
ابتسمتله و بوسته في خده و فضلت حضناه فضلنا في المستشفي و كلمت مامته زعلت اني مقولتلهاش علطول اول ما عرفت بس قدرت اللي كنت فيه و فهمتني و روحنا بعدها بيومين و انا حرفياً ذنب الدنيا كله فيا حاسه ان اللي حصله ده بسببي انا لا ثواني انا مش حاسه انا متأكده من كدا و مش عارفه اعمل ايه اللي هو فيه ده بسببي اللي حصل ليوسف ده من تحت راسي انا مكنتش عارفه ابص في عينه مكنتش عارفه اوريله وشي اصلا و احنا قاعدين في البيت كنت بقعد الف حواليه اعمله اكل شرب اقراله كتاب نفسه فيه لكن مكنتش بتكلم معاه و بحاول اتجنب المواجهه بتاعت الكلام عن الموضوع معاه او بالاصح المواجهه مع نفسي لحد في يوم كنت لسه شايله الفطار و قاعدين قدام التلفزيون و هو كان باصصلي انا مش للفيلم و انا حاسه بنظرته و خايفه و عماله افرك في أيدي = ا.. انا هقوم اعمل كيكة انت بتحبها اكيد نفسك فيها بقالي كتير معملتهاش.. و قومت بسرعه وقفني بصوته
- استني يا تقي!
لفيت ببطء = ن.. نعم نعم يا يوسف محتاج حاجة؟
- محتاجك يا تقي.. تعالي جنبي هنا
روحت قعدت جنبه = و انا معاك اهو
- هو فين ده اللي معايا انا من ساعة ما جيت و انت مقعدتيش معايا نص ساعة علي بعضها كل شوية تقومي تعملي اي حاجة
= مش بشوف طلباتك و بشوف محتاج ايه بس و انت تعبان كده؟
- يا تقي انا يادوب دراعي مكسور مش رجلي يعني لو عوزت حاجة هقوم اعملها و استخدم دراعي التاني انت اللي مالك؟
= م.. مفيش ماليش.. انت شايف في حاجة؟
اتنهد - شايف كتير.. شايف كتير يا تقي و ساكت و حضني اشتاق و مكسوف يطلبها منك
دخلت في حضنه = و انا معاك اهو والله و في حضنك مالي بس
- يا تقي قوليلي انت مالك مش بتتكلمي معايا زي الاول ليه؟ ه.. هو انت شايفه اني مقدرتش احمي نفسي منه فخايفه علي نفسك يعني؟
اتنفضت و بصتله بسرعه هو ازاي بيتكلم كدا؟ ايه التفكير ده = يوسف!.. انت بتتكلم كدا ازاي؟ انت فكرت كدا ازاي اصلا؟ يا يوسف انا بشوفك الحيطة اللي بتسند عليها بشوفك اماني و سندي و حمايتي من الدنيا كلها انت ازاي بتقول كده انا عمري ما فكرت كدا و لا هفكر كدا ابداً.. بصيت لتحت.. ه.. هو انا بس..
رفع راسي بايده و بصلي برجاء - ها.. ها يا تقي اتكلمي ابوس ايدك قوليلي بتفكري في ايه و ازاي؟
= م.. مفيش مفكرتش في حاجة
-يا تقي ريحيني و اعملي معروف انا دماغي هتنفجر من التفكير من ساعة ما رجعنا و لقيتك بعيده عني كدا و مش فاهم في ايه؟ هو انا المشكله يعني؟ عملت حاجة و انا مش واخد بالي؟
بسرعه = لا لا يا يوسف انت معملتش حاجة والله انا بس بس اللي حاسه يعني.. حاسه..
- هاا
= يا يوسف حاسة بالذنب يا يوسف ضميري بيتقطع و حاسه اني مش عارفه اتنفس لاني عارفه ان اللي فيك ده بسببي و مش عارفه احط وشي في وشك مش عارفه ابص في عينك حتي و انا عارفه ان بسببي انا انت اتأذيت كدا مش عارفه اتحرك مش عارفه افكر في حاجة يا يوسف..
لما سكت لقيته بيضحك جامد مره واحده = في ايه؟ بتضحك ليه ؟
قربني منه جامد و باس راسي و بصلي - اه يا مجنونه بقي سايباني كل ده و انت بتفكري في الحاجات الغريبه دي
= حاجات غريبه ايه بس انا مبقتش بعرف انام
- و من ايه ده كله يعني.. و انت ذنبك ايه يا تقي.. اعتبريها حادثة عادية يعني مش مقصودة
= لا مقصودة يا يوسف و انت عارف ده لما بعد كام يوم بس من تهديده ليك تعمل حادثة كدا و لما تقولي ان الشارع كان فاضي و العربيه كان باين اوي انها جايه من بعيد علشان تخبطك انت مع انها كانت بكل سهوله ممكن تروح في اي اتجاه تاني يبقي ايه
- يبقي بحبك والله العظيم
= يووه يا يوسف انا بقول ايه و انت بتقول ايه.. ي.. يا يوسف افرض كان حصلك حاجة اكبر ولا روحت مني انا كنت هعمل ايه
و الحمد لله فتحت في العياط حضني و فضل يطبطب عليا و هو مبتسم مش فاهمه ليه
- يا روحي اهدي والله انا كويس الحمد لله و جنبك اهو و مش هروح في حته انا مكنتش اعرف انك بتحبيني كل الحب ده
بعدت عنه و خبطه في كتفه بالراحه = اخص عليك يا يوسف انت لسه بتسأل؟
اتأوه بالراحه كده و مسك دراعه اتخضيت جداً
= ا.. انا اسفة والله مقصدش انا اسفه بيوجعك؟
فضل يضحك عليا = بتضحك ليه ؟
- علشان الدراع التاني هو المكسور مش ده يا نبيهه
= ها؟ اه صحيح.. يعني بتمثل عليا و بتخضني؟ ماشي يا يوسف ماشي
و قومت وقفت بسرعه و لسه هتحرك شدني من ايدي لورا وقعني علي الكنبه جنبه و حط دراعه حواليا حاولت اقوم بس مكنتش عارفه فضل ماسكني بدراعه و باصصلي و مبتسم و اخر لما فقدت الامل اني اقوم قعدت مكاني و فضلت باصه لتحت - تقي
= همم
- ارفعي راسك
رفعت راسي و بصتله و عنيا مليانه دموع ضمني اكتر ليه - اوعي اشوف الدموع في عنيك تاني بصي انت اكيد عارفه ان ربنا لو قضي بحاجة مفيش حاجة هتمنعها و الزفت ده كان مجرد سبب و انا كان ممكن يحصلي اي حاجة تانية في الموقع عادي يعني و الحمد لله جات سليمه و بعدين و انت مالك بس يا تقي مش فاهمها دي انا و انت ايه ذنبك يعني ما احنا اكيد هنقابل في حياتنا ناس اشكال و الوان منهم اللي هيأذينا و منهم اللي هيساعدنا هنفضل بقي زعلانين بسبب كل واحد كدا و نقول ده اذاني بسببي و ده اذاني بسببك لا طبعا مينفعش كدا عايزك تجمدي شوية كدا و اوعديني انك لما تفكري او تحسي بحاجة كدا تقوليلي علطول و متسبنيش انا كمان عمال افكر لوحدي و افسر كل حاجة في دماغي غلط
حضنته انا كمان = حاضر.. حاضر يا يوسف هعمل كدا بس يعني انت كدا مش زعلان مني دلوقتي ؟
بعدني و مسك وشي حطه قدام وشه - يا تقي انا مزعلتش اصلا علشان ابطل دلوقتي يا بنتي هزعل منك ليه اصلاً و انت عملتي ايه بس.. سيبي احساس الذنب و الندم ده لانه الاحساس الغلط دلوقتي
- اومال ايه الاحساس الصح؟
رجع سند علي الكنبه و رفع حاجبه و ابتسم
= الحب.. محتاج حب انا زياده دلوقتي في شوية حب وقعوا مني كدا مع الحادثة و محتاج تعويض
- يا سلام؟ لا يا شيخ.. تعرف يا يوسف انت رايق والله
= الله و مبقاش رايق ليه و أخيراً فهمت مراتي مالها بدل ما كنت هتجنن من تفكيري و الاوهام اللي كنت عايش فيها و بصراحة اللي فهمته خلاني احبها اكتر
- ليه؟
= علشان حبها و خوفها عليا و احساسها بالذنب مع انها معملتش حاجة و قلقها ده كله اني ممكن اكون اتأذيت بسببها اكيد هحبها اضعاف ما بحبها اصلاً
وقفت- امم طب انا بقول اقوم اعمل الكيكة احسن..
= خدي يا بت انت هنا انا بكلمك
- لا يا بيه انا عارفه كويس اللي جاي احنا هنقلب و هنبقي في مجلس للغزل دلوقتي
ضحك = طيب و فيها ايه تعالي هنا بقالك كتير وحشاني و متكلمتش معاكي
- يا شيخ؟ دول مكملوش كام يوم
= كانوا بعمر والله عدوا عليا وحشيين اوي من غير كلامي معاكي و ضحكتك
- ا.. انا رايحة اعملك الكيكة
و جريت علي المطبخ و هو فضل يضحك= استني طيب.. استني هساعدك
بصتله و بعتله بوسه في الهوا - ربنا يخليك ليا خليك مرتاح
برقلي و ابتسم = لا ده بعد البوسه دي انا هقوم اعملها انا و خليكي انت
قام و فضل قاعد معايا بنتكلم و نضحك في المطبخ و عملناها مع بعض و الحمد لله رجعنا كويسين و هو رجع الشغل تاني و في يوم لقيته رجع بدري عن ميعاده و فتح الباب من غير التخبيطة بتاعته و شكله فرحان اوي = في ايه يا يوسف فرحان كدا ليه؟
- اقولك علي حاجة تبسطك دلوقتي؟
= يا سلام قول
- احمد
= م.. متقول حاجة تبسط يا يوسف
- اسمعي بس للاخر احمد اتقبض عليه انهارده
= ايه؟! ازاي ؟
- هقولك بس افهميني و تعالي نقعد الاول
دخلنا نقعد = ها فهمني؟
- بصي يا ستي انا لما العربية خبطتني و قبل ما يغمي عليا كنت شوفت النمر بتاعتها و فضلت ارددهم علشان مانسهومش و فضلت الفترة اللي فاتت مع كريم ن..
قاطعته = كريم مين؟
- كريم.. كريم صحبي يا بنتي ما انت عارفاه
= الظابط؟
- ايوا هو ده.. فضل يشتغل كدا و عرف دي عربية مين و جاب اللي كان سايقها و اعترف انهارده ان احمد فعلا هو اللي قاله يحاول يخبطني بالعربية
اتصدمت = كل ده حصل و متقوليش؟
- يا تقي يعني بذمتك لو كنت قلتلك اني بدور علي احمد و علي اللي خبطني كنت هتعملي ايه.. كنت هتخافي و تقوليلي ابعد عنه و انا مش هفضل عايش و انا حاسس ان عليا تار كده و مجبتش حقي و حقك
= و لو يا يوسف مينفعش تخبي عني حاجة كبيرة زي دي لمجرد اني هخاف انت كدا ضايقتني
- يا ست البنات حقك عليا و الله و اسف و ان شاء الله عمري ما هخبي عنك حاجة بس ابقي استحملي بقي
= يا سيدي هستحمل لكن متخبيش عني حاجة
- خلاص حاضر لكن بقولك احمد اتقبض عليه انت مش فرحانه و لا ايه؟
= لا طبعاً مش فرحانه؟
اتصدم - ايه؟!
= ايوا هفرح ليه يعني ؟
- يمكن علشان جيبت حقي و حقك مثلاً
= تمام دي حاجة حلوة بس ايه اللي هيحصل للبني ادم التاني ده؟ مش هيتحبس و حياته هتضيع و مستقبله هيروح؟
- نعم؟ تقي دا اكتر بني ادم بتكرهيه في الدنيا كلها
= ماشي يا يوسف بكرهه بس دا مش معناه اني اشمت فيه او اكون سبب في ضياع مستقبل حد انا مش عايزه كدا
سند بايده علي خده و بصلي- و عايزه ايه حضرتك؟
= هقولك و متزعلش و طبعا اللي انت شايفه هو اللي هيمشي ماشي؟
- ماشي معاكي قولي
= عايزه نروح نطلعه و نخليه بس يمضي علي محضر انه مش هيقرب مننا محضر عدم تعدي يعني و نسيبه ربنا يتولاه و يهديه و يرده ليه رداً جميلاً
- انت هتجنيني يا تقي انت بتدعيله؟
= يا يوسف هو مش احمد ده ابن حد هبقي فرحانه يعني و انا شايفاه بعيد عن امه كدا و هي مقهوره عليه و لا حتى ولاده بعد كدا يبقي ابوهم رد سجون لا انا مش عايزه اكون سبب في حاجة زي دي و انت حر طبعاً
ابتسملي و باس ايدي و قربني منه - تعرفي يا تقي انت قلبك ده مفيش منه والله انت اطيب حد انا شوفته في حياتي و اكتر واحدة حنينه قابلتها في عمري كله بقي بعد كل ده و مسامحاه؟
= يعني.. مسمحاه علي اللي عمله فيا بس مش مسمحاه علي اللي عمله فيك اوي بصراحه يعني بس بحاول مشيلش في قلبي و اصفي من ناحيته
- طيب والله انا بحبك.. قومى البسي يا تقي
= البس ليه؟
- تعالي نروح نطلعه من الحبس
بصتله = يعني انت مش زعلان و لا متضايق اني عايزاه يطلع؟
- لا طبعاً مش زعلان بالعكس انا فرحان ان حبيبتي بالجمال و الطيبة دي كلها
= يبقي خلاص انا هقوم البس علشان نروح
ابتسم - يلا
و روحنا فعلا نطلعه كان طالع من الحبس شكله مبهدل خالص و اول ما شافني فضل باصصلي و عيط انا بصراحة اتخضيت خضة ساعتها متتوصفش بقي احمد اللي مستقوي علي خلق الله و فاكر ان مفيش حد قده يبكي كده؟ لكن لما عرف اني جايه اطلعه فضل باصصلي كتير و هو مكسور و فضل يشكرني و يتأسف كتير جداً و مضى فعلاً علي محضر عدم تعدي و طلع و فضل و احنا خارجيين يتأسف ليوسف و يوسف يكلمه و يبصلي بفخر و انه فرحان مني و فسحني يومها كتير و لما روحنا عدينا علي مامته الاول نطمن عليها استقبلتنا و فضلنا نتكلم كتير و يوسف قام علشان جاله تليفون
= عامله يا قمرة القمرات
- الحمد لله كويسة يا ماما ربنا يخليكي
= طيب مفيش حاجة جايه في السكة كدا؟
- حاجة ايه ؟
= يعني مش هبقي تيتا قريب مثلاً
- ها؟.. لا لا مفيش حاجة
= طيب يا بنتي و الله ما اقصد ربنا يكرمكوا بكرمه ان شاء الله و يرزقكوا الذرية الصالحة بإذن الله
- ان شاء الله ان شاء الله يا ماما
ساعتها يوسف دخل = طيب مش يلا بقي نطلع نريح شوية
سرحت في كلامها هو فعلا المفروض اكون حامل علي دلوقتي؟ = تقي.. تقي
- ها.. نعم نعم يا يوسف
= روحتي فين بقولك يلا نطلع
- ماشي ماشي يلا بينا
استأذنا و طلعنا راح يغير في الحمام و انا فضلت قاعده علي السرير بفكر في كلمتها دي و مركزتش غير لما لقيت يوسف بيطرقع بصوابعه قدام وشي
- ها.. نعم يا يوسف بتنادي؟
قعد جنبي = بنادي؟ ده انا بقالي ساعه
- معلش اسفه مسمعتكش
= مالك يا تقي؟ ايه اللي حصل؟
- محصلش حاجة
= طيب محصلش حاجة بتفكري في ايه و قولي علطول و متفكريش قبل ما تتكلمي
اتنهدت و بصتله -هو احنا مخلفناش ليه كل ده يا يوسف؟
بصلي و ابتسم جامد = عايزه تخلفي يلا بينا معنديش ادني مشكلة احنا فيها اهو
- يا يوسف انت مش فاهمني ليه؟ انا اقصد انه المفروض يكون في بطني نونو علي دلوقتي
= طيب و ايه المشكلة عادي يعني اتأخرنا شوية محصلش حاجة
- لا حصل يا يوسف تعالي نروح للدكتورة بكرا
= دكتورة؟! و علي ايه يعني كل ده؟ ايه اللي خلاها تطلع في دماغك فجأة كدا يعني
- يعني انت مش نفسك في عيال كدا حواليك
ابتسم = بصراحة لا مش نفسي في ولا حاجة انا مكتفي بيكي عن الدنيا كلها و مش عايز حاجة تانية
ابتسمت - يا يوسف ماشي ماشي بس مثلا مش نفسك في بنوته كدا تفضل تلعب معاك و تبقي بالنسبالها الدنيا بحالها و تجيبلها لعب و انت جاي من الشغل كدا و تجري عليك كل يوم تحضنك و تبقي روحك فيها
ابتسم و بص بعيد و بصلي و عنيه بتلمع = طب هنسميها ايه ؟
- هي مين دي؟
= البنوته
- ايه ده احنا هنسميها من دلوقتي ؟
= يا ستي اختاري اسم بس
- امم اعتقد انك عارف انا بحب اسم ايه
= ايه هو ؟ لا يكون رحيل
- ايوون
= امم رحيل.. رحيل يوسف صلاح.. لا لا يا ستي مش عايز ارحل انا دلوقتي خليني معاكي شوية
ضحكت - ان شاء الله تفضل معايا عمري كله
= اسمها العمر كله
- لا مش عايزه غير انك تفضل معايا عمري انا كله بعدها ابقي عيش حياتك براحتك و شوف حد تاني يسعدك
كشر = و الله يا تقي لولا اني بشمهندس محترم كنت رديت عليكي رد يزعلك
- ليه بس كدا؟
= اعيش بعدك ايه و حد يسعدني ايه انت عبيطة؟ انت فاكره اني هعرف اعيش من غيرك لحظة انت هتلاقيني جاي وراكي علطول.. انا هقوم اخلص الشغل اللي عليا بدل ما اقول كلام يزعلك مني
قام مشي و انا مبتسمه من كلامه بس نادتله بسرعه - طيب انا هكلم الدكتوره نروح بكره!
رد من برا = اللي يريحك!
و فعلا اتصلت بيها و اخدت ميعاد و روحنا تاني يوم مع بعض و كشفت = مدام تقي عايزاكي تجاوبي علي كام سؤال كده
انا و يوسف بصينا لبعض و بعدين بصتلها - طبعاً اتفضلي
= حضرتك بتدوخي كتير الفتره الاخيره؟
- ايوه
= طيب حاسه ان جسمك بيوجعك
- يعني..بس ممكن الفتره اللي فاتت دي اكتر شويه
= همم.. طيب بتصدعي و نظرك بيزغلل احيانا
- ايوا فعلاً الفترة اللي فاتت كتير بصدع جدا و بحس اني مش قادره اقف اصلاً
= و اظن ان احيانا بيغمي عليكي
بصيت ليوسف كان باصصلي و مكشر.. بصتلها
- يعني هي مرة او اتنين بس
= طيب حضرتك هتروحي تعملي شوية التحاليل دي و ترجعيلي تاني اول ما يخلصوا
يوسف خد منها الورقة و اتكلم هو = طيب لو مثلا عملنا التحاليل دي فوري و خلصناها نيجي انهارده ؟
- و الله يا استاذ يبقي احسن بكتير جداً
= طيب تمام بعد اذنك
و نزلنا انا و يوسف من العيادة و ركبنا العربية من غير ما يكلمني و شكله متعصب
= يوسف
-بس يا تقي متكلمنيش دلوقتي
=ليه بس ؟
- يا تقي اسكتي مش عايز اتعصب عليكي
= و هو انا عملت ايه؟
خبط علي الدريكسيون جامد و بصلي و هو متعصب - يعني ايه يعني تبقي تعبانه و متقوليليش؟!
=بس.. بس انا مش تعبانه
زعق- لا يا شيخة لما يبقي جسمك بيوجعك و بتصدعي و بتدوخي و اغمي عليكي كام مره.. كام مره؟ كام مره يا تقي مفكرتيش تقوليلي مره فيهم انك تعبانه او حصلك حاجة!
= ا.. انا محبتش اقلقك بس ما انا كويسة اهو
بص قدامه و شغل العربيه - هنشوف الموضوع ده اهو
= طيب يا يوسف خلاص متزعلش
- متتكلميش معايا يا تقي لحد ما نروح بجد متعصب منك
= طب احنا هنروح فين؟
- هنروح نعمل التحاليل.. يعني هنروح فين يعني
= طيب ما تخليها بكره و خلاص احنا مش مستعجلين
بصلي و هو مبرق جامد - متعصبنيش زيادة يا تقي! .. يعني هرَوح ازاي يعني و ممكن يكون فيكي حاجة مش هعرف اقعد لحظة.. اسكتي اسكتي انا مبقتش فاهم انت بتفكري ازاي اصلاً
= يا يوسف انا مفيش فيا حاجة هي بتطمن بس
بصلي و بص قدامه و اتحرك و خدنا نعمل التحاليل كان بيدفع فلوس زيادة علشان ياخد التحاليل في وقتها و كل ما اعترض كان يبرقلي و هو متعصب و يقولي اسكتي و مش هخبي عليكوا كل تحليل كنا بناخده كنت بقراه و تقريبا فهمت فيا ايه و قلبي اتقبض جامد بس كنت بكدب نفسي و بقول هي هتقول حاجة تانية لحد ما يوسف خدني و روحنالها علي اخر اليوم و يوسف هو اللي اتكلم لان انا كنت غرقانه في تفكيري