اسكريبتات تقي الله على

فن التثبيت ↖️↖️ 😁❤️

= احمد احمد احمد احمد
- نعم نعم نعااام في ايه ؟
= هو لو مثلا كده يعني طلبت منك طلب هتكسفني
- علي حسب الطلب؟
= ايه ده يعني مثلا لو طلبت حاجة كبيرة مش هتقلب الدنيا علشاني و تحققهالي
- يا بنتي هو انت متجوزه سوبرمان؟
= لا متجوزه احمدمان اللي كان بيقولي كل طلباتك اوامر
- و انا يا حبيبتي لسه بقولك اهو كل طلباتك اوامر لكن اطلب بما هو مستطاع يعني و انا علي قد ما قدر هتشقلب و عملهولك
=...
- لا إله إلا الله.. انت هتعيطي و لا ايه ؟ انا عملتلك حاجة يا بنتي؟
= ايوه يا احمد عملتلي
- عملت ايه بس ما انا بقولك هعملك كل اللي انت عايزاه اهو
= طيب ما دي المشكله عااا
- يا بنتي اقفلي السرينه دي و فهميني انا عملت ايه؟
= يا احمد مش عارفه امارس هرموناتي عليك يا احمد.. كل ما اجي اتخانق معاك تقولي كلام حلو و تاخدني في الكلام كده و مابعرفش اخد منك حق و لا باطل.. هو انت متغيرتش بعد الجواز ليه زي باقي الرجاله؟
برقلي - نعم ؟! اتغير ازاي يعني؟
= يعني لسه بتهتم بيا و بطلباتي و بتقول كلام حلو.. مش كويس ده انا مش عارفه اتخانق معاك
- لا إله إلا الله و انت عايزه تتخانقي ليه بس ؟
= ما هو الحياة مينفعش تبقي علطول حلوة كدا فين التشويق فين الاكشن
- لا حول و لا قوة الا بالله و متبقاش حلوه علطول ليه ؟ و بعدين ايه تشويق و اكشن دي هو احنا في سابق و لاحق
= الله ما تيجي نتفرج عليه
- هو ايه دا؟
= سابق و لاحق انا كنت بحب اتفرج عليه اوي و انا صغيره اقلب علي الماتش ده و هاتلنا سبيس تون يلا
مد ايده بيمسك الريموت و هو بيتنهد - حاضر يا اخرة صبري
= اهئ اهئ اهئ
-لا إله إلا الله.. يا بنتي في ايه اكبر في ودانك مالك مانا هجيبها اهو في ايه؟
= يا احمد انت طيب اوي كدا ليه و بتسمع الكلام يعني مش هتقولي امشي من هنا انا بتفرج علي ماتش مهم و لا هتزعقلي و تقولي كرتون ايه اللي بتتفرجي عليه ده
- يا بنتي ماتش مهم ايه مفيش ماتشات اصلا ده ماتش مُعاد بس و بعدين مانا بتفرج معاكي علي كرتون انا كمان عادي يعني
= ايواا يعني هو علشان مُعاد استسلمت و كنت هتجيب كرتون بسرعه لكن لو مباشر كنت هتزعقلي و تقولي غوري من وشي
- تقي انا عمري زعقتلك و قولتلك غوري من وشي و انا بتفرج علي ماتش؟
= لأ
- اومال بعمل ايه؟
= يا اما بتقعدني جنبك و تفضل تشرحلي يا اما بتجيب حاجة بنحبها احنا الاتنين اصلا
- طب خلاص انت زعلانه ليه؟
= يا احمد انت مابتزعقش ليه؟
- و هو انت عايزاني ازعقلك ليه ؟
= اهو جرب كدا بس زعق يا أخي مرن احبالك الصوتيه ده انت حتي لما حطيت تلجايه في رقبتك و انت نايم مزعقتليش و فضلت تجري ورايا و لما مسكتني فضلت تزغزغني و تضحك معايا و مادتنيش علي قفايا
- و انت عايزه تاخدي علي قفاكي يا عنيا
= لا مش بالمعني الحرفي يعني بس انت هادي اوي و وقور كده و بتلعب شطرنج و بتفضل تقرا كتب كبيره هو في ايه انا متجوزتش علشان تبقي دي الحياة
- نعم؟! اومال مين اللي كان واخدك قبل الحظر وداكي الملاهي و قضينا طول اليوم هناك
= انت
- و مين اللي كان بيلعب معاكي استغمايه امبارح و رجله اتخبطت في الكوميدينو و لسه واجعاه لحد دلوقتي
= انت
- و مين كان بيقرا معاكي مجلة ميكي من يومين
= انت بردو
- طيب عايزه ايه بقي
= يووه ما تسترجل كده يا احمد و اتحمشن شويه و زعقلي كدا
اتصدم و علي صوته - استرجل؟!.. في ايه يا تقي ما تلمي نفسك ولا علشان انا ساكتلك يعني من الصبح و مستحمل
- ايوا ايوا هيزعق اهو.. احم احم.. انت بتعلي صوتك عليا يا احمد!
= لا طبعا مقدرش هو انا اقدر اعلي صوتي علي ست البنات
- يا ولي الصابرين ما انت كنت ماشي حلو اهو و هتتخانق ليه قلبت كده مره واحده
= تقي
- نعم
= هو لسه في من الكيكة القمر اللي كنت عاملاها
- اه ليه؟
= طيب ما تقومي تجبيلنا منها
- هي عجبتك؟
= جدا فوق ما تتخيلي
- طب خلاص هقوم اجبلك
= تقي
- نعم
= اعمليلنا كوبايتين شاي معاها بقي
- من عنيا
و قومت روحت ناحية المطبخ لكن وقفت فجأة
- احمد!!
= الله اكبر! نعم!
- انت اتجوزت عليا؟
= ايه؟!
- ايوا انت اتجوزت عليا ما هو اكيد بتعاملني حلو كده علشان ما اكتشفش خيانتك و تحاول تسكت ضميرك اللي واجعك من ناحيتي
= انت بتهزري و لا بتتكلمي بجد؟
- بتكلم جد جدا جدا
= طيب تعالي يا تقي اقعدي
- قعدنا.. ها هتقول ايه تبرر بيه موقفك
= موقف ايه بس.. استهدي بالله و اسمعي
- لا مش ههدي انت ازاي تسمح لنفسك تبص لواحدة غيري و تبقي معاها بالشكل ده
= شكل ايه؟! انت هتلبسيني مصيبة؟؟ و بعدين يا تقي يا حبيبتي ما انت عارفه ان مفيش غيرك تملي عيني و مابشوفش غيرك
- لا كده النظام بيقع و الخناقه بتهبط مني و ده مش حلو اه ما انت اكيد عمال تقولي انا في كلام حلو و هي مغرقها هدايا و حاجات حلوه
مسك ايدي حطها قدام وشي = هو بعيدا عن الخاتم اللي لسه جايبه من يومين ده لكن تعالي نحسبها بالعقل.. مين بياخد مني القبض كل شهر
- انا
= و مين معاه كل المصاريف
- انا
= و مين عارف كل قرش رايح فين و جاي منين
- انا
= يبقي هفتح بيت كامل تاني ازاي و بعدين ما انا مرزوع جنبك اهو ليل نهار بروح في حته؟
- لا
= بكلم حد في التليفون؟
- لا
= اومال هبقي متجوز ازاي ؟
- ما يمكن بتتسحب من جنبي بليل و بتروحلها و انا نايمه
= يا بنتي هو مش في حظر
- ايوه
= و لو نزلت هيتقبض عليا
- ايوه
= و انا قاعد جنبك اهو
- ايوه
= طيب يبقي بنزل ازاي.. و بعدين انا بحبك يا تقي
- يا خبر ابيض يا استاذ ممتاز
= في ايه؟
- يعني انت بتقفل الخناقه بدري بدري و بتقول كلام حلو و بحبك في وشي كده
= اومال اعمل ايه بس؟!
- قوم زعق كده و كسر الدنيا و قولي انت ازاي بتشكي فيا يا هانم انت مش واثقه فيا؟!
= و هو انت مش واثقه فيا؟
- لا طبعاً واثقة فيك
= و هو انا لو قمت مثلا كسرت الدنيا انت مش هتقعدي جنب الحاجات اللي اتكسرت تعيطي عليها
- ايوه
= يبقي هزعلك ليه ؟
- ليه؟
= لا انا بقولك هبقي عايز ازعلك ليه يعني ما احنا قاعدين كويس اهو
- صح معاك حق
= طيب مقولتليش
- مقولتش ايه ؟
= كنت عايزه ايه مني؟
-...
= استغفر الله العظيم يا رب بتعيطي ليه دلوقتي
- انت جميل اوي يا احمد
= طب جميل تعيطي؟.. جميل ازاي يعني؟
- بعد كل ده و فاكر طلباتي و ان انا عايزه حاجة
= لا إله إلا الله و ده غلط؟
- لا طبعاً صح
= طيب هو انا هكون مبسوط و انا عارف انك عايزه حاجة و انا مجبتهاش
- مش عارفة هتكون مبسوط؟
= انت لسه بتسألي يا تقي.. ده انا لو اطول اجيبلك الدنيا بحالها هجيبهالك
-...
= يووه بتعيطي ليه بقي ؟
- طلقني يا احمد
= ايه؟؟!
- بقولك طلقني
= ليه يا بنت الناس انا عملت ايه؟؟
- يا احمد انا مستحقكش يا احمد روح شوف واحدة تستاهل كل الحب ده و تبقي قادره تفرشلك الارض ورد و سيبني
= طيب ما انا لقيتها اهو
- هي مين دي؟
= اللي تستاهل كل الحب ده
- هي فين؟.. يعني انت اتجوزت عليا؟
= لا طبعا انا لقيتها من زمان و اهي قاعده معايا اهي و قدامي
- يا سلام و انا استاهل كل الحب ده؟
= طبعاً
- ازاي ؟
= طيب بصيلها من وجهة نظري انا.. مين اكتر واحدة بتحبني في الكون و بتحاول دايما تأيدلي صوابعها العشره شمع
- انا
= طيب مين اكتر واحدة مابرتاحش غير و انا في حضنها
- انا
= و مين اكتر واحدة بحب اتكلم معاها و احكيلها علي كل اسراري و انا مطمن و عارف انها عمرها ما هتأذيني بيهم لانها بتحبني و بتخاف عليا اكتر من نفسها
- انا
= طيب مين اللي مونساني و عامله في حياتي حس كدا و من غيرها اكون زي الميت
- انا
= طيب خلاص عايزه ايه تاني؟
- ها؟..م.. مش عايزه حاجة.. احمد
= نعم
- انا بحبك
ابتسم = و انا اكتر والله
- ط.. طب انا هقوم اجيبلك الكيكة
= طيب تسلم ايدك و متنسيش كوباية الشاي معاهم بقي
- ح.. حاضر
و مشيت.. = هههه نست السندوشت.. هاااح نتفرج علي الماتش براحتنا بقي دي فيها يومين تلاته و لا اسبوع لحد ما تكلمني تاني.. هههه متجوز هبله
- بتقول حاجة يا احمد؟
= ها لا بقول كنت عايزه ايه بردو؟
ابتسمت - عايزه سلامتك من كل شر.. هتاكل هنا و لا هنقعد في البلكونه
= لا هنقعد في البلكونه تتكلمي و انا اسمعك
- يخليك ليا ربنا يارب و يكرمك و يخليك مبسوط علطول
= هههه كل ده؟
- و اكتر والله.. انا هروح اودي الحاجة البلكونة.. تعالي ورايا بقي
= حاضر يا قمر... و مشيت و هي مبسوطة
= ااه عبيطة بتتاكل بالكلام بس بحبها و الله
* تقي الله علي
؛ حاجة سريعة كدا من زهق الحظر 😸💙