اسكريبتات تقي الله على

اجابة

السلام عليكم و رحمة الله و بركاته ..

اكتر من حد سألني الفترة الاخيرة عن اسكريبتات انا شلتها و عن فكرة رجوعي للكتابة او ليه وقفت ..

و ببساطة وقفت لأن سبحانه و تعالي مّن عليا انه يكون مع بدايات طريقي للكتابه بداية طريقي للالتزام و معرفة حدوده و الطرق اللي ممكن الانسان يشيل بيها ذنوب بدون ما يشعر ..

و خوفًا و اتقاءًا لغضبه سبحانه و تعالي انا حذفت الاسكريبتات اللي كان فيها مشاهد كلامية او وصف او افعال تتنافي مع اطار الشريعه و المباح و ان كانت في عيون البعض بسيطة و لكن كما قال انس ابن مالك رضي الله عنه ( انكم لتعملون اعمالا هي ادق في اعينكم من الشعر ، و انا كنا لنعهدها في عهد النبي من الموبقات ! )

و بإذن الله فكرة الكتابة و موهبتي فيها هحاول استغلها في قصص بردو و خواطر بس بطريقة علي قد ما اقدر ترضيه و تكون حجة لي لا علي ..

و ان شاء الله ارجع انشر قريب لكن فكرة اخذ ذنوب و حمل اثقال مع اثقالي انا مش حملها و لكدا بطلب من حضراتكم ان لو حد كان اخد مني فكرة او فعل استباحه غلط يسامحني و لو حد في اللي جاي شاف اي كلمة او فعل غلط في اسكريبت هكون اسعد الناس بتعليقه و لو صحيح هعدله فورا بدون جدال ..

و هتفضل الاسكريبتات تحت هاشتاج #حكاوي_تقاوي و اللي عبارة عن حكايات اكتر من بنت بشخصيات مختلفه تحت اسم تقي الله بتتعرض لمواقف او حكاية مع او بدون بطل اللي بيحمل اسامي مختلفه و في ازاي هتتصرف بطريقة ترضي الله سبحانه او تعالي فيها او في ازاي هتعدل سلوكها بعد رحلة مع نفسها لرضاه عزّ و جل..

و انا بعتذر عن اللي فات و بإذن الله لما و كل ما احس ان في كتابة ليا اقدر انزلها و انا راضية عنها هنزلها لعل حد يستفاد من معلومة انا حطاها فيها و تكون سبب في دخولي الجنه جعلني و جعلكم الله من اهلها..

و اي حد انا ماردتش علي تعليق ليه في اللي فات ف انا اسفه جدا و بعتذرله لاني اولا ماسحة كل السوشيال و مش بفتحه الا للحظات و مكنتش بفتح وات باد سعيًا للإجابة عن سؤال ( و عن عمره فيما افناه.. ) رزقنا و اياكم اجابة ترضيه..
ثانيا لاني كنت في رحلة مع نفسي بعد اكتئاب طويل اكتشفت فيها ان عندي نوع من الرهاب الاجتماعي و بخاف من الناس و ردود فعلهم و اي كلام منهم ف غصب عني والله و بحاول اعالجها

و اخيرا انا والله لا امثل الورع و لا المثالية لكن بحاول انقذ نفسي من عذاب و نار انا مش قد لسعه واحده منها ربنا يحفظنا جميعًا..

و يارب تراعوني بس و تراعوا خوفي لو حد عنده تعليق و تسامحوني لو مردتش من خوفي بسبب الرهاب
و شكرا ♡