باوعت لليث بخوف ابتسملي يطمأني و هو ياشر بايدة الي حتى اتذكر الي اتفقنا عليه وگفت بابا صافح ليث و تقرب علية لزم ادية و ابتسم و هو يباوعلي من فوگ لجوة ـ شگد صايرة حلوة و عيونچ
سكت و نزلت دمعته حسيت نفسي گوة احچي و احتاج اتنفس بين الكلمة و الثانية ـ شش،شبيهن عيوني
لزم ابوية وجهي و گال ـ مو مورمات حلوات انتِ حلوة و صايرة هسه احلى
ابتسمت لكلامه و هو استغل الوضع و حضني بس حضنه چان شي غير
ما اعرف شلون اوصفه اول مرة تصير وياي من زمااان ما حاضني هيچ و ارتاح بحضنه ما امنعه و ما ضايجة و لا اشوفه تكلف منه حتى يبري نفسه من اخطائة گدام الناس
رفعت ايدي على ظهرة
نز و باوع بوجهي گتلة ـ مشتاقتلك و لاخواني هواية
يريد يحچي ميطلعن الكلمات باوع لد.ليث ـ شنو تريد اسويلك شوف شلون روحها راجعتلها و تحبني يربي
جرني لصدرة و باسني براسي فتنا للصالة گعدنا سوة اني بحضنا بابا و بحضني التوم جاب يعسوب عصاير و ابوية يحچي وية ليث ـ يعني حالتها هاي ثابته هسه
گلة ـ عندي ثقة تثبت و اي ضعف تزيد قوتها بعده و احنا ان شاءالله اتفقنا راح وية علاجنا نفسه نبلش انناقش مشكلة خربطة الافكار قبل متكبر و مشكلة هوسها الاصلي لان هي بعد وصلت و اندمجت بواقعها و راح يرجع الهوس للساحة
سحب ابوية ايده من ورة ظهري و هو يسأله ـ فهمني شوية اوضح
جر ليث حسرة و سولفله ـ خربطة الافكار هذي تصير اثناء الكلام او الشرح بحيث تدمج بين حدث شايفته او شي مفكرة بي و حدث بواقعها او تصير تخربط بالكلام هي حاليا موجود عدها هالشي لكن بعده بأفكارها ممطلعته للخارج فاحنا نعالجة قبل ميطلع
و بنفس الوقت نعالج هوسها الاصلي الي هو النرجسية و العضمة من تساعد الفقراء و الايتام و بدار العجزة لان خربطة الافكار راح ترتبط بي بشكل قوي لمن يرجعلها
ابوية رفع ايده و يأشر ـ يعني الكآبة و المشاكل كلها مو الهوس
ـ لا حجي الهوس هو يسبب ذولي شوف عمو ابو نرجس حالة نرجس بيها رحمة من الرب مو عادية شوف هي مچانت متعينة لقبل اربعة اشهر كل شهر تاخذ راتبها و تشتري بي لاخوانها للفقراء بحالة الهوس و تحس نفسها بذيچ الفترة انه هي انسانة مو عادية و كلما تشتري اكثر للناس و تنفق عليهم كلما تكون احسن و اگدر اكدلك هي فد يوم باگت منك فلوس و تبرعت بيهن قبل لتحصل هالمبالغ
قاطعته بسرعة ـ مرة وحدة و بعدها و الله معدتها و دوم امنع نفسي
ابتسم ليث و شبك اصابيعه ـ ادري يا عيني هذا الي اريد اوضحه لابوچ من منعتي نفسچ و فترتچ البسيطة كلش من الدوام و استلام الراتب چانن سبب بتثبيط الهوس الى حد كلش قليل بس هسه من رجعتي ابسط مبلغ راح يبدي يجيچ شعور يطالبچ تتبرعين
اني وياج راح انناقش خربطة الافكار و الهوس سوة لان راح ينمن سوة و العلاج ابد اعيدها و اكررها ابد متقطعي و ابوچ لازم يراقبچ
