اندگت الباب جنت جاي ادرس على اللابتوب
صحت ـ تفضلدخل د. ليث گلي ـ اني رايح راح توصلچ سارة للدورة و من ترجعون ياخذكم د.سلمان جلسة جماعية
دفعت الكرسي و گمت سألته ـ ليش وين تروح مو بعد اسبوعين
رفع حواجبه و بسرعة غير معالمه و جر حسرة گلي ـ لا اخذت اجازة بس اليوم باسم تصوب و هسه بالمستشفى لازم اروح
خليت ايدي على صدري و نشغت ـ هئـــــئ خطية شلونه هسه؟
رد د.ليث ـ و الله ما ادري لازم اروح هسه لتنسين دواچ
لحگته لبرا و صحت وراه ـ فدوة ليث دگ علية طمني
ما التفت اصلا ظل بالي يمه و اليوم عدنا امتحان تخربطت احوالي
جتي سارة جابتلي الريوگ كلت لگمتين و خذت دواية و اخذتني للدورة
اگعدت على ستولي شغل الاستاذ الحاسبات و سلم كل واحد من عدنا ورقة اسئلة و صار يفتر بيننا و هو يگول ـ اعتبروا نفسكم بيوم امتحان الدورة اني صح راح اترجملكم اسئلتهم بس ما اساعدكم بيومها فشدوا حيلكم
حاولت اركز بأسئلتي ايدي ترجف حس علية الاستاذ و جابلي گلاص مي حليت سؤالين و بديت بالثالث
سمعت ـ نرجس بروح اهلج نرجسسس
درت وجهي هذا الطالب ابوكرش نفسه
گلي ـ فدوة لعينچ السؤال الثانيگعد الاستاذ بيني و بينه و هو يگله ـ من غشنا فليس منا حل بوحدك قابل حطردك من الدورة اذا مجاوبت
ابتسمت و گلت للاستاذ ـ يحلم اغششه اني مدرسة قاسمة يمين
ضحك الاستاذ و ضرب على متنه يگله ـ دباع البخت تطلب من مدرسة تغششك
بدت اعصابي ترتخي و زادت ثقتي بنفسي كملت الامتحان و اشرت للاستاذ وگف فوگ راسي و صححلي كتبلي Excellent على ورقة الاسئلة
فد فرحت عبالك امتحان فصلي بالجامعه
اخذت جنطتي و گتله ـ شكراً استاذرمشت لسارة چانت تتسوگ قريبة ما تأخرت عليه و جتي خذتني
رجعنا للمستشفى و بس فتنا ممر الغرف سمعنا صوت عالي للرجال و كلما تقربنا بدأ شكله يتوضح
چان واحد اربعيني يتجادل وية الاطباء و لازم ايد نجوى
خلت سارة ايدها بإيدي و تقربت علية همستلي ـ هذا اخو نجوى كل فترة يجي و يتعارك وياهم و يغير طبيبها
بس مرينا بيهم دكتور سلمان اشر علية و گله ـ هذي المريضة الي هجمت عليها ، اوكفي خوية
نجوى بس شافتني گلت لاخوها ـ هاي تشتغل وية د.ليث يخططون يكتلوني
رفعتلها تك حاجب ورديت عليها ـ اي مو انتي الملكة اليزابيث و نريد نغتالچ مدتشوفين حالي روحي محاملتها مو انوب اتعارك وياچ بعدين عرفة ولفة و اريد اكتلچ شبيچ انتي