" الأن فقط ستكشف الحقائق ، ستفتح أبواب جديدة ، ستشرق شمس فجر جديد ، سيتلاشي الظلام للأبد ويتبدد النور ، ستهطل مياه الأمل وتسقي الزهور الزبلاء من فرط اليأس ، ستتعالي ضحكات الأطفال في المكان ، وتتساقط الإيجابيات كالثلج ، ذلك هو قدرنا ، نصر مجيد ومستقبل باهر ، تمسكو جيدا فلقد بداء مشوار الإعمار للوطن الحبيب♡ "ـــــــــــــــــــــــــــــــــــــــــــــــــــــــــــــــــــــــــسهي كانت متوترة شديد من سواقة محمد الجنونية بس ما فتحت خشمها معاهو لأنو عارفة راجلها لمن يكون زعلان ما بتفاهم مع أي زول ، بعد ما وصلو البيت أستنتو لحدي ما أستحمى وغير هدومو بعدها هي زاتها دخلت استحمت وغيرت هدومها ، لمن طلعت من الحمام لقتو قاعد في طرف السرير وبهز رجلو ، قعدت جمبو وقالت ليهو: محمد ممكن أعرف المضايقك شنو ولييه جيت سوقتني بالأسلوب دا قدام الناس؟ ، مسح وشو بي يدو وقال ليها: كان لازم أعمل كدا وأحمدي الله أني مسكت اعصابي علي الاخر وما اتكلمت وإلا كان ما حيحصل خير _حبيبي انا عارفك ما بتزعل كدا ساي ورينى الحصل شنو في الصالة _أمي عجبتها بت في الصالة وساقتني لأمها وعرضت عليها أني أتزوجها من دون حتى ما تستشيرني وتأخد رأي في الموضوع وهم وافقو طوالي بس الأم قالت ما بقبل بتي تعرس راجل مرة فقامت أمي قالت ليها هو اصلا مرتو عقيمة ما بتلد وانا حاخليهو يطلقها ويتزوج بتك ساعتها انا حسيت الدنيا لافة بي فما لقيت نفسي إلا وانا ماشي منهم وسايقك علي البيت علي طول نفسي أعرف لييه دايما أمي دي أنانية كدا وما بهمها سعادتي ،امنياي ولو لمرة واحدة تفهم انا عايز شنو وما تجبرني أسوي عكسو انا قرفت ملييت والله من ساعة ما جيت البلد دي وامي مافي لسانها غير سيرة اني اعرس عشان اجيب اولاد ياااااخي انا ما عايز أولاد من مرة تانية غيرك يا سهى ما عايز والله يا انتي يا مافي!سهى رقدت علي كتفو وقالت ليهو: يمكن انا ما عقيمة يا محمد بس في ناس لمن يتزوجو قرايبهم بتحصل ليهم مشاكل زي دي ع العموم أنا ما ندمانة اني أتزوجتك بس امك عندها حق تشوف عيال ولدها وتربيهم هي ما انانية هي عايزة تفرح بيك وبعيالك يا محمد اوعى في يوم تكره أمك لانو اكرهتك علي حاجة في النهاية دي امك لو قالت ليك امشي فوق الجمر تمشي وأنت ساكت_بالرغم من معاملتها السيئة معاك برضو انتي بتدافعي ليها مصنوعة من شنو إنتي يا سهى؟؟_ معاملتها معاي حاجة وعلاقتك بيها حاجة تانية مهما قالت لي وعملت لي السبعة وزمتها لازم ما اخلي دا يأثر علي علاقتك معاها لأنها أمك وأنا ما يرضيني انك تتخاصم مع أمك عشاني_ لكن هي مفروض تحترم قراراتي انا سعيد جدا معاك وما نفسي أكمل مع مرة تانية غيرك أنا بلاك ما بقدر والله صدقيني_ربنا عندو حكمة من البحصل دا كلو وأكيد في خير كتير مدسوس لينا منو عارف ممكن نتوفق في يوم ونقدر نسكت كلام امك والناس للأبد أنت بس خليك جنبي والكاتبها الله بتبقىمحمد رقد في رجلها وهي بقت تمشي يدها في شعرو لحدي ما نام ، رقدتو براحة عشان ما يصحى وغطتو كويس ، بعدها طفت النور ورقدت جمبو كانت تعبانة شديد وجسمها كلو بوجعها ، زفرت بأرتياح انو اخيرا العرس تم وأنتهى بخير ، فضلت تفكر في كلام محمد وتبكي لحدي ما إستسلمت للنوم .ـــــــــــــــــــــــــــــــــــــــــــــــــــــــــــــــــــــــــــــــ#في جانب أخر......وسام رجع بيتهم ومعاهو مصيبة كبيرة لوسن ، بعد ما العرس خلص وهو كان راجع خلاص جاتو حنان ام بيان أتكلمت معاهو كلام خلاهو يتوتر بس ما كان في يدو شئ ، استسلم لطلبها و نقل # الثعلب لجحر الأرنب ، كانت أم خليل وبتها ندي ومرة ولدها الكبير وولدها #إياد ، وسن ملامح وشها اتغيرت لمن نزلت ولقت أم خليل قاعدة ، اخر حاجة أتوقعتها أنو تلقاها في بيتهم وزي الوقت دا كمان ، حست بالأوكسجين انعدم في الجوء مشت عليها ببطء وسلمت عليها وهي بترجف ، ام خليل عاينت ليها بغضب ولزت يدها وقالت ليها: أنا ما بسلم علي الكتل ولدي شوفي يا بت الناس أنا جاية اقول ليك حاجة واحدة ختيها حلقة في أضانك الولد الفي بطنك دا حفيدي أنا وأنت ما عندك بيهو أي شغلة مش كتلتي ابوهو ويتمتيهو من هو في بطنك ما معروف زاتو حتسوى فيهو شنو بعد يجي علي الدنيا دي و أحنا ما مستغنين من ولدنا وما عايزنو يتربى مع مرة مهملة وشرانية زيك بأختصار احنا حنشيل جنانا بعد ما تلديهو ونرببهو أحسن تربية فاهمة ولا ما فاهمة؟وسن أتخلعت وقالت ليها: دا ولدي انا وما حأديهو لي زول لو حابة ممكن تجي تزوريهو هنا في البيت وتسوقي يقعد معاك يوم يومين ويرجع انا ما كعبة للدرجة دي عشان أحرمو من حبوبتو وأهل ابوهو بس ما حاخليك تشيلي منى أبدا واللهندى قالت ليها: وسن الولد ولدنا ومن حقنا نشيلو ونربيهو حيقعد في البيت الكبير مع حبوبتو و معاي ومع اولادي تقدري تجي تشوفيهو في اي وقت والله دا عشان مصلحتو عشان ما يجي يلقى نفسو فاقد ابوهو وفاقد اهل ابوهو كمان خلود قالت ليهم: يا جماعة كدي اهدو وختو الحلة واطة البتسو فيهو دا غلط وشينة في حقكم والله والقانون بقول أنو بحق للام حضانة الولد لحدي سن ال18 سنة بعدها هو حيختار عايز يعيش مع منو فيكم دا القاااانون كدا يا جماعة والمحاكم والجرجرة ما حبابا واللهأم إياد قالت ليهم: عاااد لكن التربية دي صعبة عليك والله بالمنطق كدا الجنى دا مصاريفو كتيرة داير لبن داير بامبرز وحفاظات بتتغير كم مره في اليوم داير هدوم وألعاب وأنتي ما شغالة كيف حتقدري توفري ليهو دا كلو هااا؟؟وسن قالت ليها: حأشتغل لو تطلب الأمر وما حأحرم ولدي من حاجة بإذن الله والأرزاق بيد الله _تشتغلي شنو كدي وريني وانتي شهادة جامعية ما عندك بعدين حتعرفي كلامي دا كويس والله التربية دي ما هينة ( أتحرمت من الجامعة بسبب خليل منعها انو تواصل قرأيتها في التمريض )سديم إنفصم فيها وقال: أنتي قايلانا مقطعين وجعانين ولا شنو؟؟ والله البيوت والأملاك العندنا دي تشتريك انتي وأهلك كلهم أبونا كان حاسب حساب كل شئ و قبل ما يموت سجل ربع املاكو لوسن اختي دا غير الميراث أحنا اكتر حاجة عندنا القروش عشان ما تأخدوها حجة عرفتي يا شاطرةإياد قال ليهو: أحترم نفسك يا زول اوعى تقل أدبك فاهم دا كلام كبار زاتو المقعدك انت والمعاك شنو دا شنوووو؟؟سديم قال ليهو: انا أخوها وابوها وولي امرها واي فهم ورئبال ما غريب هو زاتو في مرتبة اخوها بس الدور والباقي عليك انت التخجل جاي مع النساويين في موضوع ما بخصك وكمان بتتفاصح أم خليل نهرتهم وسكتهم ، إياد بقى يتبادل النظرات النارية معاهم أما وسن كانت مصدومة وقالت : بالجد؟؟ ابوي الله يرحمو عمل كدا يا سديم !!_أي والله والأوراق كلها قاعدة عند عمو سمير ، أبوك ما نساك ولا يوم يا وسن وكان عشمان لحدي اخر يوم في حياتو انك ترجعي ليهو وتطلبي العفو منو بس ما جيتي و دا كلو بسبب راجلك ، صوتو اتحشرج وهو بقول: يمكن لو كان رجعتي واعتذرتي منو كان حيكون هسي معانا وسن بقت تبكي بحرقة علي الحصل معاها ، بكت أمها وابوها الخسرتهم بسبب حب زائف ، بكت حياتها الأنقلبت فوق تحت من ورا تهورها ، بكت علي حرمانها دراسة التمريض وبكت علي الشهور القضتهم مسجونة في البيت وما عارفة الحاصل برا شنو ، بكت ولدها الحيجي الدنيا ويلقى ابوهو مافي وشعورو حيكون شنو لمن يعرف انو هي كانت السبب في موت أبوهو خليل هل ممكن يكرهها ويتخلى عنها ، ويمشي يعيش مع اهل ابوهو ولا بعد ما يعرف القصة حيتقبل الموضوع عادي ؟ في أسئلة كتيرة ما لقت ليها جواب ولا حتلقى ليها اجوبة في الوقت الراهن ، قطع دوامة التفكير أم خليل وهي بتقول: أنا لما قابلت حنان في عرس سمر بت اختي بقيت اسالها عنك لحدي ما ورتني انك رجعتي بيت خالك وكمان طلعتي حامل وقتها أنا ما فكرت في شئ غير اني لازم اجيك باقي الليل دا واصريت علي حنان توديني ليك هي قالت ما بتعرف البيت بس ود خالها الجاء ساقها مننا ورجعها البيت جاء العرس دا بكلمو يوديك هناك وفعلا مشت أتكلمت معاهو وولدكم جابني لحدي عندكم ، انا عندي ولدين وبت كبرتهم وربيتهم احسن تربية بعد ما أبوهم اتوفى وما قصرت منهم في شئ والحمدلله هسي مستقرين في حياتهم ولدي الكبير بابكر ابو إياد دا شغال في قطر في احسن وظيفة وبتي ندى دي متزوجة دكتور معروف اغلب وقتو مسافر اوربا وهسي هي قاعدة معاي في البيت الكبير مع عيالها ياااخ حتى ولد ضرتي الوحيد طلع ناجح" ابو إيثار " اما ولدي الصغير خليل حسبي الله ونعم الوكيل بس ، بالرغم من انو اتوفق في شغلو تقريبا بس ما أتوفق في المجالات التانية ، من هو صغير كان زول معزول وغريب شديد وعلي العليهو كمان كان خاطب بت وفركشة الخطوبة بسبب تصرفاتو الما مفهومة دي وعلشان كدا...وسن قاطعتها: وعلشان كدا هو كان حابسني في البيت وخايف اخليهو وامشي زي ما خطيبتو عملت؟؟ هل دا سبب مبرر يعني!! انا أبصم ليك بالعشرة انو ولدك ما كان متزن وبالبلدي كدا مجنوووون_أخرررررسي ولدي طبيعي انتي المجنونة من يوم ما اتزوجتيهو وهو اتغير علينا بقى ما بزورنا ولمن اتصل ليهو بقول حيجينا قريب وبرضو ما بجي وطوالي كان بحذرنا وبقول ما عايز زول يجي البيت ويقعد مع وسن لأنها حقتي انا ومرتي حسبي الله ونعم الوكيل في الملعونة البقت ولدي كدا الله لا يسعدها ولا يعدلها عليها دعوة ام حشاها محروق علي ولدها الضاع_طيييب يا .... يا ام خليل كلامي العندي قلتو ولدي البمد يدو عليهو بقطعها ليهو كلمتكم دايرين تجو تشوفوهو وتمشو اهلا وسهلا غير كدا حيكون بيناتنا المحاكم بسأم خليل عيونها قلبو شرار وقالت ليها: وهو كذلك براك اخترتي الدرب الاعوج تتحملي بس وحفيدي حأقلعو قلع من جوة عيونك يا حقيرة_نتقابل بعد سنتين وكم شهر يا ام خليل، الله معاكم شديد يا حمواتي مع السلامة الباب بفوت جملأم خليل ساقت إناث الخرتيت معاها بما فيهم إياد وإتشايلوها في ستين داهية بعدها وسن إنهارت في الكرسي وقالت : لييه انا دايما بحصل لي كدا ، سديم جاء قومها و وداها فوق غرفتها ، رئبال ولنى طلعو فوق من سكات ، خلود قالت لوسام: هاا كيف كان العرس؟؟ قال ليها وهو بطلع علي غرفتو هو كمان: كويس ما بطال العرسان طلعو حلووين شديد ماشاء الله عليهم لابقين علي بعض خلود أتنهدت واتوجهت بدورها علي غرفتها وهي بتقول: المشاكل ما بتخلص في البيت دا ولا شنو؟؟ .ـــــــــــــــــــــــــــــــــــــــــــــــــــــــــــــــــــــــــــــــــ - بعد يومين -#في ثانوية النخيل.....المياه رجعت لمجاريها بين لتين وعمار ورجعو اصحاب تاني ولمن حكو لرئبال بكل الحصل سامح عمار ببساطة وقال ليهو: انا اصلا ما كنت زعلان منك لانو أفعالك كانت مبررة بس ما المبرر انك أنضميت للإلڤن وبقيت في صف الأعداء ، سيف قال ليهو: بس لو ما هو كان زعل منكم وانضم لينا ما كنا هسي حنكون قاعدين تحت الشجرة دي وبنضحك مع بعض كدا (طبعا حسام سافر مع اختو سبأ البلد تاني يوم العرس طوالي ) ، رئبال قال ليهو : البلطجي دا كلامو صح للأسف ههههه_بلطجي بتاع حنانك انا بقيت مسالم خلاص أأأ لكن عندي حساب مع الزبالة القاعد هناك داك ماشي أتمو وأجي يوسف وفؤاد قعدوهو وقالو ليهو: يااااخ أقعد ما تخرب اللمة مالك ياااخ دا شافع وأصغر منك_طيييب عشانكم حأسيبو بس لو لاقيتو براهو إلا يطيرلتين وهي بتهمس لبراءة: يا سجم انت مالك يوم داك ما اتصلتي لي علشان أطمن عليك_يا بت هوو انا اتذكرتك بالصدمة والمفاجأة الحصلت ليي_ليييه حصل شنو بينك وبين مراد ؟؟_واااي يا لتين ما بتصدقي قال لي شنو والله ود خالك دا طلع راجل بمعنى الكلمة قال أنو عجبتو وحيجي يخبطني في إجازة ثالث ثانوي قادرة تصدقي؟؟_وااااااي واااااي واااااااي يا عفنين يا رمم ليييه ما كلمتوني أتاري مراد الجزمة سأل امي وسألني منك قبل ما يمشو بيتهم ما أتوقعت يكون عايز يخطبك يا بت المحظوظة يا براءةرئبال قرب علي لتين وقال ليها: بتقولو في شنو انتي وهي؟؟براءة أتنحنحت وقالت :أحم يا جماعة باركوولييي أختكم بالصلاة علي النبي كدا حيخطبوها بعد ما تخلص الثانويعلت شهقات الجميع وباركو ليها وهم مصدومين، إيثار مسكت فيها وقالت ليها: كذااابة والله أوعى يكون الفي بالي بس هو العايز يخطبك!_أيواا يا ستي ياهو زاتو مراد ود خال لتين إيثار بقت تقرصها وتلبع فيها وتقول: واااااااااااااااااااي مراد الود القرضة حيخطبك أنتي ما قادرة أصدق صحييي حظ القباااايح ووووب علياااااا بورتيينا من بدري يخسسسي عليك العريس اللقطة يحردو ليك عااااد جبتيهو كيف يا قادرة _برررررري ما عملت شئ انا دا اجتهاد فردي منو هوو افووو صبرت ونلت كلكم مربطين وانا كنت سنجل بائسة بس الله عوضني براجل مشمشة اللهم لا حسدسديم قال: كلكم مربطين إلا انا وفؤاد وسيف وبعض الصالحينسيف ضحك وقال ليهو: سوووري قصدك انت وفؤاد وبعض الصالحينفؤاد قال ليهو: لا هو بس وبعض الصالحين الما أرتبطو سديم اتحرج وقال ليهم: أنا زاتي مرتبط قايلين نفسكم براكم هه!عمار رفع ليهو حاجبو وقال: اسمها منو وساكنة وين؟_أسمها عزة وساكنة الرياض _ ودي صادفتها وين إن شاء الله _ما عندك شغلة صادفتها وين يا زول المهم حبينا بعضلتين قالت ليهو: عازة دي ما احلى مني طبعا صح؟ رئبال غمز ليها وقال: هو في بت بتطول جمالك يا ستهملتين اتكشمت ودنقرت رأسها بخجل ، رئبال قال ليهم وهو كاتم الضحكة : الزول دا بحب ليهو بت اكبر منو تقريبا بسنتين كمانإيثار شهقت وقالت: أجي أجي أجي يا ود أمي مالك قال خليت البراعم وارتبطت بالأكبر منك لقيتك كعب لكنسديم قال ليهم بغيظ: ما أكبر مني هيي رئبال دا كذاب ساي_أنا كذاب؟؟ طيب البت الكنت بترسمها يوم داك وقلت ليك بتشبه " رهام مشاكل " البتقرا معانا في الفصل مش ياها دي حبيبتك البتتكلم عنها حتى بالإمارة كنت كاتب عزة الرشيد وجمبها راسم قلب صغير مش دا هو اسمها ؟فؤاد ختى سبابتو وابهامو في حنكو وبقى يقول: أسمها عزة الرشيد وساكنة الرياض ، ضحك وصفق بيدينو وقال:يا جماعة انا عرفتو قاصد منو عزة الرشيد دي بطلة رواية بعض هذا القرنفل وهي ساكنة في الرياض وقرت أقتصاد في جامعة الخرطوم وأكبر من سديم فعلالتين قالت ليهو: ما كنت متوقعاك من النوع دا بتنبرش وبترتبط في خيالك ببطلة رواية آ سديم!!فؤاد قال ليها : الموضوع عادي جدا يا لتين انا زاتي كنت معجب بعزة الرشيد ونفسي تكون في بت حقيقة زيها في الواقع وتكون شايلة كل صفاتها عازة دي تعتبر كراشي الأبدي ياخ♡إيثار قالت ليهم: بعض هذا القرنفل الرواية دي بعيدة شديد وووبعليااا السمندل وما ادراك ما السمندل والله يخووانا طارق المغربي دا كان عامل لي هوس بعد ما خلصت من الرواية بالجد هو حلم كل بت سودانية وبعد الثورة كمان ألآف من الرجال الزي السمندل ظهرو لكن نتفق أنو الشهيد #كشة بستحق لقب " السمندل " لأنو واعي زيو وهمو علي البلد كان ثائر راكز ومثقف شديد رحمة الله عليه - جرس نهاية الفسحة ضرب معلن فض التجمع دا -ـــــــــــــــــــــــــــــــــــــــــــــــــــــــــــــــــــــــــــــــــــــــوسن جات وهي شايلة صينية فيها كبايتين شاي لبن ومعاهم بسكويت رويال♡ ، قالت لبيان الماسكة تلفونها وبتتصفح فيهو: طبعا ياداب قبل شوية صحيت من النوم وما شربت الشاي بما انك جيتي قلت نشرب الشاي سوا_بختك والله الحمل بخليك تنومي وما تحسي بحاجة ههههههه-علي سيرة الحمل طبعا يوم العرس بليل ام خليل جاتنا هنا في البيت نافخة صدرها وقال عايزة تهددنيبيان غمست البسكويتة في الشاي وأكلتها وقالت ليها : اي ماما قالت لي انها جات العرس وطلبت منها انو تجيك البيت اها قالت ليك شنو الولية دي؟_تخيلي قالت انها حتشيل مني ولدي وقال شنو هي احق بتربيتو انا أتعب واشقى وأولد وهي تجي تستلمو في الجاهز عليك الله المرة دي نصيحة في عقلها؟ _وقحة شديد والله انا لو في مكانك بردح ليها وأصفق ليها لمن تتكيف جناي أنا تشيلو مني والله إلا كان اموت قدامها لكن حية أرزق والله لو جاء الجيش ما اديهو ليها_انا ما اتناقشت معاها كتير وقلت ليها بيناتنا المحاكم القانون حيقيف معاي وأنا أحق بحضانتو اكتر منك_أي أي وريها المرة الما نصيحة دي بالله_أنسينا منها أها انتي وسامر حتتزوجو متين ؟؟_ بسم الله الوراك منو انا لسع ما حكيت ليك؟؟_ وسام ههههه_بررري منو وسام دا الفولة ما بتتبلى في خشمو _الحقيقة هو حكى لينا اي حاجة كيف قدرتي تغلبي المجرم داك و اخوك لمن عرفكم بتحبو بعض أنت وسامر وتقبلو للموضوع ووو وكل حاجة كل حاجة_ كر علي الود دا مالو كدا نان انا احكي ليك شنو خلاص؟_احكي لي الما بعرفو انا_أمممم الما بتعرفيهو الحقيقة هو بعيد كل البعد عن موضوعنا انا وسامر وبتعلق بيك انتي شخصيا وبيني وبينك هو سبب الزيارة دي_موضوع بتعلق بي أناااا؟؟ خير في شنو يا بيان انا الأيام دي بقيت ما بتحمل اي صدمة جديدة والله_لالا أطمني الموضوع ما خطير دقيقة بسمسكت تلفونها وعملت فيهو كم حاجة وبعدها أدتهو ليها وهي بقت تقرأ في الكلام المكتوب بخلعة بعد خلصت ختت يدينها في خشمها بإندهاش وقالت: لا ما قادرة أصدق والله معقول في زول عجبتو ألعابي الشمعية دي لا وكمان عايز يشتري مني حقوق اللعبة ويصنعها وااااو ما كنت متخيلة دمياتي الغريبة دي حتعجب زول والله_مفروض تشكريني لأني نزلت صورهم في الميديا وشافتها شركة ألعاب عربية وعجبتهم فكرة ألعابك دي وطوالي اتواصلو معاي قلت ليهم حاشوف رأي الصانعاها واديكم خبر هااا رأيك شنو ؟ _موافقة طبعا يا بت أنا ما اتخيلت في يوم انو مجرد لعبة سويتها وانا محبوسة في بيت خليل تتبناها شركة العاب عشان تصنعها انا حاسة أني بحلم والله_يا سلااااام يخخ علي كدا نقول آمين؟_علي بركة الله ، لكن اللعبة دي ما اعتقد تكون مناسبة مع الاطفال الصغار لأنها ما مريحة نوعا ما هل تفتكري أنو حتنجح؟_عموما فكرة العابك حلوة والله ويمكن تلقى رفض في البداية بس في فئة اكيد حيحبوها سواء أطفال أم كبار وانا ما شايفة انها بتأثر علي الطفل بطريقة سلبية انتي بس اتوكلي وختي الرحمن في قلبك _حيغيرو فيها حاجات صح وممكن يسموها باسماء علشان تلصق في الذاكرة وهل حيعملو سلسلة للأولاد ولا حيخلوها بنات بس في أسئلة كتيرة في راسي والله _هم ما ادوني معلومات كافية بس كل البعرفو انو حتتصنع لعب بلاستيكية وقماشية اما الشمعية دي فاللعرض طبعا والتفاصيل التانية دي حتتكلمو فيها أنتو ، وسن أسمعيني رسلت ليهم الموافقة وردو لي انهم حيتواصلو معاك بعدين بالإسكايب علشان تحكو في التفاصيل حأرسل ليك كل حاجة في الواتس هسي تمام? _واااي يا بيان أتوترت شديد كيف حأقدر اتكلم معاهم بعدين بالإسكايب صوت وصورة ما حأعرف اقول ليهم حاجة_أتشجعي يا وسن وخليك واثقة من نفسك إتفائلي وأحلمي يمكن بعدين العابك دي تشتهر ويتعمل ليها افلام ومسلسلات وكمان فيديو قيمز مافي شئ بعيد عند ربنا_شكرا ليك يا بيان ياخ انتي دايما واقفة معاي وبتدعميني بحبككككك شديد والله_ وانا أكتر يا بيبي والله انت تستاهلي كل الخير ياااخ_حااابيبي حااااابيبي يااااخ " أنت بحاجة لذلك الشخص الذي يدعم أحلامك وطموحاتك بشغف ويسعى معك دوما لتحقيق ما تتمناه وكأنه يجتهد مع نفسه هو ، يحلق معك في سماء نجاحاتك ويضمد جروحك عندما تتلقى صفعات الحياة القاسية ، فرحك لا يكتمل إلا بدونه ولا تستطيع ان تتقدم خطوة واحدة بدون ان تستشيره فانت تعلم جيدا ما يحمله لك من حب نقي ، إذا كان لك صديق ُُ ُ كهذا عزيزي القارئ فهنيئا لك بنصف السعادة ♡ "ــــــــــــــــــــــــــــــــــــــــــــــــــــــــــــــــــــــــــــــــــــ#في جانب أحمد....مرت أربعة أيام علي كلامو الأخير مع عمو سلطان وبنيامين في موضوع تجارة المخدرات ، و أحمد لمن رجع بيتهم فهم أمو وأختو انو ما حيسافر اليمن خلاص وحيقعد هنا يشتغل مع سيد مدحت توفيق " بنيامين " في شركتو ، فاطمة وإسراء فرحو شديد ورحبو شديد بفكرة انو يشتغل في شركة بدال ما يمشي يحارب برة ، بس الما عارفنو انو أحمد بدى يمشى في السكة الحرام للأسف ، في البداية كان خايف ومتردد بس شوية شوية بدى يتعود علي الموضوع ، في خلال الكم يوم ديل وزع كمية من المواد المخدرة " الترامادول الخرشة الهيروين والبنقو " ، سلطان وبنيامين كانو مبسوطين منو شديد لأنو اتأقلم علي الشغل بسرعة وكان بحفزوهو بالقروش ، في يوم من الأيام بعد ما خلص من زبون ، في شاب ثلاثيني كان متابعو ، احمد أنتبه وأتعمد يخش بشارع معين عشان يشوفو حيخش معاهو ولالا ، وفعلا تابعو ومشى وراهو في نفس الشارع ، أحمد وقف وقال ليهو بنبرة شرسة : ساكيني من قبيل لييه؟ مشبه علي ولا حاجة؟؟ كانت نبرة صوتو غريبة وهو بحك أنفو ويقول ليهو: يا مان أقسم بالله واقف عديل عليك دينك عزنا ياااخأحمد قال ليهو بإرتباك : أ أعزك بشنو يا زول أنت ما نصيح؟_داير أخضر ما عندك؟أحمد إتردد وقال ليهو: ما ضامنك أنا يمكن تطلع حكومة حتديني الأمان؟؟_عيب عليك ياخ في زول بسلم الديلر بتاعو ههههههه أرح أرح عزناااا ياخ _منتهي يا جاح أتفضلالشاب أستلم رأس البنقو وطلع ليهو ربطة صغيرة بتاعت قروش وأداها ليهو ، احمد شال نصها وختاها في جيبو وقال وهو برجع ليهو الباقي: أنت عشان زبون جديد حأكرمك لكن ما تتعود تاني دسيس؟ الشاب أبتسم ليهو ومشى منو وهو فرحان ويدندن بعد ما أستلم كيفو ، احمد عاين ليهو بطرف عينو لقاهو لفى بالشارع التاني ، بلع ريقو ومشى قدام وهو متمالك اعصابو بس مع كسرة الملف جرا بأقصى سرعة عندو لمن حسى بأنو حيتقبض ، كان في ضابطين من شرطة مكافحة الممنوعات مدسين وبمجرد ما احمد جرى جرو وراهو طوالي ، أحمد كان بلهث وهو جاري باقصى سرعة عندو وبحاول يتفادى يصدم ليهو زول ، فضل يخش بشوارع كدا لحدي ما لقى نفسو في سوق صغير كدا ناسو كانو بساط ، حاول يضيع الضباط الساكنو ، لمح ليهو زقاق ضيق كدا دخل بيهو وبقى يعاين وراهو مافى زول جارى وراهو ، أتنفس الصعداء وكان طالع علي الزلط كدا فجاة في زول نطى فيهو ومسكو شديد ، أحمد أثناء ما كان بحاول يتفكى منو عاين ليهو كدا اتخلع وقال ليهو: انت مش الزبون القبل شوية دا يعني طلعت في النهاية شرطي وخدعتني إحيييك علي إتقانك الدور والله ، ظهر شبح ابتسامة في وش سامر وقال ليهو: أحنا مهمتنا القبض علي المجرمين والمهربين فلازم نكون بنعرف هم بفكرو كيف عشان نقدر نتعامل معاهم كويس لكن انت شكلك جديد علي الشغلانية هههههههفي اللحظة دي أحمد ضربو في ركبتو بقوة ، سامر صرخ بألم ووقع في الواطة وأحمد قدر يتفك منو بس قابلوهو الشرطيين ومسكوهو بسرعة أحمد ما لقى مفر أستسلم لحدي ما جاء سامر وهو بعرج كلبشو وركبوهو في العربية وسط عيون الناس الأتجمهرو وبقو يتسائلو عن سبب القبض علي شاب صغير زي دا ، طول الطريق احمد كان منزل رأسو وما نطق بكلمة ، لحدي ما وصلو القسم وقبل ما يخشو جوة سامر وقفو وقال ليهو: مش أنت الكنت معتقل مع بيان وبت عمها حتى بتذكر كان معاك أختك صح؟؟ أحمد سكت وما رد عليهو ، سامر قال ليهو: الأداك الحاجات دي منو هاا ؟؟ ما عايز تقول حاجة طيب أحنا حنعرف نخليك تتكلم كيف دخلووووه ، ودوهو غرفة كدا قعد فيها نص ساعة بعدها في ضابط جاء داخل عليه شايل كوز موية أداهو ليهو ، احمد شرب وقال ليهو: شكرا ، الضابط قرب عليهو وقال ليهو بهمس: لو جبت سيرة بنيامين في الموضوع دا عارف حيحصل لي أهلك شنو صح؟أحمد بلع ريقو وقال ليهو: ح ح حاضر ، الضابط حمر ليهو وطلع ، بعدها سامر دخل وجرى الكرسى بطريقة مزعجة وقعد قدامو ، سكت مسافة وقال ليهو: أحمد السكوت ما في صالحك قول البتعرفو كلو وأنا حأضمن سلامتك_يا جنابو أنت مش قبضت عندي بنقو والتهمة اتثبتت علي بتحقق لييه تاني حاسبني بالقانون ولو عايز تتسدى الضربة الضربتها ليك في ركبتك انا ما عندي مانع_هههه أتسدى!! شوف أنت مجرد ديلر يا احمد انا لازم اعرف البووس منو وأقبض عليهو بنفسي وريني القاعد يجيب ليك المخدرات دي منو؟؟ بتعرف اسمو و محل سكنو؟؟أحمد هز ليهو راسو بالنفي وقال:صدقني انا ما بعرف عنو حاجة هو هو اصلا بستخدم اسم مستعار وما عارف اسمو الحقيقي منو ولا ساكن وين يا جنابو " بيماطل "سامر مسح وشو بيدو وقال ليهو: طيب أديني عنوان بيتكم؟أحمد اتخلع وقال ليهو: لا يا جنابو ارجوك ما لازم خالتي واختي يعرفو اني محبوس بتهمة بيع مخدرات خالتي مريضة سكر و ما حتتحمل والله_ طيب عندك مخدرات تانية داسيها في حتة ولا دي كلها بس؟..............__مخزن باقي المخدرات وين يا أحمد؟؟_أأأ في البيت _نوع الممنوعات شنو والكمية بالضبط كم؟_بنقو حوالي 400 رأس_كككككككم؟؟ يا زول انت مجنون ولا شنو !! الكمية دي كلها خاتيها في بيتكم وتقول لي ما لازم خالتي واختي يعرفو؟؟ نصيح انت!!_دا أول أسبوع لي شغل أدوني كان 500 رأس أوزعها في خلال 10 أيام وكل البعتو لحدي الأن ما يقارب 100 رأس دا غير شرايط الترامادول البقزقز بيها_وكمان تعاطي مخدرات؟؟_لالا ما قصدي كدا بقزقز بيها يعني ببيعها بالجنبة كدا فهمت_البووس بتاعكم دا شكلو تاجر كبير وإلا ما كان أدى واحد جديد زيك في الشغلة 500 رأس بحالو ، او الزول دا عامل ليك كمين عشان تتقبض طيب احنا ما نجي نعكس الأية لو فكيناك وعملنا كمين للبووس بتساعدنا علشان نقبض عليهو وكدا عقوبتك حتتخفف_ ما أظن ينفع البووس تقريبا بكون عرف انو اتقبض علي واخد كل أحتياطاتو_طيب يا أحمد انا حأرسل دورية لبيتكم تصادر المخدرات الهناك فأرجوك أتعاون معي_ط ط ط طيب#في أحدى القرى الريفية.....كانت قاعدة في عنقريبها بتسبح و بتعاين لأحفادها الكانو عاملين جو بأصوات ضحكاتهم العالية واللعب والشغب مع الأغنام الصغيرة رجع ليها الذكرى لما كانت أصوات الضحك واللعب ما بتنقطع في بيتهم ، بس الوضع أتغير من بعد وفاة راجلها ، عيالها اي واحد شال نصيبو من الورثة وسافر الخرطوم عشان يأسس حياتو ، أولادها الكبار كلهم سافرو وبناتها واحدة عرست وسكنت قريب منهم في البلد ووحدة ماتت في حادث بعد ما خلت بتها و ولدها لأبوهم الكان ما شغال بيهم ومركز مع شغلو وعلاقاتو الحميمة بس ، علقت سبحتها في رأس السرير ونادت أحفادها بصوت حنين : كفاية لعب خلاص تعالو يا أولاد اقول ليكم دا ، حسام وسبأ في ثواني جو جارين زي الأطفال ووقفو جمبها ، ضحكت وقالت ليهم: شاطرين حبايبي انا ، سبع جيبي لي الزيت من الأوضة عشان تسرحي لي شعري دا ناششف، سبأ قالت ليها: واااي يا حبوبة خربتي أم الأسم أنا أسمي سبأ ما سبععع _بررررري أسامي البندر حقت الشياطين دي ما بقدر اقولها يا بت_شياطين شنو يا حبوبة قولي بسم الله حسام قال ليها وهو كاتم الضحكة: حبوبة بتكون مشت لبلقيس ملكة سبأ لما الشياطين نقلو عرشها عند سيدنا سليمان مش كدا يا حبوبة؟؟_أياااا يابا بقصد كدا دي أسامي شياطين والعياذ بالله منهم _استغفرتك يا مالك روحي انا اخير لي امشي أجيب الزيت والمشط ، اول ما سبأ خشت جوة حبوبة همست لحسام: هيي انت البت دي ماشاء الله نفسياتها أتحسنت في بلدنا دي ما زي ايام جيتكم داك بررري كانت زي التقول ملبوسة ولا حاجة _اي والله يا حبوبة عشان كدا انا اقنعت الحاج يجيبنا ليك نقعد معاك نغير جو حبة _ الشايب العايب دا كدى الجو فضى ليهو حيقعد يقل في أدبو براحتو عاااد لكن البندر كبيرة وسمحة بالحيييل لكن نصايبها كتيرى ما بتبقى زي بلدنا الهادية دي إصلهى_ هههههه والله حبوبة في شكك بعدها سبأ جابت الزيت وبقت تسرح لحبوبة شعرها ، قالت ليهم: أمكم الله يرحمها كان طوالي بالعصريات تقعد تسرح لي شعري و تضفرو لي ، سبأ سكتت مسافة وقالت ليها: طيب انا زاتي حأضفرو ليك ما دام بتحبيهو كدا ، حسام سرح ليها بالفرشة وبقى يحاول يضفرو ليها ، حبوبة قالت ليهو:هييا ولدي ما تبشتن لي شعري ساي شن عرفك بالزي دا أنت ، ضحك وقال ليها :حبوبة ما تخافي ما ببشتنو ليك والله ، الواطة كان ضهرية كدا في همبريب بارد كدا كان بضرب الراكوبة القاعدين فيها ، حسام وسبأ بعد ما انتهو لقو حبوبة تشخر ، سبأ قالت :حبوبة نمتي؟؟ زيي زمان لمن يسرحو لي كنت بنوم طوالي ههههههه رقدوها في السرير وسبأ رجعت علبة الزيت والمشط والفرشة محلهم ، حسام قال ليها بشقاوة: ما دام حبوبة نامت رأيك شنو نمشي البحر ؟؟_لالا يا حسام هسي كان حبوبة صحت وما لقتنى جنبها كدا حتقلق وتقعد تفتش فينا_يا بت ما تخافي حنجي سرعة خالي حكى لي امبارح وقال في منقة سمحة جنب البحر نمشي نقطع منها ونجيبها وناكلها بالشطة أرح ياااخ بطلي خوف_ قداااام يا زولسبأ لبست واحد من تياب حبوبة وقالت لحسام: كدا كويس صح؟_بي كل الاحوال انتي شينة اصلا يلا ارحمسكتو من يدو وهي بتقول: هههههه دقيقة اصدقك ، لمن كانو ماشين في الشارع حسو بنظرات ناس البلد حتاكلهم اكل ، وكل ما يجو ماشين جنب اتنين يسمعو : مش ديل اولاد المرحومة حييي لسع صغار والله دنيا فانية ، حسام ضغط علي يد سبأ وواصلو طريقهم ، وصلو البحر وقفو قصادو حبة بعدها حسام اتشعبط في شجرة المنقة وبقى يجدع لسبأ وهي تشيل وتلمو في توب حبوبتها ، وأثناء ما عايز ينزل كدا في راجل كان راكب حمارو وجاي عليهم أول ما شافهم كورك فيهم وقال: يا حرامية أصبرو لي الليلة يا كلاب ، سبأ طوالي فكت الجرية وحسام جاء ناطي من فوق خطف سفنجاتو وكتح وبقو الاتنين جارين لحدي ما بعدو كدا وقفو وبقو يشيلو في أنفاسهم وواصلو طريقهم عادي وهم بضحكو بأعلي صوتهم ، لمن رجعو البيت لقو حبوبتهم في رقدتها لا هشت ولا نشت ، حسام قال ليها: قلت ليك حبوبها نومها تقيل وما بتصحى بسهولة ، سبأ قعدت تقطع في المنقة والعضم كان بتديهو لحسام يمصو ، بعدها جابو الملح والشطة وبقو يأكلو ويتمطقو ساي .ـــــــــــــــــــــــــــــــــــــــــــــــــــــــــــــــــفاطمة وإسراء طلعو العدة كلها من المطبخ عشان يغسلوها قبل العيد الكبير ما يجي " عيد الأضحى " ، اثناء ما بغسلو كدا فاطمة قالت لإسراء:العيد خشى علينا خلاص السنة دي واقع يوم شنو يا ربي؟؟_اممم العيد حيقع يوم 12 تقريبا كدا حيكون يوم أثنين_يعني باقي ليهو....سجمي 16 يوم بس !!_اي والله قرب شديد هااا السنة دي عندنا خروف ولا زي كل سنة ؟؟_أنا أتكلمت مع احمد في الموضوع دا وقال الشركة الشغال فيها دي حيدوهم مواد تومينية وحافز 2000 السنة دي إن شاء الله حنضبح يا بتي الله يسهل الأمور بس_اللهم أمييين ياااخ_الجردل دا اتملى امشي أكشحي الموية الوسخانة دي وتعالي رجعي العدة النشفت دي محلهاإسراء قالت ليها حاضر وشالت الجردل فتحت الباب وبقت تكشح في الموية ، بعد أنتهت كدا ودخلت جوة الباب بقى يدق شديد، إسراء ختت الجردل وقالت: دا منو عديم الزوق البخبط الباب كدا؟؟ ، مشت وهي بتقول: الصبر ياخ أحنا ما قاعدين جنب الباب الله!! ، أول ما فتحت الباب اتخلعت لمن الشرطي قال ليها: معانا أذن بتفتيش البيت دا يلا أدخلو يا شباب ، إسراء قالت ليهم: هيي البيت دا فيهو نساوين بس كيف تدخلو كدا ودايرين تفتشو كمان في بيتنا شكلكم غلطانين في البيت، الضابط ضحك وقال ليها: لا ابدا ما غلطانين يا أستاذة دا مش بيت ناس احمد صح؟؟_أأأ أي دا بيتهم بس عندكم شنو؟؟ دقيقة اتصل لاحمد هو بعرف يتفاهم معاك كيف _هههههه كدي جربي لو رد عليك احمد عندنا في القسم مقبوض بتهمة تجارة مخدرات ؟؟إسراء قالت ليهو:ككككيف؟؟ ، فجاة في صوت صحن أتكسر طلع ، إسراء عاينت وراها لقت فاطمة بترجف من فوق لتحت ، جرت عليها وقالت: ما تصدقيهم يا خالتو ديل كذابين سااي احمد مستحيل يعمل كدا ، الضابط قال ليها: أحنا قبضنا معاهو ريسان بنقو وفي التحقيق أعترف بكل حاجة وقال انو عندو باقي بنقو في بيتو هسي الشباب حيجيبوهو ، إسراء قالت ليهو: أنت كذاااااااب ، أتنين من الضباط جو طالعين وقالو: سعادتك لقينا البنقو ملفوف في اكياس ومدفون في حفرة تحت الدولاب ، جابوها ليهو وقالو ليهو: تانى ماف حاجة سعادتك ، قال ليهم: ممتاز كدا انا أأكد ليكم انو احمد حيتسجن 5 سنة بالكتير ، فاطمة بقت تعاين للبنقو و لإسراء البتبكي وتقول: أخوي مستحيل يعمل كدا لا أحمد ما كدا والله ، لحدي ما وقعت من طولها علي الأرض .بيان كانت بتراجع في النص الكتبتو قبل دقائق بعدها نزلتو في صفحتها علي الفيس وكان بقول: مرحبا أنا عيسى، أجل عيسى فقط فأنا لا اعرف والديي اللذين انجابني في نزوة شهوة ثم تركانني للمجهول بلا هوية ، منذ نعومة أظافري لا بل اقصد منذ قذارة أظافري وأنا انتظرهما على احدى الأرصفة آملا أن يتذكرانني ويأتيا لأصطاحبي وأودع حياتي العارية للأبد ، تبا انني أفعل كل شئ امام الناس، انام آكل أشرب أمرض أبكي أنتحب ثم أضحك ضحكة باهتة وأنافق لكي أستطيع متابعة حياتي البائسة ، أكره أن ينعتني الناس بالمتشرد أو ابن الحرام ، سئمت نظرات الشفقة والأحتقار ، سخريات سائقي العربات الفارهة وهم يقولون لي عندما أطلب منهم بعض المساعدة: نديك قروش لييه؟ عشان تمشي تشرب بيها سلس ولا مصيبة زمان انتو قايلين نفسكم ناس يا عرة المجتمع يا متشردين يا أولاد ال.... ، عذرا سيدي انا فقط أريد منك بعض المال لكي آكل ولكنني لم اجن منه سوى الإهانات والتي -أكلتها في حناني- ، لكن منذ أندلاع ثورة ديسمبر المجيدة قد تغيرت حياة ذلك المتسول الصغير تماما ، كنت حاضرا في كل المواكب والمليونيات بشتى اسمائها وأهدافها ، أبحث عن أمي وأبي أو أي شئ قد يوصلني لهما ، أرى كنداكة تنطلق منها زغروتة مدوية فأهلع وأقول ربما هذه أمي وأتابع بنظراتي طبيبا يشفي المصابين فافخر واقول هذا أبي يضمد جروح هذا ويوقف نزيف ذاك ولكن أنا!! من يستطيع ان يضمد جروح هويتي المبهمة أو يوقف نزيف كرامتي وأنا أتلقى المعايرات كل يوم ، لقد نسيتني يا أبي أنا نتيجة أثمك في لحظة ضعف بينكما أنت وأمي ، ولكنني الأن قد وجدت عائلتي في تلك البقعة التي أعتصمنا حولها بعد نجاح موكب السادس من أبريل العظيم ، لم أشعر قط بأنني غريب او نكرة فالناس هناك عاملوني بعفوية وطيبة لم استشعرها من قبل ، أصبحت من عيسي المشرد إلي عيسي الثائر أحد ابطال الشوارع ، ألتقيت بإخوتي في الألم تحت خيمة اسموها -مبادرة أطفال القيادة- كانت نعم الملجأ لنا تعلمنا فيها ودرسنا علي يد أعظم المعلمين في العالم ، حينما افتح عيني في الصباح وأجد نفسي قرب اخوتي في عشنا الدافئ أشعر بحنان قد حرمت منه طوال سنيني القليلة ولكن سرعان ما تستهويني ضجات من بالخارج أرفع يدك فوق والتفتيش بالزوق ، صباح الخيير صباح الخيير وي وي وي صباح الخير قوووم يا نائم،كوووو كو كرووو،أخرج كالعادة وأنا شاهر علم بلادي وأصرخ:مدنيااااو ، حينها اسمع قهقهات بعض الرفقاء وهم يحتسون شاي الصباح مع قطع الكيك اتسلل خفية وأسرق بعض الكيك من يد تلك الجميلة التي ما تزال تنتظر بشغف عودة حبيبها الشهيد ، أتلقى بعض التوبيخات من صديقاتها واعيد قطعة الكيك معتذرا ،ثم أقف متاملا صور الشهداء الذين لولا الله ثم هم لما أتحدنا وتكون هذا الجمال المدعو -بأعتصام القيادة العامة- أعيد طوبة -الإنترلوك- إلي حيث مكانها لكي تتكئ علي أكتف الشهداء وتنام بعمق ، أتقدم ببطء كي لا أوقظ صغار التروس وأذهب لجمهورية أعلى النفق اصغي مترنما لسيفونياتهم المحببة لقلبي بعدها اغتسل بمياه نافورة النفق النقية التي تنطلق من أحدي قارورات المياه ، أذهب إلي خيمة الأطباء وأمثل انني مريض لكي أحظى ببعض الأهتمام والرعاية ، في الليل أجلس لكي أتابع الاشعار والأغاني الثورية المنطلقة من مسرحنا البهي ، عندما تأتي الساعة التاسعة مساء ويؤدي الثوار الوقفة الصامتة امام البحرية أعرف حينها أن وقت اللهو إنتهي و حان الوقت المخصص للشهداء وثوار الليل، أذهب إلي خيمتنا وأتمنى ليلة هانية لأخوتي ، تلك كانت حياتي السعيدة التي كنت أبحث عنها منذ صغري ، ولكن بعد ذلك اليوم اللعين أدركت حقيقتي التي تناسيتها طوال الثمانية وخمسين يوما ، أنا الأن وحيد أجلس علي أحدى الأرصفة ليس معي سوى ذكرياتي وشوقي لذلك المكان ، انهض بتعب ثم أقصد احد الأزقة اتوسد سريري المصنوع من الكرتون ، أغمض عيناي بتوسل علي أمل أن أستيقظ غدا وأكون بقرب اخوتي في عشنا الأمن!!!
يتبع....
