"أنا لست مجنونة يا صديقتي،،فقط هذه طريقتي لأخبار العالم بما لا أستطيع البوح به....!! "ــــــــــــــــــــــــــــــــــــــــــــــــــــبيان كانت واقفة بتحكي لوسن عن تفاصيل الموكب والمغامرات الحصلت معاها هناك بعد خلصت وسن قالت ليها:بيان ممكن أطلب منك طلب؟؟_إتفضلي طوالي_عايزة لي عروسة ومعاها كم حاجة كدا ممكن تجيبيها لي؟؟بيان إستغربت من طلبها الغريب وقالت ليها:طيب بس ممكن أعرف لييه؟؟_ما تفتكري أني مجنونة أو كدا،،أسفة بس حأحكي ليك كل حاجة لمن تجيبي العروسة والحاجات أوكي؟؟_طيب هسي حأمشي أجيبها ليك_شكرا ليك بالجد ياخ ما عارفة اقول ليك شنو_ولو عادي يا بت ما بيناتنا،،وسن كتبت كل حاجة عايزاها في ورقة وأدتها لبيان وقالت ليها بحرج:أسفة حأعذبك معاي بس لمن ألقي لي قروش حأرجعهم ليك،،بيان حدرت ليها وقالت:والله أزعل منك يا عويرة أحنا اخوات قروش الدنيا كلها ما بتغلى عليك،،وسن أبتسمت ليها ومشت فتحت شباك الغرفة وبقت مسهية،،بيان لبست ليها عباية ملونة وساقت عربيتها ومشت أقرب محل ببيع الحاجات دي،،أدت الورقة للبياع هو إستغرب في البداية من الطلبات الغريبة والما عندها علاقة ببعض دي بس وراها مواقع كل حاجة عايزاها وهي لفت وجابتهم كلهم بعدها شكرتو وحاسبتو ومشت البيت لقت وسن مستنياها بفارغ الصبر أدتها الحاجات،،وسن طلعت الحاجات وشافتها وكانت فرحانة شديد زي الشافعة الأول مرة يجيبو ليها عروسة،،عاينت لبيان لقتها بتعاين ليها وفي وشها إبتسامة إتنحنحت وقالت ليها:عارفة أنا عندي هواية غريبة جدا ما قادرة أسميها وما فاهمة فايدتها شنو أصلا _واللهيااا؟؟_شوفي يا ستي أيام كنت محبوسة في بيت خليل راجلي الله يرحمو عانيت شديد وكنت بطلب منو انو يقتلني ويريحني بس هو كان رافض وبقول لي انا بحبك وما قنعان منك عشان أقتلك وأخليك تهربي مني بالسهولة دي ما قادرة أفهم تفكيرو دا كيف هو قال أنو بحبني بس ليه حابسني وبعاملني بالوحشية دي تصرفاتو معاي دائما كانت متناقضة وما مفهومة المهم في يوم كنت قاعدة براي وزهجانة جاني هو وقال لي يلا تعالي أكلي ما عارفة الخلاني أوافق شنو بس في العادة هو كان بيأكل بعدها بجيب لي الاكل وانا كنت بأكل بسيط الحاجة التخليني عايشة بس،،أثناء ما بنأكل جات في بالي فكرة مجنونة وبدون مقدمات وبدون ما أفكر في كلامي الحقولو كويس قلت ليهو:خليل أنا عايزة عروسة ومسدس شمع وألوان،،عاين لي وضحك شديد لمن أتخنق أنا مشيت جبت ليهو موية شربها وتاني رجع يضحك وقال لي:قلتي لي شنو؟عروسة وشمع وألوان!!؟؟جنيتي خلاص مش كدا؟ طيري من وشي سريع قبل ما أدخل ليك الكباية دي جوة رأسك قال عروسة وألوان فاتحها ليك مرسم أنا،،أنا ما يئست وفضلت انق ليهو في الموضوع ع الطالعة والنازلة وزنيت علي رأسو وبريتو لمن في النهاية وافق وجابها لي شافني مبسوطة قالي والله انتي جنيتي رسمي وشعبي المهم ما أشتغلت بيهو وجريت اوضتي ومسكت العروسة الكيوتة ديك ووصلت مسدس الشمع في الكهرباء وشخبطت عليها بالألوان وعملت ليها تعديلات وغيرت ليها ملامحها كلها وطلعت تحفة ياخي لمن أنبسطت من نفسي،،خليتها لمن تنشف وتبرد حبة بعدها جيتها وأتأملت في ملامحها كانت بائسة وحزينة كدا حسيتها بتشبهني وسميتها(ماريه)جريت وريتها لي خليل بفرح وهو مما شافها خطفها مني وبقى يدعسها برجولو ويقول:دمية سحر دا أخر ما أتوصلت إليه؟؟عايزة تجنيني صح يا ساحرة يا مشعوذة_دي شنو الأفكار المريضة دي يا زول دي مجرد عروسة عدلت فيها بس ما أكتر_العروسة دي شكلها ما طبيعي وما مرتاح ليها أنا شالها وقال:أنا حأتخلص منها هسي،،مسكتو وقلت ليهو:خليل لو عندك ذرة إنسانية وحدة بس أنا برجوك وعايزاك تجيب لي كلو مرة عروسة وشمع وألوان وحاجات كدا أتسلى بيها حبة بدال ما أقعد أتكلم مع الحيط وأعاين ليهم،،خليلإتردد وقال لي حاضر مش قلت ليك متناقض الراجل دا ومن اليوم داك بقت عندي هواية وغرفتي إتملت بالعروسات الحزينات وهو كان كلو ما يشوفهم بقول: العاجبك في أنك تخلي عروسات الشفع الصغار ساحرات مخيفات وغريبات كده شنو؟؟ _كان نفسي يكون عندي اخوات بنات بس هسي بقا عندي معرض كامل وحنتونس سوى وحأحكي ليهم أسراري لكن أنت حتكون وحيد طول عمرك عارف ليييه؟؟ لأنك واحد مريض ومتناقض لأبعد حد صعب الزول يفهمك ويرتاح ليك لأنو الغدر والغش من طبعك بعد كلمتي دي خليل جن جنونو وفجأة بقى يشيل العروسات ويجدعهم لي ويقول:أنت المجنونة لأنك بتتكلمى مع عروسات قبيحات زي ديل أنا طبيعي وما مجنون فاهمة أ ن ا ما م ج ن و ن وفجأة وقع في الأرض وقام وإتكى علي الحيطة وقال لي بصوت مبحوح:أنا ما قاصد أعاملك كدا أ أ أنا بحبك والله بس اقل كلمة منك دمي بفور و لا إراديا بلقى روحي بضربك قطع كلامو وبقى مغطي وشو بيدينو كأن بحاول يبكي بدون صوت بس التنهيدات والشهقات الكان طالعة منو قدرت أسمعها ساعتها أنا أتأكدت أنو هو مريض نفسي مش مفروض أخاف منو؟؟لا أنا أشفقت عليهو ويمكن لأول مرة قلبي يحن عليهو لدرجة إتمنيت لو هو كان طبيعي كنا إتزوجنا برضاء أهلي وهو طلع بحبني بجد وما غاشيني وكلو يوم بثبت لي أنو أنا أخترت صح ونجيب لينا شفع صغار يشبهونا يتربو في عز أمي وأبوي أخخخخ بس ،،ضحكت بألم وواصلت:قاعدة أحلم أنا صح؟؟الحاجات دي بتحصل في الأفلام بس ههههه المهم من اليوم داك هو بطل يجيب لي الحاجات دي وأنا نسيتها بس الليلة فجأة إتذكرتها،،بيان طبطت عليها وقالت ليها:عموما كدا فكرتك دي جديدة وسمحة أنا متاكدة أنو حيحبوها الناس وأنا هسي إتشوقت أشوف عروساتك الكيوتات ديل_كيوتات!!هههههه عروساتي أبدا ما بجي فيهم لفظ كيوت لأنهم نتائج تجارب فاشلة وعواقب التجارب دي نهاية مؤلمة ومأساوية لصاحبها الصنعهم _سيبك من النكد دا وركزي معاي عروساتك ديل مبدئيا كدا حنعمل ليهم إعلان في السوشيال ميديا فيما بعد لمن النت يرجع إن شاء الله وإذا لقيتي الشغل ماشي ممكن تصنعيهم عديل يعني أنتي تتعاوني مع شركة بتصنع العروسات وأنتي تديهم رسم يوضح شكل العروسة العايزاها وهم يصنعوها ليك علي حسب مزاجك وتفتحي ليك محل كبير تعرضي فيهو لعبك دي وأنا حكون معاك وحأهتم بنشر أخبارك وصور الألعاب ولو عايزة حأعمل ليك موقع عديل الناس تقدر تشوف أشكال اللعب العايزاها وتشتريها منك وأنا متأكدة حتنجحي وتشتهري وبكدا تكوني قدرتي تحولي نقطة فشلك لنجاح باهر_عجبني نشاطك وحماسك دا بس أنتي مشيتي بعيد عروسلتي ديل ما حلوات ولا اقول ما تعيسات للدرجة الأحترافية التخليني أتعاقد مع شركة أنو تصنعها لي وبعدين انتي ما شفتي العروسات البعملهم عشان تحكمي عليهم بالنجاح_أيوا صح أنا ما شفتهم بس متأكدة أنهم حلوين وحيعجبو الناس زي ما متأكدة هسي أنك زولة مبدعة شديدكبرتي رأسي شديد هسي علي فكرة،،طيب انا حأعمل وحدة وعايزاك تديني رأيك فيها بصراحة أوكي؟_طيب طيب يلا أمشي أعمليها بسرعة منتظراك أناـــــــــــــــــــــــــــــــــــــــــــــــــــــــــــــــــــــ#في ثانوية النخيل......عمار كان قاعد تحت شجرة النيم وشايل ليهو قاطع،،نقش علي الشجرة بعصبية أسم(لتين)،،إنتبه أنو إنجرح في يدو رمي القاطع وطوالي مشى عيادة المدرسة وربط جرحو لمن كان راجع إتلاقى مع رئبال،،ملامح وشو إتغيرت وبقا شادي علي يدو بقوة،،رئبال قال ليهو: عايز إتكلم معاك هسي ممكن؟_أسف بس أنا هسي ما فاضيكان عايز يمشي بس رئبال مسكو وقال ليهو بإصرار:لا عايزك ضروري هسي لو سمحت_إتكلم سرعة عايز شنو؟_عايز أعرف الحاصل بينكم كلكم شنو بالأخص أنت ولتين من ما نزلت أنا وأنتو ما طبيعين حاسي أنو في مشكلة وما في زول راضي يوريني مشيت أتكلمت مع لتين والباقين بس ما لقيت منهم جواب فأرجوك أنت أحكي لي مالكم؟؟_هه أحكي ليك؟؟أحكي ليك شنو ولا شنو!!_أحكي لي الحاصل بالتفصيل_يا زول!؟أنت متأكد عايز تعرف لأنو مافي صالحك أنك تعرف وأحتمال حتخسرنا أنا ولتين للأبدرئبال بلع ريقو وقال ليهو: عمار ما توترني أرجوك ياخ أحكي الفيني مكفيني والله_طيب يا سيدي عايز تعرف سبب خصامنا؟؟السبب هو أنت يا رئبال أيوا أنت عارف ليييه؟؟عشااان لتيين بتحبكككك زي ما أناااا بحبهااااااا وما حستغنى عنها بالرغم من أني كنت ملازمها طوال الوقت بس هي ما كانت قادرة تحس بحبي ليها يمكن الله ما كاتبها لي حبيبة بس أنا كنت مطمئن عليها ع الأقل لمن كانت صحبتي بس هسي خلاص ضاعت مني هي بتحبك أنت ومستحيل تحبني أرجوك يا رئبال عشان خاطري خليك راجل وأوعى تزعلها في يوم لأنو لتين دي مخلوقة عشان تفرح بس،، أنا وصيتك عليها يا صحبي فما تخزلني،،قال جملتو دي ومشى وهو أنفاسو مخنوقة حسى بأنو الدنيا لافة بيهو وقلبو وجعو لدرجة أعتقد أنو حيموت بسقطة قلبية بس دائما طريق الحب كدا بوجع صاحبو في النهاية،،الحب ما بعرف صغير أو كبير هو زي السرطان خامل جوانا وفي لحظة بس ممكن يثور ويجهجه باكاتك كلها فعشان كدا حتلجئ للكيماوي الحيدمرك ببطء هو ما بيفرز بين الخلايا السليمة والمصابة والحب كدا ما بفرز بين الصح والغلط،،عارفين الكيماوي في الحب هو شنو؟؟ (التعلق) أنك تتعلق بحاجة أنت عارف أنها ما حتكون ليك في يوم بس أنت حتحاول تعاند القدر وحتعافر عشان تصل لحاجتك ساعتها حتلقى نفسك كلو يوم إتعلقت بيها أكتر وحبك ليها زاد أكتر مع مرور الزمن،،(الحب سرطان قاتل الله لا يبتلينا)،،رئبال كان مندهش من كلام عمار وما قادر يصدق لتين بتحبو هو؟؟متين؟؟وكيف؟؟وليييه؟؟لا وعمار طلع بحبها يعني هو عالق هسي في (مثلث حب) بس هو موقعو من الأعراب شنو؟؟هو ما حب ولا حصل جرب إحساس الحب تجاه بت أيااا كانت أبدا ما إتوقع أنو في يوم حيقع في موقف زي دا طيب هسي حيعمل شنو؟ سديم لازم يحكي لسديم ما حيقدر يشيل الليلة دي براهو،،عمار كان قاعد في المدرجات بتاعت الملعب جاهو حسام قال ليهو:ممكن أقعد معاك؟؟عمار هز ليهو رأسو وهو مدنقر حسام طوالي قعد جمبو سكت مسافة بعدها قال ليهو:ما عايز تحكي لي حاجة حسيتك مهموم ومحتاج زول تفضفض ليهو_فعلا أنا محتاج زول عشان أفضفضف ليهو وأرتاح_طيب ما أنا قاعد قدامك أتكلم يلاعمار إتردد قبل ما يتكلم بس في الأخر قرر يدي حسام فرصة إتنهد وقال ليهو:طلعت بتحب واحد تاني_لتين صح؟؟_كيف عرفت؟!!_هو منو في المدرسة دي ما عارف أنو عمار بحب لتين إلا هي الغشيمة ما عارفة_يا زول للدرجة دي واضح أني بحبها_آ زوووول والله لو جبت واحد يعاين ليكم ساي بيعرف أنك بتحبها_المشكلة هي بتحب واحد من أصحابي أسمو رئبال_رئباااال ود السفير؟؟! والله لعبتها صح بت الذين_حسام قفل خشمك عشان ما أخبطك بحاجة_خلاص سكت يا قيس بن الملوح ههههههه_عارف أنا هسي ضايع وما عارف أعمل شنو_شوف يا صحبي خليك عارف أنو لو الله كاتب ليك حاجة حتجيك ولو بعد ألف سنة أنت لو بالجد دايرها لقدام خليها هسي وأدعي أنها تبقي من نصيبك وتبقى مرتك بالحلال هي ضامنة انو رئبال البتحبو دا حيعرسها بعدين؟؟هو الحب دا كلمة نقولها وخلاص؟لا هو ألتزام وأفعال ما لسان وونسة ساي وما شرط أنك تحب وحدة معناتها خلاص تتزوجو لأنكم بتحبو يمكن بعد الزواج حياتكم حتتغير ومشاعركم حتتلاشى لأنكم خلاص ضمنتو بعض لكن أحلي الحاجة الزواج ثم الحب ودا بكون صادق ومع مرور السنين أنت حتبطل تحسسها بحبك لا أنت حتأكد ليك بمواقف بسيطة انك لسع بتحبها الحاجة لمن تكون طوالي ومستمرة بتبقى مملة صح؟؟ فشنو أنت فوض أمرك لله وركز علي قرايتك أهم شى أنت لسع صغير علي الحب ووجع القلب دا هههههه بنصحك كدا أحساس انا راجل كبير ما منتحر زيك وعلي زكر القراية أنا حسأعدك أنك تتجاوز لتين دي وصدقني حتنساها زي كأنو ولا شئ كلو يوم حنقرا لينا باب واليوم البعدو حيكون أسئلة في الباب كلو وفي خلال كم أسبوع حنلقى نفسنا خلصنا المواد كلها وجاهزين ليها مالنا ومال الكلام الفاضي دا خلينا نجتهد عشان نتخارج من 3بعدها نشوف لينا سمبك ولا حاجة لأنو الجامعات دي موضوعها طويل ،،وحسام فضل يتكلم مع عمار ويخفف عنو لغاية ما بقى كويس وبقى ويضحك ويتونس معاهو وبقو أصحاب تاني،،حسام عاين لساعتو وخبط رأسو وقال:أخخخخخ نسيت سيف بكون منتظرني عشان أديهو كراسي بتاع الكيمياء أسف يا عمار بس لازم امشي هسي_كويس ما مشكلة نتلاقي نهاية اليوم يا زول_ظاااابط يلا سلاممشى كم خطوة كدا عمار ناداهو وقال:حسام،،حسام إتلفت عليهو وقال وهو شابك يدينو ورا رأسو:أيوا نعم_شكرا ليك ياخ والله ما عارف أقول ليك شنو أنت وقفت معاي وساعدتني أكتر من أصحابي كنت ظالمك ساي والله أعفي لي_لا شكر علي واجب يا فردة وما تنسى أننا في يوم كنا أعداء وقبلها أصحاب فأنا أكتر واحد حأفهمك لأني شفت منك الشين والسمح هههههه ربت علي كتفو ومشى قبل ما نظراتو تتحول لسخرية ويقول في قرارة نفسو:غبي ما كنت قايلك حتلين لي وتثق فيني بالسرعة دي شكرا ليك سهلت علي كلام كتير واثناء ما ماشي كدا فجأة أعترض طريقو (سيف) عاين ليهو بريبة وقال:شنو يا فردة الغنجات دي بتعمل شنو من وراي أوعى يكون قلبك حن علي الأشكال دي وبالزات عمار نسيت عمل في تؤامك سبأ شنو?? حسام عيونو قلبو شرار وقال ليهو:لا ما نسيت وعمري ما حانسي العملو في أختي كسر قلبها وعايرها بمرضها الهي ما ليها يد فيهو بسبب العملو دا خسرنا بعض وبقينا أعداء لكن لسع دافنها ليهو أنا_حلووو طيب هسي الخطة شنو_حاليا أنت حتتعامل مع عمار كويس وحتصاحبو وخلي الباقي علي العبدلله دا_هههههههههاااي والله أنت يا مجرم لو ختيت زول في رأسك حتتعبو وتخليهو يقول الروب ودا البعجبني فيك يا صحبي
يتبع......
