شيخ ابو الاكبر

نزف

جنت سهران امس وي علاوي ونسولف حجالي عن الي مضوجه وشاغل باله صعدت شفت جنه نايمه ضليت صافن بيها وبملامحها تخبل غطيتها ونمت يمها تحركت عليه وصارت بصدري ياربي شنو هالملاك اليمي قربت ايدي عله خدها وسرحت بجمالها وسطرني عطرها خليتها بصدري وحضنتها ونمت غفيت عله عطرها كعدت لكيتها بعدهي نايمه تقربت عله خدها ردت ابوسها بس تحركت وبدت تكعد رجعت غمضت عيوني حته لا تحس اني كاعد قبلها كعدت شافت روحها بصدري نايمه رادت تكوم بس رجلها رجعت تعاين عليه احس بانفاسها قريبه كلش جنها اول مره تشوف ملامحي قربت ايدها عله وجهي ولمست لحيتي وبعدها خلت راسها عله صدري  اني متحملت لفيت ايده عليها وفتحت اعيوني بعيونها دخيلك ياللهي عيونها تذبحني
-صباح الخير شلون صرتي
-صباح النور شيخ
جانت خجلانه وهالشي يزيد جمالها جمال نزلت عينها وكالت
-شيخ اكوم احضرلك ملابسك
-لا انتي تعبانه هسه فطم اخليها تجهزلياهن ارتاحي انتي
حسيتها ممرتاحه بالوضع حاضنها واحجي وياها حارت وين تودي اعيونها بست راسها وكمت كتلها
-لا تنزلين البنات يحضرنلج كلشي ارتاحي
اخذت ملابسي ودخلت سبحت ونزلت لجوه كلت للبنات يتمن بالبيت ولايخلن جنه تنزل لان رجلها متاذيه طلعت وبلش الروتين اليومي مالتي من شغل للكعدات ارجع للبيت تعبان.
دخلت لكيتها تريد تكوم تقربت عليها لزمتها من خصرها ورفعنها اليه
-شجاي تسوين ليش تتحركين وحدج وين فطم
- جانت هنا وراحت اتشوف الحجيه واني مليت من الكعده
شلتها ونزلت بيها لجوه خليتها يم الحجيه فرحت من نزلت لان ضاجت من الغرفه وكعده وحدها كتلهم يحضرولي الاكل.. بعد يومين اخذت جنه للمستشفي وفتحت الجبس الي برجلها  ورجعت طبيعيه بس اخاف عليها. اتصلت عله علاوي
-الو وينك علاوي تعال
-اي يخوي جايك
اخذت علاوي وعمي ابو احمد ورحت لبيت ابو مصطفى جان يم المزرعه مالتنه وصلنه للمزرعه كال عمي
- بويه انت كتلهم جايينهم
-لا عمي اريد اشوف رايهم حته نجي بعراضه
علاوي مافاهم شي مايعرف وين جايين وصلنه لبيت ابو مصطفى نزلنه وبقه علاوي صافن صحت عليه نزل مايدري شيسوي يعدل بروحه لو يرجع لو يتقدم طلع ابو مصطفى استقبلنه ودخلنه يمه وكعدنه نسولف اتطمنه عليهم وعمي ابو احمد بلش بالحديث
-يبو مصطفى جاينك بطلبه وماضن تردنه كلنه اذا تلبيها نحجي واذا ماتكدر تلبيها انلم ارواحنه والدرب نندله.
-اذا اكدر عله الطلبه تشلعون عيوني
-سالمه اعيونك اليوم جبت الشيخ ابو الاكبر وابنه علي حته ناخذ بتكم الابنه علي اذا قسمته عدكم تنطونه واذا مالنه قسمه عدكم تبقون اهلنه.
-والله النه الشرف والبنيه بتكم ترباتكم بس البنيه لازم ناخذ رايها
-اكيد تاخذ رايها وتشورها وترد خبر واذا صارت نتفاهم بعد الاربعين تدري عدنه مصاب بس سمعنه البنيه ناس هواي هاويتها واحنه مانريد تروح منه.
-الله يرحم المات يبو احمد جيتكم عله راسي ان شاءالله خير
طلعنه منهم علاوي بس صافن وصلنه للبيت علاوي ساكت عله العشه ملتمين وعمي فتح الموضوع
-اريدكم بسالفه مهمه ان شاءالله تصير اريد اخذ الحجيه للعمره بس يخلص الاربعين ونزوج ندى ويتزوح علاوي نتطمن عليهم ونروح عمره
حجت الحجيه
-صدك يخوي نروح عمره
-اي ليش لا
-بس ندى فهمت سالفتها وجبار وده اهله وحجو بيها بس علاوي يتزوج قصدك يرجع ليلى
-لا حجيه علاوي تعب من المشاكل يريد يرتاح ولكه بت حلال ليلى تريد تبقه اهلا وسهلا ماتقبل بالوضع الله وياها ماكو مره تمشي راسها عله رجلها..
ضحك علاوي كلام عمي ساعده يفك الخربطه الي براسه جان مايعرف شيسري بسالفه ليلى وشلون راح يعيش بهالوضع بس فرحان الي يحبها راح تصير اله بس معقوله ميوافقون بي هالشي خلا حته ماياكل كام من العشه وطلع للحديقه خلصو العشه والبنات راحن طلعت يم علاوي نسولف وانغير جو جابولنه جاي شوي ودخلنه ميصير يبقه عمي وحده ضلينه نسولف وعمي راح لبيته الحجيه فرحانه لعلي وكلها باركتله بس بعدنه ماندري ردهم... شفت جنه تعاين عليه بخجل ماعرفت ليش بعدين تذكرت خجلانه من موقف اليوم الصبح كالن راح يبقن اليوم يم الحجيه بقن يمها احنه رحنه انام.. ثاني يوم جان عندي روحه لشيخ كاظم وره الغده حاجيت عباس يروح وياي طلعت بالسياره وي عباس قبل لا نوصل لبيت الشيخ كاظم وكفنه عله الاشاره طبكت سياره سمعت صوت الرمي وماحسيت بشي بعد..
اصياح صوت علاوي يصيح ومستشفى ماجنت اشوف شي الناس اتجمعت وانكلبت المستشفى بالشباب والعمام وصل خبر للبيت الشيخ تصوب الناس درت والبنات انتهن يردن يفهمن شي ماكو محد يحجي شي خلو الاكبر يمهن وكلها طلعت للمستشفي بعدين اخواني خابرو ولد العم حته يحمون البيت خافو لا الرموني يرحون للبيت كلها شالت اسلاح عمي ابو احمد كوه مسيطر عله الوضع كلساع يردون يرحون ياخذون ثار منهم مارضو ينطون خبر الحمد الله الرصاصه اجت بصدري بس من ناحيه الجتف طلعو الرصاصه ولفو ايدي مقبلو يطلعوني اله ثاني يوم حته يتطمنون عله الوضع كل الوكت مر واني ماشايف عصفورتي اشتاقيت الها اشتاقيت لعيونها اجه الدكتور وطمنهم عن حالتي وكال بليل تكدرون تطلعونه اجه عمي ابو احمد يمي سالته عن الاهل البيت منو ضل بي طمني وكالي كلشي تمام وكلنه بخير خفت لا عباس هم اصوب بس كالي لا ماكو شي بس انت اجت بيك طلقه وكال لزمو واحد منهم وهوه هسه بيد الشرطه انه كل الي اجه ابالي منو ذوله الي ضربوني وليش اتذكرت سالفت الشيخ ابو ضياء بس كلت حليناها والسالفه صارلها اسبوع انه ماعندي عداوه وي احد كل هاي الاساله وجعت راسي عمي كالي ارتاح حته بليل نطلع للبيت صارت الساعه ١٠ بالليل طلعت لكيت السيارات والشباب كلها منتضرتني وصلت للبيت مجهزين الي مكان بالمضيف حته الناس التجي تتحمدلي بالسلامه وصلو ولد العم كلهم والشباب وصار اصياح ومايرضون تهدا الامور اله ياخذون ثار يردون نتنازل حته يطلع ويكتلوه ضلو يتناقشون للفجر جهزولهم الاستقبال يرتاحون وينامون بي وانه نمت بمكاني كعدت عله صوت الهوسه علاوي جهز ذبايح لان شيوخ راح تجي اليوم صحت الاكبر يجيبلي ملابسي لان من امس بذني وكلي ريحت مستشفي بدلت وتعطرت ولحد هسه ماشايف عصفورتي طك كلبي كلش متت عليها التهيت وي الناس جانت هيه مفرفحه تريد اي خبر عني من اجيت كالولها بخير بس ماتشوفينه لان زلم كلها يمه واليوم شيوخ كلها عده التهينه وي الناس التجي المضيف مافرغ ابد والشباب تعبو حيل وصار اليل والناس بعدهي تجي علينه هاي اليله الثالثه ماشوف اعيونها ومانام عله ريحتها حيل تاذيت واشتاقيتلها بقو عمامي يمي والشيوخ الجايه للساعه ب١٠ اجه واحد للمضيف تحمدلي بالسلامه وكالي
-شيخ عندي كلام ارد اكوله كدام الناس الخيره هاي بس اريد الامان منك 
-كول والي يمسك بحجايه انه كتاله انت دايس ابساطي احجي
-شيخ السالفه تخص الي صوبك الولد من عشيرتي وانه ابن عمه والولد دز بيدي رساله الك
-كول شنو
-الولد يكول اكو احد ابيتك هوه الدزه يسوي هيج وثارك مو وياي ثارك وي الياكل بصحنك وحط طلقه بصدرك
من صدمتي وكفت عله حيلي وانه مامصدك الحجي
-شنو اليضمن كلام ابن عمك صح.
-كالي اكلك اليثبت كلامه السالفه من مبايل الفصليه والرساله الي اجتك
هنا دمي فار وتسودنت يعني السالفتين مرتبطات سوه وهذا الي ابيتي يلعب هالعبه من زمان وليش هيج اساله هواي محد يعرف بسالفت الرساله والمبايل بس انه وجبار
-زين والمطلوب شنو
-يسلمك كل الادله والاثباتات والكاعد ابيتك ايحطه بيدك بس لازم يطلع هوه منها لان هوه ماله ذنب
-تم
الكل عارضت وصاحت مانقبل انه سكتتهم اعرف شنو اسوي كلت العلاوي يروح يتنازل ويطلع الولد ويجيبه اله بكل صوره اريد افهم السالفه بقو الشباب يتناقشون والولد راح تعبت بس التفكير مايخليمي انام طلع الصبح والناس بدت تجي للمضيف وجان اكو كم مشكله حليناها كاعدين وطب ابو مصطفى كام علي بس شافه تلكاه وكاله
-هلا عمي تفضل
ضحكت عله علاوي شلون فرحان بس ابو مصطفي بقه بمكانه مادري خجل من الموجودين او عنده شي
-تفضل عمي ابو مصطفى
-تسلم شيخ بس وياي بنتي اجت تسلم عله الحجيه ونتطمن عليك
- اي كل الهلا بويه علاوي وصل الحرمه للجوه تعال يبو مصطفى
اجه كعد خليته يكعد يمي اعتذر مني ماجه من وقت بس جان مايريد يحرجنه ومن هالكلام جنت ادري بي خجلان من الجواب فسالته
-ابو مصطفى مالك نيه تفرح علاوي انريد نصير عايله وحده
دنك شويه وكال
-شيخ البنيه موافقه واحنه نتشرف بيكم
-اي هذا الخبر الي يفرح
بهالوقت دخل علاوي
-ياجماعه ان شالله بعد كم يوم نخطب العلي اخوي بنت ابو مصطفى الف مبروك خويه
كلها باركتله وكلها كامت تهني وصل الخبر للبيت والبنيه جانت خجلانه البنات داير مادايرها تباركن الهت وتعرفن عليها شويه ودخل عمي ابو محمد وليلي راحت للبيت يم الحجيه هيه وامها هنا صارت المصيبه...