شيخ ابو الاكبر

مشاكل

دخلنه البيت وتلكونه العمات مجموعين بالستقبال الجبير سلمنه وكعدو يتناقشون شفت فطم رحت عليها
-فطم شلونج بابا طمنيتي وين جنه
-الحمد لله جنه بالغرفه فوك وتعشينه اني وياها قبل الكل حته محد يسال بس مو صاير محد يسال عني مانذكر بس من تسالون عله جنه
-ليش منو سال غيري عليها
-الحجيه سالت عنها وكالت من يجي الشيخ اريد احجي وياه
-ماشي وانتي ام السان محد يكدر ينساج يبويه الاكبر وين
-جاي يدرس هسه قبل شويه شفته بغرفته
-والحجيه
-منتضرتك بغرفتها
رحت للحجيه سلمت عليها وبست راسها
-هايمه شلونج كالو رايدتني
-اي يمه اكعد احاجيك صار ليلتين تنام بالصاله كلنه البنيه جانت مريضه وخليت فطم يمها كلت لان بعدها متعرفنه اليوم شنو عذرك شيخ عماتك هنا وبناتهن والدنيه مرجونه اذا يشوفوك نايم هنا مو بغرفتك شيصير الحجي الصبح سكتنه عمتك سهام
الجاي الله يستر منه شوفلك حل يمه
-لاحجيه اليوم اصعد لغرفتي اني من البدايه هيج رايد اسوي لاتشغلين بالج وارتاحي
-اي يمه السابع وخلص والبنيه حلالك مرتك وماصدكت تتزوج وافرح بيك واتطمن عليك
-يمه شتحجين حالها حال فطم
-عزه شنو هالحجي يمه البنيه مرتك شنو حالها حال فطم ماكو هيج شتكول الوادم علينن وانت شيخهم
-شعليها الوادم
-اسكت لايسمعنك عماتك تشهرنه شهيره اسمعني زين البنيه مرتك تاخذها هسه او بعدين هيه الك وبركبتك ومسؤله منك وهيه التكوم بيك وبطلباتك فهمت
-الله كريم محتاجه شي مني
-سلامتك الله يحفظك
طلعت وانه اعصابي نار طلعت يمهم بره كاعدين يسولفون سمعنه عذراء بت عمتي صرخت طفرنه كلنه اني وعباس دخلنه نركض للبيت لكينه نور مرت عباس واكعه ويردن يكومنها مايكدرن عباس وكف مكانه جمد مصدوم صرخت عليه
-عباااس شمنتضر شيلها مانكدر احنه انت رجلها
شالها حطيناها بالسياره وكبل للمستشفي فحصوها والدكتور سوالها تحاليل هواي بعد ساعه رجعو علينه والدكتور سال
-منو زوجها
-انه دكتور
-اتطمن ضغطها جان هابط ومتعبه نفسها ميصير تضغط عله نفسها باول اشهر لان مناعتها ضعيفه ولازم تاكل جسمها ضعيف والحمل يضعفها اكثر
-دكتور مافهمت شي شنو حمل شنو اول شهر
-شنو متدرون اكو حمل زوجتك حامل بالشهر الثاني لازملها تغذيه وراحه والف مبروك الكم
-شكرا الك دكتور نكدر نطلعها للبيت
-اي اكيد
عباس مامصدك جان طاير من فرحته طلعنه للبيت والكل عرف نور حامل والكل تباركلهم
اتصلت عله علي
-الو علي وينك
-ابيت عمي ابو محمد ليش شيخ صاير شي
-لا بس ولد عمك وياك لو رجعو
-لا مو وياي رجعو للبيت اني هم هسه جاي
اني مارتاحلهم ولد عمي ماماخذين طبعنه لان معايشين ويانه ماشين عله طبع اهل امهم جلال وعمر ذولي ولد عمي الله يرحمه رحت اشوفهم يم الشباي بالمضيف لكتهم يتسامرون وي بقيت الشباب ولد عمي احمد احبهم شباب معدلين
-هاس لسه كاعدين ولكم ماشبعتو سوالف حته النوان نامت
-ههههه شيخ تدري بس بالمناسبات نلتم هيج لمه مانكدر نضيعها
-اوف من السانك الحل عمار الله يساعد التاخذك
-لا واللع شيخ بس هيه وين غير تجي مو انشلع كلبي
كلها كامت تضحك طبعا عمار ابن عمي ابو احمد الزغير بعدها حجه ياسر ابن عم ابوي هاي الله يرحمه ولد بعمر ابني الاكبر وخلوق كلش وخجول وهوه الي يريد بنتي فطم حجه وياي عمي احمد بهالموضوع بس انه كتله يكمل دراسته وبعدين نحجي حجه ياسر وكال
-عمار ارجوك مو وكت رومانسياتك اني تفكيري بالنتيجه اذا ماجيب معدل اموت
-ياسر هوه انت كلشي عندك موت اذا ماطلع للسفره اموت اذا ماجيب معدل اموت اذا مانطوني فطم اموت... شكلي خربطت مو رحت زايد هواي
كلها صاحت عليه اي خربطت اباوع الياسر يباوع عليه ونزل راسه وكال راح انام
-يلا بلا حجي زايد نامو تصبحون عله خير
-امرك شيخ وانت بخير
طلعت منهم ورجعت للصاله شفت جنه وفطم بالبيت من شافني اجن عليع
-ها لسه كاعدات شنو سالفتكم اليوم محد نايم لسه
-بابا بعد وكت هسه ساعه ب١٢ وبعدين جنه ضاجت من الغرفه كلت نطلع للحديقه
-جنه تره ماناسي وعدي
-ها ياوعد
-شنو ياوعد فطم بويه صاير شي
-بابا الحجيه اليوم حجت وياها من طلعت منها لحد هسه بس تصفن ماعرف شبيها
عرفت الحجيه حجيتلها عن سالفه اليوم اصعد يمها واخذها مخليه البنيه بس تصفن طلعن للحديقه كعدن ع المرجوحه المرجوحه جبيره مقابيل الباب تقربت يمها وكلت الفطم تروح خاف الحجيه تحتاحها كعدت يمها هيه جفلت مني ورادت تكوم
-مو اتفقنه بليل اخليج تحجين وي اهلج
باوعتلي بصدمه وفرح
-اي بس ماتوقعت تخليني احجي وياهم كلت مجرد كلام حته تسكتني وتنسه بعدين
-لا شلون بس قبل لاتحجين بعدنه عله اتفاقنه اسالج وتجاوبين
-اذا هيج اكيد
-اليوم الحجيه كالتلج الشيخ ابو الاكبر يصعد لغرفته
جاوبتني بخجل وخوف
- اي صح هيج كالت
-زين ليش ضايجه حجت شي ضوجج
ضلت تتلعثم بالكلام اني فهمت شبيها ومن شنو ضايجه ماعرفها من قبل وممعاشرها بس افهم كل حركاتها وتوترها حيل واضح بالنسبه الي
-اذا مضوجج الوضع كولي ماريد ابو الاكبر وخلص..
شهكت وخلت ايدها عله حلكها وباوعتلي كالت
- ميصير اني فصليه اله وكدام الله زوجي ميصير احجي هذا الكلام.
بكلامها شفت برائتها شكد صافيه هالبنيه ونضيفه ماتريد هالشي بس متكدر تعصي امر الله ومتقبله امره رغم الي متخيلته ابالها هوه رجال عجوز
-ليش احس اكو سوال محيرج اسالي واجاوبج بسهوله ههههه.
-ها اي ماعرف شلون اساله بس اريد اعرف من اجيت لليوم اني بغرفت ابو الاكبر ودخلت لهنا فصليه باسم ابو الاكبر ليش من البدايه ماجه ليش اليوم
-اول يوم مشكله والثاني مريضه واليوم ثالث الج هنا
-اي صح بس هوه مايتواجد بالبيت. وسلمت عليه مره بس شويه يبقه ويروح كعدت اليوم الفجر شفت الملابس الي بغرفته مو بمكانهن واكو ملابس ناقصه يمته دخل واخذهم...
من برائتها وكلامها ضليت اضحك بكل صوتي
-ليش تضحك مداحجس شي يضحك هالشي محيرني معقوله بيتكم بي شي...
هنا بعد ماسيطرت ضليت اضحك واضحك بصوت عالي شفتها مستغربه وماخذه الكلام بجديه فسكتت من الضحك وحاجيتها..
-اذا انتي متردينه وهوه عجوز ليش تدورين وراه وتتفقدين ملابسه واجه لو مااجه
-لان احب افهم الوضع الي اني بي حته اعرف اتعايش وياه من جانو هنا سمعته يحجي وي الاهل موجود من نزلت ماهوه ومستحيل صعد لان اني جنت فوك
-ليش شاغله تفكيرج بي مو متردي
-احس اكو شي غلط او اكولك يجوز حته مالاكيه ومااواجها فكرت يمكن متزوج ويروح البيته ودعيت هالفكره تكون صح بس فطم ونور اكدولي هذا بيته.
حسيتها احتنكت وبلشت تبجي بدون صوت عرفت كل هذا تفكيرها وتحليلها حته تلهي روحها حته لتبجي البنيه دتعيش حرب نفسيه صراع قوي وعله ياساعه ويدخللها الغول المتوحش العجوز الي ابالها
-جنه هاج هذا تلفوني احجي وي اهلج براحتج واني شويه وارجع
اخذت الجهاز من ايدي بس بقت صافنه عليه
-شبيج صافنه
-ماحافظه رقم بابا
اخذته من ايدها واتصلت عليهم
-هاج اني مخزن وقمه احجي
خليتها ورحت ليجوه حته تحجي وي اهلها براحتها حاجيت فطم تنام بغرفتها اني اليوم اصعد لغرفتي ورجعت للحديقه اكو شجره بالزاويه وخلين مقاعد يمها كعدت حته عليهن هيه صارت مقابيلي هيه تحجي وي اهلها واني ادخن لان خطيه الدخان ياذيها هههه صاير حيل اهتم مو. انه اباوع عليها تحجي وي اهلها وتبجي بس فرحانه بنفس الوقت حجت وي والدها وي والدتها ضلت تبجي بصوت كطعت كلبي طمنتهم عليها واني صافن عليها وعله حركاتها انفنح باب البيت دخل علي وليلى زوجته مشافوني اني صاير وراهم اول مدخلت ليلى وشافت جنه تحجي بالتلفون هجمت عليها وجرتهل من شالها وسحبت الجهاز منها وكعت جنه بالكاع ودفرتها اني طفرت من مكاني متحملت اشوفها هيج وعطت صوت البيت كله كعد عله عياطي
- ليلىىى
علي جمد مكانه ليلى ماهتمت بقت تدفر بجنه وصلت يمها دفعتها وعلي جرها نزلت عله جنه كعدتها وشفتها بس تبجي عدلت شالها كومتها اعصابي صارت جمر لو الزم ليلى ادفنها كلها كعدت جانت الساعه بالوحده ونص بالليل اجو عماتي وبناتهن ولد عمي طلعو فطم اجت تركض عله جنه ردت الزمها متخليني خايفه كعدتها فطم ع المرجوحه طلع عباس لازم الحجيه صاحت
-يمه شبيك شصاير ليش العياط شكو يمه علي شصاير
ركضت ليلى يم امي وبلشت تحجي
-اني اكلج اشصاير هاي الفصليه حبستها بالمخزن وكلت هيه اجت بذال دم اخوي يعني حصتي حكي بكيفي لو احركها عدله هسه اجي الكاها بنص الحديقه تحجي بالتلفون وتتمضحك بت ال.... ولاجنها فصليه الكح..... ماخذه راحتها
-شنو هالحجي هاي مرت الشيخ مالج اي حك بيها
اني كاعد ع ركبتي اشوف جنه لان فطم راحت تجيب البخاخ واسمع الحجي وكوه لازم اعصابي شفت ادموعها تنزل بدون صوت تباوعلي تستنجد بيه
-خيه ياحجي هيه خلك فصليه وليلى محتركه عله اخوها
-سهام كتلج بطلي اسوالفج واخذي البنات ودخلن عيب الشباب منا وهنه واكفات جدامهم يلا دخلن
-ياسوالف عفتو بنات العشيره الشريفات المؤدبات وزوجتو الشيخ وحده مدري منين بت شوارع يلا يمه ادخلن جوه رجعن نامن يلا فوتن
اجت فطم وخلتها تجر نفسها والبخاخ بيدها من سمعت كلام عمتي متحملت
-انتو متستحون مو بعينجن اني موجود لو مالي قيمه صرت
- محشوم خويه بس هدي اعصابك
-يااعصاب كافي شوفو الكل حاضر ويسمع بيت الشيخ ابو الاكبر مابي فصليه واليدخل بيت الشيخ يحترم اهله ومرت الشيخ وانتي ليلى مديتي ايدج عليها مرتين وسكتنه احترام لابوج ولاخوي وقدرت المصاب الانتي بي بس قسم اذا مسيتيها بكلمه او تلمسين شعره منها ياكص ايدج ويحرم هالبيت عليج واخوي علي بدال المره ازوجه ٣ نسوان
-هدي شيخ والي تريده يجرالك وليلي غلطانه
-لا ماغلطت وادوس راسها ولو بيدي اذبحها بت الشوارع
كملتاخر كلمه علي ضربها راشدي فر راسها وصرخ عله الاكبر كله هسه توديها لاهلها
عمتي صاحت
-فلك فلكج بلحضه هجمتي بيت يمه منها هالفصليه
عطت بيهم مره لخ
-اسمعوني زين كلمه فصليه متنكال واليكولها اكص السانه سمعن انتن ديوان كامل وزلم من احجي تسكت هسه ماكدر عليجن افه وانه ابو الاكبر اليدخل بيتي يحترم مرتي سمعتن زين..
كلها صاحت امرك شيخ وراحو. باوعت عليها لكيتها تباوعلي بصدمه خليتهن وصعدت سبحت وبدلت طلعت شفت الساعه صارت٢ بالليل شويه وانفتح الباب دخلت وهيه مدنكه شفتها دخلت تمددت عالفراش
-اه اخيرا رجعت لفراشي تكسرت من نومت الصاله.
من خليت وجهي عالمخده سطرني عطرها جان عالمخده
-ماتجين تنامين بويه
-ها اي هسه
اشوفه تقدم رجل وتاخر رجل
كلت عاشت رعب هواي كعدت وارتجيت عالمخده كلت احاجيها احسن
-تعالي احجي وياج اكعدي.. شوفي بويه اريدج بكلمتين اول شي الخوف شيلي لان محد بهذا البيت راح ياذيج وسوالف بنت عمج كلها تنسينها ماكو احد يدوسلج عله طرف واني موجود
-ادري
-شنو
اني سمعتها بس ردت اعرف شتقصد
-ها لا ماكو شي
-شغله ثانيه انتي بالنسبه الي حالج حال فطم ماشي بويه بس راح ابقه هنا لان الاهل موجودين وعماتي ماريد احد يحجي حجابه منا مناك
-ان شاء الله شيخ
-هههههه لو يسمعنج الجوه هيج تحجين ياكلنج لاتكونين ضعيفه كدامهن اني ميهمني شيفكرون الي يهمني ماريد احد يضوجج وبعدين انتي راح تكونين مسؤله عن اكلي وملابسي وكلشي يخصني ماحب تجادليني او يعله صوتج عليه وماحب تضمين شي عليه او تكذبين لان اذا اعصب ماشوف كدامي بعد ويلا تاخر الوقت نامي وارتاحي
-حاضر
نمنه من التعب محسيت بشي وعطرها جان وياي حته بالحلم كعدت عله صوت الباب فتحت عيوني شفت وجها مقابيل وجهي ممرتاحه بنومتها سبحان الخالق شنو من جمال شايله وناعمه كلش زغيرونه حيل كمت فتحت الباب طلعت فطم.
...
..
...
شنو رايكم بالبارت كولولي