نسيبتي ياداب بدت قلاوتي تظهر ليها اول لو مرضت اتجاري فيها ليل نهار وبخلي بناتي عشان اقعد عندها واشتغل ليها ولو م بقت كويسه م برجع بيتي وحتي بقت تبقي كويسه بعمل الأكل وبرسلو ليها ،،،لكن فعلآ خير تعمل شر تلقي كل مافي الأمر انها زعلانه عشان جبتا لي ولدها بنات بس طيب الشي دا انا لو بيدي كان غيرتو بس م بيدي ولو خيروني الف مره بختار بناتي.
نسيبتي قالت شكلي غلطه لما قلتا لي حامد يطلق منى كان اخليها قاعدة علي الأقل تخدمني ،،،،يعني بعد مرضها وبعد عرفت منال مستحيل تحن علي حالها يوم لسه عايزاني بس عشان اشتغل ليها.
ابرار وهي في الجامعة
ي نور مية مره قلتا ليك الولد دا بحبك وعايزك لي قدام يعني م بلعب بيك وم تنسي دا ود عميد الكلية يعني ناس هاي كلاس ،،،،نور قالت ليها انتي مش من البداية قلتي بتحبي ومستعده تعملي اي حاجه عشان توصلي ليه طيب الجد ليك شنو هسي عشان تخليني ارطبت بيهو ،،،،قالت ليها اااي كنتا بحبو واي حاجه بس لما قربتا منو عرفتا انو م بحب غيرك وصراحه الولد حنني مع انو هم ناس هاي كلاس والبنات بترمن في رجلينو بس هو م شايف ولا عايز غيرك انتي ولما شفتو كدا قلتا لازم اساعدو ،،،،نور قالت ليها صراحه كلامك م اقنعني نهائي بس ماشي ي ستي بحاول افكر في الموضوع مع انو كنتا رافضه الفكرة دي تمامآ ،،،،ابرار ابتسمت وقالت ليها وان شاء الله توافقي يارب وح تكوني اخدتي احسن قرار في حياتك ،،،،نور زحتها منها وقالت ليها ان شاء الله وقالت ليها يلا ماشه المكتبه عشان اذاكر الامتحانات قربت انتي م ماشه ،،،،ابرار قالت ليها م عندي نفس هسي لقرايه امشي انتي وانا بعدين بذاكر ،،،نور ودعتها ومشت علي المكتبه.
نور دي بت بسيطة شديد وابسط من البسيط قلبها طيب وبتخاف من العلاقات شديد انسانه شبه منطويه لانها م بتحب تتعلق بالناس شديد عشان خاته في راسها انها ح تفقدهم زي م فقدت ابوها ،،،ابوها متوفي وعندها اخت تانيه ممتحنه الشهادة امها بتشتغل في سوبر ماركت والحمد لله حالهم مستور ،،،هي حلاتها شديد اي ولد بشوفها بعجب بشخصيتها وبساطتها ،،،نهائي م بتدي ولد فرصه في حياتها ،،،م عندها صحبات غير ابرار ،،،بس ابرار م قدرت الصحوبية ولا العشره وبتحاول تخلي طارق يصل ليها وياخد منها العايزو زي م عمل معاها هي ،،،،طارق الشي الخلاهو متعلق بنور انو حاول يصل ليها وهي صدتو وهو بكره زول يقول ليهو لا علي حاجه ودائمآ بسجل لي البنات مقاطع فيديو وبستفذهم بيهم عشان يجيبو ليهو البنات زي م عمل مع ابرار.
بعد نور مشت ،،،ابرار طلعت التلفون واتصلت علي طارق قالت ليهو عايزه الحلاوه ،،،قال ليها م تقولي لي نور وافقت ،،،،قالت ليهو م لنهاية لكن قالت بتفكر في الموضوع ووعد ي سيدي م احل عن راسه الا بعد اجيبها ليك في شقتك ،،،،قال ليها طيب ياستي الحلاوه بتصلك لما اخد كل العايزو وياريت تحاولي تجيبيها سريع عشان انا زهجتا ولو زهجتا بتعرفي بعمل شنووو وقفل ليها الخط في وشها ،،،قالت والله ي طارق لو م كنتا ماسك علي زله كان وريتك النجوم عز الضهر.
طارق عندو سته سنه م اتخرج من تجاره وهو ود عميد الكليه يعني بعمل العايزو بدون م زول يقول ليهو تلت التلاته كم ودائمآ بركز علي البرالمه عشان بكونن م سمعن عن عمايلو وبنبهرن بعربيتو وشكلو الحلو.
نور وهي في المكتبه جات انفال قعدت جنبها قالت لي نور ممكن اتكلم معاك شووويه ،،،نور قالت ليها لو سمحتي دا م مكان لي الكلام بعدين نتكلم ،،،انفال قالت ليها لا وعلي شنو وو عندي فتره بقول عايزة اتكلم معاك ابرار بتخليك تهربي مني بس عايزه اقول ليك حاجه وحده ي نور احسن ليك ي نور تبعدي عن ابرار عشان في بنات شافنها بتطلع شقه مشبوهه وكل الفي الجامعة بتكلم عنها وقامت خلتها ،،،،نور بقت تفكر ي ترا الكلام دا صح ولا لا ،،،تاني طردت الافكار دي من راسها وقالت اهم شي انك تنجحي ي نور واي حاجه تانيه بتتحل.
منال عملت نفسها عيانه وم قادره تقوم من السرير عشان حامد م يقول ليها امشي اقعدي مع امي واشتغلي ليها لحدي م تبقي كويسه ،،،،حامد يحمر يدنقر م مشي الشغل الليله ومشي لي امو قعد جنبها (عجبني ليهو)
صفاء مواصله تحريش مع منال وتشيل وتملا ليها في راسها ،،،ومنال بتنفذ بالحرف الواحد.
الليله مشيت اشتغلتا ولقيت نسوان كويسات شديد واي وحده بتديني حاجه براها وفي وحده قالت لي يومي تجيني وبديك الشي البعجبك ورجعتا البيت مبسوطه شديد ويوميآ علي الحال دا لحدي في وحدات بقن صحباتي وحالي ماشي ميسور والحمد لله واهم شي بناتي مواصلات دراستهن وبحاول اعمل ليهن كل الاتحرمتا منو انا لانو الحرمان دا صعب شديد الله لا يوريكم ليهو.
يوم بناتي بعد رجعن من المدرسه استاذنن يلعبن برا مع بنات الحله ،،،،وانا اليوم دا م مشيت الشغل ،، جات المره ضربت لي الباب قالت لي الحقي بتك رجعت فيها كارو بتاعت مويه وعوقتها في رجلها طلعت كاني مجنونه وجريت عليها.....
يتبع
