العرسان جوا داخلين ،،،وهي تعجبكم ماسكاهو من يدو تقول هارب منها ،،،،حامد سلم علينا وهي جات مدت يدها وجرتها بسرعة ،،،،سوسن قالت لي تقول جابرنها ،،،ضحكتا قلتا ليها اسكتي واكتميها 😂،،،،العروس بقت تحمر لينا مرضها تقوم تطقعنا بالكراسي 😂.
فضلناهم وجبنا ليهم الموية والعصير وشوية كدا مشينا انا وسوسن نخت الغداء ،،،،ختيناهو ولمينا الكراسي وقعدنا نأكل سوا ،،،بناتي ختينا ليهم اكلمع اولاد سوسن وقلنا ليهم اقعدو معاهم هناك ،،،عشان م يجن يعملن جوطة ،،،،العروس تعجبكم طبعآ تشيل وتاكل فيهو قدامنا لا خجله لا استحي ،،،،وانا اعاين لي سوسن ،،،وسوسن تعاين لي ،،،انتهينا ومشيت مع سوسن المطبخ ،،،انا غسلتا العدة وهي عملت شاي الغداء.
سوسن قالت لي الله يعينك بس علي البحصل معاكي مع ضحكة 😂،،،،قلتا ليها قصدك شنو ياكلبة ،،،قالت لي شكلها الولية دي م هينا وح تخليكي تطلعي من هدومك ،،،،قلتا ليها تطلع منو من هدومو والله امعطه معط ،،،قالت لي والله م عايزة احرشك لكن لو م بقيتي نجيضة م ابتقدري تعيشي مع منال دي انتي وبناتك ،،،قلتا ليها تصدقي انا م لازم ابين اني خايفة منها خصوصآ هي واختها البايرة دي شرانيات وناس حي نسابتي كلهم عارفين كدا ،،،،قالت لي هي كعبات علي نفسهن م عليكي وبعدين طول م انتي في السليم مافي زول بقدر يلغط معاكي بكلمة وحدة ،،،،ولو هي غلطت تتأدب بس ،،،،قلتا ليها لو قلتا ليك انها م ابتغلط كذبته عليك بس لازم اعمل حسابي منها زي م قلتا ليك ،،،،سوسن قالت لي يلا هي وراح نودي الشاي وانا عشان اطلع اتفكفك عشان تاخدو راحتكم ،،،،قلتا ليها محسساني عايزة اخد راحتي معاهم 😂 ،،،يماما قولي هم عايزين ياخدو راحتهم ارح ارح.
ودينا الشاي وطبعآ هي من تشوفني تقعد تتنايص وتعمل حركات بس وحاتكم ولا هاميني ،،،وكانوا القدامي دا م راجلي ،،،هو بيدو قتل اي مشاعر في قلبي اتجاهو انا بقيت م دايرة حاجة غير اشوف بناتي باحسن حال وطلباتهن متلبية وبتعلمن ويحاولن يغيرو من حالهن وحالي معاهن ،،،ويومي البلقي طريقة بلا حامد بمشي واخليهو بس الله يجيب اليوم دا.
سوسن رفعت معاي الحاجات وودعتهم ومشت ،،،،وحامد ومنال دخلو الغرفة قالوا تعبانين دايرين يرتاحو ،،،محسسني كانوا بنجرو في خشب ،،،الا اليرتاح ساي ويتهنا بيها اصلآ انا م دايرة بس سوسن هي البتقول لي اتحملي وم تبيني ليهو انك كارهاهو ،،،يلا اريتهم يعمرو ،،،الدنيا مغربت بناتي جن ،،،ختيت ليهم اكلن وطلعتا السرير حقاتي انا وبناتي بس هم ان شاء الله يتفسخو جوا وحاتكم ولا يهمني 😂 ،،،اصلآ الحوش كلو واحد ولو طلعوا بشوفهم.
صحيت الصباح بدري صليت وعملتا الشاي ودخلتا السراير ،،،،جهزتا البنات لي المدرسة ونفس الروتين ،،،غسلتا عدتي الساعة بقت 10 ولسه الجزم م صحو ،،،،قلتا مالي ومالهم مشيت لي سوسن ،،،قالت لي اها الفطور شنو قلتا ليها م عارفة والله قالت لي نعمل(سلطة دكوه ومرارة وصحن شية) شلنا القروش ومشينا السوق جبناهم واي زول دخل بيتو ،،،لقيتهم صحو وبشربو في الشاي ،،،حامد قال لي انتي م بتبطلي حوامة من اول الصباح ،،،هسي تلقاكي كنتي مع سوسن ،،،،سوسن دي م ابتخليكي الا لما تخرب ليكي بيتك ،،،،قلتا ليهو اولآ انا طلعتا اجيب الفطور عشان تفطرو ،،،وثانيآ سوسن هي المصبراني علي العيشة الهنا دي ومشيت وخليتهم ،،،،ياخ قلبي وجعني شديد قلتا اطلع ليهو كل الشين الفي قلبي لكن تاني هديت شويه قلتا م اتسرع ساي ،،،،جيت ماشه اجيب موية من البرميل الجمب البرنده سمعتها بتتكلم مع حامد وبتحرش فيهو قالت ليهو ،،،،،انت لازم يكون عندك كلمة علي مرتك دي ،،،سوسن دي ماشة ساي وعلي كيفا وكدا ح تعلمها المشي الما كويس م تنسا انها ام بنات ولو الأم بقت ماشة علي كيفا البنات ح يقومو بنفس طريق امهم ،،،هو ساكت وبسمع فيها ولا فكر يقول ليها انا مني دي عارفها كويس وم بتعمل شي غلط.
لما قربتا ادخل عليها البرنده وامعطها معطة تمام ،،،بس لو عملتا كدا حامد بخت الحق علي وبطلعها هي المسكينة ،،،،شلتا مويتي ورجعتا المطبخ وانا شويه واطرشق ،،،اصلآ عرفتا قصدها عايزة تفتني مع حامد وسوسن ،،،عشان سوسن تبعد وتستفرد بي مع اختها الشرانية ديك ،،،،بس وين دا عمرو م يحصل انا لازم اشتغل من تحت لي تحت زي شغلها هي ويومي الاطرشق فيهم كل شي ح يدمر في وشهم.
مضي اليوم ومافي شي غير نظرات الكره والشك بيني وبين الست فلانه ،،،وحامد العامل زي الخاروف.
الصباح حامد نزل الشغل ،،،،قلتا الحمد لله اصلآ عملتا ليهو الشاي بتاعو شرب ومشي والبنات مشن المدرسة وبقينا انا والست هانم الساعة 11 ولسه نايمة ،،،،بعد صحت وبكل بقاحة قالت لي وينو الشاي جيبي لي في غرفتي ،،،،جريتها من يدها قلتا ليها انا م الشغالة الجابوها ليك ناس بيتكم ،،،،انتي تنزلي المطبخ وتعملي لي نفسك العايزة ،،،،قالت لي انا عروس م بنزل اي شغل من هسي ،،،قلتا ليها احسن تختيني عشان م ارتكب فيكي جريمة ،،،،شكلها خافت مشت المطبخ جابت ليها شاي ودخلت بيهو غرفتها 😂،،
،،والفطور عملتو وابيت اناديها ،،،لما جاعت جات تكركب في الحلل ،،،لقتنا انا وسوسن بنشرب في الجبنه ،،،،قالت لي سوسن لو م عايزة صحبتك بيتها يتخرب بسببك ابعدي عنها ،،قمتا مشيت عليها قلتا ليها وانتي لو م عايزاني ارتكب فيكي جريمة بطلي تحرشي حامد والله اقتلك سامعة كلمة اقتلك دي ،،،،مشت وخلتنا ،،،،قلتا لي سوسن م تشتغلي بيها ،،،،سوسن قالت لي انسي اصلآ كلام وحدة زي دي م بأثر فيني ،،،،.
منال اتصلت لي صفاء اختها ،،،،وحكت ليها الحصل كلو ،،،صفاء قالت ليها انتي حيوانة عايزة تسكتي ليها يعني ،،،،اسمعيني بقول ليك شنو ونفذي بالحرف الواحد ،،،،ولو م خليت حامد يطلقها م يكون اسمي صفاء ،،،،.
حامد جا قعد كم ساعة جوا بعد كدا جا ينادي لي وعيونو كانها نار......
يتبع
