خسـرته 💔

1

خسرته "1"

والروح لـ حبيب الروح ، تحنْ.

كنت نسأل في روحي السؤال هدا هلبا !
اعلاش اني ماكنتش راضيـة بقدري ؟ اعلاش ماحسيتش بحبـه وحنيته
رغم كُل التعب الي يمر بيـهْ مايرتاحش غير ف حضني ...
مقابلتش الإحسان بالإحسان .
ندمت بس شن ينفع النـدم توا ؟

أسمي سلمى مِن عائلـة جداً فقيـرة
مرو اعلينا ايام واحني جيعانين وصقعانين
تربينا في حـوش يقطر في وقت المطر
ماعندناش سيارات نمشو ع رجلينا
بابا مريض وأمي ربـة بيت وماعنديش خوت
أحني تلاتة بنات " سوسن ، سهيلة ، سلمى "
اني اخـر العنـقود ..
خواتي متزوجـات وعايشين أحلى عيشـة بس أني كنت الوحيدة المظلومة بينهم
لين جاني عمار كانت حالته المـادية كويسة وعنده حوش بروحه خوته مستقيلن كل حد عايش بروحه وهو الوحيد الي يدير في باله ع امـه
عمار راجـلي " كان راجـل بكل معنى الكلمة "
كنت نحلم براجل معبي فلوس ويعيشني احلى عيشـة !وفعلاً عشت معاه السنة الأولى احلى عيشة والي نبيه يجيني " مستغنى بعد فقر " وبديت معاش نرضى إلا بالغالي ونشوف لفوق بس
ومن ناحيـة الحب ف عمار ماحبيتاش نهائي
قاعدة معاه ع خاطر فلوسه 👌🏻
بس ماعرفتش ان الحُب والحنية والإهتمام أهم من الفلوس والحـوش ! 🤍
بس كيف ماقلت فـوق ! شن ينفع النـدم ؟

جـاني في عمر 18 اعطوني أهلي بعيون مغمضات باش يفتكو من المصاريف الـزايدة و ع اساس بتتحسن عيشتي ..
وتحسنت بس مش ديمـا حَ نعيشو حياة ورديـة حياة ملكية مافيهاش مشاكل ولا تعب !! 🤷🏻‍♀️

عندي 3 سنين  متـزوجة وعندي زوز صغـار بنت او ولد " بلقيس ، باسم "

كان عمار يخدم في شركة مع خـوه بس فترة جت أفلست الشـركة واهني بدت مُعاناتي من اول وجديد ، وكل مرة تنقص علينا حاجة والصغار بدو يكبرو ..
بس ماخدمش بالحرام ابداً باش يوكلنا ويعيشنا ..

________

عمار كيف جي من الخـدمة وجهه اصفر وعيونه دابلات من التعب بس أبتسملي : هلا حبيبتي
أني بدون مانشبحله : اهلين باهي الي جيت مافيش  حتى ماكرونة نديروها ع الغدا
عمار نزل راسـه : سامحيني بس كنت نلقـط باش نجيبلك مكرونة .. ومدلي الكيسـة فيها ماكرونة ولحم .
خديتها وماقلت حتى شكـراً ! " قداش الإنسان يكون حقير مرات " ؟!
خشيت للكوجينـة وبديت انطيب ودمعتي ف عيوني ونلعن في العيشـة الي عايشتها ..
ونسيت ان ربي قال " لا تَقْنَطُوا مِنْ رَحْمَةِ اللَّهِ "
ماكنتش ندعي ونعاون راجـلي ونرضـى ! كنت نلعن في عيشتي ونتمنى ربي ياخدني او ياخده هو !!!

كملت المكرونـة وحطيتها وجي هو جنبي وبدا ياكل لاحظت في يده كلها جـروح رف قلبي شوي وحنيت بس فيه شعور داخلي يدفن ف الحنيـة ويخلق الكره 😔

أني بكل برود : خيرها يدك ؟
عمار أبتسم بكسرة : لا مافيش شي مادوريش شوية جروح ☺️

" بس هي مش شوية جـروح ! لما كان يخدم وينقل ف البضاعـة كانت ثقيلة عليه وقداش من مرة طاح بس عشان يسعدني ويرضيني ! "

أني : اها به
نضت وجبتله معقم وبديت نعقمله في يده ولفيتها بشاش بكل برود وبدون مانحن عليـه ولا نقوله كلمة طيبة :

تغدينا وحطيت الماعين في الكـوجينة بس كان ماعنديش خلوق نغسلهم غيرت لصغـار وقعمزت في غرفتي لين جت السـاعة 12
جي عمـار جنبي وكان يحاول يلطف الجو
عمـار : استحشتك انتي مش مستاحشتيني ؟❤️
اني لفيت للجهة التانية : عمار مش وقته بنـرقد
عمار : عارف أنك تعبتي وعانيتي من صغـرك بس اني ندير في كل جهـدي باش نعوضك وقرب طبع بوسـة ع جبهتي كلها حنية وحُب !
بس اني ماحسيتش بالحنية والحب حسيت بالقرف !!
رقـد عمار ورقدت اني ....

_____

تاني يوم الصبـح نضت مالقيتش عمار ف الحوش
وعزوزتي جت عندنا " ع اساس ناقصنا مصاريف زايدة "

أغلب الناس تقول اعلاش عمار مايطلقهاش ؟
عمار يحب .. عمار يحب سلمى من كل قلبه ، وكل كلمة تقولها يخلقلها عُدر انها عانت من صغرها هدا اعلاش !

من قال ان الراجل مايحبش ؟ من قال ان الراجل مايحسش ؟😔💔

عزوزتي كانت حنية الدنيا فيهـا بس اني ماكنتش نعامل فيها مُعاملة كويسـة ! كان قلبي مليان غل ع العيلـة كُلها 👌🏻👀
وبـدات عمارر ..

يُتبع