ازمة ضمير

البارت 42

ازمة ضمير ... البارت الثاني والاربعون
«للكاتبه روزايه»

خسرنا أول خسارة وگلنة تتعوض
وخسرنا الثانية وگلنا العتب عالحظ
ما ظلت بعد حجّة
اشبعد يا روحي نترجّة
هاي الثالثة وبيها السكوت أفرض
....

اسماء ... لو اعرف اخسر عمري كله وما اخسر ادهم اني الي بعت ذهبي ومديت ايدي على فلوس عمي وعمتي واجيب وادفع فلوس لام معتز ولغيرهه وتالي اطلع خسرانه...

احس نفسي ع طرف الهاويه وكلشي خططت اله راح يضيع انكتلت كتل من ادهم مو بانصاف كلما يفوت للغرفه مجرد ما يسمع صوتي يجيني الراشدي ...

بيومهه تعاركت ويا كتله انت خطبتني ليش تعاملني هيج انت كلت اني اريدج..

انفعل حيل وهد عليه خنكني صاك ع اسنانه ويصيح انه ماكتلج احبج انتي الكحتي نفسج بطريقي..

من وراج خسرت امنيه وما ادري بيهه وين انتي ..... و..... جان ينطق بكلمات فشار مايلبس عليهه ثوب مايشوفني بنظره غير بس بالكلمات الي وصفني بيهه..

خشمي ينزف وجسمي تكسر من الدفرات والبوكسيات الي حصلتهه اخذني سحل وشمرني ابيت عمي يومين واني ما اكدر افتح خلكي واكل من قوه الضربه مالته..

اني غلطت بكلشي وغلطي الاكبر امنت وصدكت بام رنا صديقتي جنت ابدال ما اكعد ويه عمتي واحجيلهه اروح اخابر ام رنا واخذ بكلامهه..

هي نصحتني احجي لعمي واكله ادهم مامتقربلي واني بعدني باكر كالت الرجال ما تهزه غير رجولته ومن راح يوجهوله هيج كلام راح يتمم زواجه بيج وانتي اسعي حته تسوين طفل ويجي لدرب..

رحت لمرت عمي سولفتلهه تخبلت ليش شنو السبب مايريدج اشو مبين بطل شلون مامتقربلج لسه..

جنت اموت قهر واني اشوفه من يطب ويطلع روحي متعلقه بي احبه حب موطبيعي مستعده افدي بروحي بكلشي مستعده ادفع عمري ثمن بس اعيش شهر واحد ويا بحب...

بليل اروحله للاستقبال اباوعله شلون نايم وهو نادرا ماينام دائما اراقبه يدخن ويسهر برا لحدمايتعب يله يطب جوه ...

لا لمسني بحنيه ولاسمعت من عنده كلمه حلوه ولا اجت عينه بعيني حته بالخطوبه مجرد ماتلتقي عيونه يدير وجهه ويتهرب من عندي..

راح عمي ومثل ماكالت ام رنا صار الي صار وادهم منفعل بهذا الموضوع ورجعني عمي واني ادعي تتحسن حياتي للافضل...

الكل نابذني بالبيت انقهر من اشوف شذره بنت الخدامه صارت ام البيت واني الي دفعت كومه فلوس مامحصله بس الاهانه..

اسمع صوتهم جوه والحجي الي عليه من وكعت شذره والكتله الحصلتهه من ايوب احس ظهري مفتوح من النص عبالك يكتل برجال كسر عوده الماسحه عليه ..

جنت مقرره اشتكي علي والا اذبه بالسجن احجي لعمي والا اخلي يجي يعتذر كدام الكل..

جنت كاعده بالغرفه وكالعاده البس واحضر يوميه املي يجي ادهم واالكا متغير سمعت فاروق وهو يكل لادهم ربيهه..