ازمة ضمير

البارت36

ازمة ضمير ... البارت السادس والثلاثون
«للكاتبه روزايه»

اتسوي روحك جاي تنسه
وما تجيهم..!؟
ومن بعيد اهواي تنشد
يمته ناموا..؟
يمته فزوا...؟
و القميص اللايگ اعليهم تبدل..؟
بعده نفسه..؟
اتسوي روحك تچذب وگلك صدگ
غطي گلبك ذاك هوه امبين بگلبك عشگ
...

ايوب.. ول منا لا اترس حلكك رصاص الجاي اداعي بي زلمه اليجي هين بعد والله لا ادفنو بمكانو

عادل.. موهيج الحجي مرتي تعديتو عليهه واخذوتهه من داري انه وياكم والمحاكم لخيسكم كلكم بالسجون ..

ايوب.. ذاك درب المحكمه خاف ماتندلو وروح انبح ابابهه مره ماعندك يمنه وغصبا ماعليك اطلك وانت وفلاح الجبان ادفعون الثمن غالي...

فلاح.. انتم ياولد اخوي راح تروحون برجلين على هاي عملتكم تاخذون حرمه من رجلهه وتروحون تشتكون علينه وين صايره هاي ماعدكم شيخ لو رداد يردكم...

ايوب.. هم الك عين وتحجي مالك بنت يمنه روح منا قبل ما افقد اعصابي عليكم...

الصوت عالي وزاد الغلط بيناتهم وادافعو وايوب رجلو ماتعينو عركه زلم ويدفعون بايوب يريدون يفوتون للبيت ياخذون نيران...

الجيران طلعت ع صوت الصياح وعم اسماء هو الي وكف بوجهم وهددهم يخابر الشرطه وايوب جان مصر يكلهم لو على جثتي ما تاخذوهه

بس صوت السيارات والتراب الي خلفته وراهه وايوب دخل للبيت وهو لازم رجلو وعابر الدم على الضماد مالتهه...

تلكتو نيران بعيون مليانه دموع كالتلو موكتلك يا ايوب مايعوفكم بحالكم مشكلتهم وياي لان اعرف كل سوالفهم ومايريدون اعترف عليهم...

ايوب.. انت بس لاتصيرين ضعيفه والباقي ينحل صح خاطرت بروحتي بس موبيدي ماكدرت انتظر الايام تمشي ...

ثريا.. ايوب رجلك تنزف تعال اضمدهه الك..
.. ايوب حدري هين يولي ما اكدر احركهه ...

ثريا... سندتو من ايدو واخذتو لمكانو والحجيه يم راسو اتلوب بي وهو ساكت ضمدت جرحو ورجعت لفيتو ومدد بفراشو...

سديت الباب واخذت نفس عالي ياربي شلون بينه خاف يصير شي باخوتي لان متهورين والعصبيه العدهم ماتخليهم يفكرون...

رجعوا الولد وكعدت احجيلهم وفاروق عصب على ايوب وصار نقاش حاد بيناتهم...

فاروق.. ايوب اذا ماكعدت وسكتت اكسر رجلك الثانيه حته اخلص يول انت عقل ماعندك كلما نكسب السالفه تروح تخربهه..

ايوب.. شسويت يعني تريد افتحلو الباب واكلو اتفضل البيت بيتك والله انتم الماعدكم عقل ...

فاروق.. الله يطيح حظك اكثر من هالحظ العندك لا من انت مريض خلصان من طلايبك ولا بيك حظ...