رفقا بما تبقى مني ..(الجزء الاول " دموع طفلة يتيمة ")

الفصل 12....

هبط سيف لقا كلشي مزال ناعس، كيف ديما دخل لكوزينة وجد ليه كاس ديال قهوة و توجه لبيتو يكمل داك شي لي كيخطط ليه... حمات شمس في سما و لي عندو شي شغل ناض يبشي يقضيه و منهم سيف لي خرج و معرفو تا حد فين غادي و الماس لي هزات الخبز و لعند لفران توجهات.. دخلاتها لالة خديجة كيف ديما لعندها لدار و لفطور حطات لكن الماس ما قاصت والو و قالت ليها ما فيا لي ياكل اخالتي،
لالة خديجة تعجبات و دخل ليها لوسواس و خافت داك شي لي كتفكر فيها يكون بصح جبداتها عندها و دخلاتها لبيت نعاس و بقات معاها راس في راس و قالت لالة خديجة لي قلبها ممهنيهاش..
خديجة:بنتي الماس شتك هاد ليام مبقيتيش كاع كتكلي داك شي لي كنحط ليك و تبارك الله بنتي لي كل نهار تزيدي تكبري و تجبدي قولي ليا ابنتي شكون كيعطيك تاكلي.
الماس كلامها من كلام سيف لي قراها ووعاها و لي سولها اش تجاوبو و تسد عليه لبيبان :لا لا اخالتي تا حد مكيعطيني ناكل غير جدة ممبقاتش كتخبي عليا الماكلة و كتخليني ناكل لي بغيت.
لالة خديجة هاد الهضرة ما دخلات ليها راس و هي عارف ديك العقروشة ديال لحاجة قلبها كحل :اممم زعما قولي ليا ابنتي يكما شي حد كيدير ليك شي حاجة خايبة و نتي مقلتيهاش لي
الماس :بحالاش هاد الحاجة.
لالة خديجة:معمر شي حد حيد ليك حوايجك ياك ابنتي
الماس: لا لا اخالتي انا لي ديما كنحيد حوايجي راسي و معمر شي حد حيدهم ليا.
خديجة:وهانتي ابنتي الحبيبة ديالي نوصيك ما عمرك تخلي شي حد يقرب ليك ولا يحيد ليك حوايجك ولا شتي شي واحد فولاد عمامك قاصك فشي بلاصة اجي قوليها لي و متحشميش
الماس وخا مفهمات والو لكن حركات ليها راسها بي اه و هي كتبسم ليها بقاو في لبيت و لالة خديجة كتوصيها و تعاود توصيها دايرها فمكان بنتها و متبغي لي يضرها وخا معندها جهد قدام الحاج محمد لكن شادة في يد الماس و حالفة حلوفها ما طلق منها تا تعطيها راجل لي يتمناها ..سمعات صوت سي عزيز كيعيط ليها جمعات الوقفة وخرجات هي و الماس لقات سي عزيز كيهضر مع سيف لي هاز جوج ميكات.
لالة خدبجة:اهلن بولدي سيف كيف داير لباس.
سيف:لاباس اخالتي خديجة و نتي كيف دارة مع شي حرارة
لالة خديجة:وراك عارف اولدي مراكش كيف كتكون في صيف...
بقاو كيهضرو و الماس واقفة وساكتة و لعند سيف ما بشات و تا سيف مرة مرة يشوف فيها و يبتسم ،عارفها دايرة بوصيتو و بكلمتو حيت هوا لي قال ليها من نكون وحدي اجي عندي اما من نكون مع ناس ديري راسك مكتعرفنيش..

شاف سيف في لالة خديجة تنهد و قال.
سيف:سمعي اخالتي خديجة انا جيت عندك نيشن و نتي و سي عزيز و حدكم لي كنتيق فيكم و بغيت هضرتنا ما تخرج من هنا.
لالة خديجة هي و عزيز شافو فبعضياتهم و هما مفهمين والو و جاتهم هضرات سيف فشكل وزادت تشوشات لالة خديجة لي قالت
خديجة: يعزك الله اولدي، لكن شمن مناسبة هاد الهضرة
سيف:سمعي اخالتي خديجة انا بقات فيا هاد ليتيمة و بغيت نعاونها
خديجة:كلنا اولدي بقات فينا و مكرهناش نعاونوها دخل بعدا اولدي دخل الهضرة ماشي قدام لباب.
دخلو لداخل و في صالون جلسو
خديجة:أنعمر واحد كاس اتاي بزربة و نرجع.
سيف:بلاش اخالتي خديجة انا نيت مزروب غير جلسي نكملو كلامنا راني عارفك مولات دار لكبيرة.
خديجة: الله اكبر بيك اولدي اوا كمل..
سيف:كيف كتعرفي عائلة الماس مكرفصين عليها بزاف و عطينها تمارة ديال ناس كبار و يمحنو فيها بقات غير هي لي صغيرة و معندها صحة ، انا بشحال هادي كنت غادي نشكي بيهم لجمعيات لتعنيف طفلة و لكن من سولت لقيت تا دوك جمعيات ما في يديهم والو و تا ناس لي شادين الميتم ما فيهم تيقة وراكي شفتي بعينك الماس شحال عاطية لعين.
خديجة :ايييييه اولدي انااااا لي عارفة و خايفة عليها يبشيو يتكرفصو عليها و هي معندها لا حنين لا رحيم و...
سيف قطعها بغضب : عندها.. عندها الالة خديجة عندها لي يحميها بحياتو ولي كيقلب على الموت يقرب ليها ولا يقيس شعرة منها... مهم اخالتي خديجة انا قررت ان احسن حل نخليو الماس تبقى عايشة مع دارهم و خا تكرفيص ديالهم لكن راكي عارفة الحاجة ما كتبغي شوهة هادشي علاش انخدمو هادشي فصالحنا حيت بهاد شي مغادي تخلي تا حد يقرب لألماس .
خديجة:ونتا اولدي فين كتعرف هادشي كامل
سيف: من بعد وغادي تعرفي كلشي مهم انا لي بغيت منك هو هاد لحوايج (هز ميكات و حطهم قدامها)
خديجة:اش هاد شي اولدي
سيف:هادو حوايج خديتهم لألماس لكن معرفتش كيف نعطيهم ليها و نتي لي طحتي ليا في البال و عرفتك غادي تعاونيني بغيتك تهزي هاد لحوايج وديهم تعطيهم ليها بسميتك يعني نتي لي جبتيهم ليها و عنداك دكري سميتي
خديجة:و خا مفهمت والو من هضرتك لكن غادي ندير كاع داك شي لي قلتي.
تافقو بيناتهم و خرجو لعند سي عزيز سولوه على الماس لي بقات حداه قال ليهم راه بشات لدارهم
توادع سيف معاهم و شد طريق لدارهم و داير تيقتو في لالة خديجة هي لي غادي تعاونو ..دارس لخطة ديالو مزيان وعارف كيف ياخد داك شي لي بغا غير بي الفن و بلاتي هي احسن حيت كون هو لي عطا لحوايج لألماس قدامهم غادي يديرو عزة نفس و انها ممحتجاش لي يصدق عليها اما هما مردينش بولد لأصل و من عائلة معروفة بحال سيف يشري لحوايج لألماس لي هي غير بنت الخدامة هادشي علاش لعب هاد لعبة وعطاهم لالة خديجة تعطيهم ليها كصدقة باش يتيقو راسهم و يقولو مرات لخباز صدقات على بنت الخدامة .

دخلات الماس و بان ليها كلشي مجموع في صالون كبير وتا من جدها كاين هبطات راسها و دخلات لكوزينة و في لماعن غطسات ما سول فيها حد ما عيط عليها حد هي بحدها في الكوزينة كتسمع ضحك ديالهم نزلات ليها دمعة يتيمة على خدها الأيسر بزربة مسحاتها و كملات شغلها ...