Usa ka Bugkos nga Gugma

Part 3

Nag-inusara nga naglakaw si Alicia pauli sa ilang balay ug sa tulay na pud kini miagi kay gusto niini nga magpahangin na lang una. Sa pinaka tunga sa tulay kini mihunong ug naglingkod sa may usa ka steel bar nga iyang isip hawiranan aron dili mahulog sa ubos. 

"Diyos ko, mabdos gyud diay ko. Kinsa bay amahan aning bataa kaha Lord?"

"Kabalo ko nga dili ako. Pwede muabay ug ingkod nimo miss?" Ingon pa sa lalaki nga anaa misulpot sa luyo ni Alicia ug nakabati kini sa mga gipamulong ni Alicia mao nga nakuratan kini pag-ayo unya imbes nga masuko kini siya iya kining gitugutan ang lalaki nga muabay kaniya total murag dili man nawong ug rapist ug dili pud holdaper.

"Okay lingkod lang boss ikaw mag-igo." Matud pa ni Alicia nga walay gana nga mitubag unya nagpadayon ug paglantaw sa layo dayon piyong sa dihang milabay ang bugnaw kaayo nga hangin.

"Salamat ha sa pagtugot diri nako. Ang hangin nga bugnaw siguro maoy nagdala nimo dinhi sa tulay maong naa ka dinhi karon? Presko hinuon ang hangin dinhing dapita unya bugnaw pa gyud kaayo ilabi na nga gikan sa lasang sa atbang nga bukid. Una pa, di ba ikaw tong babae nga nakit-an nako dinhi nga naghilak gihapon unya nagdungaw sa ubos? Wala ka nagpadayon ug ambak adto nu? Komedya lang. Naa ba kay mga problema nga gipang-atubang mao nga pirme ka dinhi sa tulay? Pwede ba nato maistoryahan kay basin naa koy matabang nimo diha pwera lang sa cash kay wala pud ko ana. Mga tambag lang ug istorya sa usa ka..." Giputol ni Alicia ang iyang pag-istorya pinaagi sa pagsampong niini sa baba sa lalaki.

"Sorry ha dili nako mapunggan nga mag sige ug istorya mao nga....." Gisampungan na pud ug balik ni Alicia ang iyang baba hinungdan nga naghilom na lang ang lalaki unya nagtan-aw sa layo ug nagsimhot sa bugnaw nga hangin nga mihuyop padulong sa ilang nahimutangan. Pipila ka minuto kini silang duha wala nagtingganay ug nagtanaw lang sa layo nga murag adunay talan-awon nga anindot kaayo hinungdan sa ilang paghunong ug istorya.

"Ako diay si Alicia."

"Sebastian."

"Nice meeting you Sebastian."

"Ako pud."

"Taga asa diay ka?"

"Kinahanglan ba gyud nga naay sayaw ana nga pangutana kay mutindog ko."

"Nara nimo kung kaantigo ka."

"Bitaw taga diha lang sa may parish."

"Unsa imong trabaho dadto? Ayaw kog igna nga pari ka? Kay murag dili man kag nawong ug pari."

"Dili pa. Pero padulungay pa. Puhon."

"O nganong ginagmay na man kaayo imong mga istorya karon ha nga ako na kang gapangutan-on?"

"Sorry. Hilumon man gyud ko nga pagkatawo ilabi na nga maka-abay ug dili pa nako kaila kaayo. Mao nang akong gipractisan karon ang makig halubilo sa mga tawo kay diha man ang akong tumong ang magsangyaw sa maayong balita. Katoliko ba ka Alicia? Aduna ka bay pagtoo?"

"Oo padre usa ko ka Katoliko ngano man diay?"

"Wala lang nangutana lang kung unsa imong pagtoo. Daghan na man gud karon nga wala nay pagtoo basta lang nga na belong kuno sa usa ka simbahan apan dili lig-on ang mga pagtoo niini. Ayaw sa tawon ko tawaga ug padre kay dili pa ko pari. Una pa wala ba ka gigutom? Pwede ba ka nako ma-invite mag breakfast or paniudto na lang. Unsa man ha? Ali na ubani na lang ko kay gusto ko naa koy maka-istorya." Mitindog usab si Alicia ug wala kini nakabalibad sa lalaki ug iya na lang kining gibalewala ug nagsunod na lang sa hangyo ni Sebastian nga ubanan kini siya. Didto kini sila nakapadulong sa usa ka cafeteria nga diin didto pud nagtrabaho si Fidel apan wala masayod si Alicia busa nagtagbo kini sila sa sulod.

"Wooo. Daan pa lage ko nga giganahan ka nako kay mianhi man ka dinhi sa akong gitrabahuan. Unsa man round two ta ha baby girl?" Ingon pa ni Fidel nga aksiyon ug duol ug halok kang Alicia apan gilaparo kini ug kusog kaayo ni Alicia sa iyang kakurat ug kaulaw sa mga tawo nga anaa sa palibot. Nasuko ug maayo si Fidel ug iya unta kining birahon ang kamot ni Alicia apan gitagbo kini siya ni Sebastian nga ngadtong tungora gikan pa sa gawas nag parking sa iyang kotse.

"Kinsa ning tawhana ni ha? Mao ning nakauna diha nimo o lain na sad ning lalaki nimo ha? Kiat gyud kang bayhana ka ha unya pavirgin-virgin pa gyud ka?"

"Bastos ka Fidel! Bastos ka." Gikaruwas niini ang nawong ni Fidel sa kalagot apan dali ra kaayo kay gipalayo na man kini ni Sebastian gikan sa pagkab-ot sa iyang kamot. Aksiyon pud unta nga itulod ni Fidel si Alicia apan mas kusgan si Sebastian kumpara niya busa wala kini nahimo ug siya na nuon ang gitulod ni Sebastian palayo kanila.

"Husto na brod palihog. Nianhi lang mi aron mukaon unta. Palihug ko respeto sa babaye brod." Ingon pa ni Sebastian nga namula na sa kalagot ngadto kang Fidel kay bastos man kini kaayo ug taras ngadto kang Alicia.

"F--- Y-- nimo. Hala pag-uban mong duha kay humana ko ana niya." Ug nikatawa kini ug kusog sa dihang gisumbag kini ug kusog kaayo ni Sebastian mao nga natumba kini ug nalipong sa salug ug nagdali-dali ug panggawas ang duha ug misakay sa kotse aron mupalayo sa lugar.

Walay tingog na nagdrive ug sirit sirit si Sebastian sa iyang kotse palayo sa maong lugar. Wala lang pud mitingog si Alicia sa kakulba sa kusog kaayo nga dagan sa kotse apan sulod sa iyang huna-huna nalipay kini ug nagkatawa kay nakabalos kini kang Fidel ug first time nga adunay nanalipod sa iyang pagkababaye. First time in her life nga adunay knight in shining armor gawas nga macho kini guwapo pa gyud kini kaayo. Karon lang niya namatikdan ang itsura niini kay murag nigawas ang pagka-astig niini human makasumbag kang Fidel.

"Gusto ba gyud ni siya mahimong pari? Pwede akong siyang punggan Lord ug siya akong himuon nga amahan niining akong gisabak?" Matud pa ni Alicia sa iyang kaugalingon.