وآخرون يعشقون بقلم الكاتبة (انسام ليبيا )مزيج بين الفصحي والعامية❤ (مكتملة)💚

الحلقة22والآخيرةة

#وآخرون_يعشقون
الحلقة( 22)والآخيرةة
عاد توفيق للمزرعة وهو يشعر ان كاهله محمل بما لايطيق ... توقف تحت شجرة التوت الضخمة محاولا كسب وقت قبل ان يدخل ليرمي عليهم هده القنبلة......شاكر كان واضح لا تنازل قبل عقد القران...كيف سيبلغ والده واخته الجامحة بهكدا خبر ...هو علي يقين انها سترفض وتفضل السجن علي زواجها من شاكر ....
- لله الامر من قبل ومن بعد ...اللهم اني لا اسألك رد القضاء ولكني اسألك اللطف فيه..
- مرااحب ياشيخ...
صوتها الذي اصبحت أذنيه تميزه وسط جوقة من الموسيقيين ..طريقتها الناعمة اللعوب في لفظ الحروف ...تجعل حتي اكبر المتزمتين صرعي أنوثة طبقات صوتها ...ياللهول ياتوفيق لقد جننت ...
اعادت تحيتها له ..
- السلام عليك ورحمة الله وبركاته..اهو قلنا التحية الشرعية كاملة ...
- وعليك السلام والرحمة..
- لاباس خيرك واقف هنا ...؟؟؟ صار حاجة في موضوع فاتن؟؟؟
نظر اليها وقد اختفت كل همومه التي كانت تثقل كاهله فرؤيه ملامحها الجميلة وعينيها الممتلئتين بشيطنة طفولية تعاكس بقية تضاريس جسدها المتفجر بالانوثة ....يا إلهي ماذا دهاك يا توفيق...ثم فجأة وبلا مقدمات اندفع ليقول لها
- نادية نبي نتزوجك ...وياريت يكون الاسبوع الجاي ...
بقيت للحظات تنظر اليه بعدم فهم قبل ان ترتسم ببطء إبتسامة ممتلئة بشيطنة أنثوية
- لا ياتوفيق ..مينفعش..
ملئه قلق قاتل ...
- قصدك مينفعش ان نتزوجو؟؟
- مينفعش الاسبوع الجاي...
خرجت منه لا إراديا نفس مرتاح ...ليقول
- تبي تأجلي...
- لا ...نبيه غدوة مع عقد فاتن ...
- واني شنو عرفك بقصة فاتن؟؟؟ومش كنتي تسألي توا علي الجديد ....
قاطعته بملل..
- تيفا ..تيفا...لازم تتعود علي اسلوبي لو تبي نكون مراتك..انا هكي نحب لعبة القط والفار ...(لتكمل بطريقة استنهضت رجولته بطريقة مؤلمة)...
وعموما بعد مانتزوجوا راح تعرف قداش نحب الآلعاب ....غمزت بعينها وإستدارت لتكمل طريقها ...
- نادية
إلتفتت إليه وهي تبتسم إبتسامة من نوع خاص..إبتسامة شعر أنها له هو خصيصا..
- عيون نادية...
تجمد من طريقتها في الرد فحتي زوجته ليلي كانت متحفظة معه وكان يشعر انه مع صديق يحترمه اكثر منها زوجه تتدلل عليه..
- احمم ...ماجدة..
- الحمد لله بخير بس تبي راحة فترة طويلة لحد مايثبت الحمل...شئ ثاني؟؟
- انتي متأكدة انك تبي نتزوجوا غدوة..
- امممم نبي نتزوجوا ...والا انت متبيش ...
- لا لا ...انا ...
كم تبدو رائعة في ثياب التمريض...ربما لن يسمح لها ان ترتديها الا له...
رباه ياتوفيق متي اصبحت صاحب افكار منحرفة ...هز رأسه بعنف محاولا بيأس طرد تلك الفاتنة من رأسه..لكنه كان يعلم انها إستكانت هناك ولا مجال لإخراجها....
- نادية اول مانتزوجوا مش ح تخدمي وح تتفرغي للصغار والحوش...
- حاضر
استغرب سرعة موافقتها توقع صراعا من جانبها ..
- وطريقة لبسك ...نتمني لو تلبسي الخمار..انتي حلوة ووجهك فتنة...
- تأمر..
شعر أنها تتلاعب به بطريقة ما..
- فيه شئ ثاني ..تيفا...
- بنتي..
- ح تكون مع بناتي ...زيهم بالزبط...
- خلاص غدوة بعون الله ...
- ح نكون حلالك ...تصبح علي خير
..عادت لتكمل طريقها وهي تتحرك برشاقة وعادت تلك الافكار الغريبة تتصاعد في رأسه...عاد من جديد ينفض راسه علها تخرج من افكاره وتوجه نحو البيت
ولج من الباب ليجد جدته وعمه ووالده وباقي افراد العائلة من الرجال متجمهرون بطريقة مزعجة ..كان يفضل لو بقي الامر محصورا بين والده وبينه ...والافضل كم تمني لو لم يحصل هدا الامر من أساسه....
- ها خير بشر..
قاطع عمه افكاره بسؤاله المتلهف...
- شاكر مصر ان التنازل بعد عقد القران...وقضية حيازة السلاح ح يكتم عليها قاضي صديق للوالد...
اندفع عمه ليقول ..
- خلاص ويتزوجها ويفكنا من هالقصة ...انا من الاول كنت عارف ان طبايع هالبنت ح تجيبنا المشاكل...
- فاتن كانت تدافع عن سمعتهايا عمي وانا خايف ان زواجهم ميستمرش وتطلق بعد اقل اسبوع حسب معرفتي بيها فهي ح تقول ننحبس ولا نتزوجه...
قاطعته جدته بحزم...
- لاح ترفض ولا حتتطلق...
- ياحنه البنت كارهاته لدرجة انها ضربت عليه النار..
- وهو يبيها لدرجة انه شري حوش خوها باش يتزوجها فيه...
- ياحنة ..
قاطعته باشارة من يدها وهي تنهض...
- توا توكلوا روحوا ..وغدو جهزوا موضوع العقد...وانت يا توفيق برا نادي المهبولة فاتن ..ولو مجتش حنركبلها ..ونعطيها بعصاتي اللي مكلتاش من صغرها...
تعجب توفيق من اسلوب جدته الساخرلكنه فجأة توقف ليتدكر زواجه المرتقب من نادية..
- اه ياعيلة فيه موضوع بنبلغكم بيه
- خير ان شاء الله..
- ان شاء الله خير يابوي..
- غدوة مع عقد فاتن وشاكر ..بنعقد علي نادية..ومنبي حد يناقشني لان خلاص الموضوع منتهي..
- بالرفاه والبنين ياولدي ...اجابه والده بتعب بادي علي وجهه...
سلم عليه شقيقه مهنئا وعمه وخالد...لكنه كان في يعوم في قلق وتوجس من ردة فعل فاتن علي هده التسوية...
توجه نحو غرفتها وقد قرر ان لا يواجهها بأي شئ ليترك الامر بأكمله بين يدي جدته ..فهي من روضت خالد...وماجدة ...و...لكن فاتن مختلفة ...فاتن ستشعر بالخدلان ....طرق باب غرفتها
- فاتن ...
عم الصمت لعدة ثواني قبل ان ترد بصوت كانت تحاول ان تجعله طبيعيا بقدر الامكان لكنه استشف اهتزاز الحزن فيه مازاد من قلقه عليها...
- حنة تبيك تحت ...ضروري ..
- ليش؟؟
- أنزلي شوفيها...
- اوك..
تركها وقلبه في حالة من عدم التوازن بين الحزن علي اخته التي خدلها الجميع حتي هو....وبين النشوة العارمة بأمتلاك نادية كحلال له بعد ساعات....
&&&&&&&&&&&&&&&&&&&&&&&&&&&&&&&&&&
إخترقت رائحة عز الدين انفها مزيج لذيذ من المسك والعود ...إبتسمت بضعف وهي غير قادرة علي فتح عينيها...أحست بأصابعه ترسم خطوط وجهها برقة وهو يهمس
- أفتحي عيونك حياتي..خلي نطمن عليك...
لم تستطع رفض طلبه لتجد ملامحه الحبيبة تتأملها في قلق ..
- البيبي..
- الحمد لله بخير..بس لازم ترقدي علي ظهرك اكثر فترة لين يثبت الحمل..
- فاتن ؟؟
إعترت ملامحه تكشيرة غاضبة..
- هالمجنونة ربي سترها ..الراجل ماماتش....
- وتنازل والا لا؟؟
- حبي متشغليش روحك بأي شئ الا صحتك و البيبي ...والباقي كل واحد مسؤل عن نفسه..انتي ارجعي ارتاحي وانا نطمن علي عمر ونرجعلك
هزت رأسها بتعب ...لتغمض عينيها وتعود من جديد لتستريح في ظلمة النوم المريحة..
&&&&&&&&&&&&&&&&&&&&&&&&&&&&&&&&&&
- انتي شنو اللي تقولي فيه ياحنة...
- اللي سمعتيه يا اللي فاقعة مرارة حنة....ونقصي صوتك احسن لك..
- كيف ..كيف نتزوج واحد لو شفته ح نقتله وناخد فيه تأبيدة..
- وهو الزواج شنو...؟؟؟ ماهو تأبيدة...تزوجيه وعذبيه براحتك..وياقتلتيه ياقتلك....
كانت الجدة ترد علي ثوران فاتن ببرود يزيد من استفزازها
- انتيب تهبليني ياحنة والله بنهبل منك....
- وهو انتي ناقصة هبال ...انتي خليتي الشيطان يحكمك وتحملي نتايج تصرفك والا تبي بوك ينجلط من تحت راسك....هي كلمة مليهاش ثاني غدوة يعقد عليك...وبعد شهر يدخل بيك في عرس محترم....وكلمة زيادة لا....
- ياحنة ...
- خلاص ...الموضوع تم ...ومعاش فيها نقاش..
خرجت وهي تبكي وتصرخ مهددة ومتوعدة ....بالويل والثبور وعظائم الامور ...اما والدها فكان يكاد ان ينهار مما يدور حوله ...
- مش عارف شنو أخرتها ...ومش عارف موضوع شاكر شنو اخرته
- ياعامر ...هدئ روحك واكيد ربك ح يفرجها..فاتن نسخة من امي وامك...واخدة قوة امك وحكمتها..وخبث امي ودكائها..والا نسيت..
- منسيتش ...وموضوع توفيق..
- احسن شئ انه بيتزوج ويلم روحه ....ونادية نعرفوها من سنين...وربي هو المتحكم بالمقادير ياعامر..أهدى...وريح رأسك.. بنتنا بتتزوج راجل ولد عيلة محترمة ...واكيد ح يصونها..
نظر اليها بدهشة لشدة هدؤها ..
- انتي ناسية انها ضربت عليه الرصاص ...
- وانت ناسي انه كدب عليها...خلاص واحدة بوحدة...
- مش عارف كيف تفكري ...والله ماعارف...
- تفكير واقعي وعملي....وبعون الله مافيه الا الخير...
تنهد وهو يلقي بجسده علي الفراش...
- إن شاء الله...
&&&&&&&&&&&&&&&&&&&&&&&&&&&&&&&&&