"မင်းသိဖို့က... အရက်သောက်လို့ အသည်းကွဲတာ ပျောက်တဲ့လူ မရှိသေးဘူး။ စိတ်ညစ်လို့၊ အသည်းကွဲလို့ အရက်သောက်တယ်ဆိုတာ လူညံ့လူဖျင်းတွေရဲ့အလုပ်။ အရက်သောက်လို့သာ ပြဿနာအားလုံးပြေလည်သွားကျစတမ်းဆိုရင် လူတိုင်းအရက်သမားတွေ ဖြစ်ကုန်မှာပေါ့။ အေး... ခြွင်းချက်ကတော့... များများသောက်လို့ မြန်မြန်သေရင်တော့ စိတ်ညစ်စရာ သိပ်မတွေ့ရတော့ဘူးပေါ့ကွာ။ သက်ဆိုးမှ မရှည်တာ။"
သျှန်နောင်က ပြောနေရင်းမှ မိုင်းမိုင်ကို စူးစူးစိုက်စိုက်ကြည့်ကာ...
"ငါ့ကို ကျေးဇူးတရားကို နင်းပြီး အခွင့်ကောင်း ယူတယ်ပဲပြောပြော...။ ငါ မင်းကို ကျွေးမွေးပြုစုလာတာ လူကောင်းသူကောင်းဖြစ်ဖို့။ အရက်သမားဖြစ်ဖို့ မဟုတ်ဘူး။ ဒီတော့ လုံးဝ မသောက်ပါနဲ့။"
"ဟုတ်ကဲ့ လေးနောင်။ ကျွန်တော် မှားသွားပါတယ်။"
မိုင်းမိုင်က မျက်နှာငယ်လေးဖြင့် တောင်းပန်စကားဆိုလာတော့လည်း သျှန်နောင်မှာ ဆက်မဆူရက်တော့။ ထို့ကြောင့် ခေါင်းကို ခပ်ဆတ်ဆတ်ငြိမ့်ပြီး ခွင့်လွှတ်ကြောင်းကို အမူအရာဖြင့်သာ ပြလိုက်သည်။
"အခု ရက်လည်အတွက် စီစဉ်စရာရှိတာ စီစဉ်ဖို့ ငါ သွားလိုက်ဦးမယ်။"
မိုင်းမိုင် ခေါင်းကို လေးတွဲစွာ ငြိမ့်လိုက်သည်။
"မင်း အပြင်လုံးဝ မထွက်ပါနဲ့။"
မိုင်းမိုင်က သဘောမတူသလို ကြည့်လိုက်လျှင် သျှန်နောင်က သက်ပြင်းချကာ...
"မိုင်းမိုင် မင်း ဘယ်လို ခံစားရမလဲဆိုတာ ငါသိတယ်။ ဒါပေမယ့် ဒီလူကို မင်းကိုယ်တိုင် စီရင်ဖို့မတန်ဘူး။ မင်းက ငါတို့လို မဟုတ်ဘူး မိုင်းမိုင်။ ငါတို့လက်တွေက သွေးစွန်းပြီးသား။ နောက်ထပ် ဒီလို တိရစ္ဆာန်တစ်ကောင်ရဲ့ သွေးတွေ စွန်းထင်းသွားလို့ ဘာမှ မထူးတော့ဘူး။ အေး... ဒါပေမယ့် မင်းက မတူဘူး။ မင်းက သန့်ရှင်းပြီး အပြစ်ကင်းတဲ့လူ။ မင်းက ငါတို့ နေချင်တဲ့ ဘဝ... ငါတို့ ဖြစ်ချင်ခဲ့ပေမယ့် မဖြစ်နိုင်ခဲ့တဲ့ဘဝမှာ နေထိုင်ရမယ့်သူ။ ဒါကြောင့် မင်းရဲ့ဘဝကို အပြစ်အနာအဆာကင်းကင်းနဲ့ ဖြတ်သန်းပါ။ နောက်ပြီး... သွားလေတဲ့ မင်းရဲ့ ချစ်သူကလည်း သူ့ကြောင့် မင်းလက်တွေ သွေးစွန်းမှာကို လိုလားမှာ မဟုတ်ဘူး မိုင်းမိုင်။ ဒါကြောင့် ဒီကိစ္စကို မင်း မလုပ်ပါနဲ့။ ငါ တောင်းပန်ပါတယ်။"
YOU ARE READING
အခ်စ္တို႔ျဖင့္ အတိၿပီးေသာ...|| အချစ်တို့ဖြင့် အတိပြီးသော
General Fiction》ေဇာ္ဂ်ီ 《 ႏွလုံးသားတစ္စုံမွ ဖန္တီးပါေသာ အခ်စ္တစ္ခုအေၾကာင္း 》Unicode 《 နှလုံးသားတစ်စုံမှ ဖန်တီးပါသော အချစ်တစ်ခုအကြောင်း ○●○●○●○●○●○●○● ●《♤》Seke x Seke 《♤》○ ○●○●○●○●○●○●○●
Chapter 53
Start from the beginning
