الحب المحرم

Psycho1

.............................................................

Flash back
France. Nice

راجل فعقدو الخامس، شعرو رمادي دليل على عمرو، لابس كوستوم كحلة و داخل بكل وقار لهديك الشركة, التجاعيد لي فوجهو و حدا عينيه كيعبرو على العيا و الهم لي هاز.

تنهد للمرة المليون قبل ما يبتاسم للموضفين ديالو و يطلع لبيروه، دخل سد عليه لباب و جلس فكرسيه مرجع ضهرو لور، كيشوف قدامو فلخير لي باه حرفيا تحارب باش يديرو، لمال و حتى لجاه، من حراك فسن لعشرين، لعامل تنضيف فلقصور التاريخية لي معروفة بيهم الدول الأوروبية، لمليونير، صاحب اكبر الشركات لإستراد و تصدير الأحجار الكريمة من المغرب لبرا، و تجارة بلأثار التاريخية قانونيا.

و هو غارق فتفكيرو دخلو عليه فحال العجاج و المساعدة ديالو موراهم كتشوف فيه بمعنى مقدرتش نحبسهم و هو حرك ليها راسو و مشات و سدات لباب موراها
هز عينو فولادو بجوج واحد منهم عندو خمسة و عشرين عام و لاخور فايتو بعاماين، كانو كيمتلو التناقض كون كان بنادم، ليل مع النهار، لعافية و لما

:مالنا ياك لباس؟
قال بستفهام هاز حاجبو فيهم بينما الصغير كلس حادر راسو و لكبير مفرق رجليه و مرجع ضهرو بلور و كل مرة كيشوف فيه كيفكرو فباه لي هو جدهم، نرجسي فحالو!

سعيد :لوليد لقيت ليك همزة جديدة اندخلو لملاير انرجعو ايام جدي الله يرحمو
قال لكبير بفتخار و باه شاف فيه بشك خصوصا فاش خوه صغير قرب جيهتو كيهمس ليه بتأنيب
خالد :ماشي هكا راه مغيبغيش اصلا
قال بين سنانو و ضار شاف فباهم لي كان باقي كيتسنى شي تفسير و شحال كان عارف بلي ولدو الصغير ما عندو دخل ولكن شيطان لكبير مول هادشي
سعيد :مهم لوليد بلا ما نطولو لهضرة، عقلتي على هداك الراجل من المافيا دطاليان لي كان جدي كيتعامل معاه كيهرب ليه الاتار راه عاود صيفط رجالو، مكرهش يرجع يخدم معانا فحال فوقيتة دجدي الله يرحمو

قال و صوتو غادي و كينقص مع عينين باه لي ولاو حمرين مع كل كلمة كيقولها حتى سكت،
و فضل يتفكر جدو، قدوتو فالحياة، راجل بدا من والو و طلع بعائلتهم على حسب وجهة نضرو، ولاو من الطبقة البرجوازية بفضلو لي تطور حتى ولا كيعاون فتهريب المخدرات من المغرب بكونها نوعية مطلوبة برا و كتجيهم رخص، خلا اعمالو القانونية واجهة باش يغطي تعاونو مع المافيا الفرنسية و الإيطالية لي كانو من بينها مغاربة و لا ناس على الاقل نصهم مغربي، و بلا ما يحس غرق فلفلوس، فلبريستيج، فلعالام ديالهم، لفلوس، لحماية، السلطة حياة لي ولد مدينة صغيرة من لمغريب مشا غير حارك منها عمرو قدر يتخايلها عاد باش يعيش فيها!

:خرج عليا خرج
قال باهم على غفلة و ضرب بيديه على بيروه، عينيه حمرين، عروقو بانو بلأعصاب، عيا يربي فيهم، عيا يبعدهم من الماضي لموسخ دجدهم، حاول يخلي غير الأعمال و الشركات القانونية لي ورتو باش يعيشو بالحلال و وخا هكاك ولدو لكبير مكانش راضي، كان ديما باغي كتر، هوما بصح مبقاوش فلمستوى لي كانو فيه مع جدهم و لكن باقيين مرفحين
الا ان ولدو كان مشدود لهداك المجال، للحضة بدا كيشك واش لحماق كيورتوه فلعائلة واش النرجسية و الأختلال لعقلي لي كان فلجد ورتو الحفيد و لكن هو ولدو و الحمد الله مخرجش فحالو، لا ميمكنش.