The Friendly Wedding (Season 1 & 2) - Published

Chapter Eleven

"Anong gusto mong pasalubong?" tanong nito.

"Abs," pang-aasar niya pa rin dito.

"Badtrip ka, Misis. Lakas mang-asar, ah" naasar na wika nito. "Kapag ako nagka-abs talaga, maglalaway ka!"

She just laughed and shove him away. Pagkaalis nito ay agad naman niyang tinawagan ang mga pinsan para ayain sa nalalapit na birthday niya. Nang pumayag ang tatlo ay mas lalo siyang na-excite. Matutuloy na ang plano nila ni Johann na magka-closure na ang kanya-kanyang mga pinsan.

For the meantime, naligo at nag-ayos na rin siya after. Aasikasuhin niya muna ang pagpili ng pwesto para sa bookstore niya!

***

TATLONG araw na lang at birthday na ni Sapphire! Pero sa lahat ng malapit na mag-birthday, siya lang yata ang aburido na aburido.

Hanggang ngayon kasi ay wala pa rin siyang mabiling lote para sa pagtatayo niya ng bookstore. Lahat nang nakita niyang prospects ay natanggal sa listahan niya dahil madaming problema sa titulo, sa may ari o sa kung saan-saan pa. Wala na nga siyang problema sa pera, ang mismong mga plano naman niya ngayon ang may problema.

Nanggigigil at malakas na hinampas niya ang katabing unan at napatili sa inis!

Biglang napabalikwas ng bangon si Johann na kanina pa natutulog. "Ah! Saan ang away? Saan? Saan?" inaantok pa na sabi nito.

Nakasimangot na binalingan niya ito. "Mister, malapit na birthday ko."

Kinusut-kusot nito ang mga mata. "Ano ba naman iyan, Misis? Tumili ka dahil malapit na birthday mo? Excited? Excited? Kailangan mo pang mang-gising?" parang naiinis na sabi nito.

Napalabi siya. "Hindi pa rin ako makakita ng magandang lugar para sa bookstore ko! Lahat ng gusto ko, ang daming problema!"

Napakamot sa batok nito si Johann. Nahiga ulit ito ng kama. "May deadline ka ba at madaling madali kang makahanap ng commercial space para sa bookstore mo? Napakadami mong oras para maghanap ng lugar."

"I have goals, you know. Dapat maabot ko iyon. Dapat by next year, nag-uumpisa na ang construction ng dream bookstore ko. Kapag hindi ako mabilis na kumilos ngayon, masyado nang atrasado ang mga plano ko." Niyugyog niya ang balikat nito. "Mister, do you have any suggestions?"

"Anong oras na?"

Tumingin siya sa wall clock. "Four AM."

"Ah! May maganda akong suggestion."

"Ano?" interesadong wika niya.

"Matulog ka na."

Napasimangot siya. "Mister, naman, eh! I'm serious here. I badly need suggestions." Lumuhod siya paharap rito at saka niyugyog ito sa balikat. "Help me with these! Hindi ako makakatulog." Hindi kasi siya sanay na nawawala sa plano niya ang mga bagay-bagay kaya hindi siya matahimik.

Bumalikwas ito ng bangon pero nakapikit pa rin. "Ano bang gusto mong mangyari?" he sleepily said.

"Tulungan mo 'kong makahanap ng lupa na puwedeng pagtayuan ng bookstore ko."

Napahikab ito. Nakapikit pa rin. "Wala tayong mahahanap ngayon. Walang nagbebenta ng ganitong oras. Bukas na lang puwede? Pagkagaling ko sa klase?" Humiga na ulit ito at nagtalukbong ng comforter hanggang sa ulo.

"May alam ka bang nagbebenta ng lote or space?" Naisip niya, mas maganda kasi kung lupa pa lang mabibili niya para wala na siyang problema sa pagde-demolish kung may nakatayo mang bahay o building.

Umungol lang si Johann.

"Hey, talk to me," pangungulit niya pa rin. Hindi niya maintindihan na kailangan ng asawa ng energy bukas para sa pagtuturo nito. "Knock knock! Mister!" Kinatok niya pa ang ulo nito.