زيجه راس براس

البارت 5

هلا شلونكم اخباركم مشتاقتلكم كوومه اسفه والله مو قصدي ما أنشر بس والله ضروف أمس عدنه خطار وماكتبت واليوم كاعده أكتب وابن اخوي اختفه محد يعرف وينه وصار طفارنه ماله تالي الكل يدور عليه من صفحه وهبطنه هذا بارت وان شاء الله اكتب وانشر بعدين

الاء كمت بالكوه مابيه اخذت ملابس ورحت للحمام لابسه كلابيه قصيره ربع ردن رحت للحمام وصلت يم الباب طلع بوجهي علاء
علاء... هاي شنو
الاء... ااا بس ادخل الحمام
علاء... دخلي منو كاضبج
الاء ردت ادخل كرصني بيدي خلاني اصرخ صوت يوصل السابع جار الكل اجه ع صوتي
علاء بيني وبين نفسي هيه كل ما اوكف وياها تفضحني هسه شيكولون علي
ام مازن... وثول شبيج بس تصارخين الزلم بالستقبال وانتي بس تصارخين
الاء بلا هسه شكلهم اللي راح يصير زوجي بس يكرص بيه كتلها... ماما سحليه بالحمام ويععع
ام مازن... ولج ولي فضحتينه كدام الناس روحي غيري ملابسج
الاء... انتبهت ع نفسي بالكلابيه خرب حظي رحت للغرفه بسرعه انعل ابو الحمام غيرت ملابسي وطلعت للصاله الحجيه و مروه و صفا وخديجة كلهن كاعدات رحت عليهن وكلت..... السلام عليكم
الحجيه... هلا وعليكم السلام
الاء... شلونج حجيه كل عام وانتي بخير
الحجيه... وأنتي بخير شلونج
الاء... الحمدلله عايشين شلونج ام هيثم كل عام وانتي بخير
خديجه... هلا حبيبه الحمد لله وانتي بالف خير
الاء... انتن مو لازم اسلم عليجن
صفا... مو بكيفج ماتسلم يلا تعالي بوسي الراسي
الاء... هلوووو ابوس رأسها ولي ام الكمل
مروه... حيللل تستاهل
الاء... انتي ام خشم شلونج
مروه... بخير
الاء... شسوين جايه
مروه... جيت اخطبج الابني خشوم تقبلين
الاء كعدت يمها وكتلها بهمس... والله ابنج خشوم اشرفلي من اخوك ابو صخام
مروه... طاح حظج عوبه باجر يصير رجلج يافاهيه
الاء... وعسا لا صار
مروه... 🖑🖑🖑
خديجه... ياا ولج مريوه تغمين الاء
مروه... مو طايحه حظ شسويلها
الاء... شسوي غير طالعه عليج
مروه... بومه هذا وجه عروس شلون مورم من النوم
الاء... تره النومه بعدها بعيني لا تخليني اكفشج واروح انام
مروه... روحي
الاء كمت وكتلها... لا شلون اكوم وانتم هنا عيب عيب ضلن يضحكن ويسولفن شوي واندك الباب ماعرف منو طلع صاير هجوم علينه جيش يحرر فلسطين
ليان... وجان نجي نشوف الخبله مالتنه
الاء... محد خبله غيرج
ليان... خبله واخبل شحال لو عندي عقل
الاء... لا فدوه كلشي ولا عقلج ما ناقصين خبال
غرام... عرفينه تره مو حلوه بحقنه
الاء... شعدها صدك هذا ابو ثرب معدلج
غرام... انجبي ترحيله فدوه
الاء... لا والله بعده السانج اعرفج هاي الحجيه ام مخلد وهاي ام هيثم وهاي صفا وهاي مروه وهاي امي وهاي اني خاف ماتعرفيني وهسه اعرفكم هاي ليان وهاي لمار وهاي غرام
غرام... واخيراً شفنه مروه نسمع بيها ومانشوفها
الاء... وهاي شفتيها وانتن شعدجن جايات
غرام... صعدت فوك السطح وشفت سيارات بابكم خبرت البنات واجينه
الاء... انتي هذا رجلج ما يكعدج بالبيت اربع وعشرين ساعه بس دايحه
غرام... ولج هوه حلاته مايحجي شي لو ابقى كل اليوم بشارع
الاء... 🖑🖑🖑🖑 امشن للغرفه لا تفشلني كدام الناس ضحكن ورحنه للغرفه سوالف وضحك صارت الصلاه صلينه ورحنه للمطبخ هنه متعلمات يجن للبيت بس يشتغلن يكولن بيتنه مو بس بيتنه حته بيت لمار وليان غرام مانروحلها هواي لان عيال صعبه وعيب اتزوجت قبل 7اشهر وزوجها يحبها ويدللها أبد ما يتزاعلون دائمآ تحجي عنه شلون يتعامل وياها وهيه تحبه حيل صح زواجهم تقليدي بس كميه التفاهم بينهم كلش هواي اتمنه انو اني وعلاء نصير مثلهم نتفاهم مثلهم ماريد تصير بينه مشاكل بس يبقى الحب ضروري مو بس علاقه زوج وزوجه مااعرف شلون راح اعيش وإحسان كدام عيوني مستحيل اتحمل يبقى هوه اول حب بحياتي مااكدر انسى بسرعه الثاني يوم مارحت للصالون مااحب المكياج الزايد اني كلت امكيج هيه هيج حفله بسيطه واجت غرام رفعت شعري بتسريحه بسيطه ومكياج بسيط الفستان ماردته ضخم مااحبه بابا اخذلي فستان حوريه احمر مخصر من فوك ومن جوه الركبه عريض كلش حلو وع ذوق بابا بعد احلا كل ملابسي احمر واسود ومرات ابيض اخذ بس بابا كل الملابس اللي يجيبهم احمر يموت ع هذا الون للساعه ب3 كالو اجه الشيخ طلعت من الغرفه ابد ما عندي فرحه بهذا اليوم احس راح يعدموني مو يزوجوني كعدت بالصاله امي عزمت المدرسات اللي وياها ونسوان من المنطقه وخالاتي ونسوان خوالي وعمامي اجو من الانبار ماعرف خايفه من المستقبل المجهول اللي ينتظرني اجت امي كومتني وخلت المحرم مال الصلاه ع رأسي واخذتني يم باب الإستقبال ضل الشيخ يحجي أمور عن الزواج بعدها كلي هل تقبلين ب علاء عبد الرحمن زوجا لكي اختنكت اريد اكول نعم ماتطلع مني رجع كال هل تقبلين ب علاء عبد الرحمن زوجا لكي كلت نعم انت وكيلي بعدها كال الف مبروك امي رادت تاخذني للصاله كتلها لا بس ادخل للغرفه شوي كالت لا تطولين دخلت للغرفه اختنكت اريد هوى مايدخل سمعت صوت إشعار مال رساله اخذت الجهاز شفته فيديو من إحسان مال صدك مخطوبه يفلانه خاف اني جنت ناقصه هوه زودها علي ضليت ابجي العبره بلعومي مااكدر ابلعها صعبه صرت مثل بلاع الموس لا اكدر ابلعه ولا اكدر اطلعه سلمت أمري لله كمت عدلت مكياجي وطلعت للصاله اغاني والبنات يركصن
ام مازن... ولج ليش اتاخرتي علاء يريد يدخل يلبسج الذهب
الاء... ع شنو مستعجل
ام مازن... ما مستعجل بس انتي اتاخرتي والناس تريد تروح
الاء... يي يي هاي اني خلي يجي
ام مازن... تره محد جابرج عليه اذا ماتردينه مامجبوره بي
الاء... ماما بعدين نحجي راحت امي شوي ودخل علاء لابس قميص اصفر و بنطرون ازرق عضلات جسمه بارزه اتحس القميص راح ينفجر كعد يمي ولا انطيت رد فعل تقرب يمي و همس
علاء... الف مبروك
الاء... الله يبارك بيك
علاء... بيج شي مو ع بعضج
الاء.. لا مابيه بس شوي تعبانه
علاء... ليش ما رحتي الصالون
الاء... مو مهم اني اعرف اخلي مكياج وصديقتي سوت شعري مو بحاجه صالون عود بالعرس اروح
علاء... الله كريم من هسه اكلج شعرج ما ينصبغ يبقى اسود
الاء وي هذا من هسه يتشرط لعد من نتزوج شيسوي كتله... ان شاء الله ما اصبغه
علاء... ان شاء الله قبل محرم العرس فجهزي كلشي بسرعه ما نريد نتعطل
الاء... ما عندي شي سكت من شافني هيج جافه وياه ابد مااحجي بس ع كد السؤال اجت امي انطتني الذهب علمود يلبسني اخذ الحلقه ولبسني واني كذالك بعدها اخذ القلاده تقرب علي كزبر جلدي وهوه زادها علي بكلمته
علاء... اروح فدووه للكيمر
الاء بعدت قبل لا يلبسني
علاء... شبيج تعاي خلي البسج
الاء... اا لااا اني البسها انطيني
علاء... تؤ تؤ تؤ ماكو اني حدري لشوف رجعت تقربت عليها لبستها وبستها بكتفها
الاء ماتحملت بسرعه دفعته الكل إنتبه حاولت اضيعها بسمه متصنعه رفعت أيدي اريد اعدل شعري
علاء... داكه وشم
الاء... يي
علاء... من يمته
الاء... من سنه او اكثر شوي
علاء... ما علموج هذا حرام
الاء... اعرف بس الشيطان شاطر
علاء... شيطان هوه بس انتي تخلين الشيطان يتعلم منج
الاء... اعتبرها اهانه
علاء... لا بالعكس كاعد اكلج شنو صفاتج
الاء هزيت أيدي ماعاجبني شوي وطلع والنسوان كامن يطلعن شوي شوي خلصت الهوسه رحت بسرعه للحمام اخذت شاور وغيرت ملابسي وطلعت احس راح اموت مااكدر مااتحمل كل اللي ديصير مو بارادتي علاء مستحيل اكدر اعيش وياه ابد دخلت للغرفه وقفلت الباب ماريد واحد يدخل يمي تمددت ع السرير وعيوني ع السقف خلص صرت ع ذمته صرت مرته هاي الكلمه اكثر شي تضحكني يمكن قراري غبي بس سعاده مازن اهم من كلشي نمت ماحسيت غير ع صوت الأذان عبالي اذان المغرب طلعت البيت هدوء الكل نايم دخلت للحمام غسلت وتوضيت ورحت صليت صلاه الصبح وبعدها المغرب والعشا وكعدت اقرا قرآن