سلع ارواح محرمه

الفصل الثالث عشر

,.'

مسـدوح على السرير , بعد اللحاف , دار جسمـه لنـآحيه التآنيه , ثواني ورجع انسدح على ظهره
يطــآلع في السقف لدقااائق , سحب اللحاف واتغطى , ثواني وقفــل التكيـف , اتأفف وجلس بردة فعل سريعه
اخد بكت الدخان وولع سجاره خرج يمشي بهدوءوباله مو معـآه , جلس على الكنبـه لين مانتهى من سجارته
, رجع وقــف ودخل المطبـخ فتح الثلاجه بدون سبب
خرج تـآني للصاله جلس وسنـد جسمـه وولع سجاره , زفر بصوت مسموع , قام من مكـآنه ودخل لغرفتـه

دآ كلـــو التوتـر بسبب مـنـآل , مو قادر ينـآم وهوا المفروض يثق بشخص غصبـآ عنـه
ارق
توتـر
صرآع مو طبيعي
انتهى من السجاره , سحب جواله من على المكتب جلس على كرسيه المتحرك يلفـه يمين ويسـآر والجوال يرفعه ويخبطه على المكتب بسـرحان
مره , مرتين , تلاته , اربعه وبعدها وسع عينه , ووطالع في الجوال ,خدشــه من الأركـآن بسبب حركـته
ماحيـقدر ينـآم إلا لو كلمـها
لأول مرا يحــس انو ثقيــل على شخـص
بس خــلآآص راسـه حينفجر من التفكير
اتـصل عليـها
بعد مادق الجوال " كان كتبتلها احسن ! "
نزل الجوال بيقفـل إلا سمع صوتها ورجـع رفع الجوال على اذنـه
: هلا ..كيفك
منال بصوت كلو إستغراب : تمام !
سكوتها خلاه يبرر : كنت بس بسئلك متى ممكن تسيبي العمل !
منال قفلت باب غرفتها بالمفتاح : ليش ؟
حٌسام : بس بعرف عشان اديهم خبـر يدورو موظفه غيرك
كذاب !
كآن سهـل عليها تعرف انو كذاب بدي اللحظـه , متصل 2 الليل عشان يسئلها دا السؤال !!
وقفت قبال دولاب كتبها وعينها تدور على الكتاب الجديد: بدي اليوميـن
حسام وقف حركة الكرسي : بجد اهرج
منال سحبت الكتاب : حتكلم انا مع عم فيصل بنفسي
رفع حـآجبــه دي منـآل لما تكون بعيـده
تتكلم براحه
ماتـآخد منها شي لو ماتبى تتكلم
بحقـد واضح بصوته : اغرتك الوظيفه !
منـآل جلست على السرير وتقلب بتوتر في الكتاب : إيوا
: من اي نـآحيه
فتحت صفحـه مأشره عليها بللون الفصفوري " يرتكبون كل الحمـآقات التي تدفعك للرحيـل , ثم يسألونك بكل براءة لما رحَلت ؟ "
تنحت فجأه في الجملـه , في اللحظـه الللي فتحت فيها الصفحه مع سؤال حسام
كأنها إشــآره لها إنها تآخد بحقــها , انها تحط حدود لإسلوبـه وعنفه
:ايش بك ؟
قفلت الكتاب باارتباك سحبت جسمها لورى بااتجاه المخده : ولاشي
: بسألك في ايش عجبتك الوظيفـه
حركت يدها بتوتر على اللحـآف قالت بتردد : ماعرف كيف طبيعيه العمل
: طيب ليش حتروحي !
منـآل : مو إنتا متضايق من وجودي ؟
كانت تبا تقول اناا متضايقه
بس ماقدرت
ضعيفـه حتى لما توصل المعلومــه
يدها تتنافض وكأنه ممكن يخرج من الجوال
حسام عقـد حوآجبه : مين قال !!
منال ارتبكت زياده :خلاص قفل الموضوع
حسام : لا بججد اهرجي
منال عدلت نظارتها وماعلقت
حسام :اكيـد شايله بنفسك عليا بس انتي السبب لو ماكذبتي ماكان عاملتك بدا الاسلوب
منال: طيب انا ليش كذبت ؟
حسام سكت وبعدها قال : ليش ؟
منال قامت من مكانها تـآني , ايش حتقول عشان ماكنت شايفني اساسا
ماكنت زي البنات اللي تطـآلع فيهم وتٌعجب فيهم
حست انها اتورطت فـ محادثـه ماتقدر تكون فيها صريحـه
حسـآم : واضح انك ماتبي تتكلمي بس انتي انسانه سطحيـه لدرجه تشردي من مكان بسبب شخص واحد !!
منال : ادور راحتي
حسام : ماحتلقيها
منال : تقدر تكلمني واتس
حسام : طيب..
عرف انها بتشـرد من الكلام هنـآ تبا تكون شويـآ صريحـه بس بالكتـآبـه ...
منال قفلت وفتحت الواتس كتبتله " ماحب ترا تتكلم معايا بدا الاسلوب "
حسام :"اي إسلوب ؟ "
منال بعتب :" مابقيت شي غلطت كتير فيا وف أهلي حتى عورتني كدا مرا بسبب مسكتك ليدي مو عارفه ايش سويتلك عشان تعاملني زي كدا "
حسآم " انا اعرفك من زمان كل يوم كنت اشوفك تجي الكافي عمري ماقربت منـك ماأذيتك إلا لما اتعديتي حدودك معايا "
منال " بس انا ماجرحتك عشان القى منك دا كلو !"
حسام " لكل إنسـآن ردة فعلـه "
منال انقهرت انها عاتبت " طيب كويس "
حسام " وبعدين ؟ "
منال بحقد كتبت ورا بعض " لكل انسان ردة فعل انتا ماتفكر وانا انسانه اشتري دماغي وانسحب عشان كدا مابى اقعد بنفس المكآن معاك ماسرت اضمن ايش تسويلي او ايش حتجرحني اليوم فيـه "
حسام " مو عارف ليش اخده موقف مني وسايبه قروب الجامعه كلهم "
اهم شي مايطلــع غلطـآن
منال " الجامعه شي ملزومه فيه وظيفتي لا "
حسام " وحتشردي من كل وظيفـه لو لقيتي واحد زيي ؟"
منال " ماتوقع فيه كتير زيك "