البارت الرابع عشر
تقربت منة يابة يابة
كوم يابة شجاك لا حس ولا نفس
صحت ع الولد اجوي يراكضون
شصار شبي ابوي
كتلهم شيلو وياي
امي تصرخ وضمياء تصرخ
انخبصت
بسرعة صعدته بالسياره
وشغلتها
صعدوا الولد وياي وامي تركض اجت اخذوني وياكم
ابو باقر حاجيني ابو باقر
يمة انهجم بيتي الزلمه راح مني
باقر : طرت بالسياره طياره لا حسبيت لطسه بالشارع ولا لسياره
امشي سريع وادك هورن
عشر دقائق وصلت للمستشفى
نزلت وفتحت الباب
بسرعة ركضت جبت سديه
ونزلت ابوي نومته عليها
وندفع بيه
صادق يركض كدامي
ومحمد يدفع بيه
وامي تعيط
وصلنا للطواري
نزلته اني ومحمد
تلگانه الدكتور خير شبي الحجي
كتله وكع تخربط
امي كتلت دكتور هو من الصبح معلك ضغطة
كلها اي وهسه شصار
مااعرف دكتور وكع
يفحص الدكتور بيه
صاح بسرعه للانعاش
دكتور شصاير عنده
للاسف ضاربتة جلطة قويه
الضغط صاعد عنده جان
وهو مسبب الجلطة
وهسه شنو
ادعولة يكوم بالسلامة
كعدت بالكاع مثل الطفل وكمت ابجي
اني السبب اني
اذا صار شي بابوي مراح اسامح نفسي
معقولة اغضب ابوي
معقوله اتسبب بموت ابوي
اخخ كله منج فاتن ساعة السودة عليج
وع يوم الحبيتج بيه
خليت راسي بين رجلي
وكعدت ابجي من كل كلبي ع الي سويته
تقرب مني محمد
باقر شجاي تسوي ع كيفك وي روحك
مرفعت راسي
باقر كوم اوكف ع حيلك انت ضهرنه
ابوي طايح وانت هذا وضعك شجاك
بقيت ع كعدتي
امي ابد متقربت مني ولا حجت اني السبب
يسئلوها الولد دكلهم من الصبح ضغط صاعد عنده
كأنما تبررلي
بقيت ع كعدتي للضهر
لا كمت ولا تحركت احس رجلي ماتت
وكرهت روحي والحياة كلها
ارفع راسي اشوف امي تبجي
استحي منها وارجع اخلي راسي بين رجلي
تليفوني يدك مااجاوب
اصعب ساعات مرت علي
هي هاي الساعات
اجو عمامي وولد عمي للمستشفى والجوارين
يحجون وياي مااجاوب
وره ساعة طلع الدكتور كال توفة
شنووووو
شنو ابوي كتلته اني اي اني ابوي مات
بسببي
يابه كمت من مكاني للغرفة الي بيها
طحت عليه
ابوس برجليه بويه بس اكعد
بويه فدة لا تموت بس سامحني
يابه
جروني ولد عمي باقر صدك جذب
عود هذا انت المتدين
العاقل الفاهم
كول يالله
جروني كوه منه
طلعت لكيت امي تصرخ وتلطم
اخذوه للثلاجه
بسرعه بسرعه مثل الحلم
هستوه يحجي وياي
هسوتوه عيط علي
شنو مات ابوي
اني سبب موته كتلته
لازمني عماد ابن عمي
باقر شجاك كول يا الله
انت الجبير صير قوي اخوانك خطيه
تره يباوعولك
اخخخخ اخخخخ يابوية اخخخ
شسويت اني معقولة ع مود وحده
اغضب ابوي واموته شصارلي شجاني
ضليت الوم بنفسي حرگة بصدري متطلع
اريد اصرخ اريد ارجع الوقت
ومااحجي شي
ولا اعاند ابوي
كلشي مااريد بطلت بوية مااريدها
اخواني يبجون وامي
واجن عماتي
انترس المستشفى ع مود ابوي بسع طش الخبر
طلعوا ابوي
واني امشي وره جنازته
لا اله إلا الله
يصيحون
واني اصيح وراهم لا اله اله الله
لا اله اله الله
صعدوه ع السياره
ورجعنا للبيت ابوي ميت
هيج بسع بسع
كمت امشي بله شعور الي يحجي وياي ماجاوبه
مصدوم ع الي صار
......... فاتن........
من سديت المبايل ضليت الوم بروحي شسويت ليش، كتله
هذا عصبي كلش
خاف يسويله مشكلة وي اهله
ضليت بالغرفة بحجة اقره لا طلعت ولا طبيت بعد
امي صاحت علي ع الغده
كتلها مااريد
ولج شلون متردين تعالي اكلي لا ينزل ضغطج
راح تخبليني انت
انت وحده لعبتي بيه لعب
كافي دلال واطلعي اكلي
مااشتهي يوم
لج كومي اكلي مابيه حيل هبطات كل شويه واكعه
مااريد مااريد
عساني ميته وخلصانه
وج شبيج انتي تخبلتي
اي تخبلت تقررون بكيفكم
منو مقرر عمج خطبج
واني كتله الله كريم
يجي عمج كوليله مااريد ازوج وخلص
منو يجبرج
اني مااجبر احد ابد شنو اني الي راح ازوج قابل
كومي اكلي كومي
كمت امي شاويتلي لحم
كوه اكلت معدتي تكلب
لان قلقة وبالي يم باقر والله خطيه
جاي يتحمل فوك طاقته
كمت بسرعه
امي ولج شكلتي معزايه
كملي اكعدي مااريد يمه عدي امتحان اريد اقره
طبيت وطلعت المبايل
ادك وماكو ميجاوب
يا شصارله يربي دخيلك
صوجي اني شكو كتله
كمت اعض باصبعي
اخخخ من لساني
صدك زعطوطه
ومااضم سالفه
ضليت كل شويه اخابر ماكو
افتح الكتاب عود اريد اقره
مااعرف اركز ولا اشوف الكلمات
وارجع اخابر ماكو
ياربي شجاه
بقيت لليل هيج ماكو
مو بالعدة اخابر هالكد ومايجاوب
صدك قلقت
سمعت صوت امي تحجي
يمة اسم شلون مات
انخمش كلبي
كلت باقر مات
مااعرف شلون طلعت اصرخ
منوو مات منو مات اصرخ بعالي صوتي
امي ركضت علي
اسم الله يمة اسم الله
مو من عدنه ابوباقر
مااعرف سمعت باقر
باقر باقر
ضليت اصرخخ
يمة اسم الله شبيج يمة بتي صارت بيها خوفه من الموت
جابت مي
يمه اسم الله كمت ارجف
وج يمه رجال جبير ابو باقر
