بنتين من الزمن ده مكتمل

الحلقه الثانيه عشر

دعاء/ مش غريبه يا هيا انك من امبارح بره البيت ولسه مانمتيش وفايقه اووى كده
هيا / لا ما انا نمت
دعاء/ نمتى ! ايووه نمتى فين بقى يا هيا
هيا ركزت في كلامها/ اقصد وانا في المطعم نمت على الكرسى
دعاء بصت جامد ل و بتفكر ازاى كل ده هيا بتكدب عليها / اه تصبحى على خير
(دعاء دخلت الاوضة وفضلت تفكر تقول ل هيا انها كدابه ومش كانت في المطعم بس خايفه تخسر هيا خالص وفضلت دعاء في حيره )
وابتدت دعاء تاخد بالها من خروج هيا كتير ولما تكون بتكلم تامر تسكت اول ما تشوف دعاء. هنا دعاء اتاكدت ان فيه علاقه بين هيا وتامر اكتر من حب
دعاء/ ممكن اتكلم معاكى شويه هيا
هيا/ اتفضلى
دعاء/ ممكن اعرف ايه اللى غيرك كده
هيا/ ازاي يعنى انا زى ما انا
دعاء/ لا اتغيرتى كتير وخروجك زاد مع تامر ومبقتيش تحكيلى على كل حاجه زي الاول
هيا/ لا متغيرتش ولا حاجه
دعاء/ طيب يا هيا تعرفى خروجك مع تامر غلط وحرام
هيا/ خروجى غلط وحرام؟
دعاء/ اه غلط وحرام مش فاكره كلام بابا الله يرحمه
هيا عنيها دمعت/ الله يرحمه كان نفسى يكون معايا مات في اكتر وقت كنت محتاجه ليه مات وانا كنت بتدمر تعرفى يا دودو باباكى ومامتك كانو احلى حاجه في حياتى هما الحضن والامان والدفى اللى بدورعليه والمشكله تامر هو اللى لقيته بعدهم ممكن مش بحس بنفس الامان بس مش عارفه انا متعلقه بيه اووى ليه وليه بخاف على زعله
دعاء/ ممكن سابونا في وقت صعب وفعلا كنا محتاجنهم بس امر ربنا بقى هنعمل ايه. تعرفى يا هيا المفروض نعمل ايه
هيا/ ايه
دعاء/ نفتكر كل حاجه قالوها لينا ونعملها لازم اي حاجه بتعمليها تبقى عارفه انهم معاكى وشايفينك ده غير ربنا اللى معانا دايما
هيا فضلت تعيط
دعاء/ بتعيطى ليه يا هيا عياطك ده بيقلقنى
هيا بدموع/ انا كويسه افتكرت انكل الله يرحمه
دعاء/ الله يرحمه
(فون دعاء رن)
دعاء/ الوو
مصطفى/ حياتى عاملك مفاجأه
دعاء/ ايه هيا
مصطفى/ هتبقى مفاجأه ازاى طيب
دعاء/ قول وانا هتفاجئ عادى بس قول والنبى( باب الشقه عند دعاء خبط) ثوانى مصطفى الباب بيخبط هشوف مين وهكلمك
مصطفى/.....
دعاء/ الو مصطفى الو
(قفلت الفون وراحت فتحت الباب لقت قدامها مصطفى واهله
مصطفى/ ايه مافيش اتفضلو
دعاء/ اه اتفضلو طبعا (ودخلو ومصطفى وهو داخل شدت ايده) مش كنت تقول انك جاي ومعاك اهلك عجبك منظرى كده
مصطفى/ والله زي العسل وانا اصلا كان نفسي اشوفك بهدوم البيت بس تصدقي احلى من هدوم الخروج
دعاء ضربته على كتفه / اتفضل اتفضل. ثوانى يا طنط هغير هدومى
مصطفى/ تعالى هتغيرى ليه والله زي القمر
(دعاء اتكسفت ودخلت الاوضه)
دعاء/ هيا اهل مصطفى برا
هيا/ بجد ربنا يسعد قلبك يارب
دعاء/ يارب ويسعد قلبك مع اللى يستهلك ويحافظ عليكى
هيا/ ليه مقولتيش مع تامر
دعاء/ مش وقت كلام في الموضوع ده غيري هدومك وتعالى يالا معايا
(غيرو الهدوم وطلعو للضيوف)
دعاء/ منورين البيت
ابو مصطفى/ والنبى ما قادر اقوم اولع النور
دعاء/ لا يا عمو حضرتك اللى منور
ابو مصطفى/ هو مين اللى اتعور
مصطفى/ محدش اتعور انت اللى منور المكان
ابو مصطفى/ يا بنى ابيع الدكان ازاي بس
مصطفى بيقول بصوت واطى/ انا اللى جيبتو لنفسى
ابو مصطفى/ لا مش بحب البيبسي عايز عرق سوس
مصطفى فضل يكلمه بالاشاره ويهز راسه
ابو مصطفى/ هو انت فاكرنى اطرش يا واد اتكلم عايز ايه
مصطفى/ ازاي العفو يا حاج
هيا/ هروح اجبلكم حاجه تشربوها
مامت مصطفى/ مش ليه لزوم يا حبيبتى تعالى عشان تسمعى اللى هقوله
هيا/ ده ساقع مش هاخد وقت
مصطفى بيبص فى عين دعاء ودعاء مكسوفه ومش عارفه تقول ايه
(هيا جابت الساقع )
هيا/ انا جيت اهو
مامت ممصطفى/ بصى يا بنتى مصطفى بيحبك ومش قادر يستغنى عنك هنعمل خطوبه لحد ما يخلص البحث بتاعه ولما يخلص تتجوزو ايه رايك
دعاء/ الرأي رأيك يا طنط اللى حضرتك تقولى عليه
مامت مصطفى/ طيب على بركة الله نقرا الفاتحه ايه رايكم الخطوبة نعملها الجمعه الجايه
دعاء/ على بركة الله
مصطفى/ ايه رايكم نتغدى مع بعض بره
دعاء/ ينفع تكونو في بيتى وفي بلدى وتكلو بره
مامت مصطفى/ معلش المره الجايه هناكل هنا بس المره دى اكيد مش عامله حسابك وانا عارفه مرات ابنى اكيد شاطره
مصطفى/ ايه يا هيا مش بتتكلمى يعنى مش عوايدك دا انتى رغايه
هيا/ لا مافيش ربنا يسعد قلبكم ومبروك
مصطفى/ الله يبارك فيكى عقبالك
هيا/ ربنا يسمع منك
مصطفى/ طيب اجهزو و انا هستناكم في العربيه
دعاء/ احنا جاهزين وهننزل معاك يالا يا هيا
هيا/ لا معلش تعبانه شويه روحى انتى
مامت مصطفى/ لا طبعا لو مش هتروحى هنطلب الاكل يجى هنا
هيا/ معلش يا انط اصل انا تعبانه شويه روحو انتو انبسطو
مامت مصطفى/ والله ما يحصل لازم تيجى معانا
دعاء/ لو مش هتيجى معايا مش هروح
(مصطفى اتضايق)
هيا/ لا وعلى ايه يالا
مصطفى/ تعالى اركبى معانا
هيا/ لا معلش خلى انط وانكل ياخدو راحتهم انا هاجى وراكم بالعربيه
(اتحركو بالعربيه وهيا طول الطريق سرحانه و بيجى في دماغها كلام دعاء ان خرجها مع تامر غلط وحرام امال لو عرفتى اللى بيحصل اللى بينى وبينه هتقولى ايه . انا مش عارفه ايه اللى عملتو ده وليه عملت في نفسى كده ممكن عشانن بحبه بس ليه رافض مبدأ الجواز منى ما احنا كده كده متجوزين ايه هيحصل اكتر من اللى بنعمله مسؤليه ايه اللى بيتكلم عنها وفجأه هيا عملت حادثه
مصطفى بص في المرايه / لا حول ولا قوه الا بالله
دعاء/ في ايه
مصطفى/ هيا عملت حادثه (ولف ورجع)
دعاء نزلت جري من العربيه/ هيا حبيبتى انتى كويسه
هيا/ انا الحمد لله بس دايخه شويه عايزه اروح
مصطفى قاس نبضها/ هيا انتى حاسه بأيه
هيا/ انا كويسه بس عايزه اروح
مصطفى/ ما ينفعش لازمم تروحى المستشفى عشان نطمن انه ما فيش نزيف داخلى
راحو المستشفى واطمنو عليها وروحو البيت
هيا/ انا اسفه يا دودو كل ما تيجى تفرحى انكد عليكى
دعاء/ اوعى تقولى كده تانى ربنا يخليكى ليا
مامت مصطفى/ معلش يابنتى يارتنى ماكنت غصبت عليكى
هيا/ الله حلوه اووى بنتى منك
مامت مصطفى/ طبعا بنتى امال ايه
(مصطفى طلب الاكل فى البيت واكلو)
يوم الخطوبه اتصلت هيا بتامر/ الو يا تامر هستنناك تروح معايا الخطوبه
تامر/ معرفش يا قلبى بس ممكن مارحش عشانن عايز انام
هيا/ اكيد على الساعه تسعه هتكون فوقت
تامر/ اه ان شاء الله
(قفل الفون)
هيا فضلت مع دعاء عند الكوافير لحد ما وصل مصطفى
مصطفى/ ايه الجمال ده
دعاء/ ......
مصطفى/ طيب والله زي القمر
دعاء/ بس بقى بتكسف
مصطفى/ يا وعدى عليكى وانتى مكسوفه تصدقى بتحلوى اكتر وانتى مكسوفه
اسر بصووت عالى/ الف مبروووووك يا عروسه
مصطفى مسك اسر /ايه ما فيش مبرووك يا عريس
اسر/ اتنيل عايز تخطب و اقولك مبرووك كمان افتكر انى قولتلك بلاش
دعاء/ ماشى يا اسر بقى كده
اسر/ ايوه هو كده ورش عليها تلج افراح وجرى
هيا واقفه وعقلها مش معاها
وصلو القاعه وفضلت هيا تدور على تامر ومش لاقياه
هيا اتصلت ب تامر/ الو الو الو تامر
تامر/ بس تعالى هنا وبطلى شقاوه شويه
هيا/ شقاوة ايه واجى فين
صوت بنت منن عند تامر/ ااه اوعى ايدى
تامر/ انتى هتستهبلى تعالى بقولك
هيا وقفت متنحه ومصدومه
(تليفون تامر فتح بالغلط)
سابت الخطوبه وطلعت تجرى وركبت العربيه وصلت بيت تامر وهي بتكدب نفسها ومش عايزه تتصدم ولا تشوف حد عنده وعماله تدعى انها يكون بيتهيألها لحد ما طلعت وفتحت الباب ودخلت الاوضه لقت تامر نايم مع واحده
تامر اتخض وقام بسرعه
البنت/ ايه قلت الذوق دي فيه حاجه اسمها تخبطي عالباب
هيا/ .....
تامر/ هيا دي دي
هيا/.....
البنت/ دي ايه يا روح عيني
تامر/ انتي ايه اللي جابك دلوقتي؟ و في حد يدخل عالناس كده
هنا هيا نطقت و الدموع ماليه عنيها و وشها/ ناس ناس يا تامر ليه ليه عملت فيك ايه وحش عشان تعمل معايا كده انا حبيتك انا عمري ما حبيت حد دايما بخاف منه ليه خلتي حبيتك حرام عليك انا اديتك كل حاجه و انت ايه طيب لو مش بتحبني عملت معايا كده ليه انت مخلتش عندي حاجه اديها لحد حتى ثقتي حبي كل حاجه انت ازاي كده شيطان على هيئة بشر منك لله
تامر/ بت انتي اخرسي خالص انا مضربتكيش على ايدك انتي فاهمه و امشي اطلعي بره البيت مش عايز اشوف وشك هنا تاني يالا غوري بره (طلعها بره و قفل الباب)
هيا ماشيه في الشارع بالعربيه و بتفتكر
ام هيا/ انتي لازم تتجوزي شريف
باباها/ لازم تتجوزي عادل
هيا/ ماما عايزه اتكلم معاكي
امها/ بعدين يا هيا مش فاضيه
هيا/ انكل عايزه اتكلم معاك
ابو دعاء/ اخيرا هيا هتتكلم و انا كمان من زمان نفسي تقولي اللي جواكي و اللي مخليكي حزينه على طول مع انك شقية و زي العسل بس حاسس ان فيه لغز جواكي
هيا وقفت العربيه/ اهو يا انكل اللغز كبرو زاد هاعمل ايه انا دلوقتي هاتصرف ازاي يا رب خدني و ريحني بقى حتى اليوم اللي كنت هاتكلم فيه مع حد ربنا اخده مني
روحت بيت دعاء
دعاء / عالعموم شكرا اوي يا اختي انك مش تحضري خطوبتي
دعاء بتص لهيا / مالك فيه ايه؟
هيا وشها كله احمر و الميك اب كله سايح خالص
هيا/ معلش غصب عني و مش هاقدر اتكلم دلوقتي خالص و مشيت
دعاء بتكلم نفسها/ يا ترى فيكي ايه يا هيا انا مش مرتاحه للاسمه تامر ده من ساعة ما دخل حياتك لغبطها اكتر ما هي متلغبطة
فضلت هيا في حزنها و دعاء تحاول تخرجها من حزنها و مش قادره ولا عارفة لحد ما جه يوم هيا فتحت باب الاوضه
دعاء اتفاجأت بلبس هيا ملفت جدا و مبين انوثتها
دعاء/ ايه الحلاوه دي كلها اخيرا طلعتي من الاوضه
هيا/ ميرسي انا نازله
دعاء/ هاتنزلي فين و انتي لابسه كده
هيا/ هاتمشى شويه
دعاء/ انتي اخده بالك انتي لابسه ايه
هيا/ اه واخده بالي حد قالك اني عاميه
دعاء/ هيا فيه ايه بتتكلمي كده ليه انتي عارفه اني بخاف عليكي
هيا/ لا ماتخفيش انا كويسه جدا بعد اذنك
دعاء/ انا مش هاخليكي تطلعي بالمنظر ده بره البيت روحي غيري و انزلي براحتك
هيا/ لو سمحتي وسعي احسن ارمي نفسي من الشباك
دعاء/ و الله مجنونه و تعمليها اتفضلي يا هيا بس لعلمك انا مش مبسوطه وانتي كده
هيا/ ولا انا مبسوطه ولا عمري عرفت يعني ايه انبساط
نزلت هيا و ركبت عربيتها و فضلت تلف شويه في الشوارع و قررت تروح لتامر في المطعم
يا ترى هيا راحت المطعم ليه؟
تتأسف لتامر؟
تترجاه يرجعلها؟
تغريه عشان يرجعلها؟
تنتقم منه؟
توقعاتكم ايه الحلقة الجاية؟