العبق الاقحواني " مي الفخراني" (كامله)

الفصل العاشر

_ ليه يا بني كده؟!، ده انتوا متجوزين من قريب
نطقت بهذه الجملة" حنان" التي ظهر على ملامحها الحزن الممزوج بالدهشه من ما قاله " سفيان"

التقط " سفيان" يدها وقبلها قائلا بهدوء مصطنع :
_ كل شيء نصيب يا أمي

ردت " حنان" باستنكار:
_ هي زهره مش كويسه ؟!٠٠٠ دي زهره مشاء الله أدب واخلاق ومفيش زيها، ايه بقي يخليك تقول انكم هتطلقوا ؟! ٠٠٠ ومتقوليش مفيش نصيب وتسكت !

زفر" سفيان" بضيق يعرف أنها لن تقتنع بسهوله ، وتنفس بعمق مفكرا في كلمات مناسبه لإقناعها بسلاسله ٠٠٠٠٠٠٠

٠٠٠٠٠٠٠٠٠
"في شقه دكتورصالح"

هتف " صالح" بانفعال:
_ هو أنا هلاقيها منك ولا من ألماسه ؟!، عايزه تطلقي يا زهره ليه ها؟!، ماله سفيان؟!، عشان تقولي مش متفاهمه معاه!!، اتجوزتي راجل محترم ، عايزه اكتر من كده ؟!

حبست " زهره" دموعها وهي ترد باندفاع مختنق :
_ ناقصني الحب ، أنا مش قادره أحس بالحب تجاه سفيان٠٠٠ اه هو إنسان كويس ومحترم وكل حاجه بس لا أنا قادره أحبه ولا حتي حاسه أنه بيحبني؟!

قطب " صالح" حاجبيه وهو يقول بسخريه حاده :
_ حب؟! ، هو أنا الي هقولك يا زهره أن الحب ده بيجي بعد الجواز ، الحب إلي إنتي بتقولي عنه ده انك تحبي واحد قبل الجواز ده غلط ٠٠٠فوقي يا زهره من قصة حبك للولد إلي كنتي بتحبي هو زمانه اتجوز ومش فاكرك أصلا!

أغمضت" زهره" جفونها وهي تبتلع غصه مريره في حلقها ثم هتفت باختناق محاوله كبت دموعها :
_ بابا ده قراري أنا وسفيان ومش هرجع فيه ٠٠٠ عن اذنك
قالت أخر جمله وهي تقف وتلتفت تسير بخطوات سريعه متجهه إلي غرفتها وقد انسابت دمعه خائنه على خدها ٠٠٠٠

أما" صالح" فوضع رأسه بين كفيه يشعر  بقلة الحيله والغضب تجاه ما تفعله " ألماسه" وما قالته " زهره"  الآن!!٠٠٠٠
٠٠٠٠٠٠٠
في اليوم التالي
في المساء

جلست " مهره" مقابل " صهيب"بعد أن تركهم" مراد" لكي يتحدثون براحه ،كانت " مهره" تخفض بصرها وتفرك يدها بتوتر بالغ ونبضات قلبها تتعالي ٠٠٠٠

تأملها" صهيب" للحظات ثم هتف بخفوت:
_ مهره ، ارفعي وشك

توترت " مهره" ورفعت بصرها ببطء شديد ووجهها مشتعل من الخجل ووجهت بصرها بعيد عنه ٠٠٠٠

صمت" صهيب" لثواني يرتب أفكاره ثم تحدث بجديه تامه :
_ مهره أنتي ساعدتني كتير ، وقفتي جمبي في مواقف أهلي أصلا مكنوش موجودين فيها ٠٠٠لما كنت بتخنق أو اضايق اول حد كان بيجي في بالي هو انتي ، مريت بحاجات كتير ومشاكل كتير على مدار السنتين إلي عرفتك فيهم كنتي بتقفي جمبي في كل حاجه ، كنتي بتسمعي ليا ، باختصار إنتي اكتر  شخص عارف مين هو صهيب ٠٠٠

صمت لثواني ينتقي كلمات لائقه ثم استرسل مكملا بصدق متردد :
_ بخصوص موضوع ألماسه ٠٠ أنا مش هقدر اقولك أني نسيتها بين يوم وليله ٠٠ بس أن شاء الله معاكي وبوجودك  وبمساعدتك ليا هقدر أنساها ، زي ما ساعدتني اتعالج من الإدمان ، أن شاء الله أنا واثق انك هتساعدني وانساها واكمل حياتي معاكي وكمان أن شاء الله هقدر أحبك في يوم من الايام ، و ده مش هيبقى صعب لأني إنتي أصلا ليكي مكان خاصه عندي أنا مقدرش استغنى عنك إنتي أهم شخص في حياتي ٠٠٠