كسرني وزماني انصفني

النهايه

استغربت من اتصال وسام وخصوصا ماكو شي يجمعنه سوه
صح طليقته مزوجه طليقي لكن مو فد سبب قوي يخليه يطلب يلتقي بيه
بالبدايه رفضت اروح واشوفه بس بعدين كمت وبدلت حتى اعرف شيريد مني وهو طبعا منطيني العنوان الي حنلتقي بيه وكان لقاءنا بكوفي

لتقيت بوسام وتفاجات اول مشفته شاب يطلع بل35 سنة ومرتب اني جنت خجلانه منه ماعرف ليش
وسام/كلش اسف اخذت من وكتج صراحه ترددت ازورج بالبيت من كلام الناس بس اريد احجي وياج بموضوع مهم
قبل كلشي ارجع اعرفج عن نفسي اني اسمي وسام واشتغل مدرس لغه عربيه والحمد لله حالتي تمام
وتعرفين سالفتي كلها مع هيفاء
سهير/الي الشرف استاذ وسام وبالنسبه لموضوع هيفاء اي اعرف تفااصيل زواجها من طليقي لكن تفاصيل طلاقها منك لا...
وسام/  تمام هسه اشرحلج كلشي ومثل متعرفين هيفاء تزوجت زوجج
وطبعا هي من  جانت على ذمتي تخوني وياه واني بعدما عرفت هالشي طلقتها لان متستحق تعيش ويايه بعد
سهير / وهل يا ترى  صحيح قرار بالزواج عليها ؟؟
وسام/منو كلج اني تزوجت عليها اني متزوجت طلقتها بعدما شفت رسايلها ويه زوجج واهلها ضلو يبوسون الايادي واني مرضيت ترجعلي
سهير/استغربت من كلامه لعد ليش جانت هيفاء تكول انه تزوج عليها اكيد تريد تطلع روحها صاحبه حق خوما تكول للناس خنت زوجي وطلكني

وسام/هاا شو صفنتي سمعيني  ست سهير عندي مقترح بسيط
سهير/مقترح شنو
وسام/اني لما طلبتج اليوم لان عندي طلب من حضرتج
سهير/تفضل شنو الي تريده
وسام/هالاقتراح اذا توافقيني بي اكون مسرور جدا
سهير/طبعا لاحظت من كلامه انه شخص مثقف  جدا بطريقه كلامه واسلوبه بالكلام
وسام/ست سهير اني هذه الانسانة اضطريت ارجعها بعدما نفصلت عن زوجج لان الاهل ضغطو بسبب الاطفال عليه بس اني ماريدها صراحة وفكرت كلت ماكو غيرج تكدرين تساعديني بهل موضوع

اسهير/قصدك هيفاء رجعتها
طيب واني شلون اساعدك مفتهمت
وسام/تقبلين تتزوجيني حتى لو زواج على ورق لحدما اخلص منها وتتفضلين عليه واي شروط حاظر
سهير //اني اهنا تفاجات من كلام وسام وصراحته وبنفس الوقت شي بداخلي مكدر يمنعني ان ابدي اي تردد اورفض
سهير//
معقولة اني وياك
ضحك وسام وكال /ليش معقولة.
نسيتي شسوو بينا ثنينهم خانوننا وجرحو كرامتنا
سهير/صحيح كلامك  بس مو معناتها ازوجك
وسام /الصراحة الي شجعني افاتحج بالموضوع سببين
سهير/وهمه شنو
وسام/اولا تاكدت انه انتي نهيتي موضوع قصي وممقررة ترجعيلة
لان خلال كلام عيفاء والي سمعته منها انو انتي قررتي تبقين منفصله عنه حتى بعد ما طلگ هيفاء وبعد ما ظل يجي عليج ويحاول يقنعج بالرجوع وانتي رافضه
والسبب الثاني شجاعتج عجبتني وخطوبتج الي من حسن حظي متمت ..

__طبعا هو اهنا كال هالكلمه بشقه
واني بدون تردد راسا جاوبته
سعير//اني اصلا مجنت مخطوبة هذي جانت تمثيلية حتى ابعد قصي عني
وسام/زين سويتي مو كتلج انتي شجاعة
وهذه هي اسبابي بطلب الزواج واتمنى توافقين
رديت عليه
سهير/ممكن تنطيني وكت افكر بي
وسام/طبعا اخذي كل وكتج وأتشرفت بمعرفتج
سهير/الي الشرف واني حاليا اترخص ما اريد اتاخر بعد اكثر
وسام/الله وياج ومنتضر منج الرد
سهير/الله كريم
مع السلامه

رجعت للبيت واني بين الخايفة والفرحانة لان نتقمت من هيفاء وراح انتقم اكثر اذا تزوجت وسام
فكرت هواية ومر سبوعين اني بس افكر خلالها جان وسام يتصل بيه مجرد يسلم ومفتح الموضوع ويايه جان كلش ذوق
بس ياترى شخص لطيف مثلة ومثقف شنو سبب هيفاء ليش خانته اكيد الصوج بيها لان وحده قذرة وما اريد افكر بيها بعد وشنو اسباب خيانتها لان فعلا هالانسانه متهمني
بنهاية الاسبوع الثاني رجعتله الجواب بموافقتي
وطبعا قبل ما اوافق اخذت رأي اهلي بالموضوع ووافقو لان يعرفون الاسباب ومشو وره قراري
اما زواجنا قررنا نسوي حفلة زغيرة بيناتنا وعزمنا الاهل والاصدقاء
هيفاء نضربت جلطة بعدما سمعت بزواجنا ورفعوا اهلها دعوى طلاق على وسام واخذو كل حقوقها منه
اما قصي فهو الثاني مجان احسن حال من هيفاء سوالنا عركة بيوم الخطوبة اخوتي ضربوه يلا عافني وجان يتحجج انه ميصير اتزوج علمود ابني عمر
بس هالشي مفاد وياه وتم زواجي اني وسام والحمد لله
طبعا صح كان اتفاقنا انو زواج ع ورق بس يعد ما عاشرت وسام وعاشرني
وتعلمت عليه وع اطباعه وهو كذلك
بلش بينه توافق والحمد لله حاليا  صارلي سنتين من تزوجت وسام وعشت وياه احلى ايام عمري واولادة مثل اولادي وصار عندي بنية منه سميناها منى
قصي سمعت بي تزوج وحده زغيره عمرها 15 سنة وكل يوم عركاتهم بالمنطقة كل الناس تسمعها لانه متسمع كلامه
هيفاء نقطعت اخبارها سمعت شالو لغير محافظة
واهنا انتهت قصتي ويه عشيقه زوجي السابقه
وزوجي الي باعني باول فرصه سمحت اله وطلكني
ورجل كان لا ع البال ولا ع الخاطر يكون هو حبيبي وزوجي وابو بيتي وسندي بهالدنيا
نصيحتي لكل مرة اذا خانج زوجج ويه حبيبته السابقة او اي وحده ثانية عووفي بدون تردد
حتى لو رجعلج لان حيرجع بعد فوات الاوان بعدما كسر كلبج لتسمحيله يهين كرامتج لانو هيه اغلى من ما تتصورين
ونشالله تكون قصتي خفيفه عليكم واهم شي عندي تتخذوني ولو عبره صغيره كدامكم
واشكر متابعتكم  ولتنسون التصويت للقصه ورايكم بنهايه قصتي

#النهااايه