ظليت صافنه بمامون.. احس حتى الكلام ضاع..
صارت الضربات يم الباب كلش قويه.. كل ضربه احس كلبي راح ينشلع وياهه..
شويه واسمع صوت طلقات شي ورا شي متحملت وبلا وعي.. كبل عطت..
سديت اذاني وغمضت عيوني حيل..
مادري شوصل مأمون يمي وشوكت..
كال:لاتخافين هسه اشوف شكو.. لا تخافين..
بعده يحجي انضربت الثانيه والثالثه والرابعه.
انتهيت احس كلبي وكف..
مكدرت احجي.. بس ارجف ومجلبه بمامون..
هو يهدي بيه وعينه ع الباب..
مأمون:هسه ارجع.. لتخافين ماكو شي! اسيل! باوعيلي لاتخافين..
جلبت بي اكثر:لا تطلع.. لا.. لا تطلع.. دخيلك لاتطلع..
مأمون:لج شنو مااطلع.. خل اشوف هذا ياكلب يسوي هيج..
جريته كل مابيه من قوه.. ولو اني مابقى حيل عندي..
يمكن اذا الزم شي يوكع مو اله اكدر اجلب بي وامنعه..
مااشوف بس وصل باب الغرفه..طلع سلاح منهه وصعد الدرج.. شويه ونزل ركض راح للمطبخ ..
اريد اكوم مااكدر.. صرت بس اصيح وكوه يطلع مني الصوت مأمون ارجععععع..
مأمون تعااااال..
ماسمع لي.. اسمعه سحب اقسام وسد باب المطبخ..
كمت بيه مابيه..
وصلت المطبخ..
صوت الطلق مشتعل الجو..
وكعت للكاع.. ايست كلش.
راح مأمون مني بعد.. ادري بحظي شنو..
وكعت وكمت اصرخ بالكاع.. كل مابيه من صوت وقوه بقت.. مأمون لاتعوفني.. مأمون لاتروح فدوه..
اني بدونك مااعيش بعد..
سمعت صوت الطلق خف..
بس لسه مأمون مادخل..
ماسمع بس صوت الباب انفتح..
تخيلت دخلو الي يرمون عليه.. من شفت مأمون كبالي زدت بجي.. خوف ع فرحة برجعته..
اجه كعد يمي..
حضني بأثنين اديه..
مأمون:كافي.. اسيل كافي لتخافين راحو.. مابقى احد منهم اسمعي! ماكو صوت! اسيل!
ظليت بس ابجي.. ممستوعبه الصار.. منو الاجه وليش وشنو الصار مااعرف..
ضمني اله حيل.. حسيت نار تطلع منه..
مأمون:لج كافي! اسولتي! روحي!
كوه كدرت انطق واسأله منووو.. منو السوه هيج..
ذب حسره وكال:يمكن اخوان سجى..
-ليش هيج ليش؟ليش تطلع مأمون؟ اذا مافكرت بنفسك فكر بيه! متت عليك خوف! اني منو الي غيرك!
مأمون:ياروحي.. لعد شلون اعوفهم ياخذون راحتهم! غير ادافع عنج وعني!
-مأمون خايفه.. مااريد نبقى هنا.. مأمون عوفني واشرد منا.. ميخلوك عايش ادري..
لزم حلكي:اششش.. منو اليكدر غير انهي!
-مأمون لا تكابر اكثر.. مينكدرون! ومو بس هم! هيثم مراح يسكت ادري! روح منا !
ضحك:ولج شلون اعوفج واروح! مخبله أنتِ شنو؟
حضنته حيل..
ياخوفي عليك .. ياخوفي يجي يوم مالكاك كدام عيني..
ياخوفي يجي يوم ماالكاه هذا الحضن الهسه ابجي بي..
وين اخليك وبشنو اكدر احميك.. روحي ترخص الك..
كومني.. كوه وكفت ع حيلي..
وصلني للغرفه..
خلاني ع الفراش وتمدد بصفي..
بده يتبسم ويلاعب بشعري..
احسه يريدني انام ويطلع.. عين عليه وعين ع تلفونه..
مكدرت اهده.. ودموعي لحظه والثانيه تنزل..
كل شوي يمسحها.. يضحك بوجهي وكيلي اني هنا.. من شنو تخافين ولج!
ابتسم له.. وبداخلي خوفه متروح..
بقى يمشي اديه بشعري..
مادري شلون خدرت ع ايده وغفيت..
فزيت ع صوت باب المطبخ..
باوعت بصفي ملكيته.. كبل ركضت ورا..
اركض واصيح اوكف لاتطلع.. مااخليك بروحك اوكف..
لحكته يم باب الشارع..
وكف .. صفن بيه..
بعد مابي يشرد ..
مأمون:ليش كعدتي ؟ شكو؟
-وين رايح؟
مأمون:هيج مرايح! اريد ادخن؟! شنو ممنوع؟
-ليش ماادخن جوه؟ مأمون شضام عليه!
رجعلي.. لزم وجهي بأثنين اديه..
مأمون:ساعه زمان وارجع.. لتخافين طالب بطريقه جايج.. راح يبقى برا يحرسج..
لزمت اديه..:لاتروح..مااخليك.. لاتطلع. اكيد هسه منتظريك يم الباب .. واكفيلك بالركن.. مأمون اموت بدونك لاتروح فدوه.. لاتعوفنيييي!
باسني من عيوني.. مسح دموعي وكال:مااعوفج والله! ساعه زمان وراجع! اهدي شويه.. روحي نامي ..
شهكت:كل عقلك اكدر انام! اخذني وياك! مأمون اخذني شبيك! مااخليك وحدك والله!
خنزر عليه:وتالي وياج! كلتلج ساعه زمان وراجع! يله فوتي جوه !
بلا مااحس.. رجعني خطوات.. جلبت بيده.. بجيت وتوسلته دخيلك لاتروح.. ابقى .. لخاطري اني!
جر نفسه جر مني.. بقى يدفع بيه لحد ماطلع الباب..
ممصدكه خليته يطلع!
اني ليش خليته.. وكفت يم الباب.. لااكدر اطلع ولااكدر ادخل..
شوداك والمن رحت.. اوف منك اوف..
ظليت كاعده وره الباب وابجي..
اسمه صوت سياره برا..
فزيت ع طولي.. كطعت النفس..
ظلت السياره واكفه.. لانفتح باب ولا تحركت بعد.. شويه وطفت..
باوعت للباب.. اكو بي فتحه صغيره بالحدايد صايره.. باوعت..هاي السياره مال طالب.. اكيد هو الاجه.
ظل بالباب.. وساعات مرت ..
مكدرت ادخل.. وكل لحظه تمر يزيد خوفي بيهه
روحي رادت تطلع. واصعب من الانتظار ماكو!
كلي ساعه زمان.. وهسه مرت اكثر من ساعه وهو ماكو..
ايست.. دخلت جبت شالي ..فتحت الباب..
اشوف سياره طالب رأسا انفتحت..
نزلي واجه يركض..
طالب:وين يمعوده! وين ارجعييي!
-مأمون وينه؟ كلي ليش لهسه مارجع؟ وين راح ؟!
طالب:اسكتي رحمه لاهلج! اسكتي وفوتي جوه! هسه يجي!
-عطت بلا وعي لك شفوووووت! والمن افوت! مأمون وين؟؟ ياعالم راح اتخبل! وينه بس كلي وينه ! شتعرف احجيلي!
كان يحجي ميباوع بوجهي ومبين انه متوتر اكثر مني بس يحاول يخفي:روحي اسيل جوه! هو يجي ويحجيلج!
-اييييي وينه! فهمني وينه! ليش مااجه! كلي ساعه ويرجع وينه؟
ذب حسره وكال:يمكن يم اهله..
-ليش راح الهم؟ وليش لهسه مارجع هاااا؟
طالب:وتالي! ترا ضوجتيني! فوتي يله! مأمون ميقبل اطلعين!
-عليك الله اذا ضام شي كلي.. تعرف شي ومتكلي مو؟ مأمون صار عليه شي؟
طالب:عجيب! ماكو شي والله! مااعرف شي وداعت امي! بس فوتي فضيني!
دخلت.. وسديت الباب..
كعدت يم باب المطبخ.. رفعت راسي للسما.. ربي انته اعلم بالحال.. كافي كسرات.. دخيلك يارب..
اذا ممكتوب يصير من نصيبي ميخالف اعوفه.. بس مااريد يصير عليه شي..
ظلمه.. خوف .. وحزن باللكلب بس الله يعلم بي..
خليت راسي ع الحايط.. عيني ع الباب..
ومر الوقت .. ومااجه..
دخت وغفيت مادري شلون..
فزيت ع صوت الباب.. انفتح ..
باوعت ممصدكه عيوني هذا مأمون..
لا يجوز احلم.. فركت عيوني.. اشوفه بده يتقرب عليه..
مأمون:اسيل؟ليش كاعده هنا ها؟
بودي اعيط بوجهه واصرخ واشتكي منه وعليه..
بس مكدرت.. ماانطاني كلبي..
جر ايدي ودخلنا جوه..
مأمون:تعالي.. فوتي حبيبي..
-ليش رحت ليش؟ موتتني عليك!
خله ايده وره ظهري.. مشينا متحاظنين..
مأمون:وهاي رجعت.. مصار شي.. اهدي كافي..
-وين رحت..
مأمون:نامي والصبح نحجي..
-اكدر انام بعد هل خوفات كلها؟
مأمون:لتفكرين بشي.. نامي حبيبي.. الصبح احجيلج..
-ها تريدني انام وتطلع مو؟
مأمون:هههههه لج شلون تفكرين.. لوااريد مااجيت!
-لعد كلي وين جنت؟
مأمون:اوف منج! رحت لاهلي..!
-ليش؟ همه شعليهم؟
مأمون:اخوان سجى هم مرمين يم اهلي..
وابويه متخربط..
-ياا.. شبي؟
مامون:صعد ضغطه .. واخذنا للمستشفى واتأخرت ويا..
وكفت ولزمته من اديه... باوعت بعيونه بتوسل:يعني ماضام عليه شي بعد؟
دار وجهه عني.. حسيته كذب:لا .. كل العندي حجيته الج! يله تعالي ارتاحي..
فتت للغرفه.. هو اخذ ملابس ودخل حمام..
مددت.. ممصدكه هل ليله شلون صارت وشوكت بدت وشوصلنا لهنا..
ظليت اتمعن بالمروحه فوك راسي وهي تفتر ع البطيء.. مثل مالدنيا تفتر بيه يوميه ع جهه.. يومين رجعت لي المشاكل من اول وجديد.. بعد ماكنت مرتاحه ومستقره نوعا ما.. وبعد مادري حظي شضام لي..
دخت .. وغفيت ..
كعدت .. اشوف الشمس طالعه..
مأمون ماهو! خفت.. كبل طلعت للصاله..
لكيته كاعد بيهه..خليت ايدي ع كلبي..الحمد لله..
مأمون:صباح النور !
ابتسمت صباح الخير..
انتبهت علي من داروح اغسل.. شكله متوتر .. منزعج..
اي واضح عليه هل شي..
غسلت ورحت للمطبخ.. لكيته جايب ريوك.. اكلت وغسلت وفرشت اسناني ورحت يمه..
كعدت بصفه.. جرني اله.. خله راسي ع صدره..
-مأمون ليش ضايج؟
عدل وجهي بحيث صار بوجهه..
مأمون:ليش اضوج وروحي ونظر عيني كبالي؟!
-مادري احسك ضايج.. شصاير كلي؟
ابتسم بوجهي وكال ماكو شي..
ظليت صافنه بي.. لو عمري كله اخلصه صافنه بي هم ميكفي عيني تشبع منه ولاكلبي..
وره شويه كال:اسيل اليوم نطلع من هذا البيت.. اصلا اني مادري شلون جبتج هنا..
-ليش؟
مامون:لا تسألين ليش! غلطه جبتج هنا وخلص..
-صدك هو طالب عايش وحده هنا؟
دنك راسه وكال:مرات يجي هنا..
-اي مو اكول الاغراض البي والهوسه والوسخ مو مال احد كاعد بي مستمر..
كال:عوفي البيت.. وتحضري بعد كم ساعه نطلع منا..
-وين نروح؟
كال نأجر مؤقتا..
-واذا عرفو مكانه؟
كال:ويعرفون! شنو يعني؟
-اخاف..
ركز بعيوني حيل وكال:هاي الكلمه لاتكوليها! لاتكولين خايفه اني هنا! سمعتي اني هنا!
هزيت راسي بأي.. حسيته معصب وهو يحاجيني..
كمت من يمه.. حضرت جنطته وجنطتي..
شويه واجه طالب دكله هورن برا..
كال يله انتظرج برا..
احسه مو ع بعضه كلش.. مو هذا مأمون القبل كم ساعه يشاقيني ويضحك وماافوت من مكان اذا مو هو ويايه؟
ياترى شصاير ويا..
ع سريع لبست ولحكتهم..
شفت سياره مأمون الي اجينا بيهه.. باوعت ع الجامه الخلفيه مسويهه.. وماكأن صاير بيهه شي..
طالب انطاه السويج.. صعدنا ..
مااعرف وين بالضبط رايحين.. والدنيا لوين موصلتنا..
دخلنا لمنطقه.. متوسطه الحال..
صفنت والسياره دتمشي..
افرع ضيكه... بيوت شي حديثه وشي قديمه..
اطفال يلعبون برا ..
كانت لحظات شفتها خطف.. بس انطبعت بذاكرتي..
وكفت السياره..
كال انزلي.. نزلت.. فتح باب بيت.. دخل ورا..
مشتمل صغير كان مو بيت.. لفت انتباهي المي الطالع من الباب.. الطرمه مغسوله..
للحظه ظنيت انه اكو احد جوه..
دخلنا.. مطبخ صغير.. بي طباخ بعده بلزكاته..
ميز صغير وعلي علاليك مشدده..
الصاله صغيره.. بيها تخم همين مبين جديد..
بلازمه لسه مامشدوده.. ساعه محطوطه ع طبلات ممرتبات
فرش ملفوف ومحطوط ع صفحه..
دخلنا غرفه النوم.. كلش حلوه..
موديل يجنن وكله مرايات..
خليت اغراضي ع الفراش..
كال:ها حلو؟
-اي يجنن!
شبكني من ظهري.. همس يم اذني:أنتِ الي تجنينن..
-أأ صدك خل نرتب الهوسه.. الصاله والمطبخ كلش هوسه..
مأمون:لا اني ارتبه معليج..
-لا هم اساعدك..
مأمون:يله لعد..
طلع هو.. ذبيت ردائي..
شديت الشال مثل العصابه.. شديت ثوبي للنص ع بطني..
وطلعت.. من شافني كال:ها شعندج ياستار وضحك..
باوعت لنفسي..
ها شكو؟ شبيه؟
مأمون:ههههههه لا مابيج شي حبيبي..
يله منين نبدي؟
رفعت اكتافي وكلت ماادري
ابتسم لي وبلشنا شغل.. من الصاله للمطبخ للاستقبال هلكنا يادوب رتبنا الاغراض ورهمنه مكاناتهن .. رغم كل شيء بس الضحكه والسوالف الحلوه مفاركتنه واصلا شوفته كبال عيني كافي..
صار وقت غدا..
كل راح اطلع اجيب الغدا من برا.
طلع .. وكل لحظه تمر يزيد خوفي .. الأفكار السيئة مفاركتني . .. كل شوي اوصل يم باب الشارع وارجع.. احس كلبي راد يطلع من مكانه... مامر وقت هوايه ع طلعته بس اني مااعرف شجاني ..
كل شوي اكول بداخلي هسه يجي .. هسه راح ينفتح الباب ويدخل عليه ..
لمن انفتح الباب .. مصدكت حالي مصدكت شوفته مصدكت روحي كد الخوفه المريت بيها...
بلاوعي طفرت يمه. شبكته ...
مأمون:شبيج حبيبي..شكو .. اسوله شبيج؟
خله الاكل من أيده .. بعدني عنه ولزمني من اثنين اديه ..ركز بعيني وكال:شبيج ؟ اسيل شبيج؟
مابيه شي..بس خفت ..
مأمون :من شنو ياروحي..
هيج.. لان بقيت وحدي.. وخفت عليك
ضم راسي اله :وهاي اجيت ..ومراح اعوفج للابد..
همست:يحفظك الي..
مأمون يله تعالي اكلي..
فتحنا الاكل وكعدنا ناكل.. كل شوي اباوعله أحسه ضايج وتعبان.
كملنا ولميت الهوسة ..
هو دخل للحمام ..
اني همين حضرت ملابسي حتى ادخل اسبح ورا..
كمل ..من طلع يباوعلي ويتبسم. .بس مااعرف ليش احس الابتسامه مطالعه من كل كلبه.
دخلت سبحت ..من طلعت شفته نايم و مخلي أيده ع وجهه..
قربت من يمه دنكت راسي حتى اشوفه غافي لو بعده ..
بقيت مدنكه ومركزه ع الطالع من وجهه .
شفايفه لحيته خشمه.
سرحت حيل بي ومحسيت اله جر ايدي ووكعت يمه.
ضحك بوجهي كال كال هااا؟ شكو
سلامتك
باسني من خشمي:اسيل!
ها،
مأمون:تدرين انتي احلى شي بحياتي؟
ابتسمت هزيت راسي بأي
مأمون:وتدرين بدونج مااعيش؟
من عمري ع عمرك!
مأمون:اذا بيوم صار بيه شي ومتت ٠٠٠٠٠
خليت ايدي ع حلكه:اسم الله ! الله لا يكولها
ضحك بأس ايدي وبعدها عنه وكال:قابل احنا ضامنين نفسنا نعيش للابد؟
بلاوعي سرحت بافكاري وبهذا اليوم الي اكعد مالكه مأمون بي ... اختنكت...
بجيت وكلت:مأمون لاتحجي هيج اني مااعيش بدونك انتحر واجي وراك والله! اني شنو حياتي بلياك؟!!
مسح دموعي .. ضم راسي اله وكال:يله كافي بس لتبجين ..
بقيت مخليه راسي ع صدرة.. عيوني مسكتت
مااعرف ليش كل أفكاري سودة .. وما اعرف ليش خايفه كلش من الجاي..لحظة اكون زينة وسعيد ة ولحظه تنقلب كل موازيني ..افكر بأشياء سيئة واشوف طريقي اظلم حالك..
الي ديصير بيه عذاب نفسي...مااعرف شلون امحي هل الأفكار والوساوس..
نوب هو حجى وخلاهه أبالي شلون راح اكدر اعيش مثل الناس.. شلون انام واكعد وامشي مثل الناس براحة وبدون تفكير...
مأمون:كافي شبيج! روحي ؟ كافي !
اخ هسه اني شجاني وحجيت!
مسحت دموعي وكعدت كباله :هاي سكتت مراح ابجي والله..
كعد ع حيله .. بقى يباوعلي ويتبسم.. نظرة عميقه وتفسرلي أشياء هوايه
الحب.الحنان.الاستقرار.
لزم اديه.. بوسهن.. قرب وجهه مني.. باسني من ركبتي. غمضت عيني ..
باسني من خدي..
همس يم اذني .. تعالي امشطلج..
لا اني امشط
چچ ماكو اعتراض .. تعالي..
لزم ايدي وكمنا..
وصلنا الغرفه احس جسمي صار نار فتح الكنتور
طلع علاكه..فتحهه بيهه هواي أشياء مشايفتهن..
معطرات..بوطرا شامبو وغسولات
ابتسمت..شوكت جابهن مااعرف
واتوقع تحضيرات طالب هايه..
طلع مشط..هز أيده كدامي..كال هذا!
يله تعالي..
كعدت ع الفراش.. ذبلي المنشفه زبده يفتح بشعري..
كال طولان..
اي
كال بس تعبان شوي ..
اي
مشطلي ع ابطء مايكون .. اله شوي نمت بيده. من كمل ربطه وبعده عن ركبتي
بوسني.. بده يحضن بيه ويبوس..
مااعرف شصارلي.. كوه تحملت حركاتهه...
كل ما اذكر انه راح يقربلي اذكر اليوم الاسود وي عزام.. اتمنى أبعده اتمنى اصرخ واكول كااافي..
مغمضه عيني واذكر ذلك اليوم لحظه لحظه..
حتى المكانات ااضربني بيها احسها صارت توجعني.
بيني وبين نفسي اكول كافي هذا مو نفسه هذا مو عزام هذا حبيبي ونور عيوني
مااسمع بس كال شبيج؟ اسيل؟
فتحت عيني.. باوعت بعيونه شوي استقريت
كلت مابيه شي؟
مسح ع خدي وكال لعد شبيج مشنجة نفسج؟
رخي حبيبي رخي. ..
قرب من وجهي ..بوس شفافي..
لزمت وجهه
خلص مالازم افكر بشي غيره.. الماضي ولاحاضر..لا خوف من الجاي ولا حزن من الراح.. كله انتهى بوقته..
ومن لحظة للثانيه..
صرت زوجته.. بس الي صار بهل شغله صدمنا احنا الاثنين..
الدم الي طلع ومااعرف شنو مناسبته.. خوفني. وشفت علامات الاستفهام ع وجه مأمون ..
كال وهو مرتبك ويقطع بالكلام قبل..يعني من..لمن جنتي..هم؟؟
فهمت قصده. هزيت راسي بأي ..
ذب حسرة ودار وجهه عني.. نوب كال:ليش هيج لعد؟ خاف اكو مشكله لو شي؟
ماادري.
كال راح ادخل حمام .. اذا شفتي نفسج مو تمام اخذج للطبيبه..
اي
مااعرف شصارله .. ضاج هوايه.. وحتى من طلع مااباوع بوجهي..
متوقعت هيج راح يعوفني ويروح..
يارب ليش هيج صار وياي..
وليش هيج مأمون ضاج..
اني السويته شنو.
الذنب الذنبته شنو.
كمل ورجع للغرفة.. اجه مدد ونام..
كنت متوقعه يكلي تعالي يمي.. تعالي بحضني
بس ماسواهه دار وجهه ونام.
حسيت بروحي غريبه..
وحسيت باليتم وفقد الام..
حسيت شنو معنى اكون بلا اخ وبلا اخت وبلا الأهل كلهم ..
حسيت شكد صعبه راح اعيش هيج..
حسيت بالوحدة والفراغ هووواي.
يمكن ما كانو اهل مثاليين بس كلها متعوض حاجتي لام واخت بذيج اللحظه
مو امي فردوس الردتها ذيج اللحظة
ولااختي كوثر
ردت اهل من صدك..
ام اشتكي الها.. اخت تسمعني..
بس وين الكه كل ذول .
واني املي بمامون وتالي هسه من اولها دلعك بوجهي ع شي مو اني سببه..
يمكن شكك بيه؟ وله يمكن اعتبرني كذابه؟
او يجوز هو حس نفسه تورط بيه..
لميت نفسي ورحت للحمام..
اختنكت خنك. بقيت اغسل والوم بنفسي ..اني ليش انخلقت اذا ممكتوبلي راحة اني المن عايشه.. شنو الحصلته ..
ضاع عمري خوف وهبطات وحزن
وتاليهه ماادري شلون...
يتبع
YOU ARE READING
غسل العار
General Fictionعذبو گـــــــلبي ومشو 🔕 وعافوني وحدي #بدنيتي وبحالي أبد ما فكرو 🌸 وشـــــلون أطيب #علتي لا سألو شحاله #صبح 🌧🍃 مـن يسهر لحد #الصبح لا مرله نوم ولا #فرح💔 محد عرف بمصيبتي .😞
بارت م̷ـــِْن 31 الی 33
Start from the beginning
