غسل العار

الجزاء الثاني 2

الجزء الثاني ❤❤❤❤

كعدت ع صوت مرت هيثم.. واكفه متخوصره كبالي وتهز بيدهه..
كعدت كوه افتح عيني.. وجع براسي وعيوني حارات..
حنان:كومي عيني كومي.. روحي يم امج شوفيهه صخميهه!
اني منا دمي فاير.. وهاي تجي كابله وبزه بعينه..
اله شوي هجمت عليهه وملختهه.. بس حيلي ماساعدني.. وخفت لااجيب التايهه النفسي النوب..
طلعتي من الغرفه.. كعدت بالصاله واشوفهه بدت هي وامها يلمن باغراض كوثر.. ملابسهه.. كتبهه.. كل شي يخصهه خلنه باكياس كبار..
اباوع وروحي تريد تطلع.. احس روحي تريد تنشلع من جسمي من اشوفهن يلمن بيهن.. طلعتهن وراحت للمطبخ.. بعد مااعرفت وين ودتهن..
باوعت لنفسي.. ملابسه اسود.. وثوبي نفسه صار ايام بي..
رحت لخانة امي.. طلعت ثوب اسود.. وكلت اغسل والبسه..
..اني ممصدكه الصار باختي.. ولا مصدكه هي هيج تسوي.. ولازم احزن عليها.. هاي اختي.. مو فرخ دجاجه الراح..
احسها راحت مظلومه.. مااصدك هي حامل وتضم كل هذا عنا..
دخلت سبحت.. ع السريع ولبست ثوب لامي..
عريض كلش عليه.. بس كلت اسلك نفسي بي..
طلعت من الحمام لاكتني حنان.. هزت ايدهه.. وعوجت حلكهه كالت:هو العار هم يحزنون علي من يموت؟!
سكتت.. مابيه ارد واحجي..
صبت الغده ودته لغرفه امي وصاحت تعاي اكلي وي امج..
فتت منهه خفضت صوتهه حيل وكالت:عسى سم وزقنبوت..
لكيت امي نايمه.. صينيه اكل يمهه..
كعدتهه.. تباوعلي وحايره.. مااعرف شنو بنظرتهه.. خوف.. قهر.. حزن ..
كلهن بيها..
امي:وخري مااريد..
-يمه.. فدوة اروحلج اكلي لكمة.. لخاطري فدوة يمه..
امي:لا تحاجيني اس اس!
-مااكل والله.. واموت روحي.. تردين انتحر واخلصج مني؟
بقت ساكته.. رجعت كررت نفس السؤال وبقهر وصدك ناويه عليهه..
عاطت بيه:لااا.. كفيني شرج كل شي مااريد..
-لعد اكلي لكمة..
كوه كوه قنعتهه وخليت خبزه بيدهه..كمت اجيب واوكل بيهه.. اشربهه سوب حتى شوي بلعومهه يتسعدل.. صوتهه مشرح ..
اكلت شويه وهزت ايدهه بلا.. كافي..
اكلت اني.. بلا وعي.. مدري شلون ابلع.. انسى لو اغلس .. بس ماينسي ولا يتغلس منه الصار.. احس روح كوثر ويانه.. اشوفهه كبالي..
كملت وبقيت كاعده مكابله امي.. ضايعه ملامحهه.. وجهه صاير خارطه..
وماتنعرف ولا تنشاف تخوف..
من اشوف امي هيج اتمنى مامخلوقه لهل دنيا.. ولااشوف هل يوم الانكسرت بي امي.. افكر شلون تكعد وشلون تواجه.. وابويه الي كل شويه نازل عليها دك.. اسمع صوت نسوان .. انفتح باب الغرفه علينا طلعن خالاتي.. ووياهن ام حنان هي اصلا موجوده جابتهن علينه..
بوسن امي.. وكعدن يمهه..
خيه شلونج..
امي:شلوني؟
حكج حكج.. دنكت وبجت..
بدن يسولفن بينهن.. وكل شوي يجرن ونه ونعاوه..
ماكو ربع ساعه ع جيتهن واسمع الباب اندفر كل قوته..
ابويه واكف ويباوع علينه..
بابا:اطلعننننننن! كحاب!! المن جايات! يله بره! انعل ابو يوم الاسود الاخذت من هيج مله طايح حظهه! يله اطلعن!
ظلن صافنات.. وحده تباوع للخ..
رجع عاط بيهن بصوت هز البيت هز..
عاد هن تلملمن وراحن.. بقيت بمكاني ومدنكه.. مااريد اباوع بوجهه خاف يجي ويضربنا..
طلعن خله وراح من يمنا.. يغلط ويفشر.. لحد مادخل الاستقبال ماسمعت صوته بعد..
اخ.. ذبيت نفس طويل..ياب ارحم بحالي وحال امي..
اجت مرت هيثم .. كالت:عمي راح يروح يم بيت ابو سلام(بيت عمي)
امي:خلي يروح.. جا المن يجي هنا ع ياصخام..
حنان:اي .. الله يحركهه بنار جهنم .. مادري وين جانت مسربته..
تشجعت وعطت بيهه:لسانج! احترمي عاد!
حنان:اي والله؟! ماظل عليه بس الكحاب!
امي:كافي.. بروح ابوج كافي.. ولج روحي ملجومه..
من اسمع امي تتوسلها نص حيلي راح.. شسوي يايمه واطيب روحج..
والمشكله هي رافضتتي .. ماتريد قربي منها..
حنان:ديله.. كمت حته اشك بروحي من هذا البيت النجس!
اخخ كون اكوم الطمها ع حلكها وارتاح..
دارت وجهه وراحت.. ساعات واني امي بالغرفه..
امي ساعه تبجي.. ساعه تمدد وتظل بس تون..
روحي رادت تطلع من هذا الجو.. من البجي من العياط.. من التفكير..
تمددت ودرت وجهي ع جهه الكنتور مال امي.. امشي باصبعي علي..
واتذكر كوثر.. شلون هيج شلون.. ماتدخل عقلي.. ولااقنع..
بين لحظه والثانيه اشوفهه كدامي.. يتخيلي واكفه اباب الغرفه.. التفت مالكاهه.. احسها كاعده يم راسي.. ادير هم مالكاهه..
ومرات اشوفهه خطف.. واصدك اني شفتهه.. وهو مو اكثر من وهم..
خفت حيل.. اخاف من روح الموتى من قبل.. مو اله شفتها بعيني..
وموته بهيج شناعه.. عقلي وكف كلش.. ميعرف غير التفكير بيهه..
ايام واحنه ع هل حال..
محبوسين اني وامي بالغرفه..  حنان هي تجيب الاكل يمنا.. وامي تاكل لكمة وتبطل.. وبس بجي ونوح..وكل شوي تكوم تستفرغ..
ابويه يجي للبيت.. وعمامي ميعوفوه وحده .. لو هم لو ولدهم..
اخواني مادخلو البيت بعد.. هيثم كاعد يم نسابته.. وكم مره راحت اله حنان.. وتجي تسولف النا عنه.. تكول متخبل.. واذا يجي هم يذبح واحد هنا..
ماصدكتهه.. هي بس تبالغ وتريد تخوف.. اخويه مهما يكون مايقتلني بدون ذنب.. يجوز كوثر صدك غلطت بس ماوصلت انها تحمل.. ولذلك قتلهه.. بس اني وبدون ذنب مايقربلي..
نظامي انكلب كلاب.. بنهار كل شوي انام شويه.. مااريد اسمع حجي من احد.. لا امي ولا حنان ولا امهه الي صارت هي ام البيت..
بالليل كاعده.. وماكو غير الخوف .. اخاف من روح كوثر.. احسهه تفتر يمي.. غرفتنا بعد ماطبيتهه.. واصلا انقفلت..
شعفتي بيه ياكوثر.. هم وقهر.. من غير الذكريات مالتنه..
من لعبنا.. من اول يوم ودتني للمدرسه وياهه.. من حلت دروسي..
من كعدنا نباوع تلفزيون سوه.. من اشتغلنا سوه..
ومن ومن.. ويامكثرهن.. اصلا ماكان يفرقنا شي غير الدوام..
اختنك خنك بهل ذكريات.. وهل روح الي ماعاد تتركني..
حتى اذا نمت.. اتخيلها بصفي..
نمت والهم جبل علينا.. اني وامي..
شفت حلم مزعج كلش.. كوثر.. بلا ملابس وتركض.. رادت تشرد بكل صوره.. شفتها دخلت بفراش هيثم وسترت نفسهه.. شويه وسمعت صوت طلقه.. وشفت دم هواي من كل مكان.. حتى اديه انترست.. متت خوف الهث واصيح بس مااسمع صوتي.. اريد اشوف منو الضربهه.. وين راحت .. فجأة اختفت وصار الفراش بس دم..
كوه فزيت من هذا الحلم الاسود.. لكيت روحي مختنكه.. شفت امي بصفي.. اتمني اروح بحظنهه بس اكيد ماتخليني ومااريد اخوفهه بهل ليل..
اخذت نفس طويل وكمت من فراشي.. احس نفسي شبعانه نوم..
رحت شربت مي.. صارت عيني ع باب المطبخ.. ايام واني مامعديه هذا الباب .. ولا شايفه شكو ورا.. ولا شايفه السما من يمه..
فتحته ع كيف.. ردت بس نسمه هوى تجيني من برا.. لان احس هوى البيت يخنك صار.. خليته شويه مفتوح.. انتبهت اكو احد خطف وديشرب جكاير..
خفت حيل.. بس لازم اتشجع واشوف منو..
بقيت ع نفس الوكفه.. رجع خطف.. ديروح ويرجع.. الطرمة ظلمه مامشغلين ضوه.. غير بس الي موجود بالتواليت البرا..
فتحت الباب اكثر.. انتبه الي.. هذا الشخص مو غريب.. هاي الهيئة والجسم لمأمون..
مأمون :هاا؟ شكو؟
-خفت.. اجيت اشرب مي وشفتك عبالي غريب!
قرب يمي وكال بوجهي:واذا غريب تجين تفتحين الباب؟
-هاا..
صفنت شرد ع كلامه..
مأمون :لا اطلعين.. اذا شافج عمي يذبحج برمشه عين..
-انت ليش كاعد؟ صاير شي؟ عرفتو شي؟
مأمون :لا.. ماكو شي بس مكدرت انام..
دنكت للكاع.. هذا مكان كوثر .. هنا خلوهه من جابوهه .. صفنت وسرحت..
مأمون :هييي! روحي فوتي.. نامي لا يكعد عمي..
-اي..
دخلت جوه.. رجعت لفراشي.. طار النوم من عيني.. ونفس الافكار..
كوثر.. الطفل.. ابو الطفل.. اتمنى يوكف كلبي واموت واخلص..
شسويتي بينا ياكوثر ليش..
نمت بعد ماطلع الضوه وسمعت ابويه كعد ويفتر بالبيت..
كوه نيمت نفسي..
كعدت ونفس الروتين.. ماتغير شي..
ويومين هم ع نفس الحال.. مرت عمي اجت لامي.. وحجيهه كله بز ونغز.. ورمت كلبي.. مااريد احد يحجي باختي.. حتى لو شنو مسويه مااقبل.. هي ماتت خلص.. مابقى شي منها .. كل شي يتعلق بيهه راح وانتهى..
والناس تجي بس تفتح جروح وتكسر خواطر..
من اول ماكعدت لحد ماراحت بس سم .. سم وتنطي بالدم كبل..
وراهه بشوي اجت حنان.. وكفت كبالنا..
حنان:عمي باع البيت..
-شنو؟؟
حنان:باع البيت.. راح ننتقل لغير بيت ب......
امي دنكت ولا كانها سمعت ...
حنان:خلينه نخلص من حجي العالم.. اكلو وجوهنه.. يوميه وحده ادك الباب واكلها عمتي مو هنا..
باوعت للبيت.. راح نروح .. وراح تنتهي كل ذكرى الي بهذا البيت.. انولدت بي.. ونص عمري خلصته هنا.. احس الحيطان دتلتم عليه وتخنكني..
بدت حنان تجهز وتلم بالاغراض.. وكالت الي الم ملابسنا اني وامي..
لميتهن.. ولكيت بنص اغراضي.. ثوب لكوثر.. ودفتر بي خط ايدهه.. ضميته بدون مااشوف شنو بي.. خفت لا تشوفه حنان وتاخذه منيي..
ابويه مااشوفه.. بس اسمع صوته..
وامي نفس وضعهه.. وجهه بده يكشر ويوكع التزلغ.. وضعفت حيل.. صارت سوده ووجهه تعبان كلش..
اخواني هم ماشفتهم.. بس كالو بيوم الي نشيل راح يرجعون يعيشون ويانه..
اجو ولد عمي.. فتحو الاغراض وحملوهه.. ويه كل قطعه تنشال روحي تروح.. صح البيت مكأبني واتمنى اطلع منه.. بس صعبه اعوفه بهل سهوله..
كملو كل شي.. وراحن السيارات الحمل الي شالن اغراضنه.. بقينه احنا.. هيثم اجه لمرته واخذهه من الباب هي وابنها.. ابويه اصلا مااجه.. ساعات واحنا وحدنا..
بقينه اني وامي وحده تباوع للخ.. هنا متحملت.. ردت اختم طلعتي من هذا البيت بحركه كلب.. اطلع الضيم البداخلي والقهر..
كابلت امي وبجي ... هي عاد شافتني ماقصرت.. كالت الي:ولج حيل دكي ع روحج.. ولج دكي ع صدرج وكابليني..
بدون وعي بديت انفذ الي كالته.. واثنينا متكابلين.. نلطم ونصرخ بالطرمه.. وحدنا.. لا ااحد ولا ماحود.. الجوه فااارغ.. مثل صحراء خاويه..
لا نفس ولا لمه..
حيل ضربت ع نفسي.. ع صدري وع زنودي.. ع وجهي.. حتى ع راسي ضربت.. فقدت بلحظتها.. امي همين رجعت زلغت وجهه.. وصارت دمايه.. اشوفهه اكثر وازيد..
شويه وطب علينا ابن عمي سلام.. شافنه تخبل اجه يركض..
سلام:خاله صدك جذب! ولج اسيل شلون هيج تخليهه!
مااكدر ارد علي .. دموعي والبجي خنكني..
لزم امي حضنهه.. وكوه سكتهه.. طلع كلنس من جيبه ومسح وجهه..
خله ايده ورا امي.. وايده الثانيه خلاهه ورايه.. اخذنا اثنينا بحضنه وطلعنا..
ردت التفت.. كال:امشي لا تلتفتين..
دنكت ومشيت.. فتح النا الباب.. صعدنا ومشت السياره مسافه شطولها...
وصلنا ع ارض زراعيه.. بساتين.. وخضار هوايه..
بيت صاير بالنص.. وبي مكان معزول مافهمته شنو.. وكفت السياره ونزلنا.. لكيت مرت هيثم واصله.. والولد همين واصلين ومنظفين البيت وبدو يشدون الاغراض..
سلام:يله.. فوتن جوه.. امي وغفران (مرت سلام)جوه..
مشيت ورا امي.. ماعرف هذا شنو.. البيت متروس بشر.. عمامي يمنا.. وولدهم ونسوانهم...
خل احجيلكم عن عمامي شوي.. حتى  تعرفون هم منو..
عمي الجبير ابو سلام. عنده سلام متزوج غفران.. وياسين متزوج عذراء واسعد صغيرهم ممتزوج...
وسماء وعلياء وضمياء كلهن متزوجات..
عمي الاصغر من ابويه.. عنده فلاح..متزوج سمية.. اوس و مامون مامتزوجين .. .. وعدهم بعد بس رواء..
صارت هوسه .. يشتغلون والنسوان يسون اكل.. احنا كعدنا ع صفحة اني وامي.. وام سلام يمنه.. وحجيه بس بز..
طلعت روحي منها.. تمنيت اخنكها..
بعد يوم كامل من الشغل.. كملو شد الاغراض وتنظيف الهوسه..
صار وقت اشوف بيتنا.. كلش جبير.. اكبر من بيتنا القديم.. كان 250.. هذا يطلع 400 او اكثر.. بناء احدث ومرتب..
بس الي ماحبيته البعد عن المدينه.. والجو الموحش بنص الاشجار..
طريق العام بعد مسافه علينا..
افتريت.. غرف كبار.. حتى احس الغراض ضاعت بيه..
لكيت الغرفه الي راح نكعد بيهه.. مخلين ملابسي اني وامي بغرفه وحده..
فتحتهن وبديت اخليهن بالخانات.. رتبتهن.. هوايه وقت ضيعت بيهن..
كتبي صفطتهن.. مااعرف شوكت اكدر افاتحهم وارجع للمدرسه..
انقهرت واني اصفط كتاب فوك الثاني.. خليت دفتر كوثر بنصهن..
وكلت بلليل اقراه..
رحت شفت امي .. كاعده يم مرت عمي.. حشت الاكو والماكو.. والبجذب ماكالت لامي اكلي.. رحت كعدت بصف امي.. كمت الف وانطيها.. اكلت شويه وشربت مي.. رادت بس جاي.. رحت سويت الهه وجبته..
صادفني فيصل.. شافني كبل دنك راسه.. اني وكفت بمكاني..
خفت من ردة فعله.. كمل طريقه وراح..
انطيت الجاي لامي.. بقت تشرب وصافنه بعييييد.. خفت عليها من صفنتها..
الكل هوسه والكل يسولف.. ونسو كوثر يمكن.. بس اني وامي سكته..
كل شوي المح امي.. اشوف عيونهه.. احاول اعرف شنو تفكر..
لليل.. راحت الهوسه كلها.. بقه عمي ابو سلام واسعد..
بقو بالاستقبال.. المكان المعزول الشفته اول مااجينه..
البيت جديد عليه.. ماكدرت اكعد بمكان.. خايفه.. ما مطمئنه..
امي سكته.. اخواني كلمن بغرفته..
ياريت واحد منهم يحاجيني.. اكعد يمهم.. يطمنوني من الخوف البيه..
بس كلهم عافوني حتى امي.. خفت حيييل..
رحت للغرفه.. لكيت امي نايمه ع الكاشي.. ومامهتمه.. كعدتها يمه كومي خل افرشلج.. كالت عوفيني.. عساني انام بكبر..
كلت بداخلي من عمري ع عمرج.. كافي الصدمة مال كوثر مااريد اخسر احد بعد.. بقت ع الكاشي.. واني روحي تلوب.. لا مرتاحه ولا كلبي مرتاح ع امي من اشوفهه هيج..
خليت مخده ع الكاشي هم.. راوستهه .. كمت ابجي سكته.. خايفه واريد احد يحتويني يحاجيني ويكلي الصار ماضي وراح.. وكوثر هي الغلطت واني مالج شغل.. اريد يكلولي ارجعي لمدرستج..
ثاني يوم الصبح.. اجت حنان وكفت ع راسي.. هييي كومي .. هم مثل اختج تردين تكضيهه براسي نوم وبعدين تسويلج مكسوره بوجه اخوتج!
فزيت ع طولي.. باوعتلهه وداخلي نار.. لوما الناس والملامة جان ملختها..
كمت وراهه.. اشتغلت واني ساكته.. حتى بدون ريوك.. اصلا نسيت شنو طعم الاكل.. اكلت مااكلت مو مهم..
تعبت حيل بشغل البيت.. وهمزين اخواني طالعين.. صرت اخاف من اشوف وجوهم المخنزره..
طبخت حنان وعافت المواعين عليه.. بلشت اغسل.. افكر بشغله كوثر.. ماادخلت عقلي ولااقتنع ابد..
مااحس بس العته من فتحة الثوب ..
هيثم.. خزرني وكال:عليمن لابسه اسود؟
معرفت شرد.. عيوني ظلت صافنه بي.. وهو كل خزره منه اطير الروح..
هيثم:ع اختج العار مو؟
هزيت راسي لا..
هيثم:لعد عليمن؟ ع صخام وجه اخوج مو؟
سكتت.. حاولت ادنك شال راسي بيده..
صك سنونه حيل وخزرني:هسه.. ترحين.. وتذبي! واذا رجعت وشفتج بي احركج انتي وثوبج! افتهمتي؟
هزيت راسي بسرعه اي..
طلع من المطبخ.. اخذت نفس.. اووه.. همزين ماضربني.. عدت سلامات..
رحت للغرفه كبل.. ذبيته.. طلعت ثوب بدون حتى مااشوفه لبسته..
ورجعت اركض كملت شغلي ع السنك..
هم شويه ودخل فيصل.. روحي راحت.. بس هو ماسوه شي.. شافني دنك ودخل..
كملت الشغل... وصار وقت الغده.. صبتلهم حنان واخذته.. اجت مكيفه.. معرفت شنو سبب فرحهه.. بس حسيت اكو شي..
حاولت اعرف من تعابير وجهه.. خير شر؟ الجاي؟
بس هي عكسنا.. مدام فرحانه يعني الله يستر..
ودت الاكل وبقت هناك يم ابويه وعمي واخواني.. اني وامي تغدينه بالغرفه..  امي لو بيدهه تكطع الاكل.. بس اني واكفه الها..
اكل وبالي يم حنان.. شعدها.. ليش بقت يمهم.. مو من عوايدهه.. وفيصل وهيثم دخلو الصبح لغرفة هيثم وبقو ساعات يله طلعو..
اكول لامي؟ لالا ماعوزهه .. تروح تنتر بيه.. هنوب شيخلصها وياهه..اروح اتسمع عليهم؟ لا هم اروح انكشف ونوب يصير قتلي حلال عدهم.. واصلا باب المطبخ ملازم اطلع منه..
كملنا غده وغسلت مواعينا اني وامي وحنان ماكو.. معقوله كل هذا الوقت ياكلون.. اخر شي مليت.. كد مافكرت.. رحت للغرفه تمددت.. تعبانه من كل النواحي.. اريد اغمض عيني الكه نفسي بغير مكان وبغير بيت ويم غير اهل.. ومشيت نفسي اتحلم.. اهلي ناس حبابين.. ماعدهم تشدد.. ماعندي خوات.. وبس اني الوحيده.. مدللة وكل شي اريده يجيني.. وبابا يوصلني للدوام الصبح.. وظليت اتمنى واتمنى لحد مانمت...
يتبع