غسل العار

البارت م̷ـــِْن 4الی 9

قصة اليوم 💖💖💖💖
الاجزاء من 4 الى 9

اسم القصة
غسل عار

الجزء الرابع ❤❤❤❤

نايمة واسمع بس صوت حنان يهلهل يم راسي..
حنان:كعدي ! ام الشوارع اكعدي!
وكفت ع حيلي ورفعت الها ايدي.. شبيج شبيج! احترمي نفسج!
غضت اصبعهه وكالت:اخخخ.. وج كون اني امجن! محد يقبل  ياخذج محد! كله من فضايحجن ! مرت عمج ماقبلت بيج ! تكول ما الفي كحاب ابيتي!
هزت ايدي وكلت الها:كل عقلج جايه تتعاركين ع هل شي؟!
حنان: اي وانت شهامج! هم ترحين تسويلج مكسوره وتصخمين وجه اهلج! تعودتن ع هل سالفه!
قربت منها حيل:انتي شو هوايه تجاوزين!
دفعتني ع كيف من كتفي وكالت:او دولي! هسه اني شمدوخه راسي بشله مال ساقطات!
عاد اني وصلت حدها.. كبل كمشتها من حجابهه وشعرهه.. انطيتها راشدي معدل.. نوب هجمت عليه كل مابيهه من قوه.. راحت ع وين مكان محروك ومزلغ بيه.. رجعت زلغته.. صرت مثل اسد هايج.. منا وجعتني ومنا اني مقهوره.. كطعتها تكطع.. سويت وجهه خارطه وعضيتهه..
دخل فيصل على صوتهه.. لزمنا اثنينه دك كتل.. وهمزين فيصل الي دخل لو داخل هيثم كان بس اني انضربت وهي سلمت...
فيصل يضرب بينا ويصيح ولجن فضحتنا ولجن الله لايوفقجن.. الله يلعن شكو مره ع وجه الدنيا الله ياخذ شكو مره..
نسيت الوجع البيه.. وركزت بكلامه.. يحجي بحركة وصوته يرجف..
اله شوي حسيته راد يبجي.. متت قهر علي.. مااهتميت للضرب الي ضربنيا..
حسيت ايده بدت تخف بالضرب.. مابي يضرب اقوى.. عافنه وراح..
بقت الحية تباوعلي صفح وتعدل بنفسهه.. كالت:اصبري .. يجي هيثم واخلي يعلمج..
صفكت اديه وغميتها..
كمت همين عدلت نفسي.. احس نار كابه بجروحي.. هل ادبسز ملختني..
خليت مرهم ... شوي برد عليه..
رحت دورت امي.. لكيتهه كاعده اباب المطبخ وتهتز.. وكفت بمكاني وبقيت اراقب بيهه.. شفتهه تحرك ايدهه كانما دتحجي ويه احد..
رحت كبل حضنتها من ظهرها.. وخرتني.. ماحجت بس بقت كل مااقرب منها تدفعني..
اخ القهر اكل كلبي.. ليش هيج صار بينا..
حنان دخلت غرفتهه هي وابنها بعد ماطلعت.. نوب ممسويه غده.. رحت اني سويت.. اول مره اطبخ سويت شلون ماكان.. باوعت للمركة من استوت كومه صار دهن ليفوك.. شلت منه.. شويه صارت احسن ينطلع بيهه..
طلعت روحي ع ما كملت .. كل شوي اضوك الملح.. كل شوي اتأكد من الثخن مالتها.. طلع فيصل من غرفته..
صوت كباله ومابينت اله شي.. لا ضايجة منه ولا ابد..
-تتغده؟
باوعلي بنظره.. اكثر من مجرد نظره.. تفسر التعب البي والقهر..
دنكت.. اصلا همنا وقهرنا هو واحد..
خله وطلع بغير مايرد عليه..
دخلت غرفتي... وصفنت بعيد.. ماتروح عن بالي كوثر.. لو بس اعرف ليش سوتهه.. شنو الخلاهه تدخل بهيج طريق.. وهذا الي وصلها لهيج مواصيل شلونه؟ وشنو الكاله وخلاهه تتنازل بسرعه عن شرفهه وعن سمعتهه وسمعتنا كلنا..
كل هذا ونص مني مصدك ونص لا.. الحجي الي كالوه مو شويه وابويه مايسوي شي الا يتأكد.. بس همين مااصدك كوثر يطلع منها هل شي..
مادري وين اسأل ووين اشوف شي يخليني اصدك واكطع الشك باليقين..
بعدني بصفنتي..
باب غرفتي انفتح.. شلت راسي هذا هيثم كبالي..
كمت مااحس بنفسي.. صرت بس عيون وتتحرك داير مدايره..
هيثم:ولج كليلي شسوي بيج؟ بيا كاع ادفنج ويرتاح كلبي منج ياسكط؟
بعده يريد يحجي.. كمت ع حيلي وصحت حيل:موتني وخلصني موتني!
لوبيك خير روح ادب مرتك! ماتستحي ماتخجل ع نفسك من تجي حضرتهه تفشر عليه وع امي! انت ماعندك دم ماعندك غيره!
الحجي طلع مني بدون وعي.. كل جسمي يرجف ورجليه كوه شايلتني تتراعش.. اباوعله وجهه صار دم.. هو ممتعود واحد هيج يحاجي ابد..
مااشوفه اله صار كبالي.. مادري شلون اداهرت ويا.. افتريت من يمه صرت ورا.... كبل ركضت طلعت من الغرفه..
اركض وماادري وين اولي.. كبل ركضت لباب المطبخ.. فتحت واني الهث خايفه لا من اني افتح الباب يوصلني..
وصل للمطبخ اني طلعت كبل.. ماوكفت ولا لحظة كبل اجت عيني ع الاستقبال.. رحت اركض وماهمني منو الي كاعد بي.. ولا همني شراح يصير بيه.. وبلحظة حسيت راح اموت خلص.. بس لازم اعيش هذني الكم دقيقه .. يعني مثل الغركان بمحيط ومكيف لكه خشبه يتمسك بيهه...
دخلت للاستقبال..
عمي وابويه كانو موجودين.. شافوني كبل كامو ع حيلهم.. الاستقبال شويه كبير ع ما وصلتهم وختلت ورا عمي هيثم دخل الاستقبال..
جلبت بعباة عمي.. كان يلبس زي الريفي دائما..
عمي:ها ها شكو؟
هيثم يجاوبهه وهو يلهث:عوفهه خل اربيهه.. وخر عمي ..
عمي صاح بي حيل:ولك شبيك شجاك!
مااحس بس العته من ثوبي.. صرت بوجه ابويه:ولج شمسويه ياادبسز؟
تجمعت دموعي بعيني.. واني ارجف واخلي اديه ع وجهي خاف لا يضربني :والله ممسويه.. هاي مرته.. هي تغلط وتفشر وضربتني.. شوف يابه شسوت بيه.. والله مامسويه شي والله..
فقدت واني اردد والله مامسويه شي والله.. عافني ابويه رجعت وره عمي..
هيثم:شوف يابه.. هاي ادبسز.. لا تحترم ولا تتأدب.. خليني اذبحهه واخلص..
عمي:اش! شنو هل حجي! مو عيب ! عوزنا فضايح كدام العالم يوميه كاتلين وحده! عوفهه وروح منا يله! اذا تريد حط حد لمرتك! شوفهه شمسويه بيهه!
اباوع لهيثم من ورا عمي واني ابجي اشوفه صار نار..
لا يكدر يحجي وكبرياءه يمنعه انه يروح بدون مايضربني..
بقه يخازر بيه.. كلي:اني اعلمج بس اصبري!
خله وطلع..
عمي:روحي جوه.. ومعليج بي.. واله اكلج.. روحي لمي ملابسج وتعاي وياي..
باوعت لابويه.. مدنك راسه.. لحيته شطولهه ووجهه صاير اسود..
عبالي راح يكول لا تاخذهه.. ويمنعني.. بس سكت..
عمي:معليج اني هم ابوج.. يله روحي لمي غراضج.. اخذج يم مرت سلام احسلج من هذا اخوج الطركاعه!
طلعت من الاستقبال امشي واتلفت اخاف يلاكيني هيثم ويكتلني..
وصلت الغرفة .. لميت اغراضي ع السريع.. دخلت امي عليه.. شافتني وماحجت ولا كالت وين.. عفت البيدي.. وكفت كبالهه..
-يمه اني رايحه يم بيت عمي..
امي:بلا ردة ..
-يمه ليش هيج تسوين وياي.. اني شنو ذنبي؟
امي:روحي مني..
ايست.. ما منها جاره.. وماعندي وقت اخذ وانطي وياهه اكثر.. خاف يجي هيثم ويسويلي سالفه.. اخذت علاكتي ورحت لعمي..
لكيته واكف يم سيارته منتظرني..
سلم ع ابويه ورحنا.. طول الطريق هو ساكت.: ماحجينا شي...
وصلنا ع بيت عمي.. مااريد ادخل.. طلعت من هم دخلت بهم ثاني.. شلون راخ اعيش وياهم يربي..
عمي:يله فوتي؟!
دخلت ع عمه عيوني.. لان اعرف مرت عمي شنو هي.. نكديه وبس تحجي بينا.. من قبل ماكو شي وهي تنبش ورانه.. شكول عليك هيثم الخليتيني مثل البزازين يوميه ابيت..
دخلت ورا.. اول مادخل عمي ماشافتنه مرته.. بعدين شافتني وجهه هيج صار😳
عمي:جبت اسيل يمنه كم يوم.. خطيه ترتاح من هيثم اموتهه هو ومرته..
عمتي:هاا.. اي هله بيهه.. طبي يم غفران وعذراء..
دخلت جوه.. لكيت عذراء وابنها بالصاله .. سلمت عليه من وره خشمهه . هي من نوع متكبره حتى بيت عمي ماتحبهم..
كعدت يمهه.. سكته.. لا سألتني ليش اجيتي وشجابج.. مخليه ابنها وترضع بي ممه... اسمع صوت همس ممفهوم عمي ومرته بالمطبخ.. يمكن راح تعلك من ورايه.. بس شسوي مااكدر اتحمل هل كد ضرب واخاف افقد ولساني ميسكت وهنوب اروح بيهه..
شويه ونزلت غفران.. احسن من عذراء بالف مره.. شوي تجامل وتسولف..
سلمت عليه وبوستني ..فرحانه بيه وتسأل..
جابت بتهه ورجعتلي النوب.. ماخلت شي ماسألت عنه .. وهي بطبعها فضوليه شويه.. وماضجت منها متعودين هيج عليها..
شويه وصاح عمي تعاي بويه اسيل اكليلج لكمة..
غفران:يله كومي نتغده اني وياج.. اني هم مااكلت وهسه جعت..
دخلنا المطبخ.. ام سلام باوعت لجنتها صفح وطلعت..
صبينه وكعدنه ناكل.. شويه وجود غفران يخفف عني التقييد وينسيني..
دخل علينا سلام واحنه نتغده.. تفاجىء بوجودي ..
وسألني عن حالي وحال امي.. سلام كلش سبورت هو ومرته..
كعد تغده ويانه.. ودك سوالف ماسكتو لا هو ولامرته..
ماحسيت نفسي غريبه ابينهم.. لمتهم وسوالفهم حلوه شوي تريح الواحد..
كملنه الغدا وغسلنا المواعين ونظفنا سوه.. راحت غفران لغرفتها ي وزوجهه.. رجعت للصاله وعذراء ع نفس كعدتها.. بس ابنها نايم وكاعده يمه.. فوك الساعه اني كاعده يمها اريدها تنطق تحجي ماكو..
بس مخليه رجل ع رجل وتباوع ع التلفزيون..
لحد مااجت مرت عمي.. كالت لي اكعدي بغرفة البنات.. كانت اكو غرفه جوه مخصصيها لبناتهم من يجن ..
اخذت علاكتي وكعدت.. ماخليت ملابسي بمكان خاف متقبل عليه.. عفتهن ع صفحة..
تعبت وحدي.. لا ونيس لا سالفه لاكعده.. خليت ونمت..
كعدت مغربيه.. استحيت اطلع .. ساعات واني كاعده وحدي.. نوب اريد ادخل حمام.. اسمع هوسه بره واسمع يسولفون .. شوي هدت الهوسه خليت وطلعت... كبل رحت للحمام ..
طلعت لاكتني غفران كالت تعالي ضميتلج عشا.. رحت للمطبخ وراهه.. كعدت اكل خلتني وراحت.. وره شويه رجعت كالت الحمام جاهز اذا تردين تسبحين..
كملت اكلي.. رحت للغرفه طلعت الي ملابس ورحت اسبح.. المي يأذيني من ينزل ع مكان بي جروح وحروك.. كوه كملت..
ساعات مرت.. ملل وافكر بامي.. منو انطاهه اكل ووينها هسه..
وهم مانسيت كوثر.. مثل كل مره لازم تمر بصفنتي.. ياريتها يمي واعاتبهه واسألها ليش.. لحد مااخذتني هاي الافكار لاحلام عجيبه وغريبه.. احس نفسي بين النايمه وبين الكاعده واشوف كوثر كبالي واحاجيهه مترد..
نوب مادري شنو صار وغطيت بنوم ثكيل بعد ماشفتهه...
يومين واني بيت عمي ابو سلام.. مرتاحه من ناحيه المشاكل.. بس متضايقه من وجودي وياهم..
خاصه مرت عمي حيل مثكلة وجهه مني.. من اكعد بمكان هي تخلي وتكوم.. غفران هم بس اول يومين الثالث عافتني .. اما عذراء هي نفس شكلها متنكة ع العالم ومتحجي... طبعا ياسين يشتغل عسكري.. واكثر وقته دوام وخفارات.. اسعد همين طالب كلية بغير محافظة.. كل شهر لو شهرين يله ينزل.. بس سلام المتواجد يمهم.. وهم الصبح بدوامه والعصر بمحل كهربائيات مالتهم... وعمي هم اغلب وقته طالع .. يروح يم ابويه.. لو يم عمي ابو فلاح.. لو هو يجي ..
اجه عمي ابو فلاح.. عرف بيه موجودة يمهم اصر اله يشوفني..
دخلت سلمت عليه.. وكان اوس ويا..
كعدت يمهم شويه.. سألني عن حالي وخاف محتاجة شي.. سولف هو وعمي شويه..اخر شي كال لعمي ابو سلام خليهه تجي ويانه يم رواء تتونس..
اني سكتت.. كل ظني عمي ابو سلام مراح يقبل اروح منهم..
ابو سلام:هههه والله بكيفك.. هي هم بنيتك.. واني كلت الك اهلهه لهسه محد سأل عليهه.. خليهه يمك كم يوم بين ما الله يفرجهه..
ابو فلاح:هذا هيثم مخبل.. لا ينطلع بي ولا ينوخذ بحجيه.. يوميه رايح لفلاح بسالفه.. تعال اندور وتعال نكتل ونذبح..
ابو سلام:هي هيج تنحل؟ هو خل صدك نلكاه لهذه الجلب واسويهه وياهم طلابه..
ابو فلاح:اي بس هذا متهور.. كل شي يسوي..
ابو سلام:والله اني هم خايف منه..
بقيت ساكته واسمع.. الي فهمته انه هيثم لحد هسه يدور ع الي حملت منه كوثر.. صفنت وبقيت احلل وافسر شلون يكدر يلكا ومنين يوصله..
لحد ماصحيت ع صوت عمي.. كال يله خل ناخذج ويانه..
عاد رحت مثل الحبابه اخذت علاكتي ولبست .. سلمت ع النسوان وطلعت..
اوس يسوق وعمي بصفه.. واني وراهم..
اوس كل شوي يذب حسرة ويدير وجهه ع الجامه..
حسيته ضايج من جيتي وياهم.. كلش تأخذت من الكعده.. اثنينهم سكته مهذا بس يذب حسرات..
وصلنا ع البيت.. هم نفس الصدمه مال ام سلام صارت بأم فلاح..
دخلت بغرفه رواء.. هي بعدهه مموجوده كانت بالدوام...
رواء كانت مدللة كلش.. وهي وحيدة بين 3 اخوان.. كلهم يحبوهه ومدلليها .. طالبة كليه علوم.. مرحلة اخيره.. هوايه تقدمو الها وخاصه هي كلش حلوة وانيقه بس ابوها يرفض.. يكول محد يتساهلها ويريدها تكمل دراسه..
فهي من نوع شوي جامدة.. تتعامل بجديه كلش..
كعدت انتظرها.. لحد مااجت.. عبالي راح تتفاجىء من وجودي لو راح تكول شي.. اكتفت بسلام وبس.. اصلا ماسألتني ليش اجيت وشوكت..
ولو اني المفروض مااتوقع هيج شي منها..
تغدت ورجعت قبل لا تنام يله سألتني شعجب جايتهم.. ما سولفت هوايه..
لان هي تحب الجواب مختصر وخاصه هي تعبانه تريد تنام..
مجرد ماسمعت مني خلت ونامت..
اني هم ع واهس وياهه غفيت ع الارض.. كانت مفروشه فبس خليت مخده وتغطيت ونمت...
صار الليل.. واني بعدني بالغرفه استحي اطلع.. هم نفس المعاناه يم بيت عمي ابو سلام.. سألتني رواء اذا حابه اطلع وياهه نتعشى..
-لا..
رواء:براحتج.. راح اجيب الجزواليه ناكل هنا..
-شكرا..
رجعتلي بيدها صينيه بيها خيرات الله.. تكابلنا ناكل وهي ع نفس السكته... مكابله اللاب مالتها وتشتغل بي..
حتى اني طكت روحي من هدوءهه العجيب.. قبل من كانت تجينا شوي احسن تضحك وتسولف.. هسه فد مره.. شيخلصها يارب..
مادري شلون كدرت اكل وهي هيج كبالي.. طلعت اغسل وهي اخذت الصينيه .. من رجعت للغرفة لاكاني اوس نازل من الدرج.. شافني ذب حسرة ودار وجهه مني.. كلش فشلت .. وتمنيت اموت ولا هل ذله هاي..
شكول عليك هيثم.. الله يهديك عليه بس..
حملتني ذنب مو ذنبي.. وخليتني من بيت لبيت.. ضربتني وهنتني وفضلت مرتك وامها ع اختك.. شفت الذلة والاستحقار..
وليش؟ كله بسبب كوثر.. كله بسببها.. دمرت نفسها ودمرتني بدون تفكير..
دخلت الغرفه اتصفن وصدك كرهت كوثر بوقتهه.. وصدكت وامنت انها مو بريئه.. مشت ورا طيش وشهوات ومافكرت بينا.. لا اني ولا امي الي عايشه مثل المخابيل متدري ليلها من نهارهه.. لو سمعتنا الصارت بالكاع من وراهه..
شكم مرة اقنع بنفسي واكول هي ماسوتها ماسوتها.. بس لا .. تطلع منها..
وماكو داعي بعد انتظر دليل حتى اصدك او مااصدك..
اتمناهه كبالي.. اعاتبها ويمكن حتى اضربها.. كرهتج ياكوثر..
اكول بداخلي ياريت اعرف وين قبرج.. ووين ودوج من متي.. بس هسه لا.. لو اشوف كبرج كبالي يمكن اتفل عليه.. خليتني بنار.. الناس كلها ذلتنا..
اقرب الناس النا.. عمامي ولدهم بناتهم.. خو زوجاتهم طعنو بشرفي..
واني الي محد لامس طرف ثوبي.. لج ليييييش!
فهميني ليش.. شنو الي قدمه الج هذاك الصخمتي وجهنا ع موده..
شنو حجالج وقنعج..
ايام وليالي اني عايشه بحلم .. واقنع نفسي اكول هسه اصحى هسه اصحى..
وياريتني ماصحيت.. وماصدكت انج هيج طلعتي..
كنتي تسولفين وتكولين صديقتي .. صديقتي تحب.. صديقتي زعلانه ويه حبيبها .. صديقتي طلعت ويه حبيبها.. ومشيتيها عليه.. واني مثل الثوله استمع الجروانطي رأيي واحجي عليها لصديقتج تكولين لا خطيه شذنبها تحبه! لج ياحب هذا ياصخام..
مافهتمج وماحسيت ع كذبج.. كنت مستحيل افكر بيج هيج.. اعرفج اختي..
مو غريبه.. بس مااعرف شصارلج وهيج روحتي نفسج بشربة مي..
الكل تباوعلي بالعين الصغيره.. اخواني كرهوني.. امي ابويه..
شسوي بعد وين انطي وجهي .. اذا تكدرين اخذيني يمج احسن..
لان الحياة الي عايشتهه معاشهه بشر.. اخذني يمج حتى اتعاتب وياج عتاب طوووويل..
بقيت سارحة.. واعاتب بكوثر .. مادريت بنفسي شلون كاعده ووين..
لمن دخلت رواء وكالت:هاي شبيج؟ ليش كاعده هنا؟
باوعت لحالي .. كاعده طرف وحاصره نفسي بمجال كلش صغير بي الميز وبين الحايط.. مقرفصه وحتى دموعي نازله..
-ها.. لا ماكو شي..
رواء:ليش تبجين؟
-لا ماابجي..
سكتت بعد مسألتني..
كعدت تدرس .. والتهت باللاب مالتها.. من اشوفها تقره كلش اشتاق للدراسه.. احس روحي باقيه بالمدرسه.. كلشي بيه متعلق بالدراسه.. اصلا ماكان عندي شي غيرها.. وكش ...طارت المدرسه وطارت كل الاحلام..
يتبع
الجزء الخامس ❤❤❤❤