غسل العار

بارت م̷ـــِْن 31 الی 33

قصة اليوم 💖💖💖💖
الاجزاء من 31 الى 33

اسم القصة
غسل العار

الجزء الحادي والثلاثون ❤❤❤❤

مأمون ...
ومرت ايام.. شوصفها..
مر .. لا بعد امر..
اختفت.. دورنا.. سألنا.. محد عرف الها اثر..
بيهه مااعرف شلون تحملت.. نفسي .. الحجي الصار ع اسيل.. اهلي.. الساعه من تمشي واني لهسه ملاكيهه..
مخليت مكان مادورته..
صار كل نهاري دواره عليها وتالي الليل اتعب حيل..
فكان ملجأي الشرب.. وياما بجيت عليها..
كنت احس روحي مربط .. مااكدر اسوي شي..
اخ لو اعرف وين رحتي اخ..
خلتها حسره بكلبي..
الكل ايس انو نلكاهه.. وهيثم ثالث يوم من غيبتها نصب فاتحه. صغيرة وشبه سكتاويه . كان يوكف كبال الناس ويمثل انه حزين..
ومن نرجع للبيت ينكلب وحش..
ميخلي لا تكسر لا عياط لا حجي..
حتى بوحده من المرات دخلت الهم لكيته مستلم حنان دك ضرب..
وخرتها منه وبقت تصيح علي..طبعا هي أم لسان متسكت.. حجايه منا ومنا
تالي زعلت وعافته ..
فيصل.. هم نفس الحال.. بس ما بقى وياهم نفس البيت..
رجع للمدينه هو ومرته . أخذ بيت قريب يم نسابته
هيثم كل مانكعد سوى يتحلف ويتحضر الها اذا لكاهه..
واني ياخوفي بعد مالكاهه..
كل مره اخلي بيهه راسي ع المخده تجي افكار موزينه براسي.. انقتلت.. انتحرت.. انحطفت وصار بيها شي..
شكد حاوت امنع نفسي ماافكر بيها..
بس مااكدر..
اهلي عرفو بموضوع طلاكي لسجى..
تخبلو ويوميه طلابه .. بس ماكنت اهتم..
كل همي انه اعرف وين اسيل وهي بخير..
اهلها دزو حجي لاهلي وصارت مشاكل الها اول مالها اخر.. طبعا دفعت الها تعويض كلش كبير..
وهذا مكفاهه.. رفعت دعوى عليه تريد بعد تعويض..
بس المحكمه لمن شافت اني ممقصر بدفع التعويض ردت الدعوى مالتها..
حسيتهه حمل وخلصت منه.. رغم الحجي رغم المشاكل وي اهلي.. خاصه من طلعت حامل بولد امي سوتها سوده..
يوميه واكعه يوميه متخربطه..
وكلها تحجي من وراك من وراك..
فلاح كعد يمنا..
واوس بقى عازل..
رواء تجي كل اسبوع علمود امي..
وكل ماتجي تبقى تحجي عليه..
صح خبال السويته وهي حامل مكروه طلاكهه.. بس مشيتها بكم فلس وصارت.. مهما يكون عندي أفضل من أنها تبقى اسمها زوجتي واظل كارهه العمر كله...
ابويه ميحاجيني نهائي.. واذا سلمت يدير وجه عني..
مليت منه.. فصرت ادخل واطلع اشوفه مااسلم ولا اندحك بي..
يوم وثاني وثالث وهي ماكو ولا خبر منها..
تقريبا كنت يوميه التقي بهيثم..
بس بيوم ماالكيته بالبيت.. وحنان زعلانه..
كان البيت فارغ..
دخلت .بيت أشبه ما يكون بصحراء خاوية السكتة البي والهدوء تقبض الروح... بلا مااحس وافكر . اخذتني رجليه لغرفه اسيل.. اختنكت واني امشي خطواتي.. باوعت بيها بكل ركن.. جان هل مكان بعيني حياة بكاملها بس هسه صفه مثل ساحه الحرب بعد ماتنتهي الحرب ..
وصلت يم الكنتور
فتحته. ملابسها باقيه..
تلمستهن.. احس كلبي راد ينفجر..
لو اعرف وينج.. مبقى شي وافقد عقلي خلاص..
متحملت ابقى اكثر بالغرفه..
خليت وطلعت..
دكيت ع هيثم..
-الو..
هيثم:الو ..ها مأمون ..
-وين انته؟اجيتك للبيت ماكو؟
هيثم:بالنجف.. رايح ازور..بلكي اريح كلبي يمهم ع سوايات بناتهم ..بلكي اشكي همي الهم وارتاح!
-ها.. ليش مكلت.. جان رحت وياك!
هيثم:هسه خل اوصل والله كريم..
-وصلت المقبره؟
هيثم:لا .. مبقى شي راح اوصل.
-الله وياك..
طلعت من الصاله شجان هذا البيت.. وشصار..
من بعد اسيل فرغ كلش..
صدري مقبط.. طلعت من باب المطبخ..
باوعت ورايه..
رحت ع مكانه.. ورا البيت..
وكفت.. صرت اشوفهه كبالي..
دموعها تارسه وجهه.. وهي ياما شفتها بنفس المكان وبكل مره تبجي ..
شبعت كلبي قهر فوك قهر ورحت..
دخلت البيت.. هم هدوء.. وبس مرت فلاح تشتغل..
امي بغرفتها متطلع بحجة المرض..
وابويه بالمجمع..
فلاح بالدوام..
..:ها.. ؟ تتغدى؟
-لا مااشتهي..
صعدت للغرفه..
شمرت نفسي ع الفراش.. اباوع ع السكف ..
تعبت يااسيل وتاليهه.. ارجعي عاد..
خليني بس اعرف اخبارج.. حتى لو ماتصيرين نصيبي..
غمضت عيني..
هستوني غفيت..
دك التلفون..
باوعت هيثم المتصل..
فتحت خط بصوت تعبان كوه احجي..
-ها؟
هيثم بصوت منفعل:مأمون .. لكيت اسيل!
كبل فزيت من مكاني..شنو وين لكيتها؟ وين انته احجي!
هيثم:هسه طلعت من المقبره.. اكو دفان سولفلي سالفه بالصدفه ..
عطت:ايييييه احجي عاد!
هيثم:كال اكو بنيه من فتره لكوهه فاقده وعيها يم قبر امها وابوهه.. من سألته يايوم طلع بليله الشردت نفسها!
-اي ووينها هسه؟ منو يكول هيه؟
هيثم:مادري.. بس اذا هي راح اطم عاري واجيب راسهه واجي!
-ولك لا تتخبل.. هيثم اسمعني.. هيثم!
كان يحجي ممركز.. هيثم! اسمع راح اجيك لتتصرف من كيفك! لاتندم! هيثم لاتقتلها!
هيثم:لا تجي.. اني راح اخلص عليها واخلص من المشاكل
كبل سديت التلفون.. نزلت ركض..
شغلت السياره وطلعت..
شكد مشيت سرعه بس عبالك السياره مداتمشي..
خفت عليها لا يموتها صدك..
ماعنده مانع.. دعيت كون ميوصلها قبلي..
دكيت علي واني بالطريق:هيثم.. وين انته؟ شسويت؟
هيثم:بعدني مواصلها..
-عرفت وينها؟
هيثم:كالو ماخذها شيخ بس منو هو ماادري..
-اوكي انتظر اجيتك اني.. لا تتهور وتستعجل!
سد التلفون..
ركعت السترين.. خرا بيك هيثم.. اخ شلون ويه خبالك.. بس كون الحكها..
وبعد ساعات من القلق والخوف وصلت النجف..
دكيت ع هيثم..
عرفت مكانه.. يم دفان..
رحتله هناك.. حمدت ربي الف مره لانه بعد موصلها..
وعرفنا اسم الشيخ نجم ومكان بيته..
كبل رحنا الهم.. دنيا ظهر والشارع هدوء مالهم
دكينا الباب.. طلع النا ولد شاب..
هيثم:هنا بيت الشيخ نجم مو؟
الشاب:اي وصلت.. تفضل ..
دخلنا جوه..
كوه لازم هيثم..
كعدنا بالاستقبال .. كلش ضخم وكبير..
وره شويه طلع النا الشيخ..
سلمنا عليه.. وهو هم رحب بينا بدون ميعرفنا..
هيثم:شيخ.. اجيك من الاخر.. اختي اليمك وين وديتها؟
تلعثم.. ابتسم وكال:شتقصد؟ يااخت الك يمي؟
هيثم عصب حيل وحجه بعصبيه :اسيل.. البنيه الكيتهه ع القبر.. وينهاااا!
كال اهده.. مو كله بالصياح..
عطت:شيخ مو وقتك هسه! اسيل وينها؟
ولد الشيخ خافو.. ظلو واحد يشاور بالثاني وبعدين دخلو جوه..
هيثم:شوف.. كل هذا النعيم الانته بي اطيره! اشوه سمعتك واسوي مااسوي! طلع اسيل احسن الك!
لزمت هيثم من ايده:مو هيج! ع كيفك !
نجم:هو انته المحطمهه؟ انته هيثم مو؟
هيثم راد ينفجر.. خاصه عرف انه اسيل مسولفه الهم عنه ..كوه بقى ساكت..
-شيخ.. اسيل وين.. بس خلينا نشوفها هي بخير؟
نجم:شلون اأمن بيكم ماتقتلوهه.. شلون انطيها الكم؟ هذا ذنب عليه اذا انطيتها الكم! انتو ناس متوحشين والدم ملطخ اديكم وكلوبكم وعاميكم!
-اني اتزوجهه.. باوعت بعينه.. لك اني احبها.. روح كولها مأمون اجاج.. وتعال كولي شنو تكول!
نجم:البنيه دخيله عندي.. مااكدر اجازف بروحهه وانطيها الكم..
-بس روح كلها مأمون هنا! جرب وشوف!
نجم:وشمدريني انت مامخوفها بيك !
ضربت ع رجلي واخذت نفس طويل..
-دخيل ربك صيحها.!
هيثم:خل تجي واني اعلمها!
نجم:ها؟ شفت؟ وتريد اخليها تتطلع الكم؟ روحو منا ترى برب العزه اشتكي عليكم ! كافي شمسوين بيها !
هيثم:الاحسن تصيح الها. واله اسويهه سالفه ابيتكم والله!
دخل الشيخ جوه..
شويه ورجع.. كال ام يوسف راح تحجي وياهه...
بقيت كاعد ع نار..
يجوز راح يشردوها.. اي .. بقيت كل شوي ابعد البرده الورايه واباوع ع باب الشارع..
مشفت احد طلع..
شويه واندك الباب..
راح الشيخ جوه.
هيثم كال:ندخل جوه؟ هذا شكله راح يضحك علينا ومينطيها النا؟
-اصبر اذا ماجاب نتيجة ندخل جوه..
رجع الشيخ..
هيثم؛ها؟
نجم:البنيه تخربطت.. مكدرت حتى تحجي شي!
-شنو هل حجي .. اسيل شبيها!
صحت .. اسيييييل!
اسييييل!
نجم:ابني احترم حرمة البيت الانته بي..
كمت من مكاني.. بعد مابيه انتظر وهذا دييطبخنا ع نار هاديه..
وكفو كدامي ولد الشيخ..
يوسف:وين وين! البيت بي نسوان! ارجع احسن !
-سويلي طريق افوت..
صحت مره لخ لج اسيييييل!
شويه واندك الباب..
راح واحد من الولد جوه..
التفت هيثم ماكو .. باوعت يم الباب شفته هو والشيخ بالكراج..
رجع الولد.. كال:تعال فوت..
واخيرا.. انفتح باب الاستقبال..
البيت كبير كلش وهوايه بيبان مااعرف بيا وحده..مشيت مسافه ..
احس كلبي راد يطلع من مكانه..
شويه وطلعت مريه من وحده من الغرف..
منقبه نفسها باالعبايه اللابستها وكلشي ممبين منها..
كالت هنا..
فتحت الباب.. وصلت ..
احس الزمن وكف..
دخلت خطوات..
اشوف اسيل مقرفصه ضامه راسهه كله بين رجليها وكاعده بطرف الغرفه..
قربت منها.. لهسه ماشفت عيونهه ووجهه..
وصلت ليمها.. إذا ع حاير شسوي وشكول خليت اديه ع اكتافهه.. كبل صرخت..عوفوووووني!
أزمتها عدل.. باوعت بعيونها كلت اني مأمون لتخافين محد يأذيج! اششش لاتبجين
ظلت تبجي وتردد راح يذبحوني راح يموتوني
جريتها وضميتها الي..
همست:لج اخخخخ! شلون هيج تسوين! لج شدمرتي أنتِ؟
ظلت تصرخ وتون..راح يموتوني
رفعت راسهه... اباوع بعيونهه..
من جوه اسود.. وجهه ضعفان كلش..
كامت تحجي بصوت مخنوك ومشرح كد البجي:مأمون فدوة لاترجعني يم هيثم.. فدوة عوفوني بحالي .. روح اخذه وروح مااريد ارجع..
خليت ايدي ع حلكها كانت شفايفها ترجف ووجهه متروس دموع .وصوت شهكاتهه ترن بكلبي . بلا مااحس دموعي نزلت وياهه..
-اششش.. محد راح يأذيج واني موجود. بس كليلي ليش هيج ليش؟ شسويتي أنتِ؟
اسيل:مأمون اني خايفه.. راح يموتني هيثم مو؟ راح يقتلني..
-اش اش.. لتحجين هيج. شحده يوصلج..
اسيل:لا ترجعني هناك فدوه.. روحو وانسوني
شبكتها الي:لج شلون انساج! كل عقلج تحجين !
ظلت بس تبجي..
اسيل..
لما كالت ام يوسف عندي موضوع وياج .. بقيت ميته خوف.. مادري ليش حسيت انه هيثم كلش قرب مني..
وصدك ماخاب احساسي..
ركزت بيهه حيل.. كالت اخوج وابن عمج هنا..
صفنت.. عادتهه مره لخ.. استوعبت الي كالته..
احس كل جسمي يرعش صار.. دموعي كامت تصب واشهك واحجي اكلها راح يموتني اكيد..
طلعت برا.. شوي ورجعت.. كالت لتخافين الحجي ميعوفج.. لتخافين .. ظلت تصبر بيه واطبطب ع ظهري .
حضنتني حيل.. وكالت:اذا مو اليوم باجر ترجعين.. هم اهلج ويردوج.. اكيد ميسكتون ..
اختنكت.. لازمه بلعومي واشهك..
صرت اشوف ظلام.. عبالك انعميت.. دخت وله فقدت مادري شصار.. فتحت عيني..
اشوف ام يوسف والبنات كلها التمت عليه انطوني مي وكعدني.. شوي هديت.. مره لخ صاحو ع ام يوسف..
البيت صار هوسه وفوضى بسببي..
وراح تصير مصيبه اكيد مراح يعوفوني..
رجعت ام يوسف.. كالت:شوفي ماما.. اكو واحد ديكول كلولها مأمون اجاج..
من سمعت اسمه .. الدم جمد بيه.. احس جسمي ثلج.. بقيت بس كلب يدك.. وكل دكه تزرف بصدري زرف.. حسيته وحع اكثر مما هي دكات كلب عاديه..
كالت:يريد يشوفج.. اسمعي كام يصيح والولد كوه لازمي يريد يدخل هنا.. اسمع صوته وهو يعيط اسيل اسيل احس موتي قرب كلش..
اجت كعدت .. صرفت البنات..
كالت:مأمون منو؟ هذا تامنين بي لولا؟ نخلي يدخل..إذا خايفه لاتواجهين!
هزيت راسي بأي.. باستني من راسي وكالت:اذا اذاج او هددج بس صيحي .. اني راح ابقى يم الباب..
لبست وطلعت..
دنكت راسي بين رجليه.. ماريد اشوف شي..
تمنيت اختفي ومحد يشوفني.. تمنيت افقد وعيي ومااعرف شراح يصير..
انفتح الباب وطلعت ام يوسف..
سمعتهه تكول هنا..
انسد الباب.. صوت خطوات قريبه دتوصل ميمي..
مااحس اله اديه انحطت ع اكتافي..
فزيت.. متت خوف.. عطت بلاوعي.. تخيلي راح يموتوني بهل لحظه
حضني اله.. مكنت مركزه شيحجي.. ولاركزت بنفسي شحجيت.. الي اذكره بقيت ابجي واشهك..
ماوعيت اله من كومني من مكاني..
كال:يله تحضري.. أنتِ من اليوم يمي محد راح يكدر يوصلج..
هزيت راسي بلا..
خزرني وكال:الي احجي يصير! ولتخافين مستحيل احد يأذيج! راح نرجع سوه!
-وهيثم؟
مراح يكدر يحجي شي.. عوفج منه ومن الناس كلها..
شويه ودخل الشيخ..
كال رفع اصبعه:ابني! اسيل امانه بركبتك! سمعت! اسيل امااانه!
كله:بالحفظ والصون.. لتخاف..
كال:راح ابقى وراهه واعرف اخبارهه! واذا عرفت انها تأذت راح اشتكي عليكم ! واني وعائلتي شهود ع اذيتكم الها!
نوب صاح.. ام يوسف.. جهزي البنيه..
باوعت اله.. ردته بس يباوعلي ويعرف شنو البعيوني..
بس ماشال راسه اصلا..
مأمون لزم ايدي..
عصرها حيل.. كانه يكولي لتخافين ..
بس شلون مااخاف.. وهذا المخبل المنتظرني..
طلعت من الغرفه.. كلها وصت مأمون بيه..
ام يوسف بوستني ودعتني وانطتني جنطتي الشردت بيهه وطلعت..
وصلت الكراج.. اشوف هيثم كبالي..
احس رجليه انتهت مكدرت اوكف عليها..
صرت ورا مأمون .. التفت الي وهمس:لاتخافين! امشي!
الشيخ وكف يم هيثم.. كله:امانه بركتبك اذا مسيتها! امانه سمعت!
هيثم بقى صافن بيه..
كانه ميسمع كلام الشيخ.. رجع الشيخ كال:احلفكم انتو الاثنين بداحي الباب اذا واحد منكم اذاهه! مأمون انته اذا كدهه لاتتركهه!
كله:مايحتاج توصي شيخ. رحم الله والديك ع رعايتك الها..
مأمون :يله اسيل..
مشيت خطوات.. قربنا من هيثم..
مااحس اله جر ايدي واني ورا مأمون ..
بحركه سريعه مأمون فلت ايدي منه ودفعه..
كله:كافي تتخبل! روح منا! انساهه! انسى عندك اخت!
هيثم:لج والله والله ماتخلصين مني! اني اعلمج!
الشيخ عاط:ابني رجعهه.. رجعهه انت ماتكدر تحميهه منه! رجعهه وروح!
مأمون :لا..اني موجود.. اقتله اذا فكر يلمسها!
احس روحي لعبه والناس تتحكم بيه..
هذا يجر وهذا يعر..
شي تريد تقتل وشي تريد تحمي..
زهكت.. اخذوهه لهل روح عاد..
فشلت بكلشي حتى من شردت مافلحت..
لكوني .. وهسه رايحه وياهم للموت برجلي..
ادري بمامون راح يحميني.. بس ميكدر عليه.. وبعد فيصل مناك.. هم اكيد راح يتخبل..
الشيخ كال:هيثم .. تعال يمي.. وخلهم يرحون..
هيثم تخبل.. كبل طلع من باب البيت..
طللعنا ورا..
صعد ليكدام .. فتحلي الباب  الي وره مأمون ..
صعدت .. كلي بهمس:لتخافين!
اباوع لهيثم.. داير وجهه عني للجامه..
الله اعلم شراح يسوي ..
اجه الشيخ وصاه بيه مره لخ.. مأمون سلم عليه ورحنا
تحركت السياره..
باوعت لبيت الشيخ.. بودي اصيحهم يجون ويايه يحموني..
مشينا مسافه.. كلها ساكته..
احس صوت دكات كلبي ينسمع..
مأمون لحظه والثانيه يباوعلي بالمرايه الاماميه..
خليت راسي ع الكشن الكدامي الكاعد بي مأمون .
مديت ايدي من جهه الي ميشوفني بيهه هيثم..
لزمت قميص مأمون .. شد ع ايدي ونزلهه يمه..
بقى لازمهه وهو يسوق..
دخت حيل بالطريق..
مادري شلون غفيت..
وكفت السياره..
اشوف هيثم نزل.. باوعت هذا بيت اهلي..شبسرعه وصلنا ماادري
عبالي راح يدخل البيت.. اشو هذا اجه اندار ع الباب مالتي..
جرني من السياره..'
كبل صرخت مامووووون!
احس ضربه هيثم الي فرت راسي..
مأمون جرني منه خلاني وره ظهره .. رجع هجم ع مأمون دفعه ..
جرني منه.. مثل اللعبه.. من ايد لايد..
مااشوف اله مأمون ضرب هيثم ع وجهه..
كله:كافي ! كله منك انت وصلتنا لهنا! يله فوت امشي جوه! يلللللله!
هيثم كبل رجع مأمون يريد يضربه.. مادري شلون لوه ايده ومنعه يضربه..
هيثم:عوف ايدي ! وخر اكلك!
مأمون :لتراويني وجهك بعد! افتهمت! كل هذا منك! انته السبب! يله !
دفعه عنه..
هيثم باوعلي:ولج اني اعلمج يااساقطه.. ضحك وكال لمامون .. ههههه صارلها بالشهر مدري وين ماوين! تلكى ولد الشيخ لعبو بيها وشمروهه الك! يركز بعيوني حيل ويكولي محد بيهم تزوجج متعه ها؟!
مأمون كبل طفر اله.. انطا بوكس ع وجهه..
جره جر للبيت وكله:انته واحد عار! لو بيك خير ماحجيت هيج! ولك هاي اختك ياسكط! دفعه داخل البيت وسد الباب..
باوعتله.. ميته خوف..
مااعرف رجليه شلون شايلتني..
وصل يمي.. خله ايده وره ضهري ومشاني خطوات..
كعدني ليكدام يمه..سد باب السياره ورجع صعد من جهته..
لزم ايدي..
كال:اووووف لج اوف. ليش هيج اسيل؟
برطمت.. دمعت عيوني..
كال:لاتبجين.. كافي.. من اليوم مااريد دموع سمعتي؟
هزيت راسي بأي..
شويه ودك التلفون..
كال هذا فيصل..
شمر التلفون ومجاوب..
رجع دك مره لخ..
كلت :رد..
كال:خلي يولي.. اكيد هذا البغل الجبير خابره وكله!
رجع دك مره ثالثه..
كلت:رد! بس افهم منه شيريد..
باوع بعيني وكال:لان أنتِ تردين!
فتح خط.. ها فيصل؟
صوت فيصل كان كلش واضح.. بحيث سمعت كل شي حجاه..
فيصل وهو يصيح..:مأمون! رجع اسيل! اني جاي! رجعهه احسن الك
مأمون بكل برود كله:اي خوش تدلل. شتريد بعد؟
فيصل:لك حيوان اكلك رجعهه اني هسه جاي!
مأمون :باحلامك! يله روح! مع السلامه حبيبي..
راد يسده اسمع فيصل عاط:ولك الحكك لو اطير انت وياهه! اني اعلمك..
مأمون:دووووولي! شمر التلفون ووكع..
حرك الكير..
اسمع صوت باب البيت انفتح..
التفتت.. اشوف هيثم لازم المسدس وموجهه علينا..
كبل عطت:مأمون راح يموتناااا!
التفت الي.. نوب باوع ورا...
احس روحي داشوف فلم ويمشي ع البطيء.. فقدت احساسي بكل شي.. بس عيون وتتحرك ..
التفت الي وصاح بسرعه..
دنكي راسج!
ويه ماحجى سمعت صوت الطلقات تضرب..
غمضت عيني خليت اديه ع اذاني ودنكت لجوه..
صرخت حيل.. لاااااااا...
اسمع الجام تفلش.. وره أكثر من طلقه سمعتها
الكزاز كام يطاير علينا
مأمون ماله صوت..
خفت التفت..
احس جسمي تبنج ع الوضعيه الكاعده بيهه وبس ارجف..
متجرأت التفت.. لحظات مرت.. واني ع نفس الوضع.. بس  الرجف مال صوتي والشهكات..
لحظات وكل صوت ماكو.. لا نفس لا حرف طلع من مأمون لا اي شي يدل ع انه انسان  كاعد بصفي..
واني مغمضه تهيألي شفت صوره مأمون مدمى ..
ماكنت اتجرء ارفع راسي..
وكل ثانيه تمر افرح نفسي واكول هسه راح اسمع صوته.. هسه راح يكلي اسولتي.. هسه يلزم ايدي..
يتبعالجزء الثاني والثلاثون ❤❤❤❤