غسل العار

بارت م̷ـــِْن 22 الی 24

قصة اليوم 💖💖💖💖
الاجزاء من 22 الى24

اسم القصة
غسل العار

الجزء الثاني والعشرون ❤❤❤❤

اسيل..
رجع هيثم... ويمكن قبل عليه ابقى بالبيت..
لان محد جاب طاريي ولا حجى ولا كال..
بقيت بالغرفه.. مزروف كلبي زرف ع مأمون ..
شلون راح انسى بس شلون..
بين لحظة وثانيه تنزل دمعتي..
تمنيت دوا نسيان.. اخذه وينتهي كلشي..
اكعد الكى نفسي ناسيه كل شي.. الماضي .. والايام السود كلها تنمحي..
يارب ساعدني.. كافي والله ملييييت..
ظليت بالغرفه مطلعت.. صارت ليل واني بالغرفه..
تعبت كد البجي والتفكير..
ها هسه زفو؟ راح جابهه؟ شلون لزم ايدها؟ اخ يمه..
كل شوي التفت للساعه..
واكعد افكر اكول هسه شسوو؟ وين كعد؟
كد ماتعبت غفيت..
مأمون ..
بعد مارجعنا للبيت اني وطالب.. كلها بدت تلوم بيه.. وين جنت وليش هيج تأخرت.. وووو
اني راسي مسطور.. كافي عليه السم الشربته..
صعدت الغرفه..
اباوع.. هنا وكفت اسيل البارحة.. هنا كعدتها.. هنا حضنتها.. من اوصل بذاكرتي لمن عطت عليها اكره نفسي..
شلون عطت عليها وبجيتها؟ هي عايزه..
اخ منج ياروحي!
شمرت نفسي ع الفراش.. رجليه بالكاع والباقي ع الجربايه..
اندك الباب .. صحت .. تعال..
دخلت رواء..
رواء:اجيبلك غدا؟
-لا.. بس جيبي جاي وبراسيتول..
رواء:هم رجعت لل....؟
-رواء اسكتي مني وسوي الكتلج علي .. يله لاتعبيني وتخليني احجي هوايه!
طلعت.. وره شويه اجت بيدها صينيه..
كوه شلت نفسي وكعدت ع حيلي..
كعدت بصفي وخلت الصينيه بحضنها..
انطتني لفه:هاك.. بيها جبن شوي مالح يلزم كلبك..
صفنت بيها:اني شسويت بنفسي وبيها؟
رواء:اووو.. هم رجعناا! تره مبقى وقت هم يله تاكل وتغسل وتبدل ونروح نجيب سجى! هاك اكل..
-ماريد.. اخذت الجاي وشربته.. نوب اخذت البراسيتول شربته..
رواء:موزين هيج تبقى! وجهك اصفر ومماكل شي من البارحه.. دكل هاي اللفه فدوة.. لخاطري..
اخذتها منها.. عضيت كم لكمة وعفتها..
رواء:احضرلك الحمام..
-اي..
طلعت.. رجعت مددت شويه..
اتمنى اسد عيني والكى كلشي راجع مثل اول.. لا خطبه ولا عرس..
اندكت الباب.. رواء صاحت يله الحمام جاهز..
رحت للحمام.. فتحت المي..
بقيت واكف جوه الدوش وايدي ع الحايط..مدنك راسي ..واذكر.... كلشي مريت بي بهل السنه ونص صار كبالي.. من اول لحظة حبيتها لاسيل.. لحد هل يوم..
طولت يله طلعت..
لبست البرنص وطلعت ..
رحت ع الغرفه.. نشفت شعري ورجعت مددت..
مالي حيل اي شي.. غفيت شويه..
وكعدت ع صوت دك الباب..
من مكاني وصحت تعال..
دخل فلاح..
فلاح:ها؟ شو نايم؟
-لعد الطم؟! بعد وقت!
فلاح:اي.. من يكملون الجماعه هم يخابرون علينا ونروح..
-خوش..
فلاح:يا سياره ازروقهه الك؟
-ميحتاج.. اي وحده اروح بيها..
فلاح:متكلي شبيك! البنيه بس تشوفك هيج تشرد! كلش زودتها! ندري بيك تحب وماخذتها بس الزم نفسك شويه!
-وشتريد اسوي يعني؟ بيدي هي؟
فلاح:حاول تبتسم ولا تكلب وجهك.. ابويه كام يحجي البارحة من عرف انت خليت اسيل تحنيك!
-وليش كلت اله؟!
فلاح:مو اني.. رواء..
رفعت ايدي باوعت للحنه.. اخ اصابعج اسيل اخ..
فلاح:يله كوم البس وتحضر.. كلشي يصير يجوز يكملون من وقت..
-اي هسه..
راح فلاح.. طلعت ملابسي..
لبست تراك سود ورجعت مددت..
شغلت الموبايل ع اغنيه سلامات.. حميد منصور..
(هاي الاغنيه لوحده كلش تحبها.. وخابصتنا بيها.. من راح تقره تعرف نفسها منو💔)
كملت الاغنيه.. باوعت للساعه.. صار وقت البس..
كمت لبست وعطرت وعدلت شعري سحبته..
اجه اوس..
اوس:ها.. كملت؟
-اي ماعندي شي..
اوس:رواء تكول ربع ساعه ويكملون.. نروح هسه؟
-مادري لتحاجيني بهل مواضيع..
اوس:يله تعال ..
-هسه..
نزلت وره شويه.. سلمت ع الموجودين..
من ضمنهم كان هيثم.. الوحيد الي ماسلمت علي هو..
دورت هواي ع اسيل.. مشفتها..
كانت بس حنان جايه..
الله يعين كلبها وكلبي..
شوية واجت رواء كالت كملت سجى..
طلعت.. لكيت طالب محضرلي سيارته..
اجه طبطب ع كتفي وضحك كال:هي وصاحبها فدوه الك تروح..
-حبيبي الله يعزك..(كلمة مشهورة من شخص  تحبها فد وحده😢)
انطاني السويج..
اجت رواء كعدت ويايه ليكدام..
وبقيه السيارات مااعرف منو بيها ومن الي راح ومنو الي بقى..
وصلنا لبيت اهل سجى..
دخلنا والهلاهل دوختني كلش.. انسطر راسي ولااكدر اسكتهم.. لاواحد واثنين يهلهلون..
دخلت الاستقبال.. كانت سجى كاعده ببدلتها ومدنكه راسهه..
من وصلت يمها وكفت..
لزمت ايدها وكعدتها وكعدت..
شفتها خزرتني كانو مقابله.. يمكن كانت منتظره ابوسها واخذها بالاحضان كدام العالم..
جابو كيك وكصينا.. ورادت تسوي فيكات مال وكلني واوكلك.. لزمت ايدها.. كلت الها عوفي من ايدج..
دنكت راسهه وسكتت..
كملنا هاي الاعراف مال اعراس..
لزمت ايدي وطلعنا من بيتهم..
رواء بصفي وكلش شوي وكالت:مصور.. تصوير.. صور البوم.. وكل شوي اكلها جوزي عاد .. مااروح !
صعدنا السيارة بوجهي للبيت..
دخلنا السياره جوه.. لان الهوسه برا..
وابويه ممقصر عازم الامه العربيه كلها..
هم جلبت بيدي.. وصلتها جوه.. كعدت يمها دقايق وطلعت..
لان كلش لعبت نفسي من التكمز والركص..
طلعت برا يم المعازيم.. وكل شوي واحد يسلم..
كلش طكت روحي.. مادري شلون تحملت..
من صار وقت العشا شويه هدأت العالم..
كمل العشا وصار الوقت الاسود..
دخلت جوه.. وبين هوسه ولد عمي واخواني واقاربنا..
داخ راسي..
صار وقت ادخل عليها..
ظلو ورايه لحد مادخلت الغرفه كلها تهلهل وتصفك..
ومدري شمالني وي الموت..
الناس تموت موت الله..
واني الكتلتني هلهوله💔
(منقول)
امها اخر الناس طلعت منها..
تباوعلي عبالك راح اكل بتها..
وصلت يمي كالت دير بالك عليها.. هاي العزيزه تره!
-ان شاء الله
ام سجى:تصبحون ع خير..
-وانتي من اهله..
خليت الستره ع الجربايه.. وكعدت..
سجى كانت كاعده ع كرسي ومدنكه..
فليت الربطه وشمرتها..
غيرت ملابسي.. وهي ع كعدتها..
كلت الها:كومي بدلي..
سجى:مو.. مو مااكدر افتحها وحدي..
-چچ! استغفر الله..
رحت يمها.. شعرها صاعد نص متر ليفوك.. وعبالك خشب صاير.. طلعت الها الطرحه والماشات..
اشرتلي ع ظهرها..
-شكو؟
سجى:السحاب مالوحه!
فتحته شويه الها ووخرت..
رحت مددت ع الفراش.. درت وجهي ع الجهه الثانيه الي مااشوفها بيها..
اسمعها تكحكح خفيف..
مهتميت الها.. بالي يم اسيل.. شنفكر هسه.. وشصار بيهه..
طفيت التيبلام الي يمي.. وكلت:اذا كملتي طفي الضوة..
شوية وطلت الضوه واجت بصفي..
متحركت ولا كدرت ادير عليها..
بقيت ع نومتي.. كد السهر مال البارحة مكدرت اكثر..
غفيت..
كعدت ع صوت طكطكه ..
كمت ع حيلي.. كانت سجى كاعده كبال المرايه وتعدل بنفسها..
كالت:صباح الخير..
-صباح النور..
عفتها وطلعت للحمام.. غسلت ونزلت جوه..
لكيت امي ورواء كاعدات ..
من شافني تفاجئن..
رواء هلهلت.. وامي همين..
امي:يمه ليش نزلت.. ومريتك وينها؟
-بقت فوك.. رواء جاي من يمج ..
رواء:تدلل يااحلى عريس..
تريكت.. وامي بس ادك يم راسي.. ليش عفتها وحدها وليش ماتتريكون سوا.. مجاوبتها مالي خلك..
عافتني وراحت..كملت وصعدت دابدل..
شفت امي كاعده يم سجى وتتهامس وياهه..
اكيد اجت تسألها عن البارحة.. الليله السودة..
من شافني علن صوتهن ..
ياا تعالي تريكي .. موزين تبقين بلا اكل وهل كلاوات الي متعبر عندي.. بدلت..
امي:وين رايح؟
-طالع.. عندي شغل..
امي:يااا صدك جذب؟ يمه دكعد لا تسمع بيك الناس!
سكتت..
اخذت سويج السياره وعفتهن وطلعت..
بقت تصيح ورايه.. مأمون ارجع راح يجون اهل سجى عيب ولك ميصير.. مارديت عليها..
اصلا مخنوك.. موكادر ابقى اكثر بالبيت..
يومين مريت بيهن مثل الحلم..
شجاب اسيل.. وشسويت اني..
شردت بنفسي من البيت.. وبدون شعور اخذتني رجليه ع بيت عمي.. وصلت هناك..
امتار بس.. هي الي تفصلنا..
اسيل جوه.. الله اعلم شحالها هسه..
بقيت كاعد بالسياره.. اراقب من بعيد لبعيد..
اخ لى بس اشوفج هسه.. ترد لي روحي..
طولت هناك.. التلفون يدك .. غلقته وشمرته..
خليت ورجعت للبيت..
لكيت ابويه وفلاح منتظريني..
ابويه:هاي سوايه تسويها! الله يسود وجهك! تجي العالم يشوفون بتهم مايلكوك!
-وشنو الي صار! لا تسويها قضيه! تكدر تكلهم عنده شغل!
ابويه:دمشيييي! بس القهر من وراك!
-هه من ورايه! لعد الي سويته بيه انت شتسمي؟!
فلاح:صوتك لاتسمع بنت الناس!
امي:والله خطيه عايفها شلون انطاك كلبك وجنها حمامه!
-يمه.. أنتِ السبب.. وكافي مااريد احجي واجرحج!
ابويه:بالله العظيم اذا ماتنعدل اطلعك منا بالجلاليق..
صرخت بوجهه:ايييييييه! هسه ع اساس كاتل نفسي ع شوفتكم!
فلاح:يابه كافي! هسه تسمع البنيه !
-وتسمع؟! منو الي كلها تجي! شافتني ميت بيها واجت؟!
ابويه:امشي اصعد الها.. واكسر شيطانك واسكت! احسن مااتصرف وياك غير تصرف..
-هه عود انت صدك مسمي نفسك ابو؟ لا وتريد اسمع كلامك! اكعد هنا كوم منا روح هناك!
ابويه:ولك انجب! دايح ابو النسوان ! لك ابو العرك! موزين مني وساكت الك لهسه!
-والله تعذرني ماطلعت عليك عالم دين!
عفته وصعدت..
اول مافتحت الباب لكيت سجى يم الباب ومخليه اديهه ع حلكها وتبجي..
عطت بيها:شبيج أنتِ الثانيه؟!
كامت تشهك وتكلي:انته متحبني ومجبور بيه؟ وانته تشرب وعندك نسوان؟
درت وجهي منها وكعدت ع الجربايه..
رجعت تعيط:احجيييي! اريد اسمع منك! اريد افهم هذا الكاله ابوك صدك مو؟
-اي.. بس اسكتي شويه!
سجى:ليش هيج.. اني بشنو اذيتك وهيج تسوي بيه! ليش تزوجتني اذا هيج! ليييييش!
صرخت بيها:كافي تعيطين! انلصمي عاد!
سجى:مأمون طلكني.. طلكني !
مددت درت وجهي منها..
سجى:مو احجي وياك! طلكني ! رجعني لاهلي!
ظلت تصرخ وتبجي.. هوايه حجت.. بالي مو يمها..
بس اكثر شي ظلت تصيح ليش ليش..
وهم اني اسأل نفسي ليش..؟
وماكو جواب.. تلاثه ادمرنا.. ع شنو وع ياذنب ماادري..
وره شويه اجت حضنتني من ظهري وهمست وهي تبجي: مأمون اني احبك.. لا تسوي بيه هيج.. شتريد اسويلك ..
لزمت ايدي .. بقيت صافن ع ايدها  البارده وهي تتحرك بيدي ..
شجاوبج.. وشحجيلج.. قابل راح تصيرين اسيل؟ لالا مستحيل..
سجى:مأمون ؟
-ها؟
سجى:تسمعني ؟ سمعت شنو كلت؟
-اي سمعت..
سجى:اني احبك..
-اي.. سمعتج..
سجى:اريد اصير مرتك من صدك..
بلامااقصد كلت الها:اسيل.. كافي!
اندارت كبالي وكالت:منو اسيل؟
-منو ؟
سجى:انت كلت اسيل!
-ها.. ماانتبهت..
سجى:هاي بنت عمك مو؟
-اي..وين تعرفيها؟
سجى:سامعه بيها وشايفتها كم مره.. زين ليش صحتني بأسمها؟!
-كلت الج ماانتبهت! وكافي تلحين!
سجى:ليش هيج تحجي ويايه!
-چچ! يرادلج خلك والله! افتهمي اني تعبان!
فتحت ايدي واجت خلت نفسها بحضني..
كوه تحملت وجودها.. كل ماترمش عيني تنعاد ليله اول البارحة.. من كانت اسيل بين اديه.. وشلون كنت فاقد وياهه.. عبالك الحركة تطلع مني لااراديا وياهه..
عكس سجى.. عقلي يكول سوي هيج.. خلي ايدك عليها..
بادلها الحضنه.. بس مااكدر.. جسمي يرفض..
خلت وجهه كبالي.. بقت مركزه بيه..
واني همات.. بس مداعرف ليش صافن بيها..
ردت ادور شي بيها يشبه اسيل..
ردت ادور وجه اسيل بيها..
ملكيت.. كلش تختلف..
نظرتها.. الكلام من تحجي.. حتى صفنه عيونها مو نفس اسيل..
بقت صافنه دقايق بوجهي . لحد ماملت وخلت راسهه ع صدري.. سرحت بعيد عنها.. نسيت انها نايمه ع ايدي وبحضني.. وكلعاده اخذني فكري يم اسيل..
انتبهت عليها انفاسها ثكلت.. باوعت الها نايمه..
بعدتها عني وسحبت ايدي.. مددت ع ظهري ..
منين ماادير الكاج كبالي يااسيل..
راح اتخبل يمكن..
اسيل..
من بقيت وحدي ليلة العرس.. نمت من وقت.. كعدت ع صوتهم من اجو..شوي شوي احس وجع بكل عظامي..
واطرافي ثلجت.. غطيت نفسي بأكثر من غطا مادفيت..
كمت ارجف.. عظامي اطكطك..
ولعبان نفس فضيع بالرغم مماكله شي..
مادري شلون غفيت.. ورجعت كعدت ع نفس الرجفه والوجع.. وهم شويه وكعدت..
ماادري شديصير ويايه.. حتى الصوت مااكدر اطلعه واصيح ع حنان تجيني.. للصبح اني هيج..كوابيس واحلام مزعجة.. كلها اشوف نفسي بيها اصرخ بس مايطلع مني صوت..
اخر الليل يله نمت شويه براحه.. وذبيت نفسي..
كعدت متأخرة.. نفسي لعبانه.. ووجع بكل جسمي كوه كدرت اوكف.. غلست ورحت اكلت لكمة..
كل لكمة ابلعها وذكر مأمون معدتي تكوم تكلب..
شوي واجت حنان.. ظلت تسولف بالعرس..
خنكتني خنك من بقت بس تحجي.. لااكدر اكلها اسكتي..
ولااكدر اسوي نفسي مااهتميت...
كوه خلصت نفسي منها ورحت للغرفه..
مددت بفراشي.. ياترى شلونك هسه.. وشدسوي..
مو كلبي ورم يربي كافي.. مداتحمل..
هنوب الخوف اكل كلبي لا صدك يرجعوني يم عزام واهله الزفت.. واذا رجعت هلمره لازم اخلص نفسي بنفسي..
لو قاتل لو مقتول..
اعيش بسجن ولا يم عزام وشوفه وجه..
كل مااذكر وجهه اعصب.. واذكر اليوم الي اخذ شرفي بي..
واذكر كل كلمة كالها عليه وطعن بشرفي..
احس نفسي قصرت ويا والمفروض اموته ع الي حجا بوقتها..
مأمون ..
بعد ايام.. من الزواج المشؤوم.. مكدرت اتقبل سجى بأي شكل.. وظل زواجنه بس كدام العالم.. وبينا ماكو اي شي صار.. هي ياما توددت.. وياما اتصلت وكالت انتظرك..
وياما كشخت.. بس مكدرت..
كل مااكول لنفسي اليوم اروح الها..تصير اسيل كبالي..
اهلي ميعرفون بهل شي.. واهلها يجوز اي ويجوز لا..
بس الي خبل اهلي هو طلعاتي الزايده..
طبعا قدر الامكان كنت لازم نفسي ومااقضي البيت برا..
وهي يادوب طلعه النهار للمجمع لو ساعه زمان يم طالب والكه الدنيا مكلوبه بالبيت..
ابويه يحجي لحد مايمل.. وامي متخبله ع سجى..
مرات اشوفها تحبها اكثر من رواء..
كعدت بيني وبين نفسي..
اني الشنو المخليني ساكت لهسه؟ وليش حتى اصبر ع هذا الوضع.. خلص هاي بالشهر متزوج ومكدرت اتقبل سجى.. وغير اسيل مراح تكون زوجة الي..
كان لازم اخلصها.. من زوجها الكلب عزام..
فرجعت اراقب بيتهم.. الي زادني قهر .. هو عدي..
يمشي ع طوله وكل شويه طاب وطالع..
اما عزام من كنت اشوفه نار وتشتعل بيه..
وانتظرت الفرصه.. لحتى صارت..
راقبته ايام.. لحد ماعرفت اقرب اصدقاءه منو..
وسألت اكثربدائرته..
وعرفت ازاد صديقه..
وايام واني اخطط شلون التقي بي.. فكان احسن حل اروحله للدائرة.. ورحت اله..
استغرب مني لان ميعرفني.. بعد السلام والتعارف
كلت اله اريد احجي وياك بشغله تعال برا..
اول شي خاف مني وتردد.. كال اخي عندك شي كوله هنا..
طمنته.. وكلت اله لتخاف.. شي مو متعلق بيك.. رايدك واسطه خير ان شاء الله..
سمع هيج يله طلع.. وبقى خايف ويتلفت ..
كلت اله:رايد منك خدمه.. توصل هل كلمتين لصديقك عزام..
ازاد:عزام؟ وين تعرفه؟ اخي انت شرايد بالضبط؟!
-كوله يطلك بأسرع وقت.. واذا ماسواهه راح يندم وهواي..
ازاد:هذا تهديد لو شنو؟ وليش ماتروح اله بنفسك تحجيله!
-اسباب هوايه تمنعني.. بس اذا حاول يلعب وياي مايلوم اله نفسه..
ازاد:وهسه المطلوب مني شنو؟
-توصل اله هل كلام.. يطلك وبأسرع مايمكن..
ازاد:زين اكوله منو ؟؟
-الي يعجبك.. كوله.. المهم توصله..
ازاد:خير ان شاء الله.. اليوم احجي ويا..
-خوش.. يله.. في امان الله..
ازاد:هلا بيك..
درت وجهي ورحت للمجمع..
وساعات وايام انتظر اليوم الي اسمع بي خبر طلاك اسيل..
وماكو خبر..
وعلمود هل شي انجبرت ارجع علاقتي بفيصل وهيثم..
بس حتى اسمع اخبار اسيل واكدر اروح هناك..
بس مصار مثل مااريد..
ومحد جاب خبر .. اضطريت ارجع لازاد مره لخ..
سألته اذا خبر عزام.. فكال اني سويت العليه.. وخبرته بنفس اليوم.. بس هو رافض يطلك.. وهذا شي راجعله واني مالي علاقه.. طبطبت ع كتفه..
-شكرا ماقصرت.. مع السلامة.
حسيت نار وسرت بجسمي كله..
بودي اشوفه هسه كبالي وافلش وجهه..
وميكفيني ولا يشبع كلبي بي..
انتظرته بيوم اني وطالب ...طلع من بيته الصبح.. قبل لايصعد السيارة..
نزلت اني .. رحت يمه..
كوه متحمل ماالزمه ادكه دكه زينه..
كلت اله:ممكن دقيقه احجي وياك؟
كال:منو انته؟ شتريد؟
-هه ..
طالب:شوف اصعد احسن الك.. يله ويانه يله!
خليت المسدس الي دبره طالب اليه بخصره..
كلت اله:يله بسرعه..
مشى كدامنه للسياره.. كعد ليوره .. انطيت السويج لطالب هو يسوق.. جريت التلفون منه سديته وخليته بجيبي..
كال:اني وين شايفك؟ منو انته وشتريد؟
-هسه تعرف لا تستعجل..
وصلنا ع بيت لاهل طالب ..
نزلنا.. وهنا بعد ماكو شي يمنعني منه.. اول مادخلته..
صفنت بي.. سديت ايدي حيل.. وبحركه كلب وقهر اسيل ضربته ع وجهه..
كبل تحرك راد يرجع يضرب.. لزمه طالب من اديه وشبكه اله..
انطيته بوكس لخ.. كلت اله:هسه اعرفك اني منو..
تعرف اسيل مو؟ تعرفهاااا؟! تعرف الي دمرتها مو؟
ضربته بوكس لخ.. هاي لدموع اسيل..
انطيته الثاني.. وهاي لضربك الضربتهه..
الثالث..هاي لكل لحظة انقهرت بيها اسيل..
الرابع هاي لكل كلمة كلتها الها
طالب:مأمون كافي راح يموت! ولك وجهه تفلش!
-عوفني اموته واخلص اسيل منه!
طالب:كافي عوفه.. اجينا نفرك اذنه ونخلي يطلك مو تموته!
وعيت ع نفسي.. عفته.. طالب ترك اديه..
كبل وكع للكاع.. وجهه انترس دم مينعرف منين طالع..
دنكت يمه:همزين ماطلكت من اول مرة.. حتى اضوكك الشفته هسه!
كال وهو كوه يجر نفسه ..لوتموت مااطلكها.. اخليها معلكه..
لزمته من شعره رفعت راسه عن الكاع:راح اطلك..واذا مطلكت .. عندك خوش اخت شابه حليوه..
كبل كعد ع حيله يريد يضرب.. لزمته من ايده..
-اكسرها الك.. افتهمت! يله خابر هيثم وكله طلكتها..
طالب :انت اختار.. اطلك وينتهي كلشي لو نموتك واختك نفكرلها بمصيبه! شتكول؟ منو الاحسن؟
هز راسه اي.. متوقعته بسرعه راح يقبل.
ولو هو الجبان شيطلع منه..
اخذه طالب غسل وجهه.. وانطاه مي..
وره مااستعدل شوي .. طلعت اله تلفونه..
كال ماتصل بهيثم.. اخابر اختي اليمهم..
-خوش حجي..
يتبع