غسل العار

البارت م̷ـــِْن 19الی 21

اسيل..
من شفته.. احس كل جسمي مات.. وبقيت بس بكلب ينبض وعيون تباوع.. طلع واشوف الكل بقى يتصفن بيه.. مسحت دموعي ورجعت كعدت يم حنان.. بس مكدرت استقر..
ساعات واني مثل العوبه افتر.. مااعرف شسوي..
دخت وانسطرت واثوليت من شفته..
يبو عليه.. شجابني شورطني..
دعيت الله يعديلي هل يوم سلامات ..
صار وقت العشا.. وبدت كلها تاكل.. اله اني .. اتخيل روحي اذا خليت لكمة راح اتقيء ومراح اكدر ابلع.. اريد بس اكوم من مكاني..
حنان بصفي همست كالت اكلي لا تخلين العين عليج!
مديت ايدي.. بلاوعي خليت الاكل حلكي..
لكمه وحده بس.. والباقي سويت نفسي داكل..
وره شويه ام سلام كاعده كبالي.. كالت:اكلج شلونهم عيالج وياج؟
كأن اني ناقصه حتى تذكرني..
كلت الها:زينين ..
كالت:صدك بيتج وحدج؟
-اي..
كالت:اي احسلج.. وين لاكيتهه ههههه..
عود سوتها بشقه وهي ترفع وتكبس ..
كوه تحملت وجودي بنصهن.. ياريت لو باقيه بأي مكان ولا جايه.. كملو العشا وبدت سالفه الغسل والهوسه..
اني بقيت يم حنان متحركت..
اشو شويه وحنان هي كامت تشتغل..
كالت تعالي ورايه خل نكمل وياهم خطيه..
بلشنا نلملم الهوسه ونغسل.. شويه وبده صوت المطرب.. يضبط الصوت .. نوب يكول الو.. نوب يكول صلو ع محمد..كلها انجنت..
خاصه البنات الشابات الموجودات..
كلها كامت تكمز ويردن يشوفن الحفله..
كملنا المواعين ع السريع وبقت الهوسه..
كلها صعدت فوك.. اني بقيت اغسل..
اصلا مااريد اشوف شديصير برا.. كافي عليه اتخيله..
شويه ومااحس اله انرفعت البرده الي مخليها لباب المطبخ حتى مننشاف اذا احد فتح الباب..
باوعت.. هذا مأمون كبالي..
جمدت بمكاني.. يربي كافي.. مااتحمل هيج..
ظل يباوعلي.. نظره جامده.. بيها نوع من العتب..
تالي خله وصعد.. بقيت اباوع ورا بلا وعي..
شويه ونزل بيده تلفونه..
هم باوعلي بنفس النظره وطلع..
نص عمري ضاع بنظراته...
شوي وبده المغني يغني..
اجت حنان.. كالت ولج تعاي شوفي الحفله!
-مااصعد!
حنان:تعاي! كلها تكول اسيل ليش ماصعدت!
دنحجي وطلعن ام فلاح وام سلام ونسوان كبار من الصاله..
كالن احنا راح نباوع من بعيد..
ام فلاح ترد عليها:ههههه منو يباوع النا.. هي حفله بس شباب واحنا رايحات خرده!
ام سلام:ههههه والله صدك..
ضجت من شفتهن.. بس امي غابت منهن.. وراحت بعمر مو مال موت.. بس ولو ع شنو تكون حاضره بهل يوم..
ع ضيم كلبي..
طلعن هنه وشلتهن..
وحنان رجعت كالت:يله تعالي!
عفت المواعين وغسلت ايدي وصعدت وياهه..
احس روحي اختنك.. واني اباوع ع البيبان مال غرف..
ياترى ياغرفه منهن صارت مالته..
وصلنا يم غرفه اوس.. كانت الكل واكفه يم الشباك ماكو مكان نوكف اصلا.. وشي صايره بالنص تركص..
وشي ع صفحة تسولف..
حنان همست:تعالي...
رحت وراهه.. فتحت الغرفه الي بصف غرفه اوس..
كانت مبينه مال عرسان.. جديده..وبيها فرشه كلش حلوه.. البردة لون ابيض وجواهه تول كلش حلو همات ابيض مطعم..
.. وكفت يم الباب وانقبضت روحي..
مكدرت ادخل.. اباوع يم الشباك بس رواء واكفه..
التفت لحنان وكالت:ها اجيتو هنا؟
حنان:ههههه اي والله ماكو مكان نشوف.. رجعت صاحت تعاي اسيل شبيج؟!
رواء ظلت تباوعلي من فوك لجوه..
ماردت ابين شي.. ابتسمت واتقدمت ..
امشي وعيني ع دشداشه سوده وغتره مصفطه ع الفراش..
اخ.. لوما اليمي.. كنت شمرت نفسي عليهن..
اكيد بيهن لمسه ايده وعطره..
باوعت من الشباك.. كلها الشباب تترادح بالحديقه..
وحديقتهم كلش كبيره.. وهاي الغرفه والي بصفها مال اوس جايه شبابيكها ع الشارع والحديقه..
اباوع مشفت مأمون .. يمكن الكراسي الي صايرات جوانه مباشره بحيث منكدر نشوف..
مليت واني اباوع للناس وهي تركص.. وحنان ورواء دك سوالف..
بين لحظه والثانيه التفت اشوف الغرفه.. ملابسه.. الفراش.. عطره الي ع ميز تواليت.. كل نظره املي عيني بشوفه شي اله..
صفنت ع الي يركصون..
سمعت الباب انفتح..
درت وجهي كان مأمون .. من شافني ماانطه اي تعبير ع وجهه.. بس كال:اطلعو..
تحركنا.. اول وحده رواء .. وراهه حنان نوب اني..
وصلت قريب منه كال أنتِ ابقي!
وكفت بمكاني.. حنان رجعت كم خطوه..
كال:الكل يطلع.. بس أنتِ ابقي!
حنان:لا ع بختك!
رجع كال:أنتِ روحي!
رواء رجعت :مأمون شجاك! لاتفضحنا!
كلها:اطلعي وسدي الباب وراج! لتخافين متنفضحين!
رادت تحجي كبل عاط:كتلج اطلعي وسدي الباب!
بقيت اباوع عليهن وهن ديطلعن.. ظلت حنان ع اخر لحظه ماده راسهه من الباب تباوعلي..
صاح :كلت الباب سدو!
كبل سدنه..
دنكت راسي للكاع..احس جسمي كب نار..
تقرب مني.. صرت اشوف رجليه قريبه عليه..
رفع راسي بأصبعه .. صفنت بعيونه. ضاع كل الحجي.. وضاعات كل الامنيات الي تمنيت اسويها من اشوفه..
كال:ليش؟
برطمت وبجيت.. متحملت بعد..
مأمون :كوليلي ليش؟!
ضميت وجهي بأثنين اديه حتى ميشوفني:مو بيدي!
بعد اديه عن وجهي وكال:مرتاحه ويا؟
عوجت حواجبي! شنو هل سوال الي ديسأله؟!
رجع عاد:مرتاحه ويا؟! جاوبي؟!
-لا! عفته صار شهرين!
مأمون :شنو؟ وين جنتي لعد!
حسيته ميعرف بيه وبالمشكله السويتها.. هنا سولفت اله كلشي طبعا كنت كوه احجي من البجي والعبرات الي صارت بصدري .. من اذكر ذيج الايام اختنك.. مو اله واني كباله واحجي..
جر اديه اله اثنيهن.. حضني حيل وهمس يم اذني:ياروحي أنتِ..
مكدرت ابعده.. عبالك جسمي ذاب بين اديه..
سحبني يم الجربايه.. كعد وخلاني ع رجله..
ايده ع ظهري والثانيه مسح بيها دموعي..
مأمون :اششش.. كافي دموع.. راح يطلكج.. وراح تكونين مرتي..!
-لاا. مااكدر..
مأمون :ليش!
-مااكدر! ومااريد!
وخرني عنه وكام كبالي:شنو؟ يعني بطلتي تحبيني؟ واني الي اكول مو اسيل التخون!
بقيت ساكته..
رجع عاط:ولج احجي شي! ولج انطقي! كولي اريدك! كولي عوف كل هذا الدسوي واخذني! ولج اني اخلصج منهم كلهم!
-مااكدر!
لزم وجهي باثنين ادي وكلي :ليش متكدرين؟ اني موجود! محد راح يأذيج!
دنكت وكلت:اني متزوجة! وانت همين!
مااحس اله اندفعت دفعه قويه وكعت ع الفراش..
عاط :لج يازواج هذا! هاي مهزله! هاي لعبه سووها بينا! لج اصحي عاد هذا مو زواااااج! مااريد غيرج ومااحب من بعدج ابد! بس كولي اني مااريدك وماحبيتك اي اصدك!
سمعته بده يضرب بالكنتور..
اني مكدرت اشيل راسي.. احس كل جسمي تبنج..
خليت اديه ع وجهي وكعت ع ظهري وبجيت حسرات ووجع..
صحت:والله احبك! متدري شكد احتاجيتك! متدري شكد حلمت بيك! متدري شكد صحت اسمك وتخيلتك كبالي!
واني دااحجي.. اجه بصفي.. تمدد ع الفراش وضمني حيل..
كال:اني اسف.. بس أنتِ عصبتيني!
جلبت نفسي بي حيل.. حضني اقوى..
دفنت راسي بصدره.. هنا وطني.. هنا اهلي وهنا كل حياتي..
بده ينثر بوساته ع راسي..
وخر شالي .. وبده يخلي اصابعه بين شعري..
جلدي يكزبر ويه كل لمسه منه..وجسمي ينشل اكثر..
همس يم اذني:تتخيلين حياتي من بعدج شنو..؟ لج اسيل محد كدرت تاخذ مكانج!
بقيت ساكته..
رفع راسي من صدره.. خله وجهي كباله..
مسح دموعي.. ومشه ابهامه ع كل وجهي.. ع وجناتي ع عيوني ع شفايفي.. رجفت.. وغمضت عيني..
مااحس اله شفته ع شفتي..
مكدرت اقاوم ولا حتى اكول لا.. صح حرام الداسوي.. ولا يحقلي.. لاني ع ذمة شخص ثاني.. ومن جهة ساعات وتجي غيري تنام ويا طول بطول هاي النومه..
بس .. هذا مأمون .. يعني روحي.. مااكدرت..
حسيت انفاسه ترجف..
ضمني اله حيل .. بحيث صار كل جسمي ع جسمه..
نوب كلب عليه وصار فوكي..
فتحت عيني.. شفته مغمض عينه.. وشفته بعدها ع شفتي..
حسيته بده يفقد السيطره ع نفسه..
كوه بعدت وجهي عنه كلت:كافي.. خل اروح!
همس يم اذني:مااخليج.. اليوم أنتِ مرتي.. وهذا عرسنا!
-مأمون! لا تتخبل!
حاولت ارفع نفسي منه مكدرت..
عطت بي:وخررر! كافي! اني متزوجة! شنو نسيت؟!
ابتعد عني.. كمت من مكاني..
احس رجليه كوه شايلتني.. كل جسمي يرجف..
باوعتله كان مخلي ايده ع لحيته وداير وجهه..
اخذت شالي من ع الفراش..
مااحس اله جرني جر وانركع ظهري بالكنتور.. خله اديه اثنينهن علي.. باوع بعيوني.. كان صاير نار..
كال:زوجج اخلي جوه قندرتي ! سمعتي! اخلي جوه قندرتي راح يطلكج واخذج غصبا عنه وعنج!
غمضت عيني حيل.. خفت منه..
اول مره يعصب عليه هيج..
ركع الكنتور بيده.. فزيت..
باوعت بعينه.. كبل اخذت شالي وطلعت..
وين انطي وجهي؟ احسن شي اروح للحمام..
رحت اركض للحمام..
دخلت.. احس كلبي راد يوكف ودموعي كوه لازمتها..
غسلت وجهي.. ومسحت من الكحل الي بده يسيل..
والحمره اصلا راحت..
شسوي وارتاح؟ وين اولي؟
اخ اخ..
اخذت نفس.. وكلت.اني بعدني قويه.. محد راح يهزني.. لا مأمون ولا غيره.. هو رجال متزوج واني همين..
طلعت من الحمام.. شفت حنان بوجهي..
عيونها تسأل قبل لسانها..
كالت:ها؟ شحجى وياج! ليش عيونج مورمه؟ شكلج!
-ماحجينا شي.. عوفيني..
عفتها ونزلت جوه.. كعدت بالصاله..
بكل مكان اشوف مأمون .. هنا كعد وهنا اكل وهنا ضحك..
هه لا ومصدكه روحي من اكول اني قويه وراح انسى!
بقيت صافنه وحدي..
كلها فوك.. والنسوان الكبار برا..
عن الله اثنين كاعدات بغرفه عمي..
شويه واسمع صوت هلاهل فوك..
عرفت مأمون طلع.. شويه ونزل من الدرج..
لابس الدشداشه .. ولاف الشماغ.. يابه.. انت بغير هيج وهيج روحي مذوبها.. هنوب هيج.. شيصبرج ياروح..
ظليت عيوني علي..
وهو هم.. كان كلش جامد بنظرته.. وبيها شويه غضب..
الي وراه يصفكن ويهلهلن..
لحد ماوصل الباب واختفى عن عيني يله نزلت راسي..
احس روحي بديت اختنك..
ساعات مرت.. صوت الهلاهل.. الصفكات..
المطرب.. الموسيقى... احسها هوسه..
شويه وسكت المطرب.. همزين.. خل اريح راسي عاد..
وره شويه صاحن علينا بالمطبخ يردون جاي..
رحنا الكم وحده الباقيات جوه..
سوينا الجاي وحضرنا. وكالو حضرو صينيه الحنه ..
اخ.. روحي رادت تطلع.. مادري شنو الصبر والقوه العندي..
وتحملت..
جابن الصينيه من غرفة امه.. الورد.. والحنه.. وجكليت وبياضات بيها.. شوفتها تخنك..
اخذوها وراحو..
وبده المطرب يغني موال..
ع البطيء.. والحان تكطع الكلب..
اخ يمه. من يجرها ويكول يمااااا..
بدون ماادري بنفسي خليت ايدي ع صدري وصحت ولج يمه.. نوب هل غنى زاد وحشتي وغربتي..
بحيث تخبلت واني اسمعه.. كمت افتر بالبيت وابجي علني كدام الناس.. متحملت اكثر..
عبالك شي ديطلع مني ونشلع..
امشي واكول يمه..
مادري منين التمت الناس عليه.. وحنان لازمه اديه وتهز بيه ولج شبيج؟
اني بس اشهك واكول يمه.. مكدرت احجي..
اسمعها تكول للنسوان مبيها شي بس اذكرت امها..
جرتني للحمام.
كالت:بيج ثول؟ اغسلي وجهج واسكتي كافي..
مكدرت اسكت.. واني اسمع الصوت مال اغنيه وكل شوي وصاح يماا..
لمن بدت الدكه مال جوبي يله هديت شويه..
كلت لحنان.. بسرعه خل نرجع مااتحمل بعد..
كالت:هااا؟ شكالج؟ خبلج موو؟
-فدوة صيحي عليهم خل نروح..
حنان:اي هسه هسه! بس شويه ونروح!
-مااكدر ابقى بعد! بسرعه فدوة!
طلعنا من الحمام.. كلها تباوع بوجهي وتتهامس بينها..
دنكت ومشيت .. كعدت ع صفحة..
احس العيون كلها عليه ودتاكلني اكل بنظراتهم..
كمت للمطبخ.. حاولت الكى اي شي التهي بي..
شويه ودخل فلاح.. كان لونه مخطوف.. كال لرواء وهي كانت تفتر بالمطبخ يمي..
فلاح:هذا اخوج ماقبل يخلي الحنه!
رواء:شنو؟ ليش؟ يااا
فلاح:مادري والله خبلنا ميقبل !
رواء:صيحه.. خل امي تحجي ويا!
فلاح:اكلج ميقبل! صار ساعه نتوسل بي!
رواء:صيحه.. بلكي يقتنع!
فلاح:هسه..
بقيت بالمطبخ.. ردت اشوف عيونه مره لخ.. وبالاخص وهو يخلي الحنة..
دخل هو وفلاح..
مأمون :خير؟
رواء:مأمون ليش هيج؟ بكل شي لازم تطلع النا صفح! دخلي فدوة! عيب ميصير!
فلاح:والله عجيب انته!
رواء:راح اصيح امي..
مأمون صاح:تعالي! ميحتاج! راح اخلي!
ع السريع جابو الحنه..
رواء جرت ايده.. هو كبل جرها كلها:لا مو أنتِ..
مد ايده كبالي وكال:هاج. أنتِ خليها!
كمت ابلع بريكي وبهتت..
كال:يله! شنو خايفه!
ظل يباوعلي وهو فاتح عيونه حيل.. التفتت لفلاح ورواء.. كانو متعجبين منه..
فلاح:شبيك مأمون ؟
مأمون :معليك.. يله اسيل.. اذا مو أنتِ مااخلي الحنه!
انطتني رواء الحنه.. كالت بنتر:يله ست اسيل!
اخذت شويه .. اشوف ايدي دترجف..
بكلبي اكله ليش هيج تسوي بيه..
ليش هيج .. عايزه اني حتى تخليني بهيج موقف!
لزمت ايده من جوه..
وخليت باصبعي.. مال ايدي الخ الحنه بديت احرك بيهه ع شكل دائرة..
بدت دموعي تصب .. دنكت راسي حتى مااشوف وجه احد.. بس ايده اشوفها..
فلاح كال:يله كافي.. جيبي الوصله رواء..
انطته الوصله البيضه..
مأمون:لا .. اسيل تخليها..
فلاح:كافي! مجاي تشوفها؟! راح تموتها! روحي اسيل جوه..
مصدكت .. كبل مسحت دموعي ورحت جوه..
كعدت انتظر حنان شوكت تفرجها عليه وتكول يله..
مأمون ..
طول الحفله اني كاعد ع جمر .. ممرتاح ومزعوج كلش..
ردت تنتهي بسرعه واكون لحالي.. نوب جابو الحنه..
انجنيت اكثر.. مقبلت.. وشكد حجو.. يله خلي وميصير..
بعدين صاحني فلاح..
من دخلت وشفت اسيل.. ردت هي تخليها الي..
مادري شنو خطرلي بلحظتها.. بس ردت بأيدها الصغيره هي تخليها.. واشوف عيونها ورد فعلها من تخليها..
وتقريبا اني ردت اعصبها.. لان كلش نرفزتني..
وضجت اكثر واكثر ...
بدت تخليها واني اشوف دموعها .. كلبي انمرد عليها..
وماردت توخر بنفس الوقت..
صح كنت قاسي وياهه.. بس ماعرف شلون اتصرف من هي موجودة..
عاد فلاح كمل المهمه مال حنه الزفت..
لفيت ايدي ورجعت برا..
طلعت روحي.. ساعات واني كاعد بس عقلي بعالم ثاني..
اجه ابن هيثم.. كله بابا .. امي تكول يله خل نروح..
كله:خل يتحضرون..
راح الطفل يركض.. اني لزمت كلبي بيدي ..
هاي راح تطلع اسيل.. ومااعرف شوكت راح اشوفها مره لخ..
طلعو.. وعيني عليهم.. مخلتني اشوف وجهه بعد..
كان صديقي طالب موجود..
صحته اجه يمي.. شاورته كتله:خل نطلع منا بسرعه.. بعد مااتحمل..
هز راسه وكال هسه..
شويه ورجعلي .. كال يله كوم..
فلاح صاح ورانه وين؟
طالب:هسه شوي وراجعين..
طلعنا ..
كلت اله:بسرعه ابتعد منا.. عقلي راح يوكف..
كال:اوف منك.. الحفله كلها عيني عليك.
رجعت راسي ع الكشن وغمضت عيني..
اخرب كلشي.. هذا اخر حل.. وسجى اعوضها شكد متريد فلوس..
وصلنا لبيت من بيوت اهل طالب.. نزلنا..
كال:تريد اخابرلك ع وحدة تونسك!
هزيت ايدي بلا..
كعدنا بالصاله..
طلع الشرب.. كلت اله.. ماريد..
طالب:محد يريح بالك اله هذا! لا اهل ولا نسوان.. هذا وبس..
-صب..
انطاني كلاص.. وشغل اغاني .. كلت اله خلي صغيرون يابعد اهلنا..
شغلها .. اسمعها وافقد اكثر..
عيونها متغيب من بالي.. دمعتها.. لمسه اديها.. بوستها..
اخ يابه.. شلوون اكدر شلون..
طالب:بعدك تحبها؟
-هه ليش ناسيها اني؟!
طالب:باجر عرسك يول؟!
-مراح يصير..
طالب:لااااا.. حرام عليك! ليش لعد خطبت! شراح تكول الناس ع بنيه خطيه!
-شسوي؟ بس كلي شسوي؟ والله تعبت!
طالب:يعني شتسوي؟ اتزوج ! عسى ولعل تكدر تنسى!
-هه.. مستحيل... اسيل هنااا! اشرت ع كلبي.. تعرف شنو يعني هنا؟!
طالب:الله يساعدك..
سكتنا.. وبس نشرب والاغنيه تخلص ونرجع نعيدها..
لحد مافقدت كلش.. ونمت بمكاني ع الكاع..
كعدنا بوقت متأخر كلش..
طالب:لك ساعه 12!
-اخ.. مداكدر اشيل راسي ولك!
طالب:اني هم.. بس عرسك اليوم ولك! كوم بسرعه!
-ياعرس هذا! يمعود بطلت!
طالب:لا لالا! لا تصير نذل لهدرجة! ولك انت عاقد شلون هيج! كوم بسرعه كوم!
كمت:وكع الفاس براس..
طالب:ديله.. اكيد هسه اهلك خبصو الجو.. تلفونك وينه؟ شوفه؟!
فتحته:اووو.. الامه مكلوبه.. عبالهم متت يمكن..
طالب:بسرعه خل نروح الهم..
طلعنا بسرعه للبيت.. لكيت ابويه واكف بالباب..
اول ماشافني:انته وتالي وياك! هاي سالفه تسويها! فوت جوه يله!
اسيل..
بعد ماطلعنا منهم.. دخلت الغرفه وقفلتها عليه..
كل موقف وكل نظره منه شيبت راسي.. لااكدر انسى.. لااكدر اكعد ولا انام.. يوم امر من المر..
مادري شلون خلص.. لوجه الصبح اني كاعده..
واكول كلها كم ساعه ويتزوج.. يمه شلون بيه شلون..
لمساته بعدهه بيه.. ليش اني جبانه.. ليش زعلته مني..
اني غبيه.. وجبانه..
بس شكدر اسوي اذا اخويه هيثم!!
الصبح كعدت.. هيثم صاير هو ابو العرس.. كال لحنان اني اروح هسه والعصر اجي اخذكم..
قررت لو شنو يصير مااروح.. لوادري يكطعني..
كافي عليه الشفته البارحه..
ومرت الساعات..
حنان كل شوي جايتني .. شحجى وياج مأمون.. شكلتيله. وليش بقيتي تبجين؟
مانطيت جواب.. ولا حجيت ع شي ابد..
كلت الها ماكو شي ينحجي بي.. راح وانتهى..
كالت تحضري نروح .. كلت الها مستحيل..
لو يموتني مااروح..
كولي اله مريضه مااكدر تطلع منا لهنا..
حنان:بكيفج.. هاي اذا اقتنع..
-أنتِ قنعي.. تعرفين شلون!
حنان:اكلج.. شو عيالج محد جاب طاريج!
-والله مادري.. أنتِ اعرف!
حنان:هاي الحيه مرت فيصل متتحاجه جان سألتهه!
-كطيعه التكطعهه هي واهلهه..
حنان:يله اذا تردين غده كومي سوي.. اني مااشتهي..
-هم ماريد.. راح انام..
حنان:خوش..
يتبع