غسل العار

البارت م̷ـــِْن 19الی 21

قصة اليوم 💖💖💖💖💖
الاجزاء 19 الى 21

اسم القصة
غسل العار

الجزء التاسع عشر ❤❤❤❤

مأمون ..
طلعت امي من العمليه.. والدكتور طمنا عن حالتها..
وكال تبقى تحت المراقبه منكدر نطلعها..اسبوع او اكثر حسب وضعها..
اني رجعت للبيت.. وفلاح وابويه هم قبلي راجعين..
بقو يمها اوس ورواء..
كان البيت وحشه وهدوء يقبض الروح..
صح الطبيب مطمنا ع وضعها بس خايفين عليها..
طول هل ايام كنا نتناوب عليها.. ورواء كانت اكثر وحدة تبقى يمها..
طبعا صحت امي وضعها زين ومستقر..
بس بعد مراقبين خاف الزرع ينرفض من جسمها..
اسبوعين تقريبا يله طلعناهه..
كانت حالتها احسن بهوايه..
من طلعناهه احتاجت عنايه كبيرة.. لان الطبيب كال مناعتها تقل بعد العمليه من الادويه الي تاخذها..
كان الي يجي يزورها من الباب ويطلع..
محد يكدر يدخل الها غير رواء اكثر شي واحنا..
من ضمن الي اجو.. كان عمي وهيثم وحنان..
مادري شلون تحملت وجودهم ..
من شفتهم احس الحرارة صعدت لراسي..
مكدرت ابقى بالبيت واسمع صوت هيثم وهو يسولف و يضحك..حسيته جاي حتى يشاكسني اكثر مما جاي ع شوفة امي..
بقيت ادخن برا. وهم ماطولو.. شوي وطلعو..
باوعت الهم بأستهزاء..
هيثم ردهه ابتسامه الي.. كأنه ديكولي غصبا عليك سويتها.!
انجنيت من شوفته.. حسيت ابليس واكف كبالي مو ابن عمي.. طلعو وحتى سلام مسلمت عليهم..
دخلت للبيت صار بوجهي ابويه..
-هذا اخوك الساقط لا يجي بعد! شجايبه هنا؟؟
ابوي:احجي عدل! جاي يشوف امك!
-هه جاي .... استغفر الله.. خليني ساكت يابه..
ابوي:وتالي؟ نظل نفتح دفاتر قديمه؟
-لا حشى! اخوك سبع البرمبه وين اكو منه!
ابوي:اي وين اكو منه.. اخوي سبع..
-اني رايح.
ابوي:وين..؟
-للمجمع..
ابوي:اي عفيه.. لا تتأخر بالليل!
-درت وجهي وكلت..مااجي اصلا..
دخلت حمام.. وبدلت وطلعت للمجمع..
ساعات مرت .. وشكد كرهت الوقت.. وكرهت روحي واني كل شوي اباوع للساعه.. يمر الوقت وماكو شي يتغير وماتصير معجزة ترجع اسيل الي..
شوي ودك تلفوني.. كان الوقت متأخر تقريبا..
كان فلاح..بعد السلام..كال:تعال للبيت.. نسابتك اجو..
-وشنو يعني اله اجي؟! انتو موجودين بعد ماكو داعي..!
فلاح:عيب شنو متجي! حتى سجى جايه! تعال بسرعه..
-عجيييب! كلولهم مأمون مسافر مات استشهد!
فلاح:شبيك متتحاجى! تعال هي كلها نص ساعه ويرحون اتحمل!
-جاي جاي!
سديت التلفون ورحت للبيت..
دخلت للاستقبال سلمت ع ابو سجى واخوها..
شويه وكلولي مأمون يصيحوك جوه..
اوس وفلاح ضحكو ودنكو..
رحت دخلت لغرفه امي.. لان الصاله فارغه مبيها احد..
لكيت الكل كاعده يم امي.. وهاي اول مره يجي احد يزورها يكعد يمها.. لان الي يجي بس يسلم من الباب ويروح..
بس هذول غير شكل لازم تخليهم بعينها مو بغرفتها..
سلمت ودخلت..
اجت عيني بعين سجى.. ضحكت و دنكت..
-ها شلونج يمه؟
امي:بشوفتك زينه .. تعال اكعد يمي؟!
-لا اريد اطلع عندي شغل..
من كلت عندي شغل سجى كبل رفعت راسها وكانها تسأل شنو الشغل الي يصير بهيج وقت؟!
امي:دتعال اكعد.. عوف الشغل هسه!
كعدت يمها ع السرير.. لزمت ايدي..
امي:يمه شوف الغزال الكاعد كبالك!
ابتسمت.. بس حتى اخفي البداخلي وهزيت راسي بدون مالتفت اصلا..
امي:يمه انته ليش مارايح لمريتك كل هاي المدة؟
-كنت مشغول.. وتعرفين أنتِ؟
امي:اي والله ياام سجى .. خطيه تعبتهم وياي.. يركضون منا ويجون منا.. ماخلو الطبيب والحجز والمتبرع.. كلها تريد وقت..
ام سجى:اي صح.. بس ع الاقل تلفون يتصل بيها.. ميصير هيج مو؟
هزيت راسي وكلت:حقج عليه..
امي:باجر يجيج ان شاء الله .. مو ؟
خزرت امي..
سجى همست بصوت ناصي:اي ..ماعندي شي باجر..
اخذت نفس طويل.. وهاي هم امي سوتها! اني وين والطلعه ويه سجى وين!
ام سجى:والله سجى اعز من اولادي كلهم.. اخاف عليها من نسمة الهوى..
مادري شنو كانت مناسبه كلامهه.. يمكن شافت وحش كبالها وخافت ع بنتها؟!!!! واني اصلا رافض الطلعه وياهه بس شسوي لامي..!!!
ترخصت وكمت..
صعدت لغرفتي.. محتار اباجر شلوون.. سجى شجابج لحياتي!! احسن شي اطلع..
نزلت الدرج .. من وصلت كبال غرفه امي.. التفتت..
وكعت عيني بعين سجى..
كملت طريقي وماعاد شفتها..
شغلت السيارة وكعدت بيها.. دزيت مسج لليلو.. خبرتها اني جاي.. بين مااني بالسياره شفت الباب مالتنا انفتح..
كبل دست بانزين وطلعت بسرعه.. مالي خلك سجى واهلها كلش..
وصلت يم ليلو.. وكالمعتاد.. الليل يمها كان حياة كاملة..
ليلو:شبيك ياعمري؟ كلش مو ع بعضك هاي الفترة؟!
بكل هدوء كلت الها:خطبت..
ليلو:ههههه اذا خطبت شجابك يمي؟
-جديات داحجي! خطبت..
ليلو:اسيل؟؟؟
دنكت..:لا.. مو هي..
ليلو:زين ليش متاخذ اسيل؟ انت مو تحبها؟
-تزوجت..
ليلو:ياا.. شوكت؟ وليش مكلت؟
-صار هوايه.. كافي لا تفتحين الموضوع..
ليلو:جوعان؟ اسويلك شي؟ لو احضر السهره؟
-مو جوعان.. حضري السهره..
شغلت اغاني.. وبدت تشتغل وتتماوع كدامي.. هه كل ظنها راح انجن بيها من هيج تسوي.. متدري اني من ضيم كلبي اجيها.. واله لو اسيل مرتي تحرم عليه اي مره من بعدها..
وكلعاده مرت السهره بين شرب وبين ركص ليلو الي ماله معنى .. لحد ما فقدت كلش..
كعدت الصبح لكيت نفسي نايم ع التخم..
رحت غسلت وجهي وطلعت من البيت..
حتى مشفت ليلو..
رجعت للبيت سبحت واكلت لكمة..
رواء اجتني كالت امي تريدك..
رحت الها..صبحت عليها وبست راسهه..
صح هي امي.. والمرت بي مو شويه.. بس اكو شي بداخلي مكسور تجاهه.. احس اكو شي نقص بحبي الها..
امي:خوما نسيت سجى؟
-لا مو ناسي..
امي:فدوة لعمرك .. لا تخشن خاطرها! ترى هي مدللة .. ع كيفك وياهه؟!
-خوش.. محتاجة شي قبل لااطلع؟
امي:سلامة عمرك يمه.. الله وياك..
خاف اني ناسي .. ذكرتني بأسوء موعد ..
رحت لبيت اهل سجى.. دكيت الباب .. كان البيت مرتب ومجهز ع اتم وجه.. ام سجى حارت شنو تقدم وشنو تخلي..
اجت سجى.. لاعبه بنفسها طوبة..
مكياج طوخ.. كعب بعلو الباب.. بس ملابس محتشمه مااعرف شعجب..
سلمت وكعدت بصفي..
امها خلت وطلعت وسدت الباب وراهه..
بقيت ساكت. ماريد التفت واشوف البلوة البصفي..
درت وجهي عليها..
-شلونج؟
سجى:زينه.. وانته؟
-زين..
رجعنا لنفس السكته.. ماكو موضوع احب احجي بي وياهه..
وبس لذولاك الناس (اسيل) احب احجي كل شي..
سجى:طيب الكيك؟
-ماذقته..
سجى:اكل.. اني مسويته!
-لا مو جوعان.. نطلع؟
كمزت: اي يله!
اوكي راح اطلع اشغل السياره.. سويلي طريق..
سجى:دقيقه..
فتحت الباب وطلعت.. كعدت انتظرها بالسياره..
طولت هوايه يله طلعت.. مادري ليش حسيتها متقصده تشلع كلبي وتخليني انتظر..
واخيرا اجت وكعدت بصفي..
سألتها واني داير وجهي عنها:وين تحبين نروح؟
سجى:بكيفك.. وين تحب؟
-ماكو مكان محدد..
سجى:للمتنزه..
-اوكي..
رحنا ع المتنزه.. كان قليل بي ناس لان وقت ضحى..
كعدنا ع مصطبه..
كالت:ماكو ناس هوايه..
-اي..
سجى:لو باقين بالبيت مو افضل؟
-مادري..
سجى:مأمون ؟
-نعم؟!
سجى:ليش احسك حزين؟ مجبور ع شي؟
درت وجهي الها.. سرحت واني صافن بوجهه..
تذكرت عيون اسيل.. وتخيلت الكلب وهو يصبح بيهن يوميه.. طالت صفنتي ..
سجى:مجاوبت؟ مجبور؟
درت وجهي عنها وكلت لا.. ممجبور..
سجى:لعد ليش احسك ضايج؟ كنت اشوفك قبل بس تضحك! شمعنى هسه صاير هيج كئيب؟
-يعني متعرفين امي مريضه ومتعرفين الظروف الي مرينا بيها؟!
سجى:اسفه.. ماردت اضوجك .. بس حبيت اعرف شبيك..
سكتت.. وبقينا مشوار كاعدين سكته..
باوعت الساعه.. صار وقت غدا..
كلت الها:كومي نروح نتغده..
سجى:اي يله..
رحنا ع السياره.. الطريق كله ما درت وجهي عليها.. مداكدر ومداتقبل..
نزلنا يم المطعم..  طلبنا الاكل.. وبين ماكاعدين منتظرين كالت:مأمون؟!
باوعت الها مركزه نظرها ع ايدي وعاوجه حواجبها..
-ها؟
سجى:وين حلقتك؟! ليش نازعها؟!
-نسيتها من داغسل..
سجى:موزين.. لاتنزعها بعد عفيه؟!
-ماشي..
كعدنا تغدينا.. كملنا وطلعنا.. يمكن اضحك ع نفسي اذا كلت خاطب.. لا احس بوجودها ولا داخله عقلي مو كلبي همين..
من داوصلها لاهلها.. كنت مشغل اغنيه صغيرون يابعد اهلنا وبفراكك شلون.. سعدون جابر..واسيل كاعده بنص كلبي.. كل كلمة من هل اغنيه تنطبق عليها.. والعازف عبالك ديعزف ع كلبي..احس كلبي يتحفر ويه كل كلمه ويه كل لحن..اخ يااسيل.. صغيره ولعبتي بكلبي لعب... شحال لو اشوفج كبرتي اكثر واحلويتي ونضجتي..
ياريت بضلوعي اضمك وبنص العيون..اه يابه..
نذرا لاخيط عيوني لمن يرجعون..
مااحس اله الصوت فجأة اختفى من السياره..
التفت لسجى هي الي طفته..
عصبت وبدون قصد ارتفع صوتي :ليش طفيتي؟!!!!
شفتها اخترعت.. وظلت تتعذر:اني اسفه.. بس عبالي مدتسمع.. واني مااحب الاغاني القديمه.. اسفه..
رجعت شغلته..
وكملنا طريقنا.. مااحس اله ايدها صارت ع ايدي ..
التفتت الها لكيتها مدنكه..
رفعت ايدي وخليت ايدها جوه ايدي.. ولو مااحس بشي وياهه.. بس كافي اجرح بيها وهي مالها ذنب..
بدت تمسح ع اصبعي لو تشبك اصابعهه بأصابعي..
ردت بس اوصلها واخلص .. فسرعت كد مااكدر..
وصلتها للبيت.. نزلت وهي عينها عليه وتضحك..
انتبهت مخليه قصاصه صغيره وملفوف بيها ورده..
فتحتهن.. لكيت كاتبه جملة غزل.. ومخليه رقمها ليجوه.
ههه والله ياالله.. سامع ولد ينطي رقم لبنت.. بس مو العكس؟ ههه ولو نسيت هي مو اي بنت هي خطيبتي ومرتي عود.!
خليته بالجكمجه..
رجعت للبيت.. اول مدخلت كالو امي تسأل عليك..
رحت الها.. بقت تسأل بيه عن طلعتنا..
وعن سجى.. دوختني.. جاوبتها ع كد سؤالها وهي تريد تعرف كلشي وبالتفصيل.. عفتها ورحت للغرفه..
ومرت ايام.. تعافت بيها امي.. ورجعت تمشي ع حيلها..
وكل اسبوعين طبيب.. لحد ماطمنا الطبيب عن حالتها وكالت رجعت امكم بنت 20..
رجعت ادك ع الزواج.. عيب من الناس وصارلك شهرين خاطب .. وراح تصير علج بحلك العالم..
كل يوم تفتح نفس الموضوع.. وكل البل بيت هم يحجون بنفس الموضوع.. ما كأن صار بس شهرين..
عبالك سنتين سووها..
وفلاح اجه للمجمع.. جايب كتالوج بي اشكال الغرف تعال اختار حتى نجيب وحده منهم..
كلت اله المن؟
فلاح:لعرسك؟! ليش ناوي تظل هيج شنو؟ نضحك ع العالم احنا!
-مو هسه..
فلاح:كافي ترا تعبتنا وياك! شكد عنيد! يله فضها اختار.. واذا متختار اني اختار واجيبها واشدها..
كلبت كم صوره.. ولا غرفه عجبتني..
تالي هو كال هاي حلوه اختارها كلت اله ماشي..
بين ماوصى ع الغرفه.. فلاح انتقل ع بيته الجديد..
وصرنا هوسه.. ساعدنهم ابيتهم ونقل الغراض واخذ كم شغله جديده... وراها وصلت الغرفه وشدوها هو والعمال..
من دخلت.. وشفتها كامله.. نقبض كلبي.. داحسها كبر مو غرفه.. شلون راح تصير واني لهسه ممقتنع مادري..
من شوكت اني اسكت ع شي مااريده؟
عجيبه شوصلني لهنا!
اسيل..
مرت ايام.. حياتي ويه عزام مو اكثر من عشا ومرات غدا.. امه رجعت تجينا تقريبا كل اسبوع..
تحجي ابنتها الي اخذها فيصل.. وشلون اشترت الها وشلون اجتهم وشلون طلعن.. كأنها متقصده تحرك كلبي وتذكرني ماعندي اهل.. وكنت استنكف اسألها عنهم..طبعا من شافت بتها مرتاحه يم فيصل يله جابت حلقه وخلتها بيدي .. وظلت ادردم من جابتها..
وتكول احنا انطينا شدات وين راحن حلقه معرفتو تجيبون؟
خبلتني من هيج كالت.. واعرف الفلوس راحن يم هيثم..
وبدت رجلهم تجر علينا..
يوميه واحد جاي.. حتى ابوهم اجه للبيت..
سلم عليه.. وكان يعاملني بلطف شوي احسن منهم..
اما اخت عزام الثانيه الي ممتزوجة تجي بس مغثه..
دراستي وطلعتي واخواني وووو..
كنت اتحملها ع اعصابي..
وكل هذا اني اكرهم كلهم وماحنيت ولا عطفت بكد الشعره..
وكنت كل مااذكر عدي وعملته السوده هو واختي اشيط نار...
همزين ماكان يمر النا.. صارت مره وبعد متكررت..
ومرة من مرات ..
تفاجئت اندك الباب.. لان هم متعودين يدخلون كبل .. عبالهم يلكون فد شي يمي..
قربت يم الباب صحت منو..
صوت مو غريب كالت اني خالتج .. اني ام علي..
فز كلبي عليها.. هلا بريحة هلي..
هلا بالكطعو بيه كطع ..
فتحت الها.. شبكتها حيل.. اخ شكد مشتاقه الهم ..
دخلتها جوه.. وبعد السلام والسؤال عن الحال..
ظلت تسأل عن عزام وعن اهله.. مخلت شي مسألت عنه..
واني هم سألتها عنهم وعن خالتي الكبيرة ام قاسم الي سبق وان اجتني بس بعد ماكررتها..
كالت انها مشغوله وشوي تعبانه..
سألتها:خاله واهلي؟
كالت:شبيهم؟ عايشين بنعيم بفلوس الفصل..
-وعمامي ؟
كالت:زينين .. من فترة ابن عمج مأمون خطب..
من كالتها بقت مركزه بيه..وكأنها تعرف شي..
احس كلبي راد يوكف.. اريد ابلع ريك واحجي ماكدرت..
تخيلي انه وجهي فضحني وبده ينطي الوان..
كوه كلت:ها.. ع الخير..يستاهل..
كالت:يا شبيج اعتفستي؟
-لا مابيه شي..
ضحكت وكالت:هههه ادري بي جان رايدج.. بس هسه بطل وخطب بنت خاله امه.. سجى تعرفينهه أنتِ.. يكلج دازين ذهب بي كيلو ومهرها ملايين..
دنكت وكلت:واني شعليه بيهم..
رجعت كالت:الله يهنيهم يستاهل ورده مأمون ..
ظلت تسولف سوالف هوايه.. واني بالي مو يمها..
بس ارد عليها اي اي.. ومااعرف شنو السالفه اصلا..
بالي كله يم مأمون ..
مالمته.. ولا شلت علي لان خطب.. لان اني صوج.. واني سبب.. اني الياما رديته.. وياما كلت بوجه لا..
وسكتت وسكتت لحد ماصار الزواج بليله ظلمه..
هو هم حقه.. ميدري بشي عافني بالليل ثاني يوم تزوجت..
قابل ينتظر عمره كله..
من دتحجي خالتي مااشوف بس ام عزام دخلت علينا..
احس رجليه بادت من شفتها..
وصلت يمي وكالت:هاي منو ولج؟
بهت حلكي ومكدرت ارد..
خالتي ردت:اني خالتها.. ام علي..
ام عزام باوعت بأستهزاء لخالتي من فوك لجوه وكالت هله  بيج..
خالتي راسا كالت اني رايحة خاله.. اي شي تحتاجي اني موجوده..
ردت عليها ام عزام:متحتاج شي بوجودنه.. الله وياج..
خالتي دارت وجهه وراحت.. حتى لساني ثكل مكدرت اصيح ع خالتي ترجع عليه مره لخ..
انسد الباب وراحت خالتي واني الحجايه بكلبي بس مطلعت..
عاد ام عزام مقصرت.. كامت كل شوي داخله من باب وطالعه من ثاني.. كأنها ادور ع شي..
وتمشي وتصيح:ولج ادخلين ناس لبيت ابني؟ ولج أنتِ شلون تصونين عرضه! ياعرض السكط! شجابتلج؟ ووين ضميتي!
ظليت افتر وراهه مااعرف شرد..
رجعت كالت:هي اختج شلونها نوب أنتِ اتعس بعد! كمتي ادخلين ناس!
احس نار وكبت بيه.. عطت بيها كل قوتي:كافي تشمرين عليه! اني اشرف منج! واسألي ابنج الدايح! شفتيني ساكته وكلتي اجلق عليها مو؟ لج والله اهجم بيتكم هجم! لاتشوفيني ساكته !
عاطت بيه:ولج ادبسز! شلون ترفعين صوتج عليه! هاي تربيتج الوصخه! هاي اهلج علموج؟
كلت الها:اي اهلي علموني! يله اطلعي برا! يلللللله!
لفت عباتهه وكالت اني اعلمج ياسافله..
ركعت الباب وراحت..
احس نفسي طلعت من قوقعه الخوف الي كنت بيها..
بركان بداخلي ممعروف شوكت يثور..
خلص ماعاد اهتم.. كافي سكته وقهر وكبت..
الكلب ورم والجبد ورث ومحد يحس..
شيصير خل يصير..
ضيعت كلشي.. وهذا مأمون وراح..
بجيت بجي بس الله العالم بي..
بلا ماانتبه ع نفسي كمت اصيح مأمون وينك.. ليش هيج عفتني وكطعت بيه.. اخ ياكلبي اخ.. كله منك.. شجابك علي..
وره ساعة او اكثر..
انركع الباب قوي.. فزيت ع صوت..
مااسمع بس عزام يعيط وينها هاي بنت الكلب.. وينها التغلط ع امي.. صح بالبدايه خفت..
بس بعدين تشجعت وكلت اليوم اواجه واحجي لو شنو يصير..
وصل يمي وعاط:ولج شلون اطردين امي وتغلطين عليها؟!
فتحت حلكي داحجي.. كبل سطرني راشدي..
من قوته حسيت اذني انسدت ووجهي كب نار..
عطت عيطه خلت البيت يرن.. يانااااااس كاااافي!
مادري منين شفت عدي دخل للصاله..
من شفته تهسترت اكثر..
عطت:ولك انتم دمرتوني! هجمتو بيتنا! كمت اصرخ وأأشر ع اخو الي صار ورا واكله كله من هذا الساقط النذل.. ومخليت حجايه محجيتها.. اجه عزام عليه بده يضرب من كل الجهات.. كطعني تكطع.. حسيت روحي رادت تطلع..
وفجأة مادري شنو الصار.. كمت مااحس بالضرب..
دفعته كل مابيه من قوه وكمت..
ركضت للمطبخ.. بلا وعي اجت عيني ع السجين مال فاكهه..
شلتها ووكفت.. عطت:الي يقرب املخه بيها..
شفت عزام بعده ممتردد.. ويريد بس يقرب..
باوعت اله هو واخوه.. مادري ليش عقلي اختار عدي..
ركضت عليه وبكل مابيه من قوه خليتها ابطنه.. وباوعت بعيونه حيل.. كلت اله هاي لكوثر..
حسيت شي حار طلع ع ايدي..
وبنفس الوقت انجريت جره من ثوبي حسيت ركبتي رادت تنكطع..
رجع عزام عليه دك ضرب.. السجين بعدها ابطن عدي .. اباوعله واضحك مكيفه.. وممهتمه للكتل الي اكلته..
بعدين كام يصيح ولك عزام عوفهه الحكني راح اموت..
كلت اله.. عساك ان شاء الله!
وبقيت اكرر عساك عساك..
سحب السجين من بطن اخو.. الدم نزل ع بنطرونه وحذائه ووصل للكاع.. سحله سحل واخذه للسياره..
بقيت اباوع منتصره عبالك..
هذا ثاري واخذته.. بس ماارتاح اله عدي يموت يله..
وحده بوحده.. وحتى لو كان الثمن اني اموت ميخالف..
المهم اسوي الماسوته الزلم..
يتبعالجزء العشرون ❤❤❤❤