je t'aime à la folie

partie 42

انا : تعيش خويا سيي كفاش تهرب منو

طاكسيور : آ ماداااام اسمحيلي ماديريليش لمشاكل

قالهالي و حبس الطوموبيل درت نشوف لقيت فؤاد تاني حبس و حبط يجري من طوموبيل لحق حل الباب وقالي

فؤاد : نجمة احبطي

انا : علاااش لحقتني روح منا

فؤاد : راني نقلك احبطييي ماتهبلينيش

انا : رووووح مادخلش روحك فيااا

حكمني فؤاد من ذراعي باش يحبطني و كما سييت نحيلو يدو ماقدرتلوش مالڨري كان غير بيد وحدة كي حبطني طاح من يدي الصاك و طاح منو كلش شاف فؤاد الموس فالارض موراها شاف فيا مخلوع تم تم تيراه برجلو باش مايشوفوش طاكسيور بقا حاكمني من يدي و خرج دراهم و خلصو و قالو

فؤاد : صحيت خو تقدر تروح

انا : فؤاد اطلقنيييي

سييت نحيلو يدو و يأتيني كف من حيث لا ادري و بدا يعيط عليا

فؤاد : هذا باش تتعلمي ما ديريش واش يقلك مخك الجايح هذا كفففففاااااش حبيتييي تقتليينيي من الخلعة عليك قووليييي حبيتييي توسخي يديييك بدم هذاك الكلب انا .. حبيتي تعذبي يماك في قبرها قولييي خممتي فيا انا واش يصرالي علاخاطر ماقدرتش نحميك انت أمانة في رقبتي وصاتني عليها خالتي سامية الله يرحمها نجمة وليييي لعقلك

كي عطاني فؤاد هذاك الكف و قالي هكذاك فطني فقت لروحي واش كنت معولة ندير فقت بلي ماما راحت خلاص ماتوليش يالوكان نقتل ڨاع الناس بديت نرعش وحدي حكمت فؤاد من قمجة تاعو و قتلو

انا: فؤاد راني محروقة من داخل نار راهي شاعلة في قلبي ماما ماتت بسبتي

فؤاد: يماك ماتت علاخاطر كانت مريضة علاخاطر لحق أجلها قوي ايمانك نجمة

حسيت بدمعة طاحت من عيني و تبعوها خاوتها كي شافني فؤاد اخيرا نبكي عنقني و قالي

فؤاد : هكذاااك عمري ابكي عيطي ماتخلي والو في قلبك

عنقت فؤاد بالزور و بديت نبكي بالعياط ماطلقتوش كامل حتى حسيت بلي شمختلو قمجة تاعو بدموعي كنت محتاجة بزاف لعناق كما هذا نخرج كامل واش في قلبي

انا : ادينييي لقبرها فؤاد

باسلي راسي و شدني من يدي راح رفد الموس لي تيراه امبعد داني لطوموبيل تاعو لحقنا لجبانة كانت فارغة و كانو نسا راحو ورالي فؤاد قبر ماما وقفت قدامو و رميت روحي عليه و بديت نبكي نبكي خلفت اليومين لي فاتو

انا: ماما توحشتك ياحبيبتي فرااااقك صعييييب بزاف نور حياتي طفا من لي غابت عينك قوليلي كفاش راح نقدر نكمل حياتي بلا بيك كنت متمنيا تشوفي ولادي تربيهم كما ربيتي ولاد فايزة الله يرحمك يالغالية 😭😭😭