#تراتيل القدر

حزن مكبوت

عذرا اذا بجيتكم...بس هذا جزء من الي مر بيه العراق بفترة الطائفية المقيتة
هواي مثل قصة حيدر ونور واتعس...
الله لايعيد ذيج الايام...
#تراتيل القدر
همس ليل
البارت الاخير
رفعت عيني...شفت ام كرار كدامي....
جانت تنظرلي نظرات غريبة.....
وكفت كبالها...وابالي سؤال...
اخاف اطرحه...ولا عندي صوت يطلعه
وينه...
تقدمت اريد اسلم...رجعت ليورة
وكفت بنفس مكاني...انتظر دكولي قبل ما اسأل
نزلت نظراتها على ايدي...
_مبروك...شبسرعة نسيتي ونخطبتي...
اتبعت نظراتها...رفعت ايدي اباوع على الحلقة...
هاي شبيها عن شنو تحجي...
انتبهت زينب...جانت ترضع ابنها..كامت من مكانها...
_هلا ام كرار شلونج...
عفتهن ورجعت نفس مكاني...
رجعت عيني للباب...هسة يجي مادام اخته هنا..
جان يكول دائما يجي وياها...
سمعت صوت بجي ام كرار....
التفت عليها....
كامت من مكانها...باستني
_اعذريني خيتي....كلبي محروك....
عافتنا وراحت...عيوني تتبعها ...
رجعت للبيت...مثل كل مرة...ونفس الحياة...
ونفس الكعدة يم الشباك...
مر اسبوع...وبابا كال ترحين لكربلا تفاجات
اشرت براسي....
راح وياي محمد وامي...بس هالمرة ما توجهوا
للامام....
توجهوا للمقبرة.....ويم نقطة معينة وكفوا...
شفت امي نزلت ومحمد....
شديسون ...راحوا يم عائلة واكفين يم سيارة...
حجوا سوة ...ورجعوا يمي...
العائلة مشوا بسيارتهم...واحنة تبعناهم...
لحد مادخلنا بنص المقبرة...جنت صافنة على الشباك...
بس ماكو اي ردة فعل عندي ..
الاحساس معدوم تماما....
وصلنا...ونزلت ماما ومحمد....حاجاني محمد
_انزلي نور....
نزلت...انتبهت العائلة نزلت قبلنا...ومن ركزت...
شفت ام كرار...وقاسم ...وحجية ....
اني ماشايفة ام حيدر بس مرتين...لذلك ماكدر اميزها من مسافة...
خاصة وهاي المرة تعبانة ...
مشينا بعدهم....وصلوا لقبر...المرة الجبيرة ذبت نفسها عليه...
وام كرار كعدت بصفها...
بلحظتها ماعرف شنو صارلي...خفت...اول مرة يتحرك احساسي...
جان محمد بصفي...جلبته بيه بخوف...
خلى ايده على جتفي يحاول يدفعني لكدام....
المرة الجبيرة كعدت بين قبرين ...وبدت تنعي...
جان محمد وامي يحاولون يدفعوني اتقدم...
بس رجلي ماتقبل تمشي ...
اخر شي شبه جروني للقبر...وكفت مقابيله...
اباوع لمحمد وامي ...وارجع نظراتي للقبر الكدامي
جان صوت امه من تنعي...يمة هاي عروستك اجت
كوم حيدوري يمة...
رجعت باوعت للاسم على القبر...
اقتربت واني اتلمس اسمه ....
معقولة صدك ...حيدر صدك عفتني...
جذبت علية...كلت ما اجرحج...واول واكبرجروحي انتة
جنت احجي وياه بكلبي ...واصابيعي ترسم اسمه...
حيدر خلص بيتنا كوم ....
جنت انتظرك تأجريلي البدلة....
باوع بعده علك العهد بيدي مانزعته....
بس ابد مانزلت دمعتي...
تذكر جنت تكولي دمعتج سهلة...
بس عصت تنزل على اغلى احبابي....
انتجيت براسي على القبر....
ماجنت اسمع شيحجون...بس حسيت روحي ماعت
جرني محمد.....كومي خيتي...
ماعارضت ...سندني للسيارة...
من صعدت....اجت ام كرار....
دنكت باستني...وجرت ايدي...
خلت شي بيها...
_هاي حلقته...ومدالية جان مشتريها هدية صباحيتج
ضميتهن ذكرى...وكلت ماتستاهلين...
بس هسة هنة من حقج....
سدت ايدي عليهن...
طول الرجعة...ايدي تضغط على الحلقة
حفرت بيدي بدون ما اشعر...
ومكدرت افتح ايدي واشوفها ...
لحد ماوصلنا...جنت ارجف من البرد.....
جان شهر الواحد ب٢٠٠٩ يعني مر عليه تقريبا سنة و٨ اشهر...
اخذتني زينب لغرفتي...ونزعتني السترة...
تغطي بية بالبطانيات وارجف....
اخر شي شفتها طلعت ورجعت وياها امي وابوية
_بابا شبيج...ليش ترجفين هيج...
اجت امي شبكتني...لج ماما موتيني...شبيج
محمد خابر كرار...
من اجى...كال حاولوا ادفوها...هاي رد فعل...
ضربني مسكن...بعد مادريت....
بس اذكر جنت اكعد احس عيوني نار تطلع منها...
واشوف خيالات ....ماميزها...
وارجع انام....
شفت حيدر اجاني مثل اخر مرة شفته بيها...
فرحت ...عرفت ماراح تعوفني....
كلهم جذابين..انت مامتت مو
ابتسم بوجهي ودنك باسني بكصتي...
وراد يطلع...كمزت من فراشي ركضت وراه
جلبت بيده....
حيدر وين رايح...
التفت علية...جيت اشوف شلونج وراجع
_لاتروح عفية ....
هز راسه....
_زين اخذني وياك...ما اريد ابقى هنا
اخذني وياك
مد ايده على ايدي وخرها...
_مو هسة....بعد
وعافني وطلع....
بقيت اصيح حيدر...لاتروح...
بحيث حسيت صوتي راح...
صحيت على صوت بابا يصحيني....
جنت عركانة حيل عبالك واحد ذاب سطل مي علية
وبلعومي يوجعني...
وجهي مبلل بالدمع...
بابا جان لازمني من زنودي يهزني...
_اكعدي بابا شبيج تصيحين
باوعت اهلي كلهم فوك راسي...
_راح جان هنا وعافني وراح...
بابا صدك مات...مات بسببي
جنت ابجي بحركة واحجي...
_لا بابا شنو هالحجي...كل واحد يروح بيومه
_لا اني جبته....اني خليته يجي...جبته لموته
جنت ادك على صدري واحجي...
_استغفر الله ...بنتي هاي ساعته...جان مات باي طريقة ثانية...
كمت اصيح وابجي ...بابا شبكني...
ماما كعدت من الجهة الثانية...دحاول تسكتني...
كرار جان وياهم...عمة عوفيها...احسن ما اظل كابتة بداخلها...
ماعرف شكد بقيت...ابجي...بس حسيت واحد جر ايدي وضربني ابرة...
شوية وغفيت...
من صحيت...جنت وحدي...ردت اكوم...حسيت بدوخة...
والمغذي مشكل بيدي أذاني...
واكثر شي ياذيني جان باطن جفي...
كلبت ايدي اشوف جان اكو حزين عبالك جروح..
رجعت نمت واني اتمنى كل هذا حلم...
دخلت زينب...
_هاحبيبتي كعدتي...
اشرت براسي...
_لا نور احجي...اشتاقينة لصوتج....
_شيلي المغذي اذاني...
_هسة اصيح كرار...
راحت....واجت وياها كرار وامي...
_هاماما شلون صرتي...
_الحمد لله...
_راح اسويلج اكل...
جان كرار ديوخر الكانونة من ايدي...
_حمد لله على سلامتج نور...
_اشكرك تعبتك وياي
_تعبج راحة...بس كون ماترجعين تنطوين داخل نفسج مثل قبل...
اشرت براسي...
سلم وطلع ...
_من البارحة هو بايت...
_يا البارحة ...صار يومين من رجعتي من كربلا...
صخونة مافكتج ...والليل كله تهذين...
والبارحة كعدنا على صوت صياحج...
اليوم الثالث...
_ادري تعبتكم وياي
_يمعودة المهم رجع صوتج...وان شاء الله تكومين بالسلامة ...وترجعين تنورين مثل قبل
_باعي شنو هالجروح ابيدي...
جنت اباوع على ايدي....
شفت زينب سكتت...
رفعت عيني لها...شنو هاي ...معقولة جنت أذي نفسي ومادري
_لا راح بالج لبعيد...من رجعت جنت حيل سادة ايدج...
وكوة فتحناها..
هم رجعت سكتت...بس اني اذكرت
_وينها زينب
كامت جابتها....خليت الحلقة بالعلبة...
فتحت العلبة وطلعت الحلقة ....
ظليت اتلمس بيها..ودموعي تصب...
جانت الدموع حارة من تنزل على خدي تجوي
باوعت بالعلبة...اكو مدالية شكل عين بيها فص ازرك
اذكرت من جان يكلي...البسج زاركون لحد يحسد عيونج
شلته خليتها على حلكي ابوسها واني اشهك...
دخلت امي....كافي راح تموتين...مو هيج ماما
رادت تاخذ مني الاغراض...جريتها منها
_عمة عوفيها...مو كال الدكتور خلوها اطلع الي بداخلها
حاولوا وياي اكل ماكدرت...صعد والدي...
_بابا لخاطري...اكثر وحدة من اخوتج ريحتيني...
ومافديوم قهرتيني....
بابا والله اموت مية مرة واني اشوفج هيج ....لخاطرنا
اكلي...كل واحد يروح بيومه...
بديت اكل لخاطرهم...بس ماجان ينطوني مجال اطلع حزني...او ابجي براحتي...
طول اليوم مكابليني...
جان سلوتي الليل...من ابقى وحدي ....
حتى اناجيه وابجي....
ومن اكعد الصبح وتشوف امي عيوني وارمة...
تظل تحجي علية....
سالت ليش اخذوني للمقبرة وليش ام كرار ماقبلت تسلم علية
كالت زينب...جانت ماخذة موقف منج...
لا ماحظرتي الفاتحة....
بس هية اقترحت ناخذج للقبر ...حتى تنفك جبستج

مرة طلعت امي خارج البيت صحت زينب...
_اريد تفهميني شنو الصار من طلعتوا من البيت لغاية هسة
_نور ....اتركي الراح...وابدي حياة جديدة
_اترك الراح...لج الراح عمري كله....
الراح مو فلوس لو بيت ....
حتى انساه...وابدي
جنت احجي بعصبية...
_اعرف والله...بس شراح يفيدج تعرفين
_معليج احجي
_شوفي المسألة بدت من كتلت سيف....محمد من شاله وداه للمستشفى...واحنة ساعدنا عائلته....
الجماعة خلوه تحت المراقبة...وبعدين شافوه يتردد
على منطقة اهلي....وتعرفين الوضع جان الذبح عالك
واي واحد يدخل منطقة الثاني وبصورة مستمرة
يعتبروه مثل العميل...
ابو فهد تذكريه...حذر عمي...كاله ابنك مراقب
خلي يطلع منه...لذلك عمي...
كال اطلعوا لاهلج....طلعنا مثل كل يوم كانما رايحين...
للدوام ...ومناك رحنا لبيت اهلي
_ابو فهد شمدريه...هم وياهم
_لا تعرفيه... هو من الناس الي تاخذ حياد...وية منو مصلحته يسايسهم...
_زين منطقة اهلج..هم جانت صعبة...ماسالوا على محمد
_هو بس وصلنا ...راسا ابوية وكرار...اخذوه للجماعة
وحجولهم...وكلهم اصدقاء كرار...خلوه بحمايتهم
_وطلعتنا المفاجأة
_مو هو من طلعنا وعرفوا بينا....خلوا البيت كله تحت المراقبة...عرفو عمتي من غير طائفة...واني ...وكملت بيج...
اعتبرونا مرتددين...خاصة عمي ماقبل يساعدهم بشغلة...
ابو فهد حذر عمي...وكاله اطلعوا
_هاي الاخبار لازم من احد قريب منا توصلهم
_اكو هواي جانوا يوصلون مقابل الفلوس
_ليش ماحجيتوا كل هذا..حتى اعرف وضعنا واكون حذرة
_انتي جنت فرحانة بخطوبتج وملتهية...محد راد يغثج
_وتاليتها اني تأذيت...وراح بيها ...
ماكدرت اكمل...
_زين شلون صارت خطف حيدر
_هو الظاهر مراقبين الوضع...واول ماداخل المنطقة خطفوه
_كملي
_عمي راح لابو فهد...ومخابر جماعة...شوي رجعوا خبر
يمهم...وطالبين فدية
عمي بوقتها كان المفروض يطلع وياكم...من شاف هيج الوضع...بقى...وخابر على ابوية دز كرار وصديقه...
حتى يتلكاكم ويدخلكم المنطقة
وهو جان جامع فلوس مال شغله ...قبل فترة احتياط
ومحولها ورق اخذهن كلهن وانطاها لهم...
_وروحت محمد واحمد لكربلا صح لو طلعوا برة علمود خافوا
_لا راحوا وية ابوية لكربلا...لاهل حيدر...حتى يفهموهم الوضع...
وحتى ابوية كال لهم اذا شاكين ممكن احنة مسويها...
الحجي دز ولده اخذوهم يمكم لحد ما يتفاوض وياهم...
بس ابو حيدر مبيتهم...ومن الصبح كايل لهم...
راح ادز جماعة يوصلكم خارج كربلا...لان اذا صار شي على ابني...
ما اضمن تصرف اخوته وعمامه...
_زين بابا تاخر بالفلوس...
_لا نور...عمي جان جامع ٣ دفاتر كلها سلمها لهم...
بس انتي تصورين يهدوه...
الفلوس اخذوها مقابل يسلموه...بالعادي محد يلكه الي ياخذوه...
_راسا كتلوه
_لا ...تذكرين يوم الي طلعتي بالسطح مختنكة...بيومها خابروا عمي كالوا له روح استلمه بالمستشفى...
_واهله...
_عمي خابرهم واجوا...يكول بيدي سلمته لابوه
جانت تحجي وسجاجين بكلبي ادك
_معذبيه...سكتت
بلحظتها فقدت ظليت اضرب على وجهي بدون وعي
حاولت تلزمني...
من اجت ماما...ظلت تحجي على زينب...وحلفت اذا رجعت
لنفس الوضع تاخذ كل اغراض وتذبها
بيومها...كل ماغمض عيني اتخيله....
لليل واني احس روحي لايبة...اريد اطفي النار الي بكلبي
من جانت مشاعري ميتة احسن..ما اشعر بشي
الالام لا يطاق...طلعت بالسطح...جانت تمطر نهاية شهر الواحد وباردة...
وكفت جوة المطر واني ابجي بشهيك...
اريد بس ابرد كلبي...
كعدت بالكاع.....
_نور كومي خيتي هاي شنو
_لك محمد نار هنا ماتطفى...ادك على صدري
اني جبته للموت ....اني السبب...
اريد اموت...ليش مااموت ...ليش...
جنت اصيح من ناري
_يعني بس هو عندج...واحنة شنو...مالنا مكان بكلبج
ماتفكرين بينة ...ماتفكرين بابوج...
شابع قهر ...امج...احنة....
الغيتي الكل من حياتج....
فكري بينا...لخاطرنا...بكل الي يحبج...حتى هو مايقبل الي دسوي...
حبيبتي...لا انتي اول وحدة ولا اخرها...
الحياة تستمر...واذا تحبيه ادعيله بالرحمة...
راح شهيد احسن مني ومنج...
كومي ...داتعذبين الكل مو بس نفسج...لاتصيرين انانية
دخلني للغرفة وصاح زينب تبدلي...
بس لان صحتي جانت ضعيفة ...اخذت افلونزا وبعدها انتكست حيل...بقيت شهر اختنك من الكحة وعايشة على البخاخ...
شفت اهلي كلش تعبوا وياي...وتاذوا مني...
رجعت اكل واخذ دوة لخاطرهم...
بعد سنة...من هالحادثة ...خلصت بالدكاترة والادوية ...
والمستشفيات...
كال بابا ارجعي لدوامج...بس مارجعت نفس الدائرة...
انقلت لغير دائرة....
****،*،
مرت عشر سنوات احنة هسة ٢٠١٧....
واني نفس كعدتي من اضوج اكعد قريب على الشباك واتفرج على الشارع...
اصنع حكايات وقصص للناس الي تمر
حياتي تركزت بين الدوام...والبيت...
ركزت على ولد اخوية محمد صار عنده ٣...
خليت تربيتهم هدفي....
سنتين الي فقدت بيها الصوت...الدكتور كال نوع من رد الفعل ...لن ماتقبلت الوضع...
وفعلا جنت متاملة يطلع جذب الخبر...
المدالية وياها حلقته وحلقتي الي ماقبلوا اظل لابستها...
خوف من كلام الناس...البستها بركبتي وابد مانزعتها
ماخلوني اطلع حزني...بقى مكبوت بداخلي
شخصيتي تغيرت...مارجعت نور السابقة
شي داخلي انكسر ونطفى
عمري مانسيت حتى بعد ١٠ سنوات...
لا نسيت حبه....ولا نسيت جنت سبب بموته...
جانت رغبتي ابقى انتظر يوم انجمع بيه بالاخرة..
بس الناس ماترحم ...ولا تعوف احد بحاله...
ومرات الحجي يصير من المقربين...
وخاصة جانوا يتقدمون لي...
بابا...كافي عشر سنوات من عمرج...
نسوان زوجها ومخلفة منه وتزوج...محد يرحم...اني مادايم لج...اريد اطمن عليج..قبل ماموت...
ريحيني...هالمرة اني اختار لج
مابيدي شي...ما اكدر اخالف...
ولاسباب هواي...
بقيت هالسنوات ارفض...بس بعد الحجي الصار
كان لازم اطاوعهم
اذكرت لعبة جنة نلعبها...وية بنات خالي ...من نحتلف على شي...
كل وحدة تخمن منو راح يجي هسة...اذا طلع التخمين صح
تفوز...
كلت هسة الي راح يدخل ...هو اختيار بابا...
ردت اكوم من تاخر محد دك الباب...ضحكت...
وية كومتي سمعت صوت الجرس...باوعت..
شفت شخص طويل ولابس عسكري...وشفت نجماته..
عرفت منو هو...
مستحيل الشخص الوحيد لا اني اطيقه ولا هو يطيقني...
هالمرة فشل التخمين...سديت البردة...
وانتهت حكايتنا....تحياتي