#تراتيل القدر

خنكة عواطف

اسفة للتاخير ...ماكو عدنا نت اليوم
#تراتيل القدر
همس ليل
البارت الحادي عشر
جانت تحجي وياي وتكول مادري ابوي راح يطلب هيج شي
بس الاحراج الي جنت بي كدام اهلي ...
غلق عقلي عن كلشي...
بس من كالت جملتها الاخيرة...جانت اكو رجفة بصوتها
حسيت راح تبجي...
رفعت راسي اباوع عليها وهية تجمع اغراضها ....
جانت ايديها ترجف ...
كلش نقهرت من نفسي...ومن الوضع كله
قسيت عليها....بس شسوي...صار شهرين نراوح بمكانا
يوميا شغلة طالعة...
اكدر اجاوز كل الامور...بس جية لبغداد ...لا
وعدت والدي ....
طلعت بس من ودي اكولها لا ترحين...ابقي نتفاهم
بعد يومين روحي طاكة عليها
داومت مها جانت مجازة
_وين نور لعد
_رجعت لقسمها...خلصت شغل
_يا...خلي اروح اسلم عليها
راحت وبقيت انتظر خبر اسمع عنها...
ما تاخرت من رجعت....
_شو بسرعة رجعتي شعحب
_مالكيتها...صار يومين مامداومة
_ليش...صاير شي..لو اجازة عادية...
جنت مسوي نفسي اشتغل واحجي وياها ...
كأن الموضوع مايهمني عادي...
واني على نار اسمع منها خبر...
_لا عمها يكول هبوط بالضغط صاير عدها
انسد الموضوع....
رجعت لبيت خالتي...هالايام ابات يمهم...
لان طريق صار خطر...بس اختنكت...
العصر طلعت لكربلا لاهلي...
امي تلكتني...شعجب جاي اليوم...والوالد هم...
كتلهم اشتاقيت لكم...
ثاني يوم هم ماداومت وعرفت من مها مجازة لنهاية الاسبوع....
بقيت الاسبوع كله اروح وارجع لاهلي...
جنت احس مخنوك ...
وماكدر ابقى هنا
الجمعة رحت زرت...ومن دخلت للامام العباس...
نخيته يبرد كلبي...
جان نار مشتعلة بداخلي....
طول اليوم اتمشى بالزرع...
احس روحي ما مستقرة...
اليوم اجازتها المفروض تخلص ....
جنت حيل مشتاق لها...وبالي يمها
بس ما اكدر اسال اي كان شلون صارت...
ماريد اجيبلها حجاية....
غرفة القسم جانت قريب الدرج...طلعت من الغرفة
وبطلعتي دخلت...وصارت بوجهي....
من شافتني دنكت...وهية مقابيلي....
حسيتها مثل طفلة زعلانة...
اريد اكولها ارفعي راسج اشوف عيونج الحلوة...
صبحت ...وصعدت بدون ماترفع عينها....
الموقف لحظات ...بس لي عمر...
صعدت وعيني تتبع خطواتها....
بيها شي متغير...بس ماعرفت شنو...
ماشفت عينها حتى اعرف....
رجعت لغرفتي...والكأبة زادت ماقلت عندي....
اريد اركز على شغلي ما اكدر...
كل شوي اذكر شكلها من مدنكة....
جنت اتمنى اشبكها ...واكول لها مشتاقلج...
من اجت مها....
_شفت ست نور...اليوم مداومة
_صدك ...خلي اصعد لها
من نزلت...ردت اسألها ...
بس شلون...
سكتت..وعفت الموضوع...
مر يومين ما شفتها...لان مافد يوم نزلت...
حتى ممكن اصادفها...
_ست مها...نور مداومة...
نسيت كلت اسمها بدون لقب ....
_اي مداومة....ليش تحتاج منها شي
_اي الاوليات مال الذرعة ما انطتني اياها...وهم ماسلمنا عليها من اجت..كالوا جانت مريضة...شلون صارت
_اي والله خطية مبين عليها التعب....تريد اسالها عن الاوليات
_لا ...اني صاعد بكل الاحوال ...عندي شغل
صعدت كلبي يسبقني ...
دخلت سلمت على ابو امجد...جانت كاعدة تكلب باوراق كدامها...
من سمعت صوتي رفعت راسها...وراسا دنكت مرة ثانية
بعد ماحجيت شوية وية ابو امجد...
_شلونج ست نور
_الحمد لله...
_اوليات الذرعة مالكيتها وية الاوراق الي انطيتينياها
_لا وياها...كل الاوراق
جانت تحجي وتتجنب تباوعلي..
_اذا ماتصير زحمة شوفيها يمج....او دوريها بالمكتب جوة...
ترخصت ونزلت ...اعرف مو يمها...بس ماكو طريقة
ثانية اكدر اشوفها لو احجي وياها بيها...
من اجت جان بس باسم يمي يشتغل...
سلمت عليه...وبدت ادور بالمكتب....
حجيت وية باسم بصوت ناصي...بدون ماسمعها
_من رخصتك باسم ...اريد احجي وية نور
هو ترخص وطلع....
_ها ...لكيتيها
_لا... متأكدة جانن وية الذرعة...
كمت تمشيت لحد ميزها...جانت واكفة ورة الميز...ادور بين الاوراق...
وكفت من الجهة الثانية بحيث صرت مقابيلها ...
_نور
رفعت راسها ...تفاجأت بية...رجعت دنكت
_باعيلي....
مارفعت عينها...وظلت تكلب بالاوراق...بس بارتباك
باين من حركة ايديها....سحبت الاوراق من ايديها
_كتلج باعيلي...
_شتريد حيدر..
_مشتاق لعيونج...رفعي راسج خلي اشوفهن
_اترجاك كافي...
_كافي شنو...لج والخلقج احبج...
_اليحب مايأذي...
_لحظة عصبية...وكلت سويت الي علية....
بس كلبي ماكدر على بعدج...
_كلبك اقسى منه ماكو...
_هو لو قاسي...جان ما واكف كدامج هسة...
كافي عاد....باعيلي
رفعت عينها...ليش هيج متعبة عيونج
جان الدمع يلمع بعيها مثل الليلو
قطع علينا الحجي دخلت مها..
طلعت بعدها...رجعت لاهلي ...
افكر شلون بية...لا داكدر اعوفها...
ولا اكدر اعوف اهلي...
عيونها الذابلة تعبني حيل
بعد العشى...ردت اطلع اتمشى برة
صاحني ابوية...
_تعال بوية...تعلل ويانة...شعندك وحيدك برة
_صار بوية ..
سولفنا شوية على المنطقة والظروف
_بوية ...شوكت تخلص من شغلة بغداد وترجع هنا
_مابقى شي
_والله بوية اخافن عليك...الطريق صعب...وبغداد صايرة ماتراد ...وانت رايح جاي
_كل واحد يروح بيومه
_الحذر سبق القدر...بوية ...اشوفنكن تعبان...وادري بيك...بس مثل ما والدها يريد بنته يمه...ويخاف عليها
...انت هم وليدي...مو اريدنك يمي ...بس اخاف عليك.
ابغداد صايرة كتل على الهوية...وانت يابوي مو زايد علي
_اعرف يابة ...وماكايل شي...
كمت بست راسه وطلعت...
ماعرف شلون احلها....
خلصت اجازتي ...واول مادخلت صار بوجهي....
كلبي دك بوجع...سلمت وطلعت ....بدون ما ارفع عيني...
بدائرة وحدة بس خلال اليومين ماشفته...
لان ابد ما اطلع من الغرفة...
بالبيت الكل ملتهي بشغلة احمد ونقلته ...مبدئيا ابو البيت انطاه المفتاح...واخذ مفتاح المشتمل ...حتى ينتقل بيه
والمعاملة...على كيفهم يمشون بيها...
اني بعالم وهمة بعالم اخر...
لحد اليوم صعد...راد اوليات بس اعرف اني منطيتها له
مع ذلك نزلت اتاكد....
من تحرك وكف مقابيلي ما حسيت بيه...
من سمعت صوته ...ارتبكت...ماجنت اكدر ارفع عيني له
من حجى بحنية وياي...طكت الدمعة بعيني...
بس بكلمة منه مسح كل وجع الايام السابقة....
رجعت للبيت ونفسيتي غير شي...
جنت ادعي تفرج علينا...بس شلون ماعرف...
فكرت احجي وية بابا...بس استحيت...
شكوله...
اخر شي صحت لزينب...
_زينب ...تذكرين شكد ساعدتج
قاطعتني ....ايام النضال السلمي...ذليتيني بيها
_اني.. شوكت يالئيمة...حبابة اخيتج
_من الاخير شتريدين...
_احجي وية محمد...يحاجي بابا
_ولو اعرف عمي بس بلكت
بقيت انتظر على نار....
خلال هالايام ...علاقتي بحيدر جانت سلام ونظرات
مرة لاكيته على الدرج....
_هسة مو صاحبتج يمنا تعاي شوفيها...
_مممم...ما اجي عليها...
_تعاي على ابوية هم ميخالف...بس تعاي نتفاهم
مرتين رحت بدون فائدة ...لان مها وباسم موجودين..
اخر شي...من ردت اطلع صاحني
_ست نور...قبل ما طلعين ...بس شوفي هاي الذرعات..
شلون حسبتيها
اجيت يمه شفته كاتب انتظريني يم الدرج...
ضحكت...خنزر علية...
فعلا من طلعت انتظرته...
_شبيج فضيحة...هذا رقمي...حاولي ادكيلي مسكول ...
خلي نتفاهم ...مادنكدر هنا
_صوج منو
باوعلي بغضب ...ماراح تنسين
من رجعت ....بالليل ردت ادك...جنت مترددة
بعدين سجلت رقمه...بقيت نص ساعة ...
بين اخلي اصبعي على الاتصال وارجع ابطل
اخر شي دكيتله....
دك شوي وفصله....
رجع هو دك....
_هلووو...شلونك
_هلو...أيست تخابرين
_ليش فصلته...
_ما اريد اخسرج...خطية بعدج عقد
_ضحكت....لا كارتات موبايلي على بابا
_اووووف يابابا....شاعلني شعل
_لا عفية كلشي ولا تحجي على بابا
_تحبيه
_طبعا...يكفي تعبه علينا
_زين اذا رفض...وكالج رضاي لو هالزواج...شتختارين
سكتت...رضاه فوك كلشي
_زين ليش تلوميني...شنو الفرق...والدي هم تعب علينا...واني هم احبه...حتى لو كنت رجل مايخليني اوكف ضده...خاصة اني اعرف هو من خوفه علية
_لا حيدر اني مالمتك....ولا كتلك اوكف ضده...بدليل وافقت
اروح لهناك....بس ردت اشرحلك ماادري بابا طلب منك هالشي
_ميخالف...راح احاول مرة ثانية وثالثة...لحد مايقنع ابوج...يلا اجيب اهلي هالمرة

بعدها صار تواصلنا على التلفون...صح مانطول...
بس حاول يفهمني احجي وية ابوية بلكت يلين...
ومرات يدز مسجات باشعار حلوة...
بابا بقى مصمم على موقفه رغم ماحجى وياه محمد..
مرة وصلني محمد...واجى حيدر سلم عليه...
حجى وياه......الي عرفت راد منه يحجي وية الحجي...
وراح حيدر وسط ابو امجد هم ....
بقينا شهر على هالوضع...
اخر شي ابو امجد اقترح على حيدر حل وسط...
كاله اعتراض الحجي...انتو منطقة ريفية ...
اجر لك بمركز كربلاء....هم ترضي اهلك وترضي اهلها..
يوم رجعت للبيت....شفت سيارة ابو امجد بالباب مالنا...
من دخلت ...تلكتني زينب...
_لج تعاي بسرعة
_خير شكو شبيج....
_شو ماكلتي ..ماحجيتي
_باعي ثولة تعبانة ومالي خلك لاحد....لا تحجين الغاز
_يعني ماتدرين حيدر هنا.
_صدك والله
_هسة صارت كلها حيل....وفتحت عيونها وحلكها
_تحجين صدك...
_اي والله قبل ماتجين بشوي ...اجى وية ابو امجد
ظليت افتر...اطب واطلع...اريد اعرف شصار
_لا تظلين تحوصين...دكيتي رجل على هالولد
_نبع الحنان...ليش هيج صايرة وياي
_ماتعرفين مصلحتج...شبيه ابن خالج
_ماما...مجلبة بأبن خالي...وهو الولد مو يمه الموضوع
_مو هذا لاحس عقلج ....وماتشوفين زين
طلعوا...بابا دز على احمد...محمد اصلا جان موجود
وطبعا عمي الي مايفارق والدي...
اني بقيت بغرفتي ادعي ربي يسهلها...
قبل العشى دز بابا علية....
_بابا كدام اخوتج...اني ماعندي اعتراض على الولد...بالعكس عاجبني...بس من اسوي شي فالمصلحتج..
انتي ما متعلمة على العرب...هو أكلج امج تسوي...
شلون تردين ترحين هناك...
سكت...ورجع كمل ابو امجد اقترح شي....وقبل ما انطي جوابي راح اسالج لا اخر مرة...بعدها القرار قرارج...
يريد يأجر بمركز كربلاء...
_ادري ولد عمج واحد احسن من الثاني...ولد خالج...الا هالولد
حجى احمد...بابا خزره....الحجاية مهما تكون صعبة ...
تنكال للبنية كدام ابوها ...تريد هالشخص
اني سكتت....
_ها بابا...شنو رأيج
_بكيفك بابا....
_لا ...اذا علية ماريد ترحين بعيد عن عيني...بس الولد استقتل...وماريد تكولين ابوية وكف ضدي
_كربلا احسن من بغداد هسة...
_خلاص بابا
رجعت لغرفتي...اريد افرح واخاف...
فرحتي صارت ممزوجة بخوف لا يطلع شي ثاني..
وفعلا ...بابا اتصل على ابو امجد...وبلغه يكول لحيدر
...ابوه هالمرة اعترض ...
وبعد محاولات منه...وتقنيع..وافق على مضض
.....وللحكاية