#تراتيل القدر

مواقف حادة

#تراتيل القدر
همس ليل
البارت الثالث
داومت ثاني يوم...لكيت باسم رايح ذرعة مواد انشائية...وبس مها وحيدر كاعدين يسولفون..
بس دخلت سكتوا....سلمت وكعدت ورة ميزي
حيدر نطاني شغل ...كعدت اريد افهم منه شي ماكو
ماريد اسأله....كلت خلي يجي باسم اسال احسن..
شوي طلعت مها يم فريقها...
جنت مدنكة اكلب بالاوراق ..بلكت اكدر القط شي
حسيت احد وكف يم المكتب ...رفعت راسي
_تحتاجين افهمج شي
نرفزتني حجايته...لا ماكو داعي...
جر كرسي وكعد قريب مني....كعد يشرحلي شلون احسب...
انتبهت من يحجي بهدوء ويرك على الكلمة...
وكام رجع لمكانه...بدون ماينتظر جوابي....
اني هم بلشت اشتغل...وكفت بنقطة...بس ماتنازلت ورحت سألته..
دخل باسم وهو ديسلم...واني عبالك اجى الانقاذ ...
تلكيته بابتسامة عريضة...
انتبهت باسم فرح بسلامي وحيدر باوع ورجع دنك راسه...
خليته يستراح وسالته ...اجى شرحلي بس بقى يسولف
_باسم ...وين ذرعاتك...جان حيدر يحجي بنرفزة
_حيدر...شبيك خلي ارتاح
_صار ساعة من رجعت ماشبعت سوالف..
_لا والله هو الحجي وية ست نور ما ينشبع منه...كالها بشقة...
مع العلم هو جان يسال عن جماعات ويانة بالكلية
راح يغسل ....
_مو سألتج شتحتاجين ليش ما كلتي
_شرحتلي ماقصرت...وماردت اخرك اكثر واخذ من وقتك
_شتقصدين ...اذا مصورة اني ما احب انطي معلومة...انتي غلطانة...
جان كاعد بمكانه ويحجي بس بحدة
_استاذ حيدر ليش تفسر الامور على مزاجك
_هية ماتنفهم غير شكل...
طبعا كلش نرفزني اسلوبه ...بس حاولت اضبط اعصابي
_براحتك...ماكدر ابرر لكل واحد
فزيت لصوت القلم وهو يركعه على الميز ...ويطلع برة
_شو ماكو احد...دخلت مها
_ماعرف
_شبيج...وجهج مايكصه الطبر
_لج خبلني ...ماعرف شبيه...شخصيته غريبة عجيبة
_منو
_اكو غيره
_افتهمت...ههههه...
_ليش اضحكين...وبعدين تعاي ...شجنتوا تحجون الصبح ومن فتت سكتوا
_ماكو شي...جان يحجي عن اهله
_هو من كربلاء مو
_من الحسينية قريب كربلاء
_ها
_ليش تسالين...ترة لا عمره يناسبج ولا وضعه
_شو دائما ترددين هاي الحجاية ...شفتيني حبيته...شو اصلا اني ما اطيقه
_لمصلحتج حبي...هو اقل شي اكبر منج ب١٠ سنوات...واهله مايزوجو الا من اقاربهم
_هههه...وصلتيها للزواج ...كومي ولي من يمي
بالليل ظليت افكر بحجي مها ...ليش دائما تحذرني
...معقولة عمره ٣٢ سنة شو مامبين عليه..
اوي شعلي بيه...
مشت الايام وهو يحاول يكون بعيد صار الشغل بيني وبين باسم...الي جان يحاول يتقربلي...
لحد يوم باسم اخذ اجازة ل٣ ايام...وجان اكو شغل لازم
نسلمه ...وكل ما حاول وياه يبقى حتى نكمل ...
يتهرب ...لو يتحجج بشغل...لحد يوم طكت روحي
راد يطلع صحت وراه
_استاذ حيدر
_نعم...محتاحة شي
_اني ما محتاجة...بس هذا الشغل صارله ٣ ايام اركض وراك علموده
_جيبي اني اكمله واجيبه باجر
_هو شنو تكمله...غير اعرفه شراح تسوي
_ اني ماعندي وكت للعب
_اوكف...اوكف...يالعب...اشو انت مدري شلون تحجي
_شنو راح تعلميني شلون احجي
جان كل واحد بينا يحجي بحدة
_ماعرف اني اتفاهم وياك..لان اصلا انتة ماخذ موقف معادي مني...وماعرف السبب
_طبعا ما متعودة واحد يحجي وياج بدون ما يتلوك لج
_اني....رحمة الله والديك..توكل استاذ
جنت واكفة...كعدت واريده بس يطلع...
من طلع اطلقت العنان لدموعي...ماعرف ليش هيج يسوي
شوي حسيت واحد واكف فوك راسي...
لا راديا رفعت عيوني...شفته هو ...رجعت نزلتهن ماريده
يشوف دموعي ...او يحس بضعفي
سمعت شحطت الكرسي وهو يسحبه...كعد يمي
_امسحي دموعج ...ما جان قصدي...بس انتي مرات عندج تصرفات ترة الغير يفسرها غلط...اعرف نفسيتج نظيفة...
بس كوني حذرة
ماكدرت اجاوبه لان العبرة جانت خانكتني...
بعده ما كمل دخلت مها...اقاطع حجيكم...
_لا اني طالع ...كام وهو يحاجي مها...سلم وطلع
_شبيج ليش تبجين
_ماكو شي...عفتها وطلعت اغسل ...
بقى حجيه يدور براسي ...ليش شمسوية ...
جان ثاني يوم عطلة ....
والبيت حملة تنظيف عدنا...بيداء عادي تاخذ جهالها وتنهزم لبيت اهلها...الي هم بيت عمي
يظل الكراب براسي وبراس زينب...
التهيت بالتنظيف ...ومرات يخطر ابالي حجي حيدر...
اكول شجان يقصد من حجيه ...
_هابابا الله يساعدكم...
_هلا بنور عيني...اجيت بست ايده...
انطاني علاكة الحلويات ...مابطل من اني صغيرة لحد هذا العمر يجيبلي
_اي ليش لا واحنة ولد البطة السودة...جان محمد يحجي وهو داخل للهول
_على عنادك ...فلفل جنت اطلع لساني اعيبله
_شفت يابة...ماتحاجيها مو اني اكبر منها
_عود من تكبر صدك وتبطل تناكر اختك احاجيها
عافنا ومشى بابا...
_الا تاخذلك حجاية ...يلا ترتاح
_لج هاي عليمن ...
ركض وراي ...الكاع جانت زاهي ومي...اني هم ركضت...واثنينا تزحلكنا بالكاع....
زينب طكت ضحك واني هم...بس محمد ظل يدردم علينا
داومت بعد العطلة...شفت باسم جاي
وبعد السلام وردت اكعد يمهم حتة نشتغل
_بس دقيقة نور...قبل ماتجي مها احجي وياج...ونبدي نشتغل...
هية الغرفة بيها بعد بنات...بس مرات بعد ما نرتب شغلنا كل وحدة تروح وية فريقها او مجازات او تروح لغير غرقة
وهاي من المرات الي مابقى احد بس اني وباسم وحيدر..
من كال هيج باسم رفعت عيني لحيدر...
شفته باوع علينا بغضب ...ورجع نزل راسه
_تفضل استاذ باسم
_ماعرف شلون ابدي بس اريد اختصر ...لان ماريد اسبب لج مشكلة...
صراحة اني من ايام الكلية كلش عجبتيني...
بس هواي امور جانت ماتسمح...ومنوشفتج مرة ثانية...
كلت يجوز القدر كاتبها لي...
وحتى اختصر...اني اريد اتقدم لج ...واذا اكو تقبل منج
اشرحلج ظروفي ووضع اهلي...
طبعا يحجي واني حسيت وجهي اشتعل نار...مو اول مرة احد يجي يصارحني....
بس كل مرة ارفض من بداية الموضوع ...
والشخص المتقدم ما يهمني....بس هالمرة غير
اولا ...لان باسم كلش اعزه وهواي ساعدني..
بعدين...جانت صدمة مامتوقعة منه هالشي...
ولا خطر ابالي...باوعت لحيدر ...جان مسوي باله مشغول بالاوراق...
بس حسيته متوتر من حركة ايديه...وباسم صح صوته جان ناسي....
بس الي يدخل يفهم اكو موضوع خاص دينطرح...
_استاذ باسم ...انت اخ عزيز علية ...واحترمك كلش
بس صراحة مافكرت ولا خطر هالموضوع على بالي
_اخذي وقتج وفكري وردي الجواب
طبعا من كلت انتة اخ عزيز رده يفهم جوابي....
بس هو صعب الموضوع علية اكثر...انقطع الحديث بدخول بنية ويانة...
كام باسم من يمي...واني هم كمت ورحت وكفت يم ميز حيدر
_استاذ حيدر انطيني الذرعة اكملها
_تفضلي...موكتلج ....كال الحجاية بهمس اثناء ماينطيني الاوراق...
رجعت لمكاني واني اكلب بالاوراق بس بالي يم حجاية حيدر...
شيقصد ...قابل اني شجعت باسم...هذا صدك يحجي...
لو بس يريد حجة علية...ظليت افور بداخلي...
اشتغل واغلط وارجع اعيد لنهاية الدوام اني على هالحال
بيومها رجعت للبيت ...والطريق كله اباوع على الناس بالشارع وابالي مشغول...
بالعادي اكضي طريق الرجعة اباوع من الشباك واصنع قصص للاشخاص الي نمر من يمهم...
هيج اصور هذا هيج قصته ..وذاك هيج قصته...
وصلت للبيت ...ونفس الموال هم بيداء مسوية مشكلة
هاي البنية ماعرف شتريد...
امي تكول تغار ..لان انتي وزينب اداومون...لان بدت المدارس وتشوفنة نطلع الصبح تتخبل
_لا ماما...هاي نفسيتها هيج...حتى لو زينب كاعدة..هم جان خلقت مشكلة...هية تحب تراقب الناس ...عبالك نفسيتها مريضة ..مو مثل طبع عمي وامها...شكد طيبين ..
_اي نفس طبع خوالها...هيج يخلقون المشكلة من جوة الكاع..
_الله يساعدهم على نفسهم...انتي ليش اسكتين لها...حتى ريوك الجهال اشو انتي تسويه
_ماما لخاطر اخوج ...المهم ماتغثه وتظل تنك براسه..وهو عصبي
_هية تعودت احنة نتحمل كلشي منها...ولا فوكاها ماكو شي يصير بالبيت اذا ما تلكي ابيت عمي
اجى بابا ...سكتنا لان مانحجي شي كدامه ...مايحب سوالف فلان حجت وفلانة كالت
دخلت غرفتي بعد ماخلصت تنظيف ...واني افكر بحجي باسم...
وبنفس الوقت بنظرة حيدر وحجايته من انطاني الاوراق...
اوي واني ليش شايلة هم له...شيريد يفكر ويكول خلي يكول....مادام ماشية صح...
لو اكو حجاية علية جان ماتقدملي من الموظفين ...
بس هو عبالك يريد حجة حتة يكولي انتي غلطانة...
هم رجعنا نفكر هو شيريد....جنت احجي وية نفسي..
واني اتكلب بفراشي ماكدر انام...
هسة لازم ارجع خبر لباسم...وماعرف شلون اعتذر منه
....لو فاضتها بنفس الوقت...بس هو مانطاني مجال
ثاني يوم من داومت...باسم تلكاني وبعينه نظرة كلها امل...
وحيدر رد السلام وهو  مدنك على الاوراق حتة مارفع راسه...
التهينا بالشغل ...ومصار مجال ارجع خبر لباسم...
واني هم جنت جبانة هالمرة ...استحي افشله..
بقينا كم يوم الشغل مايخلص وحتة لو فضينا...فالغرفة ازدحام ..ما ممكن واحد يحجي...
حيدر خلال هالفترة يتجنبني...واني كمت ما سال باسم اذا وكفت بشغلة...
جان ابن عم بابا رئيس قسم بالشركة...هو رجال يطلع عمره بداية الخمسينات...بس فد شي مرتب وشخصية
وطبعا عوينجي وعنده صداقات ...
ومعروف بالشركة....والصراحة تقال اكو جانن يكيفن على غزله...جنت اروح اساله واكعد واشوف شلون يجن يتميعن يمه...
والمحترمة نفسها...هو يحترمها اكثر ويقدرها...
اني خارج الحسبة من باب هو عمي...والشركة تعرف بهالشي...
مرة جنت يمه كاعد يشرحلي ..وبعدين بدة يسولف على مرته وجهاله...ودخل حيدر...شو هذا حسيته تنرفز
وحجى باسلوب متعالي وية ابو امجد عمي...من طلع
_هذا خوش ولد ...ومهندس ممتاز..بس شوية حدي ...ماينجح اذا بقى بهالاسلوب
_منو قصدك عمو .حيدر...اي هو شوية عنده حدية...ودائما جاد
نزلت لكيت باسم وحيدر بس بالغرفة...حيل ارتبكت
عرفت باسم راح يجي يسألني.
_نور مارجعتيلي خبر...
_ماصار مجال استاذ باسم...شفت دائما الغرفة مزدحمة
جنت واكفة ورة الميز داخلي الاوراق...وهو وكف مقابيلي..
كعدت واني احاول ارتب حجيي حتة ماجرحه...
_استاذ باسم ...ماعرف شكولك ...اني كلش اعزك واحترمك...بس كأخ مو اكثر..
_ليش....مرتبطة ...لو اكو شي يمنع ثاني
_سؤالك مو محله داشوفه ...شنو مرتبطة
_لا تفهميني غلط...ماقصدتج ممكن حاجين عليج من اقاربج
_هاي امور شخصية ...وصدكني احسن بنية تمناك
_ليش مو انتي...
صح باسم خوش ولد...بس بداخلي مامقتنعة هو هذا الرجل المناسب لي...
_ استاذ ...كلشي قسمة ونصيب...وان شاء الله تنول الاحسن
_اشكرج
بس حسيته كلش ضاج وطلع ...
من طلع تركت الاوراق الي بيدي ...والي جنت اكلب بيهن بدون وعي واني احجي وياه...
نقهرت كلش عليه...لان حسيته تفاجأ من ردي...
رجعت ارتجيت ظهري على كرسي واني اباوع الميز كدامي بس فكري شارد...
رفعت عيني لحيدر ...ماعرف ليش...لكيته صافن علية
_هم كول صوجي....
جنت اريد افرغ قهري باحد...ونظرته استفزتني...
هز راسه...لوما لكة تقبل منج ماطرح موضوعه...
_يعني شنو ...كل واحد يجي يتقدم...لاكي مجال مني...لو شنو قصدك
_ماعرف....ورجع دنك على اوراقه..
جان بودي اشيل اي شي كدامي واضربه....مرات اكو بعض الناس ماتعرفين شلون تجاوبيهم...
مر باقي الاسبوع باسم ما داوم...واني اغلب الوكت يم عمي...حتى شغلي كمت اخذه فوك
وتعامل حيدر جاف كلش وياي...
لحد بداية الاسبوع الثاني...دخلت للغرفة ...ولكيت البنات تبارك لباسم...
مو نقهرت بس تفاجأت ....باسم عاقد مهر على بنت خاله
اجيت ابارك بس ارتبكت واني اباوع لنظرة حيدر...
جان بيها نوع الفرحة...او الشماتة...ماعرف ششتفسر
ومثل كل يوم اخذت شغلي وصعدت...
من نزلت جانت مها وحيدر كاعدين يسولفون ...بس شافوني سكتوا...
اني هم كعدت بمكاني والتهيت اصفط اوراق...بس بداخلي ضايجة...شعدهم سوية....
وليش من يشوفوني يسكتون....معقولة بينهم شي
استغفر الله ...شبيج واذا اكو انتي شعليج...
جنت احاجي نفسي وما منتبهة مها طلعت...بس اجى صوت حيدر فززني
_مو اكولج بعض تصرفاتج ماموزونة
رفعت راسي له واني متفاجاة من حجايته
_منو خلاك قيم عل تصرفاتي...وبعدين ما اعتقد سويت شي...اني من الصبح خارج الغرفة
_هية مو شغلة قيم لو لا....مرات التنبيه مايضر احد...
وهو لان طلعتي بهيج توقيت مو مناسب
_مو مناسب لشنو ...وضح
_لباسم...رجعتي انطيتي امل
_باوع استاذ حيدر....اني ماعرف شلون توازن الامور انتة...بس احب اكولك شي ...مالك حق تقييم تصرفي
وتفسره على مزاجك...
اذا انتة تفكيرك يصورلك امور فهاي مسالة تخصك....
لا تعكسها علية....
الحمد لله واثقة من نفسي ومن تصرفي...وماعندي شي
_لسان لو رشاش انطلق...الي يشوفج يكول سكوتية ماعدها صوت...مايدري لسانج احد منه ماكو
وبعدين وزني حجيج زين قبل ما تطلقين لسانج
لميت الاوراق لكدامي...وصفطتهن بعصبية...وشلت جنطي...استاذ الي يدك الباب يلكه الجواب..
رجعت للبيت واني اعصابي تفور...
حجيت لزينب...
_عجيب ليش هيج يسوي
_ماعرف...عبالك يريد يثبتلي اني خطأ
_وهو شعليه..
_هذا المخبلني...شعليه شو الدائرة مليانة...شمعنى مركز وياي
_وانتي هم مركزة وياه...من شوكت اديرين باله لليحجي...
صفنت على حجاية زينب....
وظلت ادور ابالي ...بعد مالي شغلة بيه واحاول اتجنبه...
اكيد كم شهر وتخلص الذرعات ويعوف الدائرة...بس هالفكرة حيل ازعجتني...
مشت الايام ...واكو توتر بفريقنا مبين...من اسلوب التعامل شكد ماحاولنا نبين عكس ذلك
لحد يوم بقينا اني ومها...جان حيدر مجاز وباسم اخذ اجازى زواج...
وهنا جانت المفاجأة من حجت مها....وللحكاية بقية